ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅନ୍ତର୍ଗତ ଭେଟେଶ୍ୱର ସେବା ସମବାୟ ସମିତି ଆନୁକୂଲ୍ୟରେ ଚଳିତ ବର୍ଷର ଖରିଫ ୨୦୨୦/୨୧ ଧାନ ମଣ୍ଡି ଭେଟେଶ୍ୱର ଠାରେ ଉଦଘାଟିତ ହୋଇଯାଇଅଛି।
ଉକ୍ତ ଉଦଘାଟନ୍ ଉତ୍ସବରେ ବାଣପୁର ଗୋଷ୍ଠୀ ଉନ୍ନୟନ ଅଧିକାରିଣୀ ଡ.ଶୁଭଶ୍ରୀ ତ୍ରିପାଠୀ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ଏହି ଅବସରରେ ସମିତିର ସଭାପତି ପ୍ରସନ୍ନ କୁମାର ପ୍ରଧାନଙ୍କ ଅଧ୍ୟକ୍ଷତାରେ ଏକ ସଭା ଅନୁଷ୍ଠିତ ହୋଇଥିଲା। ଏହି ସଭାରେ ସମିତିର ସମ୍ପାଦକ ଜ୍ୟୋତିରଞ୍ଜନ ରାଉତରାୟ ସମିତି ଏବଂ ଚାଷୀଙ୍କର ଧାନ କ୍ରୟ ସମ୍ପର୍କିତ ସମସ୍ତ ନୀତିନିୟମ ଏବଂ କୋଭିଡର ସମସ୍ତ ଗାଇଡଲାଇନ ସମ୍ପର୍କରେ ଚାଷୀଙ୍କୁ ଅବଗତ କରାଇଥିଲେ।
ଏହାସହିତ ଏହି ଉତ୍ସବରେ ସହକାରୀ ଯୋଗାଣ ଅଧିକାରୀ ତ୍ରିଲୋଚନ ସାହୁ, ଭେଟେଶ୍ୱର ଗ୍ରାମ ପଞ୍ଚାୟତ ସରପଞ୍ଚ ଜିତେନ୍ଦ୍ର କୁମାର ଭୋଳ, ସମିତି ସଭ୍ୟ ଶେଖର କୁମାର ସାହୁ ଚାଷୀମାନଙ୍କୁ ସରକାରଙ୍କ ଧାନ କ୍ରୟ ସମ୍ପର୍କରେ ସୂଚନା ପ୍ରଦାନ କରିଥିଲେ।
ସୂଚନା ଯୋଗ୍ୟ ଯେ, ଆଜି ପ୍ରଥମ ଦିନରେ ୧୩ ଜଣ ଚାଷୀଙ୍କ ଠାରୁ ପାଖାପାଖି ୫୦୦ କୁଇଣ୍ଟାଲ ଧାନ କ୍ରୟ କରାଯାଇଥିଲା। ଏହି ସବୁ ଧାନକୁ ଜୟ ଜଗନ୍ନାଥ ରାଇସ୍ ମିଲର କ୍ରୟ କରିଥିଲା।