ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଆଜି ବ୍ରହ୍ମପୁର ବିଧାୟକ ବିକ୍ରମ କୁମାର ପଣ୍ଡା ଏବଂ ବ୍ରହ୍ମପୁର ଆର୍ପିଏଫ୍ ପକ୍ଷରୁ ସଚେତନତା ଶିବିର ଅନୁଷ୍ଠିତ ହୋଇଛି । ବିଧାୟକଙ୍କ ନେତୃତ୍ୱରେ ମହାନଗର ନିଗମ ଅନ୍ତର୍ଗତ ୱାର୍ଡ଼ ନଂ ୧ରେ କରୋନା ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ବ୍ରହ୍ମପୁର ଆର୍ପିଏଫ୍ ପକ୍ଷରୁ ଷ୍ଟେସନରେ ଏହି ଭୂତାଣୁକୁ ନେଇ ସଚେତନତା ସୃଷ୍ଟି କରାଯାଇଥିଲା । କରୋନାରୁ ରକ୍ଷା ପାଇବା ପାଇଁ ସମସ୍ତଙ୍କୁ ସଚେତନ ରହିବାକୁ ବିଧାୟକଙ୍କ ସହ ବିଜେଡ଼ି କର୍ମୀମାନେ ସଚେତନ କରିଥିଲେ । ଏହି ଅବସରରେ ବିଧାୟକଙ୍କ ସହ ଅନ୍ୟାନ୍ୟ କର୍ମୀ ତଥା ଅଙ୍ଗନୱାଡ଼ି ଦିଦିମାନେ ହାତକୁ କିଭଳି ସାବୁନରେ ଧୋଇ ପରିସ୍କାର ରଖିବ ସେ ନେଇ ଲୋକଙ୍କୁ ସଚେତନ କରିଥିଲେ । କୌଣସି ଲୋକଙ୍କ ଦେହରେ କରୋନା ରୋଗର ଲକ୍ଷଣ ଦେଖାଦେଲେ ତୁରନ୍ତ ନିକଟସ୍ଥ ମେଡ଼ିକାଲ୍ରେ ସ୍ୱାସ୍ଥ୍ୟ ପରୀକ୍ଷା କରିବା ସହ 
ମେଡ଼ିକାଲ୍ରେ ଖୋଲିଥିବା ସ୍ୱତନ୍ତ୍ର ୱାର୍ଡ଼ରେ ଚିକିତ୍ସା ହେବାକୁ କହିଥିଲେ ।
ସେହିପରି ଆରପିଏଫ୍ ପକ୍ଷରୁ ସଂକ୍ରମଣକୁ ରୋକିବା ଦିଗରେ ବିଭିନ୍ନ ବାର୍ତ୍ତା ଥିବା ଲିଫ୍ଲେଟ୍କୁ ଷ୍ଟେସନରେ ଥିବା ଯାତ୍ରୀମାନଙ୍କୁ ବଣ୍ଟନ କରାଯାଇଥିଲା । ଏହା ସହ ୧୮୨ ଟୋଲ୍ ଫ୍ରି ସୁରକ୍ଷା ନମ୍ବର ପ୍ରସାର କରିବା ପାଇଁ ଆରପିଏଫ୍ ପକ୍ଷରୁ କୁହାଯାଇଥିଲା । ଟ୍ରେନର ଫୁଟବୋର୍ଡ଼ରେ ଯାତ୍ରା ନ କରିବା, ଟ୍ରେନ ଚାଲୁଥିବାବେଳେ ଟ୍ରେନରୁ ବାହାରକୁ ନ ବାହାରିବା, ରେଲୱେ ଟ୍ରାକ ଅତିକ୍ରମ ନ କରିବା, ସବୁବେଳେ ଓଭରବ୍ରିଜ୍ର ବ୍ୟବହାର କରିବା, ବୁଲା ବିକାଳୀଙ୍କଠାରୁ କୌଣସି ଖାଦ୍ୟ ଦ୍ରବ୍ୟ ନ କିଣିବା ନେଇ ସଚେତନ କରାଯାଇଥିଲା ।