ବାଣପୁର: ଆଜି ଖୋର୍ଦ୍ଧା ଜିଲ୍ଲା ବାଣପୁର ଏନଏସି ରେ ନୂତନ ଭାବେ ଯୋଗଦେଇଥିବା କାର୍ଯ୍ୟନିର୍ବାହୀ ଅଧିକାରୀ ନିଗମାନନ୍ଦ ନନ୍ଦଙ୍କୁ ଭେଟି ସ୍ୱାଗତ ଜଣାଇଥିଲେ ବାଣପୁର ଏନଏସି ଅଞ୍ଚଳର ଯୁବ ଆଇନଜୀବୀ ତଥା ସୂଚନା ଅଧିକାର କର୍ମୀ ସୀତାରାମ ଅଗ୍ରୱାଲ। ଶ୍ରୀ ଅଗ୍ରୱାଲ ଏହି ଅବସରରେ ପୁର୍ବରୁ ବାଣପୁର ଏନଏସିରେ ହୋଇଥିବା ବିଭିନ୍ନ ଅନିୟମିତତା, ଅବ୍ୟବସ୍ଥା ଏବଂ ଅଭିଯୋଗ ବିଷୟରେ ନୂତନ କାର୍ଯ୍ୟନିର୍ବାହୀ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ।
ତତସହିତ ଦୀର୍ଘଦିନ ଧରି ବାଣପୁର ଏନଏସି ରେ ରାସ୍ତାଘାଟ, ଷ୍ଟ୍ରିଟ ଲାଇଟ, ଡ୍ରେନେଜ, ଟ୍ରାଫିକ, ପରିମଳ, ପାର୍କିଙ୍ଗ ସମସ୍ୟା ଆଦି ଲାଗି ରହିଥିବାବେଳେ ତାହାର ପ୍ରତିକାର ଦିଗରେ ପଦକ୍ଷେପ ଗ୍ରହଣ କରିବା ପାଇଁ ନୂତନ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ନନ୍ଦଙ୍କୁ ଅନୁରୋଧ କରିଥିଲେ ଯୁବ ଆଇନଜୀବୀ ଶ୍ରୀ ଅଗ୍ରୱାଲ।
ପୁର୍ବତନ କାର୍ଯ୍ୟନିର୍ବାହୀ ଅଧିକାରିଣୀ ମାନ୍ୟବର ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶକୁ ଅବମାନନା କରିବା ସହ ସୂଚନା ଅଧିକାର ଆଇନ କୁ ମଧ୍ୟ ଖୋଲାଖୋଲି ଉଲଂଘନ କରି ଆବେଦନକାରୀଙ୍କୁ ତଥ୍ୟ ପ୍ରଦାନ କରୁନଥିଲେ। ଯାହାଫଳରେ ସେ ଏକାଧିକ ମାମଲାରେ ଛନ୍ଦି ହୋଇପଡ଼ିଥିଲେ। ଏପରିକି ବାଣପୁର ଏନଏସି ସମ୍ପୂର୍ଣ୍ଣ ସ୍ଥାଣୁ ପାଲଟିଯାଇଥିଲା।
ତେବେ ନୂତନ କାର୍ଯ୍ୟନିର୍ବାହୀ ଅଧିକାରୀ ନିଶ୍ଚିତ ଭାବେ ଉକ୍ତ ସମସ୍ତ ବିଷୟପ୍ରତି ଧ୍ୟାନ ଦେବାସହ ନାଗରିକ ମାନଙ୍କ ଅଭିଯୋଗ ଏବଂ ଏନଏସିର ବିକାଶକୁ ପ୍ରାଧାନ୍ୟ ଦେବେବୋଲି ପ୍ରତିଶୃତି ଦେଇଥିଲେ।
