ନୂଆଦିଲ୍ଲୀ: ଭାରତରେ ହେବାକୁଥିବା ଦିନିକିଆ ବିଶ୍ୱକପ ସମୟରେ ଦର୍ଶକଙ୍କ ବିପୁଳ ସମର୍ଥନରେ ତାଙ୍କ ଦଳ ଟାଇଟଲ ଜିତିବ ବୋଲି ଭାରତୀୟ ଅଧିନାୟକ ରୋହିତ ଶର୍ମା ନିଶ୍ଚିତ। ମହେନ୍ଦ୍ର ସିଂ ଧୋନିଙ୍କ ଅଧିନାୟକତ୍ୱରେ ଆୟୋଜିତ ହୋଇଥିବା ୨୦୧୧ ବିଶ୍ୱକପରେ ଭାରତ ଏହି ଟାଇଟଲ ଜିତିଥିଲା।
ରୋହିତ ଶର୍ମା କହିଛନ୍ତି ଯେ, “ମୁଁ ଏହାକୁ ଏତେ ନିକଟରୁ ଦେଖି ନାହିଁ। ଆମେ ୨୦୧୧ରେ ଜିତିଥିଲୁ, କିନ୍ତୁ ମୁଁ ସେହି ଦଳରେ ନଥିଲି। ଏହା ଏକ ସୁନ୍ଦର ଟ୍ରଫି ଏବଂ ଏହା ପଛରେ ଅନେକ ସ୍ମୃତି, ଅତୀତ, ଇତିହାସ ରହିଛି।”
ୱେଷ୍ଟଇଣ୍ଡିଜ୍ ବିପକ୍ଷ ଟି-ଟ୍ୱେଣ୍ଟି ସିରିଜର ଶେଷ ଦୁଇଟି ମ୍ୟାଚ୍ ଖେଳିବା ପାଇଁ ଆମେରିକାରେ ପହଞ୍ଚିଥିବା ରୋହିତଙ୍କୁ ଆଇସିସି କହିଛି ଯେ ଏହା ବହୁତ ସୁନ୍ଦର ଏବଂ ଆଶା କରୁଛୁ ଆମେ ଏହାକୁ ଜିତିବୁ।
ରୋହିତ କହିଛନ୍ତି ଯେ, “ମୁଁ ଜାଣେ ଆମେ ପଡ଼ିଆରେ ଜବରଦସ୍ତ ସମର୍ଥନ ପାଇବୁ। ଏହା ହେଉଛି ବିଶ୍ୱକପ ଏବଂ ସମସ୍ତେ ଏହାକୁ ଅପେକ୍ଷା କରିଛନ୍ତି। ଏହା ୧୨ ବର୍ଷ ପରେ ଭାରତରେ ଅନୁଷ୍ଠିତ ହେଉଛି। ଗତ ଥର ଆମେ ୨୦୧୧ ରେ ଦିନିକିଆ ବିଶ୍ୱକପ୍ ଆୟୋଜନ କରିଥିଲୁ। ଲୋକମାନେ ବହୁତ ଉତ୍ସାହିତ ଅଛନ୍ତି। ”
ତାଙ୍କ ବିଶ୍ୱକପ୍ ସ୍ମୃତି ବିଷୟରେ ରୋହିତ କହିଛନ୍ତି ଯେ, “୨୦୦୩ ବିଶ୍ଵକପରେ ଫାଇନାଲ୍ ପର୍ଯ୍ୟନ୍ତ ଭାରତ ଭଲ ଖେଳିଥିଲା। ସଚିନ୍ ତେନ୍ଦୁଲକର ଏତେ ରନ୍ ସ୍କୋର କରିଥିଲେ। ତା’ପରେ ୨୦୦୭ ବିଶ୍ୱକପ୍ ରେ ଆମେ ପ୍ରଥମ ରାଉଣ୍ଡରୁ ବିଦା ହୋଇଥିଲୁ। ୨୦୧୧ ବିଶ୍ୱକପ୍ ସମସ୍ତଙ୍କୁ ଖୁସି ଆଣିଦେଇଥିଲା। ମୁଁ ପ୍ରତ୍ୟେକ ମ୍ୟାଚ୍ ର ପ୍ରତ୍ୟେକ ବଲ୍ ଘରେ ଦେଖୁଥିଲି। ସେଠାରେ ଦୁଇ ପ୍ରକାରର ଭାବନା ରହିଥିଲା। ଗୋଟିଏ ହେଲା ଦଳରେ ନ ରହିବାର ଦୁଃଖ। ଅନ୍ୟଟି ଭାରତର ସୁନ୍ଦର ପ୍ରଦର୍ଶନରେ ଆନନ୍ଦିତ ହୋଇଥିଲି|
୨୦୧୯ ବିଶ୍ୱକପରେ ରୋହିତ ପାଞ୍ଚଟି ଶତକ ହାସଲ କରିଥିଲେ। ସେ କହିଛନ୍ତି ଯେ, “ମୁଁ ୨୦୧୫ ଏବଂ ୨୦୧୯ ବିଶ୍ୱକପ ଖେଳିଥିଲି। ଏହା ଏକ ବଡ଼ ଅନୁଭୂତି ଥିଲା। ଆମେ ସେମିଫାଇନାଲରେ ପହଞ୍ଚିଥିଲୁ କିନ୍ତୁ ଫାଇନାଲ ଖେଳି ପାରିଲୁ ନାହିଁ। ବର୍ତ୍ତମାନ ବିଶ୍ୱକପ ପୁଣି ଭାରତରେ ହେଉଛି ଏବଂ ଆମେ ଟୁର୍ଣ୍ଣାମେଣ୍ଟରେ ଭଲ ପ୍ରଦର୍ଶନ ଜାରି ରଖିବୁ। “
