ସୀତାରାମ ଅଗ୍ରଓ୍ବାଲ
ବାଣପୁର : ବାଣପୁର ବ୍ଲକର ଗମ୍ଭାରୀମୁଣ୍ଡା ଗ୍ରାମରେ ପୋଖରୀ ଖୋଳା କାର୍ଯ୍ୟକୁ ନେଇ ଦୁର୍ନୀତି ଅଭିଯୋଗ ହୋଇଛି । ଏନେଇ ଜିଲ୍ଲାପାଳଙ୍କ ନିକଟରେ ଅଭିଯୋଗ ହୋଇଛି । ମିଳିଥିବା ସୂଚନା ଅନୁସାରେ ଗମ୍ଭାରୀମୁଣ୍ଡା ଗ୍ରାମରେ ଶରତ ବରାଳଙ୍କ ନାମରେ ଏନ୍ଆରଜିଏସ୍ ସ୍କିମ୍ ଅନୁଯାୟୀ ‘ମୋ ପୋଖରୀ’ ଖୋଳିବା ନିମେନ୍ତ କାର୍ଯ୍ୟାଦେଶ ମିଳିଥିଲା। କିନ୍ତୁ ଏହି କାର୍ଯ୍ୟରେ ଦୁର୍ନୀତି ହୋଇଥିବାର ଅଭିଯୋଗ ହୋଇଛି ।
ଜେସିବି ଦ୍ବାରା ପୋଖରୀ ଖୋଳା କାର୍ଯ୍ୟକରାଯାଇଥିବାବେଳେ ଜବ୍କାର୍ଡଧାରୀ ବ୍ୟକ୍ତିଙ୍କ ଆକାଉଣ୍ଟକୁ ପଇସା ଯାଉଛି । ଏଭଳି ଘଟଣା ଗମ୍ଭାୀରମୁଣ୍ଡାଠାରେ ଦେଖିବାକୁ ମିଳିଛି । ମିଳିଥିବା ସୂଚନା ଅନୁସାରେ ମୋ’ ପୋଖରୀ କାର୍ଯ୍ୟ ପାଇଁ ସରକାରଙ୍କ ଆଇନଗତ ଅନୁସାରେ ଯାହା ନିୟମ କରାଯାଇଅଛି, ସେହି ଅନୁସାରେ କାର୍ଯ୍ୟ କରାଯାଇନାହିଁ ବୋଲି ଅଭିଯୋଗ ହୋଇଛି । ପୋଖରୀ ଖୋଳିବା କାର୍ଯ୍ୟ ପାଇଁ 3,50,000.00 ଅନୁଦାନ କରାଯାଇଥିବାବେଳେ ବାଣପୁର ବ୍ଲକ ଜେଇ, ପିଇଓ ଏବଂ ଜିଆରଏସଙ୍କ ନିର୍ଦ୍ଦେଶ କ୍ରମେ ଜେସିବି ଲଗାଇ ପୋଖରୀ ଖେଳାଯାଇଅଛି । କୌଣସି ଜବ୍କାର୍ଡଧାରୀ ବ୍ୟକ୍ତିମାନେ ଏହି କାର୍ଯ୍ୟରେ ନିଯୁକ୍ତି ହୋଇନଥିବାବେଳେ ଉକ୍ତ ପୋଖରୀ ଖୋଳିବା ପାଇଁ ଟ. 3,50,000.00ରୁ 55.000.00 ଟଙ୍କା ସେହି ବ୍ୟକ୍ତିମାନଙ୍କ ଆକାଉଣ୍ଟକୁ ଯାଇଅଛି । ସରକାରୀ ଅର୍ଥକୁ ଏପରି ହରିଲୁଟ୍ କରାଯାଉଥିବା ନେଇ ଏବେ ଅଭିଯୋଗ ହୋଇଛି । ମେସିନ୍ ଦ୍ବାରା କାର୍ଯ୍ୟ କରାଯାଇ ସରକାରୀ ନିୟମର ଖୋଲାଖୋଲି ଉଲ୍ଲଂଘନ ହେଉଥିବାର ଅଭିଯୋଗ ହୋଇଛି ।
ଏହି ଘଟଣାକୁ ନେଇ ବିଡିଓଙ୍କୁ ଅବଗତ କରାଯାଇଥିଲେ ମଧ୍ୟ ଏହା ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ତେବେ ସମ୍ପୃକ୍ତ ଘଟଣାର ତଦନ୍ତ କରାଯାଇ ଏହାର ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଜିଲ୍ଲାପାଳଙ୍କ ନିକଟରେ ଦାବି କରାଯାଇଛି ।