ଚିଲିକା: ଚିଲିକା ନିର୍ବାଚନ ମଣ୍ଡଳୀ ଅନ୍ତର୍ଗତ ଜନଜାତି ଅଧ୍ୟୁଷିତ ଅଞ୍ଚଳ ନିଳାଦ୍ରୀ ପ୍ରସାଦ ପଞ୍ଚାୟତରେ ଜରୁରୀକାଳୀନ ସ୍ୱାସ୍ଥ୍ୟସେବାକୁ ସୁଦୃଢ଼ କରିବା ସହ ଲୋକଙ୍କୁ ତ୍ୱରିତ ସ୍ୱାସ୍ଥ୍ୟସେବା ଯୋଗାଇ ଦେବା ପାଇଁ ଏଲ.ଆଇ.ସି କାର୍ଡ ସର୍ଭିସ୍ ଲିମିଟେଡ଼ ଭୁବନେଶ୍ଵର ପକ୍ଷରୁ ଏକ ଅତ୍ୟାଧୁନିକ ନୂତନ ଆମ୍ବୁଲାନ୍ସକୁ ଦାନ କରିଛନ୍ତି।
ଉକ୍ତ ଆମ୍ବୁଲାନ୍ସକୁ ରବିବାର ଦିନ ଆଇନ ମନ୍ତ୍ରୀ ପୃଥ୍ୱୀରାଜ ହରିଚ଼ନ୍ଦନ ତାଙ୍କ ଭୁବନେଶ୍ଵର ସ୍ଥିତ ସରକାରୀ ବାସଭବନ ଠାରେ ଲୋକାର୍ପଣ କରିଥିଲେ। ଏହି ଅତ୍ୟାଧୁନିକ ଆମ୍ବୁଲାନ୍ସଟି ନିଳାଦ୍ରୀ ପ୍ରସାଦ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ରହି ସମୂହ ଅଞ୍ଚଳ ବାସୀଙ୍କୁ ୨୪/୭ ସେବା ପ୍ରଦାନ କରିବାରେ ସହାୟକ ହେବ। ଏଲ.ଆଇ.ସି ତରଫରୁ ଏହି ଜନମଙ୍ଗଳକାରୀ କାର୍ଯ୍ୟ ତଥା ଜରୁରୀକାଳୀନ ସ୍ବାସ୍ଥ୍ୟସେବା ଯୋଗାଇବା ଓ ଲୋକଙ୍କ କଲ୍ୟାଣ ପାଇଁ ତାଙ୍କର ଏହି ସେବା ମନୋଭାବ ସମସ୍ତଙ୍କ ପାଇଁ ଉଦାହରଣ ଅଟେ। ଏହି ନିଶୁଳ୍କ ଆମ୍ବୁଲାନ୍ସ ସେବା ଆହୁରି ଅନେକ ମୂଲ୍ୟବାନ ଜୀବନ ବଞ୍ଚାଇବାରେ ସହାୟକ ହେବ ବୋଲି ମନ୍ତ୍ରୀ ଶ୍ରୀ ହରିଚ଼ନ୍ଦନ ମତବ୍ୟକ୍ତ କରିଥିଲେ।
ଏହି ଅବସରରେ ଭାଜପା ପୂର୍ବତନ ରାଜ୍ୟ ସଭାପତି ତଥା ଓଡ଼ିଶା ଅଲିମ୍ପିକ୍ସ ଆସୋସିଏସନର ସଭାପତି ସମୀର ମହାନ୍ତି, ଏଲ.ଆଇ.ସି ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଏବଂ ପରିଚାଳନା ନିର୍ଦ୍ଦେଶକ ସିଦ୍ଧାର୍ଥ ମହାନ୍ତି, ଭୁବନେଶ୍ୱର କ୍ଷେତ୍ର ପରିଚାଳକ, ଜୋନାଲର ବହୁ ବରିଷ୍ଠ ପଦାଧିକାରୀ ଗଣ ଉପସ୍ଥିତ ଥିଲେ।