ବାଲୁଗାଁ: ବାଲୁଗାଁ ଗୋପବନ୍ଧୁ ନଗରସ୍ଥିତ ଶ୍ରୀଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ରରେ ଆଜି ଶ୍ରୀଅରବିନ୍ଦଙ୍କ ସିଦ୍ଧିଦିବସ ଅବସରରେ ବାର୍ଷିକ ପ୍ରକଳ୍ପ ଭିତ୍ତିକ ବିଜ୍ଞାନ, ସାହିତ୍ୟ, ଇତିହାସ, ଭୂଗୋଳ, ଚିତ୍ରାଙ୍କନ, ହସ୍ତ କର୍ମ ପ୍ରଦର୍ଶନୀ ଆୟୋଜିତ ହୋଇଯାଇଅଛି। ଶିକ୍ଷାକେନ୍ଦ୍ର ପରିଚାଳନା କମିଟିର ସଭାପତି ଅଧ୍ୟାପକ ରମାକାନ୍ତ ନନ୍ଦଙ୍କ ସଭାପତିତ୍ବ ରେ ଅନୁଷ୍ଠିତ ଏକ ସଭାରେ ବରିଷ୍ଠ ଶିକ୍ଷକ ସର୍ବେଶ୍ଵର ମହାରଣା ଅତିଥି ପରିଚୟ ଓ ସ୍ବାଗତ ଭାଷଣ ଦେଇଥିଲେ।
ଏହି ଉତ୍ସବରେ ଗୋଦାବରୀଶ ମହାବିଦ୍ୟାଳୟର ପ୍ରାକ୍ତନ ଅଧ୍ୟକ୍ଷ ପ୍ରଫେସର ବିଜୟ କୁମାର ନନ୍ଦ ମୁଖ୍ୟ ଅତିଥି, ଖୋର୍ଦ୍ଧା ଜିଲ୍ଲା ଶ୍ରୀଅରବିନ୍ଦ ପାଠଚକ୍ର ସଂଗଠନର ଆବାହକ ସୁରେନ୍ଦ୍ର ନାଥ ଜେନା ସମ୍ମାନିତ ଅତିଥି ଭାବେ ଯୋଗଦେଇ ଛାତ୍ର ଛାତ୍ରୀମାନଙ୍କୁ ଉଦବୋଧନ ଦେଇଥିଲେ। ସମ୍ମାନିତ ଅତିଥି ଶ୍ରୀ ଜେନା ସିଦ୍ଧିଦିବସ ସମ୍ପର୍କ ରେ ବିଷଦ୍ ଭାବେ ଆଲୋଚନା କରି କହିଥିଲେ ଯେ “ଦୀର୍ଘ ୯୯ ବର୍ଷ ତଳେ ୧୯୨୬ ମସିହା ନଭେମ୍ବର ମାସ ୨୬ ତାରିଖରେ ଶ୍ରୀଅରବିନ୍ଦ ଅଧିମାନସ ଚେତନାର ସିଦ୍ଧି ଲାଭ କରିଥିଲେ। ପାର୍ଥିବ ଭୂମିରେ ଶ୍ରୀକୃଷ୍ଣଙ୍କ ଚେତନାର ଅବତରଣ କରାଇ ତାଙ୍କ ଇପ୍ସିତ ଅତିମାନସ ରୂପାନ୍ତର ନିମିତ୍ତ ପଥ ଉନ୍ମିଳିତ କରିଥିଲେ। ଛାତ୍ର ଛାତ୍ରୀମାନେ ତାଙ୍କ ନିର୍ଦ୍ଦେଶିତ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ରରେ ଅଧ୍ୟୟନ କରି ନିଜକୁ ଭାଗ୍ୟବାନ ମନେକରିବା ସହ ତାଙ୍କ ପ୍ରଦର୍ଶିତ ମାର୍ଗ ଅନୁସରଣ କଲେ ପୂର୍ଣ୍ଣାଙ୍ଗ ମନୁଷ୍ଯ ଟିଏ ହୋଇ ପାରିବ”।
ମୁଖ୍ୟଅତିଥି ପ୍ରଫେସର ନନ୍ଦ ତାଙ୍କର ବକ୍ତବ୍ୟରେ ପ୍ରକାଶ କରିଥିଲେ ଯେ, “ବିଜ୍ଞାନ ଓ ଆଧ୍ୟାତ୍ମିକତା ପରସ୍ପର ସହିତ ଜଡିତ। ପ୍ରତ୍ୟେକ କାର୍ଯ୍ୟରେ ସିଦ୍ଧି ଲାଭ ପାଇଁ ନିରବଛିନ୍ନ ପ୍ରୟାସର ଆବଶ୍ୟକତା ରହିଛି। ପାଠପଢା ସହିତ ପରିବେଶ ସୁରକ୍ଷା ପାଇଁ ଆମ ସମସ୍ତଙ୍କର କର୍ତ୍ତବ୍ୟ ରହିଛି। ନିଜେ ସୁରକ୍ଷିତ ରହିବା ସହିତ ଅନ୍ୟ ମାନଙ୍କ ସୁରକ୍ଷାର ଭାର ବହନ କରିବା ଭବିଷ୍ୟତ ପିଢିର ଛାତ୍ର ଛାତ୍ରୀ ମାନେ ନେବା ଉଚିତ”।
ଶିକ୍ଷାକେନ୍ଦ୍ରର ଉପସଭାପତି ପ୍ରକାଶ କୁମାର ମହାପାତ୍ର ମତବ୍ୟକ୍ତ କରିଥିଲେ ଯେ “ପରିଷ୍କାର ପରିଚ୍ଛନ୍ନତା ଓ ଶୃଙ୍ଖଳା ମନୁଷ୍ଯର ରୂପାନ୍ତର ନିମିତ୍ତ ଏକାନ୍ତ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହେବା ଦରକାର”। ଏହାପରେ ମୁଖ୍ୟଅତିଥି ପ୍ରଫେସର ନନ୍ଦ ପ୍ରଦର୍ଶନୀ ଉଦ୍ଘାଟନ କରି ୧୨୫ରୁ ଉର୍ଦ୍ଧ୍ବ ପ୍ରକଳ୍ପ ଦେଖି ଆନନ୍ଦ ଅନୁଭବ କରିବା ସହିତ ପିଲାମାନଙ୍କୁ ଉନ୍ନତ ଶୈକ୍ଷିକ ଅଗ୍ରଗତି ପାଇଁ ପରାମର୍ଶ ଦେଇଥିଲେ।
ଏବର୍ଷ ପ୍ରଦର୍ଶନୀର ଶିର୍ଷକ ଥିଲା LEARNING BY DOING ବାଲୁଗାଁର CRCC ପ୍ରଶାନ୍ତ କୁମାର ସାହୁ ଯୋଗଦେଇ ପିଲାମାନଙ୍କ ପ୍ରଦର୍ଶିତ ପ୍ରକଳ୍ପ ଗୁଡିକୁ ଭୂୟସୀ ପ୍ରଶଂସା କରିଥିଲେ। ଶିକ୍ଷାକେନ୍ଦ୍ରର ଅଧ୍ୟକ୍ଷ ପ୍ରଦୀପ କୁମାର ମହାପାତ୍ର, ଶିକ୍ଷକ ଦିବ୍ୟ ରଞ୍ଜନ ସ୍ବାଇଁ, ରଶ୍ମିତା ସାହୁ, ମଞ୍ଜୁଶ୍ରୀ ସାମଲ, ରଶ୍ମିତା ମହାରଣା, ଅନି ବିଶ୍ବାଳ, ଇତିଶ୍ରୀ ବାରିକ, ଶୁଭଶ୍ରୀ ସାହୁ, ସଦାଶିବ ସେନାପତି, ରାମଚନ୍ଦ୍ର ପ୍ରଧାନ, ପଦ୍ମାଳୟା ଜେନା, ପରିଚାଳନା କମିଟିର ସଂପାଦକ ଡକ୍ଟର କୈଳାସ ମହାରଣା ଓ ସମସ୍ତ ଅଭିଭାବକ ବୃନ୍ଦ ସହଯୋଗ କରିଥିଲେ।
