କୋଲକାତା: ତୃଣମୂଳ କଂଗ୍ରେସ (ଟିଏମସି) ଦଳୀୟ ସଂଗଠନରେ ବଡ଼ ଧରଣର ଅଦଳବଦଳ କରିଛି। ଦଳର ଯୁବ ଶାଖାର ସଭାପତି ପଦରୁ ସାୟନୀ ଘୋଷଙ୍କୁ ହଟାଇ ଅର୍ଣ୍ଣବ ବାନାର୍ଜୀଙ୍କୁ ରାଜ୍ୟ ତୃଣମୂଳ ଯୁବ କଂଗ୍ରେସର ନୂତନ ସଭାପତି ଭାବେ ନିଯୁକ୍ତ କରାଯାଇଛି।
ଏହା ସହିତ ଦଳର ବରିଷ୍ଠ ନେତା କୁନାଲ ଘୋଷଙ୍କୁ ଉତ୍ତର କୋଲକାତା ସଂଗଠନ ଜିଲ୍ଲାର ସଭାପତି ଭାବେ ଦାୟିତ୍ୱ ଦିଆଯାଇଛି। ସେ ଏହି ପଦରେ ବରିଷ୍ଠ ସାଂସଦ ସୁଦୀପ ବନ୍ଦୋପାଧ୍ୟାୟଙ୍କ ସ୍ଥାନ ନେବେ।
ଟିଏମସି ପକ୍ଷରୁ ଏହି ସାଂଗଠନିକ ପରିବର୍ତ୍ତନ ଘୋଷଣା କରାଯାଇଛି। ଦଳ ଭିତରେ ବୃଦ୍ଧି ପାଉଥିବା ଅସନ୍ତୋଷ ଏବଂ ରାଜନୈତିକ ଚ୍ୟାଲେଞ୍ଜ ମଧ୍ୟରେ ଏହି ନିଷ୍ପତ୍ତିକୁ ଗୁରୁତ୍ୱପୂର୍ଣ୍ଣ ଭାବେ ଦେଖାଯାଉଛି।
ବଙ୍ଗଳା ବିଧାନସଭା ନିର୍ବାଚନ ପରେ ଟିଏମସି ଭିତରେ ଆଭ୍ୟନ୍ତରୀଣ ମତଭେଦ ଏବଂ ଅସନ୍ତୋଷ ବୃଦ୍ଧି ପାଇଥିବା ଚର୍ଚ୍ଚା ଜୋର ଧରିଛି। ଦଳ ଭିତରେ ବିଭିନ୍ନ ସ୍ତରରେ ମତଭେଦ ଦେଖାଦେବା ସହିତ ଲୋକସଭାରେ ମଧ୍ୟ କିଛି ସାଂସଦଙ୍କ ଅସନ୍ତୋଷ ସାମ୍ନାକୁ ଆସିଛି।
ଗତ ଜୁନ୍ ୧ ତାରିଖରେ ଦଳର କିଛି ସାଂସଦ ନେତୃତ୍ୱ ପ୍ରତି ଅସନ୍ତୋଷ ପ୍ରକାଶ କରିଥିବା ଖବର ଆସିଥିଲା। ସେହି ସମୟରେ ଦଳ ମୁଖ୍ୟ ମମତା ବାନାର୍ଜୀ ଓ ସାଧାରଣ ସମ୍ପାଦକ ଅଭିଷେକ ବାନାର୍ଜୀ ଦିଲ୍ଲୀରେ ବିରୋଧୀ ମେଣ୍ଟର ବୈଠକରେ ଯୋଗ ଦେଇଥିଲେ।
ମମତା ବାନାର୍ଜୀଙ୍କ ବାସଭବନରେ ଅନୁଷ୍ଠିତ ଟିଏମସି କାର୍ଯ୍ୟସମିତି ବୈଠକରେ ଏକାଧିକ ସାଂଗଠନିକ ପରିବର୍ତ୍ତନ ଉପରେ ମୋହର ଲାଗିଥିଲା। ସୁଖେନ୍ଦୁ ଶେଖର ରାୟ ଓ ସୁସ୍ମିତା ଦେବ ସେମାନଙ୍କ ଦଳୀୟ ପଦରୁ ଇସ୍ତଫା ଦେଇଥିବା ବେଳେ, କାର୍ଯ୍ୟସମିତିରେ ମଧ୍ୟ କିଛି ପରିବର୍ତ୍ତନ କରାଯାଇଛି।
ସୌଗତ ରାୟ ଏବଂ ଜ୍ୟୋତିପ୍ରିୟା ମଲ୍ଲିକଙ୍କୁ କାର୍ଯ୍ୟସମିତିରେ ସାମିଲ କରାଯାଇଥିବା ବେଳେ, କିଛି ନେତାଙ୍କୁ ସଂଗଠନରୁ ବାଦ ଦିଆଯାଇଛି। ଏହି ପରିବର୍ତ୍ତନ ଦଳର ଆଗାମୀ ରାଜନୈତିକ ରଣନୀତିର ଅଂଶ ବୋଲି ମନେ କରାଯାଉଛି।
ରାଜନୈତିକ ମହଳରେ ଏହି ଅଦଳବଦଳକୁ ଟିଏମସିର ଆଭ୍ୟନ୍ତରୀଣ ସଂଗଠନକୁ ସୁଦୃଢ଼ କରିବା ସହିତ ବିଦ୍ରୋହ ଏବଂ ଅସନ୍ତୋଷକୁ ନିୟନ୍ତ୍ରଣ କରିବାର ପ୍ରୟାସ ଭାବେ ଦେଖାଯାଉଛି।