୬ ଦଫା ଦାବିନେଇ ପ୍ରେରଣା ସଙ୍ଗଠନ ପକ୍ଷରୁ ବାଲୁଗାଁ ବନ ବିଭାଗ ରେଞ୍ଜ ଅଫିସ ସମ୍ମୁଖରେ ଗଣଧାରଣା

Published: Oct 8, 2021, 6:56 pm IST

ସୀତାରାମ ଅଗ୍ରୱାଲ

ବାଲୁଗାଁ: ଖୋର୍ଦ୍ଧା ପୂର୍ବତନ ବିଧାୟକ ତଥା ଗ୍ରୀନ ଆର୍ମି ମୁଖ୍ୟ ଡକ୍ଟର ଦିଲ୍ଲୀପ ଶ୍ରୀଚନ୍ଦନଙ୍କ ନେତୃତ୍ୱରେ ଆଜି ପୂର୍ବାହ୍ନରେ ପ୍ରେରଣା ସଙ୍ଗଠନ ପକ୍ଷରୁ ବାଲୁଗାଁ ବନ ବିଭାଗ ରେଞ୍ଜ ଅଫିସ ସମ୍ମୁଖରେ ୬ଦଫା ଦାବିନେଇ ଗଣଧାରଣା ଦିଆଯାଇଛି। ଏସିଆ ମହାଦେଶର ସର୍ବବୃହତ ଶାଳ ଶାଗୁଆନ ଜଙ୍ଗଲ ଭାବେ ବାଣପୁରସ୍ଥିତ ଦାମିଆ-ବରବରା ଜଙ୍ଗଲ ପରିଚିତ। ମାତ୍ର ପଶ୍ଚାତାପର ବିଷୟ ଏହି ଜଙ୍ଗଲରୁ ବାଲୁଗାଁ ବନ ବିଭାଗ କିଛି କାଠ ମାଫିଆଙ୍କ ସହ ମିଲିଭଗତରେ ଅନବରତ ବହୁ ମୂଲ୍ୟବାନ ଶାଳ ଶାଗୁଆନ ଗଛ କାଟି ବିକ୍ରି କରୁଥିବାବେଳେ ପ୍ରଶାସନ ନିରବଦ୍ରଷ୍ଟା ସାଜୁଥିବା ସହ ରାଜ୍ୟ ସରକାର ନିଷ୍କ୍ରିୟ ପନ୍ଥା ଅବଲମ୍ବନ କରୁଥିବା ନେଇ ସାଧାରଣ ଜନତା ଅଭିଯୋଗ କରୁଛନ୍ତି।

ଗତ ୦୧/୧୦/୨୦୨୧ ରିଖରେ ଅଭିଯୋଗ ମୁତାବକ ଦାମିଆ ବରବରା ଜଙ୍ଗଲରୁ ଲକ୍ଷାଧିକ ଟଙ୍କାର ଗଛ କାଟି ବନବିଭାଗ କର୍ମଚାରୀ ବିକ୍ରି କରୁଥିବା ବେଳେ ସ୍ଥାନୀୟ ଗ୍ରାମବାସୀ ଏବଂ ଜଙ୍ଗଲ ସୁରକ୍ଷା କମିଟି ଦ୍ୱାରା ତିନିଜଣ ବନ କର୍ମଚାରୀ ଧରାପଡି ଆଣ୍ଠେଇବା ଭଳି ଅଭାବନୀୟ ପରିସ୍ଥିତି ସୃଷ୍ଟି ହୋଇଥିଲା। ବନ ବିଭାଗ ଏଥିରେ ପ୍ରତିଶୋଧ ପରାୟଣ ହୋଇ ଘଟଣାର ମୋଡ଼ ବଦଳାଇବା ପାଇଁ ବାଣପୁର ପୋଲିସ ସହଯୋଗରେ ଜଙ୍ଗଲ ସୁରକ୍ଷା କମିଟିର କିଛି ସଦସ୍ୟ ଏବଂ ସ୍ଥାନୀୟ ଗ୍ରାମବାସୀଙ୍କ ବିରୁଦ୍ଧରେ ମାମଲା ରୁଜୁ କରି ଜେଲ ହାଜତକୁ ପଠାଇଦେଇଥିଲା ବୋଲି ଗ୍ରାମବାସୀ ଅଭିଯୋଗ କରିଛନ୍ତି।

ପୋଲିସର ପକ୍ଷପାତ ତଦନ୍ତ ଏବଂ ବନ ବିଭାଗର ଜଙ୍ଗଲ ଧ୍ବଂସ ଚକ୍ରାନ୍ତ ବିରୁଦ୍ଧରେ ଆଜି ପ୍ରେରଣା ସଙ୍ଗଠନ ପକ୍ଷରୁ ଏହାର ପ୍ରତିବାଦ ସ୍ବରୂପ ୬ଦଫା ଦାବି ଯଥା ନିରପେକ୍ଷ ତଦନ୍ତ କରି ଦୋଷୀକୁ ଦଣ୍ଡ, ବିନା ଦୋଷରେ ଜେଲ ପଠାଇଥିବା ବ୍ୟକ୍ତିଙ୍କୁ ତୁରନ୍ତ ଖଲାସ, ପୂର୍ବରୁ ଜଙ୍ଗଲ ସୁରକ୍ଷାରେ ନିୟୋଜିତ ସି ଆର ପି ଏଫ ଯବାନଙ୍କୁ ପୁନଃ ନିଯୁକ୍ତି ପାଇଁ ସୁପାରିଶ, ସି ଆର ପି ଏଫ ଯବାନ ନ ଆସିବା ପର୍ଯ୍ୟନ୍ତ ଓଏସଏପିଙ୍କୁ ଦାୟିତ୍ୱ, ବନ ବିଭାଗରୁ ଆସୁଥିବା ଅର୍ଥକୁ ବିଭାଗୀୟ ଅଧିକାରୀ ଓ ଭିଏସଏସ ର ମିଳିତ ଜ୍ଞାତସାରରେ ବ୍ୟୟ, ଜଙ୍ଗଲ ମଧ୍ୟରେ ପଡିଥିବା କାଠ ଗଣ୍ଡିକୁ ବନ ବିଭାଗ ଅନୁମତିରେ ଆଣିବା ନେଇ ବାଲୁଗାଁ ବନ ବିଭାଗ ରେଞ୍ଜ ଅଫିସ ସମ୍ମୁଖରେ ଶାନ୍ତିପୂର୍ଣ ଗଣଧାରଣା ଦେବା ସହ ରେଞ୍ଜର ପ୍ରତାପ କୁମାର ମହାନ୍ତିଙ୍କୁ ଦାବିପତ୍ର ପ୍ରଦାନ କରିଛନ୍ତି।

ରେଞ୍ଜର ଶ୍ରୀ ମହାନ୍ତି ଏବଂ ପ୍ରେରଣା ସଙ୍ଗଠନର କର୍ମକର୍ତ୍ତାଙ୍କ ଆପୋଷ ଆଲୋଚନା ପରେ ଏ ସମ୍ବନ୍ଧରେ ତ୍ୱରିତ ପଦକ୍ଷେପ ଗ୍ରହଣ କରାଯିବା ନେଇ ଶ୍ରୀ ମହାନ୍ତି ପ୍ରତିଶୃତି ଦେବା ପରେ ଗଣଧାରଣାରୁ କର୍ମୀମାନେ ଉଠିଥିଲେ ଏବଂ ଯଦି ଏହାର ସ୍ଥାୟୀ ସମାଧାନ ନହୁଏ ତେବେ ଆଗାମୀ ଦିନରେ ଏହି ଆନ୍ଦୋଳନକୁ ତୀବ୍ରତର କରାଯିବା ନେଇ ପ୍ରେରଣା ସଙ୍ଗଠନର ସଭାପତି ଦିଲ୍ଲୀପ ଶ୍ରୀଚନ୍ଦନ ଚେତାବନୀ ଦେଇଛନ୍ତି।

ଏଥି ସହିତ ଘଟିଯାଇଥିବା ଘଟଣା ସମ୍ବନ୍ଧରେ ଅବଗତ ଏବଂ ତ୍ୱରିତ ପଦକ୍ଷେପ ଗ୍ରହଣ କରିବା ନେଇ ବାଲୁଗାଁ ଏସ ଡି ପି ଓ ମାନସ ରଞ୍ଜନ ବାରିକଙ୍କୁ ମଧ୍ୟ ଦାବିପତ୍ର ପ୍ରଦାନ କରାଯାଇଛି।

Related posts