ନୂଆଦିଲ୍ଲୀ: ଦାମୀ ଖାଇବା ତେଲର ମୂଲ୍ୟରେ ସାଧାରଣ ଲୋକଙ୍କୁ ଏକ ବଡ଼ ଆଶ୍ଵସ୍ତି ମିଳିଛି। ଧାରା ବ୍ରାଣ୍ଡ ନାମରେ ଖାଇବା ତେଲ ବିକ୍ରି କରୁଥିବା ମଦର ଡେୟରି ଲିଟର ପିଛା ୧୫ ରୁ ୨୦ ଟଙ୍କା ଏମଆରପି ହ୍ରାସ କରିବାକୁ ଘୋଷଣା କରିଛି। ଆସନ୍ତା ସପ୍ତାହରେ, ଯେତେବେଳେ ନୂଆ ଷ୍ଟକ୍ ବଜାରରେ ଆସିବ, ଲୋକମାନେ ଖୁଚୁରା ବଜାରରେ ଶସ୍ତା ଖାଇବା ତେଲ ପାଇପାରିବେ।
ମଙ୍ଗଳବାର ଦିନ ଖାଦ୍ୟ ମନ୍ତ୍ରଣାଳୟ ଖାଇବା ତେଲର ମୂଲ୍ୟ ହ୍ରାସ କରିବା ପାଇଁ SEA କୁ ନିର୍ଦ୍ଦେଶ ଦେଇଛି, ଏହା ପରେ ମଦର ଡେୟରି ଖାଇବା ତେଲର ମୂଲ୍ୟ ହ୍ରାସ କରିଛଛି। ଏକ ମଦର ଡେୟରି ମୁଖପାତ୍ର କହିଛନ୍ତି ଯେ, ଆନ୍ତର୍ଜାତୀୟ ବଜାରରେ ମୂଲ୍ୟ ହ୍ରାସ ଏବଂ ଘରୋଇ ଫସଲର ଉତ୍ତମ ଉତ୍ପାଦନ ପରେ ତୁରନ୍ତ ଧାରାର ଖାଇବା ତେଲର ସମସ୍ତ ଲିଟର ପିଛା ୧୫ ରୁ ୨୦ ଟଙ୍କା ହ୍ରାସ କରିବାକୁ ନିଷ୍ପତ୍ତି ନିଆଯାଇଛି। ସୋୟାବିନ୍ ତେଲ, ରାଇସବ୍ରାନ ତେଲ, ସୂର୍ଯ୍ୟମୁଖୀ ତେଲ, ଚିନା ବାଦାମ ତେଲ ମୂଲ୍ୟରେ ଏହି ହ୍ରାସ କରାଯାଇଛି।
ଧାରା ରିଫାଇନଡ୍ ସୋୟାବିନ୍ ତେଲର ଏକ ଲିଟର ପଲିପ୍ୟାକ୍ ମୂଲ୍ୟ ୧୭୦ ରୁ ୧୫୦ ଟଙ୍କାକୁ ହ୍ରାସ କରାଯାଇଛି। ରାଇସବ୍ରାନ ତେଲର ମୂଲ୍ୟ ଲିଟର ପିଛା ୧୯୦ ରୁ ୧୭୯ ଟଙ୍କାକୁ ହ୍ରାସ କରାଯାଇଛି। ଧାରାର ସୂର୍ଯ୍ୟମୁଖୀ ତେଲର ମୂଲ୍ୟ ୧୭୫ ରୁ ୧୬୦ ଲିଟରକୁ ହ୍ରାସ କରାଯାଇଛି। ଚିନା ବାଦାମ ତେଲର ମୂଲ୍ୟ ଲିଟର ପିଛା ୨୫୫ ରୁ ୨୪୦ ଟଙ୍କାକୁ ହ୍ରାସ କରାଯାଇଛି।
ସୋଲଭେଣ୍ଟ ଏକ୍ସଟ୍ରାକ୍ଟର ଆସୋସିଏସନ୍ ଅଫ୍ ଇଣ୍ଡିଆ ମଧ୍ୟ ଏହାର ସଦସ୍ୟମାନଙ୍କୁ ଗତ ତିନି ମାସ ମଧ୍ୟରେ ମୂଲ୍ୟ ହ୍ରାସର ବିବରଣୀ ଖାଦ୍ୟ ମନ୍ତ୍ରଣାଳୟକୁ ଦାଖଲ କରିବାକୁ କହିଛି। ଏହାପୂର୍ବରୁ ଖାଦ୍ୟ ଯୋଗାଣ ଏବଂ ଉପଭୋକ୍ତା ବ୍ୟାପାର ମନ୍ତ୍ରଣାଳୟ ଖାଇବା ତେଲ ତିଆରି କରୁଥିବା କମ୍ପାନୀଗୁଡ଼ିକୁ ଖାଇବା ତେଲର ମୂଲ୍ୟ ହ୍ରାସ କରିବାକୁ କହିଥିଲେ। ମନ୍ତ୍ରଣାଳୟ କହିଛି ଯେ, ଆନ୍ତର୍ଜାତୀୟ ବଜାରରେ ମୂଲ୍ୟ ହ୍ରାସ ସତ୍ତ୍ୱେ ପ୍ୟାକେଜ୍ ହୋଇଥିବା ଖାଦ୍ୟର ମୂଲ୍ୟ ସେତିକି ହ୍ରାସ କରାଯାଇ ନାହିଁ। ଗ୍ରାହକଙ୍କୁ ଆଶ୍ଵସ୍ତି ଯୋଗାଇବା ପାଇଁ ସରକାର ସେଲଭେଣ୍ଟ ଏକ୍ସଟ୍ରାକ୍ଟ ଆସୋସିଏସନର ସଦସ୍ୟମାନଙ୍କୁ ଖାଇବା ତେଲର ଏମଆରପି କାଟିବାକୁ କହିଥିଲେ।