ସୀତାରାମ ଅଗ୍ରୱାଲ
ବାଣପୁର: ବାଣପୁରର ଆରାଧ୍ୟ ଠାକୁର ପଶ୍ଚିମାଭିମୁଖୀ ମହାଦେବ ପୀଠ ଶ୍ରୀ ଶ୍ରୀ ଶ୍ରୀ ଗୁପ୍ତେଶ୍ୱର ଦେବଙ୍କ ପୀଠରେ ଚାରିଦିନ ବ୍ୟାପି ଚାଲିଥିବା ବିଶ୍ୱାଶାନ୍ତି ମହାଯଂଜ୍ଞ ଆଜି ପୂର୍ଣ୍ଣାହୁତି ଏବଂ ତେଇଶି ଦେବାଦେବୀଙ୍କ ମେଳଣ ପରେ ସମାପନ ହୋଇଯାଇଛି। ଚଳିତ ବର୍ଷ ମଙ୍ଗଳବାରଠାରୁ ଶୁକ୍ରବାର ପର୍ଯ୍ୟନ୍ତ ଚାଲିଥିବା ଯଂଜ୍ଞ ଓ ମେଳଣ ପର୍ବ ଚତୁର୍ଦ୍ଧଶ ବର୍ଷରେ ପଦାର୍ପଣ କରିଥିବା ବେଳେ ଗାଲୁଆ ଗ୍ରାମବାସୀଙ୍କର ପ୍ରତ୍ୟେକ୍ଷ ତତ୍ୱାବଧାନରେ ମହାସମାରୋହରେ ଅନୁଷ୍ଠିତ ହୋଇଯାଇଛି।
ପୂଜାବିଧି ପୂର୍ବକ ମଙ୍ଗଳବାର ଅଙ୍କୁରା ରୋପଣ, ବୁଧବାର ଜଳଯାତ୍ରା, ସୂର୍ଯ୍ୟପୂଜା ଓ ଆହୁତି ଆରମ୍ଭ କରାଯାଇ ଗୁରୁବାର ପୂଜା ଓ ହୋମାଦି କାର୍ଯ୍ୟକ୍ରମ ପରେ ଶୁକ୍ରବାର ପୂର୍ଣ୍ଣାହୁତି ଓ ଦେବଦେବୀଙ୍କ ମେଳଣ ପର୍ବ ସମାହିତ ହୋଇଥିଲା। ବାବା ଗୁପ୍ତେଶ୍ୱରଙ୍କ ଯଂଜ୍ଞ କମିଟି ସଭାପତି ମନମୋହନ ପ୍ରଧାନ, ସମ୍ପାଦକ ପ୍ରଫୁଲ୍ଲ ହରିଚନ୍ଦନ, ବ୍ରଜକିଶୋର ଭୋପା ସ୍ଥାନୀୟ ତହସିଲଦାର କୁଞ୍ଜବିହାରୀ ବଡ଼ଜେନା ଓ ବାଣପୁର ଆଇଆଇସି ଜୟକୃଷ୍ଣ ପରିଡାଙ୍କ ନିମନ୍ତ୍ରଣ ରକ୍ଷା କରି ବିଭିନ୍ନ ଗ୍ରାମରୁ ବାଇଶି ଦେବାଦେବୀଙ୍କ ଯଂଜ୍ଞ ସ୍ଥଳକୁ ଆଗମନ ଶ୍ରଦ୍ଧାଳୁଙ୍କ ମନରେ ଶିହରଣ ଜାଗ୍ରତ ହୋଇଥିଲା।
ଖଣତ ଗ୍ରାମରୁ ଶ୍ରୀ ଶ୍ରୀ ଶ୍ରୀ ପାଦୁକାଇ ଦେବୀ, ଭୂଇଁୟାଣି ଦେବୀ, ଗୋପୀନାଥ ପୁରର ବାଟମଙ୍ଗଳା, ବିଂଝଳାରୁ ଉତ୍ତରାୟଣୀ ଦେବୀ ଏବଂ କପିଳେଶ୍ୱର ଦେବ, ସୋମନାଥ ଦେବଙ୍କ ସମେତ ଅନ୍ୟ ୧୮ ଶମ୍ଭୁଙ୍କ ପବିତ୍ର ଯଂଜ୍ଞ ସ୍ଥାନକୁ ଆଗମନ ହୋଇଥିଲା।
ସମସ୍ତ ଦେବଦେବୀଙ୍କୁ ନୂତନ ବସ୍ତ୍ର, ନୂତନ ଥାଳି, ଗୁଆ, ଚନ୍ଦନରେ ଆଭୂଷିତ କରାଯାଇ ଯଂଜ୍ଞ ସ୍ଥାନରେ ଉପବିଶନ କରାଯାଇଥିଲା। ଯଂଜ୍ଞ ପୂର୍ଣ୍ଣାହୁତି ପରେ ଗୋଧୂଳି ଲଗ୍ନରେ ସମସ୍ତ ଦେବାଦେବୀ ମେଳଣ ପଡିଆରେ ଏକାଠି ହୋଇଥିଲେ।
ହଜାର ହଜାର ଶ୍ରଦ୍ଧାଳୁ ମାନଙ୍କର ହରିବୋଲ, ହୁଳହୁଳି, ଘଣ୍ଟ, ଘଣ୍ଟା, ବାଦ୍ୟ ଓ କାହାଳିରେ ପ୍ରଭୁ ଗୁପ୍ତେଶ୍ୱର ପୀଠ ଉଛୁଳି ପଡୁଥିଲା। ଗାଲୁଆ ଗ୍ରାମବାସୀଙ୍କ ତରଫରୁ ଦର୍ଶନ କରିବାକୁ ଆସୁଥିବା ସମସ୍ତ ଶ୍ରଦ୍ଧାଳୁ ମାନଙ୍କ ନିମନ୍ତେ ଚାରିଦିନ ବ୍ୟାପି ପ୍ରସାଦ ସେବନର ବନ୍ଦୋବ୍ୟସ୍ତ କରାଯାଇଥିଲା। ଗ୍ରାମର ଯୁବକ ମାନେ ପ୍ରଭୁଙ୍କ ସେବାରେ ନିୟୋଜିତ କାର୍ଯ୍ୟରେ ସହଯୋଗ କରିଥିବାରୁ ନିଜକୁ ଧନ୍ୟ ମନେ କରିଥିଲେ।