ଭୁବନେଶ୍ବର: ଆୟ ବହିର୍ଭୂତ ସମ୍ପତ୍ତି ଠୁଳ କରିଥିବା ଅଭିଯୋଗରେ ପାରାଦୀପ ବନ୍ଦରର ଡେପୁଟି ଟ୍ରାଫିକ୍ ମ୍ୟାନେଜର ଶ୍ରୀମନ ନାରାୟଣ ମିଶ୍ରଙ୍କ ବିଭିନ୍ନ ଠିକଣାରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା ପକ୍ଷରୁ ଏକକାଳୀନ ଚଢ଼ାଉ କରାଯାଇଛି। ପାରାଦୀପ, ଭୁବନେଶ୍ୱର, କୁଜଙ୍ଗ ଏବଂ ଏରସମା ଅଞ୍ଚଳରେ ଥିବା ବିଭିନ୍ନ ସ୍ଥାନରେ ତଦନ୍ତକାରୀ ଦଳ ପକ୍ଷରୁ କଡ଼ା ଯାଞ୍ଚ କରାଯାଇଛି। ପ୍ରାପ୍ତ ସୂଚନା ଅନୁଯାୟୀ, ପାରାଦୀପରେ ଥିବା ତାଙ୍କର ସରକାରୀ କ୍ୱାର୍ଟର ଓ କାର୍ଯ୍ୟାଳୟ ସମେତ ରାଜଧାନୀ ଭୁବନେଶ୍ୱରର ରଘୁନାଥପୁର ସ୍ଥିତ ବାସଭବନରେ ମଧ୍ୟ ଚଢ଼ାଉ ଜାରି ରହିଛି। ଏହାଛଡ଼ା କୁଜଙ୍ଗ ଏବଂ ଏରସମା ତହସିଲ ଅଞ୍ଚଳରେ ତାଙ୍କର ରହିଥିବା ବିଭିନ୍ନ ସମ୍ପତ୍ତି ଓ ଜମିବାଡ଼ିର କାଗଜପତ୍ର ଯାଞ୍ଚ କରାଯାଇଛି। ତାଙ୍କ ଦ୍ୱାରା ପରିଚାଳିତ ଏକ କାର୍ଯ୍ୟାଳୟରେ ମଧ୍ୟ ଅଧିକାରୀମାନେ ପହଞ୍ଚି ପଡ଼ୋଶୀ ଓ ସମ୍ପର୍କୀୟଙ୍କ ସମ୍ପତ୍ତି ସମ୍ପର୍କରେ ପଚରାଉଚରା କରିଛନ୍ତି। ପୂର୍ବରୁ ଏହି ଦୁର୍ନୀତି ଓ ଅସାଧୁ ଉପାୟରେ ସମ୍ପତ୍ତି ଠୁଳ ଅଭିଯୋଗକୁ ନେଇ ବିଭିନ୍ନ ସ୍ଥାନରେ ଅଭିଯୋଗ ଦାଖଲ ହୋଇଥିବା ଜଣାପଡ଼ିଛି। ବହୁଦିନରୁ ଲାଗିରହିଥିବା ଏହି ଅଭିଯୋଗର ଭିତ୍ତିରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା ଏହି ବୃହତ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଚଢ଼ାଉ ସମୟରେ ଅଧିକାରୀମାନଙ୍କ ହାତରେ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର, ବ୍ୟାଙ୍କ ଆକାଉଣ୍ଟ ଏବଂ ସମ୍ପତ୍ତି ସମ୍ପର୍କିତ ତଥ୍ୟ ଲାଗିଥିବା ଜଣାପଡ଼ିଛି। ତଦନ୍ତ ଶେଷ ହେବା ପରେ ଏନେଇ ଅଧିକ ତଥ୍ୟ ସାମ୍ନାକୁ ଆସିବ ବୋଲି ଆଶା କରାଯାଉଛି।
