ଚିଲିକା/ବାଣପୁର: ଦୀର୍ଘ ବର୍ଷର ଦାବି ପୂରଣ ହୋଇଛି। ଖୋର୍ଦ୍ଧା ଜିଲ୍ଲା ବାଣପୁରରେ ଖୋଲିବ ଅତିରିକ୍ତ ଜିଲ୍ଲା ଏବଂ ଦୌରାଜଜ କୋର୍ଟ (ଏଡିଜେ କୋର୍ଟ)। ଏ ନେଇ ଗତକାଲି ଆଇନ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଆଉ କିଛି ଦିନ ମଧ୍ୟରେ ବାଣପୁର କୋର୍ଟ ପରିସରରେ କାର୍ଯ୍ୟକ୍ଷମ ହେବ ନୂତନ ଏଡିଜେ କୋର୍ଟ। ବାଣପୁର, ବାଲୁଗାଁ, ନାଚୁଣୀ ଏବଂ ଟାଙ୍ଗୀ ଥାନା ଅଞ୍ଚଳର କିଛି ଅଂଶକୁ ନେଇ ଗଠିତ ହେବ ବାଣପୁର ଏଡିଜେ କୋର୍ଟ।
ତେବେ ଉକ୍ତ ନୂତନ ଏଡିଜେ କୋର୍ଟ ଦ୍ୱାରା ବହୁ ଲାଭବାନ ହେବେ ଜନସାଧାରଣ। ପୁର୍ବରୁ ଜଘନ୍ୟ ଅପରାଧ ଯେପରିକି ହତ୍ୟା, ହତ୍ୟା କରିବାକୁ ଉଦ୍ୟମ, ଡକାୟତି, ବଧୂ ହତ୍ୟା, ଅପହରଣ, ଦୁଷ୍କର୍ମ ଆଦି ଅପରାଧ ଗୁଡିକରେ ନ୍ୟାୟ ପାଇବା ପାଇଁ ଏବଂ ଦେୱାନୀ ମାମଲା ଅପିଲ ବିଚାର ପାଇଁ ବାଣପୁର, ବାଲୁଗାଁ, ନାଚୁଣୀ ଏବଂ ଆଖପାଖ ଅଞ୍ଚଳର ଜନସାଧାରଣଙ୍କୁ ଦୀର୍ଘ ୩୨ ବର୍ଷ ହେଲା ସୁଦୂର ଖୋର୍ଦ୍ଧା ଦଉଡିବାକୁ ପଡୁଥିଲା। ଯାହାଦ୍ୱାରା ଅଯଥା ଖର୍ଚ୍ଚାନ୍ତ ହେବା ସହ ଜନସାଧାରଣଙ୍କର ବହୁ ସମୟ ନଷ୍ଟ ହେଉଥିଲା। କିନ୍ତୁ ନୂତନ ବାଣପୁର ଏଡିଜେ କୋର୍ଟ ପ୍ରତିଷ୍ଠା ହେବା ଦ୍ୱାରା ଉକ୍ତ ସବୁ ସମସ୍ୟାରୁ ମୁକ୍ତି ମିଳିବା ସହ ଅପରାଧ ଗୁଡିକର ତ୍ୱରିତ ବିଚାର ମଧ୍ୟ ହୋଇପାରିବ।
ତେବେ ବାଣପୁରରେ ଅତିରିକ୍ତ ଜିଲ୍ଲା ଏବଂ ଦୌରାଜଜ କୋର୍ଟ (ଏଡିଜେ କୋର୍ଟ) ଖୋଲିବା ପାଇଁ ଦୀର୍ଘ ବର୍ଷ ହେଲା ଦୃଢ ଦାବି ହେଇଆସୁଥିବା ବେଳେ ଗତବର୍ଷ ନବ ନିର୍ବାଚିତ ନୂତନ ଚିଲିକା ବିଧାୟକ ତଥା ଆଇନ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନଙ୍କ ଦୃଷ୍ଟି ଆକର୍ଷଣ କରିଥିଲା ବାଣପୁର ଓକିଲ ସଂଘ। ମାନ୍ୟବର ମନ୍ତ୍ରୀ ଏହାକୁ ଅତି ଗୁରୁତର ସହ ନେଇ ଗତବର୍ଷ ବାଣପୁର ଓକିଲ ସଂଘର ୪୫ ତମ ବାର୍ଷିକ ଉତ୍ସବରେ ଯୋଗଦେଇ ଖୁବଶୀଘ୍ର ବାଣପୁରରେ ସ୍ଥାୟୀ ଏଡିଜେ କୋର୍ଟ ପ୍ରତିଷ୍ଠା ହେବାନେଇ ଘୋଷଣା କରିଥିଲେ। ତେବେ ଦୀର୍ଘ ବର୍ଷର ବାଣପୁରବାସୀଙ୍କ ଦାବିକୁ ଆଇନ ମନ୍ତ୍ରୀ ପୂରଣ କରିଥିବାରୁ ବାଣପୁର ଓକିଲ ବୃନ୍ଦ ଏବଂ ଜନସାଧାରଣ ମାନ୍ୟବର ମନ୍ତ୍ରୀଙ୍କୁ ଆନ୍ତରିକ କୃତଜ୍ଞତା ଜ୍ଞାପନ କରିଛନ୍ତି।
ତେବେ ବାଣପୁରରେ ଅତିରିକ୍ତ ଜିଲ୍ଲା ଏବଂ ଦୌରାଜଜ କୋର୍ଟ (ଏଡିଜେ କୋର୍ଟ) ଖୋଲିବା ସୂଚନା ମିଳିଲା ପରେ ସମଗ୍ର ଚିଲିକା ନିର୍ବାଚନମଣ୍ଡଳୀରେ ଆନନ୍ଦର ଲହରୀ ଖେଳିଯାଇଛି।