ସୀତାରାମ ଅଗ୍ରୱାଲ
ଚିଲିକା: ଖୋର୍ଦ୍ଧା ଜିଲ୍ଲା ବାଲୁଗାଁ ଏବଂ ବାଣପୁର ଅଞ୍ଚଳରେ ଗୋରୁ ଚାଲାଣ ବୃଦ୍ଧିକୁ ନେଇ ବଜରଙ୍ଗ ଦଳ, ଚିଲିକା ପ୍ରଖଣ୍ଡ ଚିନ୍ତା ପ୍ରକଟ କରିଛି। ଗୋରୁଙ୍କ ସୁରକ୍ଷା ପାଇଁ ବଜରଙ୍ଗ ଦଳ ଆଜି ବାଲୁଗାଁ ଏସଡିପିଓ ମନସ ରଞ୍ଜନ ବାରିକ ଏବଂ ବାଲୁଗାଁ ଆଇଆଇସି ରମାକାନ୍ତ ମାହାଲିକଙ୍କୁ ଏକ ଦାବି ପତ୍ର ପ୍ରଦାନ କରିଛନ୍ତି।
ହିନ୍ଦୁ ସଂସ୍କୃତି ହେଉଛି ବିଶ୍ଵର ସର୍ବ ପୁରାତନ ସଂସ୍କୃତି। ହିନ୍ଦୁମାନେ ଗାଈଙ୍କୁ ଦେବତା ରୂପେ ପୂଜା କରନ୍ତି। ତାଙ୍କ ଶରୀରରେ ୩୩ କୋଟି ଦେବତା ବାସ କରନ୍ତି ବୋଲି ବିଶ୍ଵାସ କରାଯାଏ। ଗାଈଙ୍କଠାରୁ ମନୁଷ୍ୟ ସମାଜ ସବୁକିଛି ପାଇଥାଏ। ମନୁଷ୍ୟର ଦୈନଦିନ ଜୀବନରେ ଗାଈର କ୍ଷୀରଠାରୁ ଆରମ୍ଭ କରି ଗୋବର ପର୍ଯ୍ୟନ୍ତ ସବୁ ଜିନିଷ କାମରେ ଆସିଥାଏ।
ଏଇ ସଂସାରରେ ଗାଈ ଏମିତି ଏକ ଜନ୍ତୁ, ଯିଏ ନିଶ୍ଵାସ ପ୍ରଶ୍ଵାସରେ ଅମ୍ଳଜାନ ଗ୍ରହଣ କରିଥାଏ ଏବଂ ଅମ୍ଳଜାନ ମଧ୍ୟ ତ୍ୟାଗ କରିଥାଏ। ଗାଈର ମୁତ୍ରରେ ଏକ ଔଷଧୀୟ ଗୁଣ ଥାଏ, ଯାହା କର୍କଟ ପରି ମାରାତ୍ମକ ରୋଗ ଦାୟୁରୁ ଲୋକଙ୍କୁ ରକ୍ଷା କରାଯାଇପାରେ ବୋଲି ମଧ୍ୟ ଦାବି କରାଯାଏ।
ହେଲେ ଏହି ଅଞ୍ଚଳରେ ଗୋରୁ ଚାଲାଣ କରାଯାଇ ପଶ୍ଚିମବଙ୍ଗ ଦେଇ ବଙ୍ଗଳାଦେଶକୁ ଯାଉଥିବା ବଜରଙ୍ଗ ଦଳ ପୋଲିସ ନିକଟରେ ଅଭିଯୋଗ କରିଛି।
ସେମାନଙ୍କ ଅଭିଯୋଗ ଅନୁଯାୟୀ, ବହୁମାତ୍ରାରେ ବାଣପୁର ଏବଂ ବାଲୁଗାଁ ଅଞ୍ଚଳରେ ବେଆଇନ ଗୋରୁ ଚାଲାଣ ହୋଇ ବଙ୍ଗଳାଦେଶକୁ ଯାଉଛି। ଯେତେବେଳେ ସେମାନଙ୍କର କାର୍ଯ୍ଯକର୍ତ୍ତା ଖବର ପାଇ ବେଆଇନ ଚାଲାଣ ଗାଡ଼ିକୁ ଅଟକାଇବାକୁ ଚେଷ୍ଟା କରନ୍ତି, ସେମାନେ ଗାଡ଼ି ଛାଡି ଚାଲିଯା’ନ୍ତି। ବେଳେବେଳେ ଗୋରୁ ଚାଲାଣକାରୀମାନେ ମଧ୍ୟ ଧାରୁଆ ଆସ୍ତ୍ରରେ ଆକ୍ରମଣ କରୁଛନ୍ତି ବୋଲି ସେମାନେ ଅଭିଯୋଗ କରିଛନ୍ତି। ଗତ ୨୪ ତାରିଖ ରାତି ୧.୨୨ ମିନିଟରେ କିଛି ଦୁର୍ବୃତ୍ତ ଗୋପୀନାଥପୁର ଛକ ନିକଟରେ ବୁଲୁଥିବା ଗୋରୁଙ୍କୁ ଚାଲାଣ କରିବା ଲାଗି ପ୍ରୟାସ କରୁଥିଲେ। ହେଲେ କିଛି ସ୍ଥାନୀୟ ଲୋକ ଏହା ଜାଣି ପାରି ଦୁର୍ବୃତ୍ତଙ୍କ ଗାଡ଼ି ଉପରକୁ ପଥର ଫିଙ୍ଗିଥିଲେ। ଯାହାଫଳରେ ସେମାନେ ଘଟଣାସ୍ଥଳରୁ ଦୌଡିପଳାଇ ଯାଇଥିଲେ। ଏସବୁ ଦୃଶ୍ୟ ଏକ ସିସିଟିଭି କ୍ୟାମେରାରେ କଏଦ୍ ହୋଇଥିବା ସଂଗଠନ ପ୍ରକାଶ କରିଛି।
ତେବେ ଏହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଉଥିବା ବେଳେ ଏଭଳି ବେଆଇନ ଚାଲାଣ କରୁଥିବା ଲୋକଙ୍କ ଉପରେ କଡା କାର୍ଯ୍ୟାନୁଷ୍ଠାନ ପାଇଁ ପୋଲିସ ନିକଟରେ ନିବେଦନ କରିଛି ବଜରଙ୍ଗ ଦଳ।
ଉଲ୍ଲେଖ ଯୋଗ୍ୟ ଯେ, ଆଜି ବାଲୁଗାଁ ଏସଡିପିଓ ଏବଂ ବାଲୁଗାଁ ଆଇଆଇସିଙ୍କ ନିକଟରେ ସଂଗଠନ ଦାବି ପତ୍ର ପ୍ରଦାନ କରିଥିବା ବେଳେ ଆସନ୍ତାକାଲି ବାଣପୁର ଆଇଆଇସି ସଞ୍ଜୟ କୁମାର ପଟ୍ଟନାୟକଙ୍କୁ ଦାବି ପତ୍ର ପ୍ରଦାନ କରାଯିବ ବୋଲି ଜଣାପଡିଛି।
