ଗଞ୍ଜାମ, ୨୭/୧୧: (ସମୀକ୍ଷା ବ୍ୟୁରୋ) : ଆଜିର ଶିଶୁ ଆଗାମୀ କାଲିର ଭବିଷ୍ୟତ। ଉତ୍ତମ ସ୍ବାସ୍ଥ୍ୟ ତଥା ଶିକ୍ଷା ଛାତ୍ରଛାତ୍ରୀମାନଙ୍କୁ ଭବିଷ୍ୟତରେ ସଫଳ ଭାବେ ଗଢି ତୋଳିଥାଏ। ସରକାରୀସ୍ତରରେ ଶିକ୍ଷାର ମାନ ବୃଦ୍ଧି ପାଇଁ ବିଶେଷ ପ୍ରଚେଷ୍ଟା କରାଯାଉଛି। ତେବେ ଶିକ୍ଷା ସହିତ ଶିକ୍ଷାର୍ଥୀଙ୍କ ସ୍ବାସ୍ଥ୍ୟକୁ ବିଶେଷ ଧ୍ୟାନ ଦିଆଯାଉଛି। ଗଞ୍ଜାମର ଜିଲ୍ଲାପାଳ ଶିକ୍ଷା ସହ ସ୍ବାସ୍ଥ୍ୟକୁ ଧ୍ୟାନରେ ରଖି ଏକ ଅଭିନବ ପ୍ରୟାସର ଆରମ୍ଭ କରିଛନ୍ତି। ସ୍କୁଲରେ ଶିକ୍ଷା ଦାନ ପାଇଁ ରହିଥିବା ସମୟ ନିର୍ଘଣ୍ଟ ମଧ୍ୟରେ ଏବେ ପାଣି ପିଇବା ଲାଗି ମଧ୍ୟ ସମୟ ନିର୍ଘଣ୍ଟ ସ୍ଥିର ହୋଇଛି। ଏହି ପରିପ୍ରେକ୍ଷୀରେ ‘ପାଣି ପିଅନ୍ତୁ,ସୁସ୍ଥ ରୁହନ୍ତୁ’ କାର୍ଯ୍ୟକ୍ରମ ଜିଲ୍ଲାର ସମସ୍ତ ବିଦ୍ୟାଳୟରେ ଅନୁଷ୍ଠିତ ହୋଇଯାଇଛି। ପୂର୍ବ ନିଦ୍ଧାର୍ରିତ ସମୟ ନିର୍ଘଣ୍ଟରେ ପାଣି ପିଇବା ସକାଶେ ଦିନକୁ ୩ଥର ସ୍ବତନ୍ତ୍ର ବେଲ ଯୋଡି ହୋଇଯାଇଛି। ସୋମବାରରୁ ଶୁକ୍ରବାର ଦିନ ଯଥାକ୍ରମେ ୧୧ଟା ୪୦ମି., ୧ଟା ୩୦ମି. ଏବଂ ୩ଟା ୧୫ମି.ରେ ବେଲ୍ ବାଜିବା ବେଳେ ଶନିବାର ଦିନ ସକାଳ ୮ଟା,୯ଟା ୩୦ମି. ଏବଂ ୧୦ଟା ୫୦ମି. ଯଥାକ୍ରମେ ବେଲ୍ ବାଜିବା ନେଇ ନିର୍ଦ୍ଦେଶ ଜାରୀ ହୋଇଛି।ଯାହା ଫଳରେ ଛାତ୍ରଛାତ୍ରୀ ନିଜେ ସାଥିରେ ନେଉଥିବା ପାଣି ବୋତଲ କିମ୍ବା ବିଦ୍ୟାଳୟରେ ଉପଲବ୍ଧ ଥିବା ପାଣି ପିଇବା ପାଇଁ ବ୍ୟବସ୍ଥା କରାଯାଇଛି।
ଜଳ ହିଁ ଜୀବନ ଅଟେ। ମାନବ ସମେତ ସମସ୍ତ ପ୍ରାଣୀ ଓ ଉଦ୍ଭିଦ ଜୀବନ ଧାରଣ ପାଇଁ ଜଳ ଆବଶ୍ୟକ କରନ୍ତି। ଶରୀରର ଆଭ୍ୟନ୍ତରୀଣ ରାସାୟନିକ ପ୍ରତିକ୍ରିୟା ଓ ରକ୍ତର ପ୍ରମୁଖ ଅଂଶ ଭାବେ କାମ କରିଥାଏ ଜଳ। ଅଧୁନା ସମାଜରେ ଛାତ୍ରଛାତ୍ରୀ ନିଜ ଶରୀରର ସଠିକ୍ ଯତ୍ନ ନନେବା ଓ ଆବଶ୍ୟକ ମୁତାବକ ଜଳ ନ ପିଇବା ଦ୍ବାରା ବିଭିନ୍ନ ପ୍ରକାରର ରୋଗରେ ଆକ୍ରାନ୍ତ ହେବା ସହିତ ସ୍ବାସ୍ଥ୍ୟ କ୍ଷେତ୍ରରେ ବିଭିନ୍ନ ସମସ୍ଯା ପରିଲକ୍ଷିତ ଦେଖାଯାଉଛି।ଯାହା ଫଳରେ ଛାତ୍ରଛାତ୍ରୀ ଶିକ୍ଷା ପ୍ରତି ଉତ୍ସାହ ଓ ସକ୍ରିୟତା ଧିରେଧିରେ ହ୍ରାସ ପାଇବା ଚିତ୍ର ସାମ୍ନାକୁ ଆସୁଛି। ତେଣୁ ଶିକ୍ଷା ସହିତ ଛାତ୍ରଛାତ୍ରୀଙ୍କ ଶାରିରୀକ, ମାନସିକ ସ୍ତରରେ ଉତ୍ତମ ଉତ୍କୃଷ୍ଟ ସୁସ୍ଥ ମନୋବଳ ସୃଷ୍ଟି କରିବା ଉଦ୍ଦେଶ୍ୟରେ ଗଞ୍ଜାମର ଜିଲ୍ଲାପାଳ ବିଜୟ କୁଲାଙ୍ଗେ ବିଦ୍ୟାଳୟରେ ପାଣି ପିଇବା ସମୟ ନିର୍ଘଣ୍ଟ ସ୍ବରୂପ ଏକ ଅଭିନବ କାର୍ଯ୍ୟକ୍ରମ ଆରମ୍ଭ କରିଛନ୍ତି । ଏହି କାର୍ଯ୍ୟକ୍ରମକୁ ବୁଦ୍ଧିଜୀବୀ, ଶିକ୍ଷାବିତ୍, ଅଭିବାବକ୍ ମହଲରେ ବେଶ୍ ପ୍ରଶଂସା କରାଯାଇଛି।