ଚିଲିକା: ଚିଲିକା ନିର୍ବାଚନ ମଣ୍ଡଳୀର ଅନ୍ତର୍ଗତ କୁମାଣ୍ଡଳ ଗ୍ରା:ପ ନିକଟସ୍ଥ ହରିକୁଣ୍ଡବରଡି ଗ୍ରାମର ଆରାଧ୍ୟା ଦେବୀ ମା’ ସିଦ୍ଧାମ୍ବରୀଙ୍କ ପୀଠରେ ଅନୁଷ୍ଠିତ ହେଉଥିବା ବିଶ୍ଵଶାନ୍ତି ଯଜ୍ଞ ଓ ତୋରସିଂହ ଗ୍ରା:ପର ତୋରସିଂହ ଗ୍ରାମର ଆରାଧ୍ୟା ଦେବୀ ମା’ ଶୁଳିଆଙ୍କ ପୀଠରେ ଅନୁଷ୍ଠିତ ହେଉଥିବା ଯଜ୍ଞରେ ଆଜି ଓଡ଼ିଶା ସରକାରଙ୍କ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚ଼ନ୍ଦନ ଯୋଗଦେଇ ମା’ଙ୍କ ଆଶୀର୍ବାଦ ଭିକ୍ଷା କରିବା ସହ ଅଞ୍ଚଳବାସୀଙ୍କ ସୁଖ, ଶାନ୍ତି ଓ ପ୍ରଗତି ନିମନ୍ତେ ପ୍ରାର୍ଥନା କରିଥିଲେ। ଏହାପରେ ବାଲୁଗାଁ ସ୍ଥିତ ଭେଙ୍କଟେଶ୍ବର ବିଦ୍ୟାଳୟର ୧୫ ତମ ବାର୍ଷିକ ଉତ୍ସବ ସମାରୋହ ଓ ଡ଼ିଏଭି ଗୁରୁକୁଳର ବାର୍ଷିକ ଉତ୍ସବ ସମାରୋହରେ ମୁଖ୍ୟଅତିଥି ଭାବେ ମନ୍ତ୍ରୀ ଶ୍ରୀ ହରିଚ଼ନ୍ଦନ ଯୋଗଦେଇ ଉପସ୍ଥିତ ଛାତ୍ରଛାତ୍ରୀ ଓ ଅଭିଭାବକ ମାନଙ୍କୁ ସମ୍ବୋଧିତ କରିଥିଲେ। ଶିକ୍ଷାକୁ ଜୀବନର ଏକ ସୁନ୍ଦର ଅଙ୍ଗ ଭାବରେ ପ୍ରତିଫଳିତ କରିବାକୁ ଭାରତର ଯଶସ୍ବୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଛାତ୍ରଛାତ୍ରୀମାନଙ୍କୁ ଆହ୍ବାନ ଦେବାର ପ୍ରକ୍ରିୟାକୁ ଓହ୍ଲାଇ ଆସିଛନ୍ତି। ଛାତ୍ରଛାତ୍ରୀମାନେ ପରୀକ୍ଷା ଦେବା,ପାଠ ପଢ଼ିବା ଓ ପାଠ ପଢ଼ିବାର ଶୈଳୀ ସଜାଡିବାକୁ ମାନ୍ୟବର ପ୍ରଧାନମନ୍ତ୍ରୀ ଯେଉଁ ପ୍ରକ୍ରିୟା ଆରମ୍ଭ କରିଛନ୍ତି,ତାହା ଶିକ୍ଷା ବ୍ୟବସ୍ଥାକୁ ରୁଦ୍ଧିମନ୍ତ କରିବ।
ଛାତ୍ରଛାତ୍ରୀ ମାନେ ଶୃଙ୍ଖଳାଗତ ଭାବେ ନିଷ୍ଠାର ଶିକ୍ଷା ଅଧ୍ୟୟନ କରି ପ୍ରତିଭାର ବିକାଶ ସହ “ବିକଶିତ ଓଡ଼ିଶା” ଓ “ବିକଶିତ ଭାରତ” ଗଠନରେ ସହଭାଗିତା ହୁଅନ୍ତୁ ବୋଲି ଛାତ୍ରଛାତ୍ରୀ ମାନଙ୍କୁ ମାନ୍ୟବର ମନ୍ତ୍ରୀ ଶ୍ରୀ ହରିଚ଼ନ୍ଦନ ପରାମର୍ଶ ଦେଇଥିଲେ। ଏହି ଅବସରରେ ବିଭିନ୍ନ ପ୍ରତିଯୋଗିତାରେ ଉତ୍କର୍ଷତା ହାସଲ କରିଥିବା ଛାତ୍ରଛାତ୍ରୀ ମାନଙ୍କୁ ମନ୍ତ୍ରୀ ଶ୍ରୀ ହରିଚ଼ନ୍ଦନ ପୁରସ୍କୃତ କରିଥିଲେ।
ଏହି ସମାରୋହରେ ନାଚୁଣୀ ମହାବିଦ୍ୟାଳୟର ଅଧ୍ୟକ୍ଷ ରାଜକିଶୋର ସାହୁ, ବାଣପୁର ବ୍ଲକ ଅଧ୍ୟକ୍ଷ ଅମରେନ୍ଦ୍ର ରଣସିଂହ,ଭେଟେଶ୍ବର ଗ୍ରା:ପ ର ସରପଞ୍ଚ ସାବିତ୍ରୀ ଭୋଳ, ପୂର୍ବତନ ସରପଞ୍ଚ ଜିତେନ୍ଦ୍ର କୁମାର ଭୋଳ, ସମାଜସେବୀ ଦୁଷ୍ମନ୍ତ ହରିଚନ୍ଦନ, ଭେଙ୍କଟେଶ୍ବର ବିଦ୍ୟାଳୟର ଅଧ୍ୟକ୍ଷ ରଞ୍ଜିତ କୁମାର ପ୍ରଧାନ, ସମ୍ପାଦକ ସସ୍ମିତା ପ୍ରଧାନ, ପ୍ରିନ୍ସିପାଲ୍ ରାମଚ଼ନ୍ଦ୍ର ଶାସମଲଙ୍କ ସମେତ ବହୁ ବିଶିଷ୍ଟ ବ୍ୟକ୍ତିବିଶେଷ ମାନେ ଉପସ୍ଥିତ ଥିଲେ ଏବଂ ଡିଏଭି ଗୁରୁକୁଳର ବାର୍ଷିକ ଉତ୍ସବ ସମାରୋହ ଅନ୍ୟତମ ଅତିଥିଭାବେ ଗୋଦାବରୀଶ ମହାବିଦ୍ୟାଳୟର ଅବସରପ୍ରାପ୍ତ ଅଧ୍ୟକ୍ଷ ବିଜୟ କୁମାର ନନ୍ଦଙ୍କ ସମେତ ଅନ୍ୟ ବିଶିଷ୍ଟ ବ୍ୟକ୍ତିବିଶେଷ ମାନେ ଉପସ୍ଥିତ ଥିଲେ।
