ବାଣପୁର: ଆଜି ବାଣପୁର ବ୍ଲକ ପରିସରରେ ଓଡ଼ିଶାର ଅନନ୍ୟ ଶକ୍ତିପୀଠ ତଥା ବାଣପୁରବାସୀଙ୍କ ଆରାଧ୍ୟା ଦେବୀ ମା’ ଭଗବତୀଙ୍କ ମନ୍ଦିରର ଉନ୍ନତିକରଣ, ସୌନ୍ଦର୍ଯ୍ୟୀକରଣ ଏବଂ ଚତୁଃପାର୍ଶ୍ୱର ସାମଗ୍ରିକ ବିକାଶ ନେଇ ଅନୁଷ୍ଠିତ ବୈଠକରେ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚ଼ନ୍ଦନ ଯୋଗଦେଇ ବିସ୍ତୃତ ଭାବେ ଆଲୋଚନା କରିଛନ୍ତି।
ମା’ ଭଗବତୀଙ୍କ ଐତିହ୍ୟ, ଆଧ୍ୟାତ୍ମିକ ମହତ୍ତ୍ୱ ଓ ପ୍ରାଚୀନ ପରମ୍ପରାକୁ ଅକ୍ଷୁର୍ଣ୍ଣ ରଖି ମନ୍ଦିରର ଭିତ୍ତିଭୂମିର ବିକାଶ,ପାର୍କିଂ ବ୍ୟବସ୍ଥା ,ଭକ୍ତମାନଙ୍କ ପାଇଁ ଆବଶ୍ୟକ ସୁବିଧା, ସୁବ୍ୟବସ୍ଥିତ ପରିଚାଳନା ସମ୍ପର୍କରେ ଆଲୋଚନା କରାଯାଇଥିଲା।
ମା’ ଭଗବତୀଙ୍କ ପବିତ୍ର ପୀଠକୁ ଏକ ଆଧ୍ୟାତ୍ମିକ ପର୍ଯ୍ୟଟନର ପ୍ରମୁଖ କେନ୍ଦ୍ର ଭାବେ ବିକଶିତ କରିବା ପାଇଁ ରାଜ୍ୟ ସରକାର ସଂକଳ୍ପବଦ୍ଧ।
ଏହି ଅବସରରେ ବାଣପୁର ବ୍ଲକ ଅଧ୍ୟକ୍ଷ ଅମରେନ୍ଦ୍ର ରଣସିଂହ, ବାଣପୁର ବିଜ୍ଞାପିତ ଅଞ୍ଚଳ ପରିଷଦର ଅଧ୍ୟକ୍ଷ ମିଟୁ ନାୟକ, ଓବିସିସିର ମୁଖ୍ୟ ମହାପ୍ରବନ୍ଧକ-୨ ଇଂ ଟିକିନା ରାଉତ,ପୂର୍ତ୍ତ ବିଭାଗ ଖୋର୍ଦ୍ଧା ଡ଼ିଭିଜନର ଅଧିକ୍ଷଣ ଯନ୍ତ୍ରୀ ଇଂ ଶିବଲାଲ୍ ସାହୁ, ବାଣପୁର ତହସିଲଦାର ହରପ୍ରିୟା ମଲ୍ଲିକ, ଖୋର୍ଦ୍ଧାର ଡେପୁଟି ଜିଲ୍ଲାପାଳ ( ଭୂମି ଅଧିଗ୍ରହଣ) ଅନନ୍ୟା ସୃଷ୍ଟି ଶତପଥୀ, ଦକ୍ଷେଶ୍ବର ଓ ମା’ ଭଗବତୀ ଏଣ୍ଡାଉମେଣ୍ଟର କାର୍ଯ୍ୟନିର୍ବାହୀ ଅଧିକାରୀ ବାଳମୁକୁନ୍ଦ ଦାସ, ମନ୍ଦିର ପରିଚାଳନା କମିଟି ସଦସ୍ୟ, ସ୍ଥାନୀୟ ବୁଦ୍ଧିଜୀବୀ ଓ ବିଭାଗୀୟ ଅଧିକାରୀବୃନ୍ଦ ଉପସ୍ଥିତ ଥିଲେ।