ଭୁବନେଶ୍ଵର: ସ୍ୱଦେଶୀ ଜ୍ଞାନକୌଶଳ ମାଧ୍ୟମରେ ରେଳ ସୁରକ୍ଷାକୁ ସୁଦୃଢ଼ କରିବା ଦିଗରେ ଏକ ପ୍ରମୁଖ ପଦକ୍ଷେପ ସ୍ୱରୂପ, ଭାରତୀୟ ରେଳବାଇ ପୂର୍ବତଟ ରେଳପଥର ୬୩୧ ରୁଟ୍ କିଲୋମିଟରରେ ୨୭୦ କୋଟି ଟଙ୍କା ବ୍ୟୟରେ ‘କବଚ୍’ ବ୍ୟବସ୍ଥାର ସ୍ଥାପନ ପାଇଁ ମଞ୍ଜୁରୀ ପ୍ରଦାନ କରିଛି।
ଏହି ପ୍ରକଳ୍ପ ଅଧୀନରେ ପୂର୍ବତଟ ରେଳପଥର ଛଅଟି ଗୁରୁତ୍ୱପୂର୍ଣ୍ଣ ରେଳ ସେକ୍ସନ ଯେପରିକି, ବାଘୁଆପାଳ–ବୁଢ଼ାପଙ୍କ, ହରିଦାସପୁର–ପାରାଦୀପ, ଖୋର୍ଦ୍ଧା ରୋଡ୍ -ବଲାଙ୍ଗୀର, ନୌପଡା -ଗୁଣୁପୁର, ଲାଞ୍ଜିଗଡ଼ ରୋଡ୍-ଜୁନାଗଡ଼ ଏବଂ ବୋବିଲି-ସାଲୁରୁ ଅନ୍ତର୍ଭୁକ୍ତ ହୋଇଛି।
ସ୍ୱଦେଶୀ ସ୍ୱୟଂଚାଳିତ ଟ୍ରେନ୍ ସୁରକ୍ଷା ପ୍ରଣାଳୀର ସମ୍ପ୍ରସାରଣ
ଏହି ଅନୁମୋଦିତ କାର୍ଯ୍ୟ ଭାରତୀୟ ରେଳପଥର ସମଗ୍ର ରେଳ ନେଟୱର୍କରେ ଏଲ୍ଟିଇ (LTE) ଆଧାରିତ ଯୋଗାଯୋଗ ବ୍ୟବସ୍ଥା ସହିତ କବଚ ସ୍ଥାପନର ବୃହତ୍ କାର୍ଯ୍ୟକ୍ରମର ଏକ ଅଂଶ ଅଟେ।’କବଚ୍’ ହେଉଛି ଭାରତର ସ୍ୱଦେଶୀ ଜ୍ଞାନକୌଶଳରେ ବିକଶିତ ସ୍ୱୟଂଚାଳିତ ଟ୍ରେନ୍ ସୁରକ୍ଷା (ATP) ପ୍ରଣାଳୀ, ଯାହାକି ସିଗନାଲ୍ ଅତିକ୍ରମଣ ଜନିତ ବିପଦ (SPAD), ଅତ୍ୟଧିକ ବେଗ ଏବଂ ଟ୍ରେନ୍ ମୁହାଁମୁହିଁ ଧକ୍କାକୁ ରୋକି ସୁରକ୍ଷା ବୃଦ୍ଧି କରିବା ପାଇଁ ଡିଜାଇନ୍ କରାଯାଇଛି। ଏହି ବ୍ୟବସ୍ଥା ନିରନ୍ତର ଭାବେ ଟ୍ରେନ୍ର ଗତିବିଧି ଉପରେ ନଜର ରଖେ ଏବଂ ଆବଶ୍ୟକ ସ୍ଥଳେ ସ୍ୱୟଂଚାଳିତ ଭାବେ ବ୍ରେକ୍ ପ୍ରୟୋଗ କରିଥାଏ, ଯାହାଦ୍ୱାରା ପରିଚାଳନାଗତ ସୁରକ୍ଷାରେ ଉଲ୍ଲେଖନୀୟ ସୁଧାର ଆସିଥାଏ।
ଉନ୍ନତ ସୁରକ୍ଷା, ବେଗ ଏବଂ ବିଶ୍ୱସନୀୟତା
ଏହି ରୁଟ୍ଗୁଡ଼ିକରେ କବଚ ସ୍ଥାପନ ଦ୍ୱାରା ସ୍ୱୟଂଚାଳିତ ଟ୍ରେନ୍ ସୁରକ୍ଷା ଏବଂ ଧକ୍କା ନିବାରଣ କ୍ଷମତା ଯୋଗାଇ ଟ୍ରେନ୍ ପରିଚାଳନାରେ ଉଚ୍ଚସ୍ତରୀୟ ସୁରକ୍ଷା ହାସଲ କରିବାରେ ସହାୟକ ହେବ। ଏହା ସହିତ, କବଚ ଘନ କୁହୁଡ଼ି ଭଳି ପ୍ରତିକୂଳ ପାଣିପାଗ ପରିସ୍ଥିତିରେ ମଧ୍ୟ ଅଧିକ ସୁରକ୍ଷିତ ଓ ନିର୍ଭରଯୋଗ୍ୟ ଟ୍ରେନ୍ ଚଳାଚଳକୁ ସୁନିଶ୍ଚିତ କରିବ, ଯାହା ଦ୍ୱାରା ସେବାର ନିର୍ଭରଯୋଗ୍ୟତା ଏବଂ ସମୟାନୁବର୍ତ୍ତିତାରେ ଉନ୍ନତି ଆସିବ।
ପୂର୍ବତଟ ରେଳପଥରେ ସୁରକ୍ଷା ଭିତ୍ତିଭୂମିର ସୁଦୃଢ଼ିକରଣ
ଏହି ପ୍ରକଳ୍ପ ଦ୍ୱାରା ପୂର୍ବତଟ ରେଳପଥ ଅଧୀନରେ ଥିବା ଓଡ଼ିଶା ଏବଂ ପଡ଼ୋଶୀ ଅଞ୍ଚଳର ପ୍ରମୁଖ ସେକ୍ସନ ଗୁଡ଼ିକରେ ଯାତ୍ରୀବାହୀ ଓ ମାଲବାହୀ ଟ୍ରେନ୍ ପରିଚାଳନା ଉଭୟକୁ ଉପକୃତ ଲାଭ ମିଳିବ ବୋଲି ଆଶା କରାଯାଉଛି। ଏହା ଉଚ୍ଚ-ଘନତା (high-density) ଏବଂ ରଣନୈତିକ ଭାବରେ ଗୁରୁତ୍ୱପୂର୍ଣ୍ଣ ରୁଟ୍ ଗୁଡ଼ିକରେ କବଚ୍ର ପରିସରକୁ ସମ୍ପ୍ରସାରିତ କରିବା ପାଇଁ ଭାରତୀୟ ରେଳବାଇର ଚାଲିଥିବା ମିଶନ୍କୁ ଅଧିକ ମଜବୁତ କରିବ।