ମୁମ୍ବାଇ : ମୁମ୍ବାଇରୁ ଏକ ହସ୍ପିଟାଲରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ଗତ 14 ଦିନ ଧରି ନିଖୋଜ ଥିବା କରୋନା ସଂକ୍ରମିତଙ୍କ ମୃତଦେହ ହସ୍ପିଟାଲର ଶୌଚାଳୟରୁ ଉଦ୍ଧାର ହୋଇଛି । ମୃତବ୍ୟକ୍ତିଙ୍କ ବୟସ 27 ବର୍ଷ ହୋଇଥିବାବେଳେ ସେ ଟିବିରେ ମଧ୍ୟ ପୀଡ଼ିତ ଥିଲେ। ଏହି ଘଟଣାକୁ ନେଇ ବିଏମ୍ସି ଉଚ୍ଚସ୍ତରୀୟ ଯାଞ୍ଚ କରିବାକୁ ଆଦେଶ ଦେଇଛନ୍ତି । ସେହି ଓ୍ବାର୍ଡରେ କାମ କରୁଥିବା ସମସ୍ତ ହସ୍ପିଟାଲ କର୍ମଚାରୀଙ୍କୁ ନୋଟିସ୍ ମଧ୍ୟ ଜାରି କରାଯାଇଛି ।
ମିଳିଥିବା ସୂଚନା ଅନୁସାରେ ଅକ୍ଟୋବର 18 ତାରିଖରେ ଜଣେ ଓ୍ବାର୍ଡ ବୟ ହସ୍ପିଟାଲର ଶୌଚାଳୟର ଦୁର୍ଗନ୍ଧ ଆସୁଥିବାର ସୂଚନା ଦେଇଥିଲେ । ଏହାପରେ ହସ୍ପିଟାଲର ଶୌଚାଳୟ ଚଟାଣରୁ ମୃତଦେହ ମିଳିଥିଲା ।
ତେବେ ଏଠାରେ ପ୍ରଶ୍ନ ଉଠୁଛି ଯେ, ରୋଗୀମାନେ ପ୍ରତିଦିନ ସେହି ଶୌଚାଳୟକୁ ବ୍ୟବହାର କରୁଥିବାବେଳେ ମୃତଦେହ ପଡିଥିବାର କିପରି ଜଣାପଡିନଥିଲା । ମୃତ ବ୍ୟକ୍ତି ଜଣକ ଟିବିରେ ପୀଡ଼ିତଥିଲେ ଏହା ପରେ ସେ କରୋନା ସଂକ୍ରମିତ ହୋଇଥିଲେ । ତେବେ ଅକ୍ଟୋବର 4 ତାରିଖରେ ଆକ୍ରାନ୍ତ ଗାଏବ ହୋଇଥିବାର ମାମଲା ଦାଏର ହୋଇଥିଲା ।
ଏହି ଘଟଣାକୁ ନେଇ ଜନତା ଦଳର ପୂର୍ବତନ ସାଂସଦ କିରୀଟି ସୌମ୍ୟା ହସ୍ପିଟାଲ ଗସ୍ତ କରିବା ସହ ବରିଷ୍ଠ ସ୍ବାସ୍ଥ୍ୟ ଅଧିକାରୀଙ୍କ ସହ ସାକ୍ଷାତ କରିଛନ୍ତି । ତେବେ 14 ଦିନ ଧରି ହସ୍ପିଟାଲର ଶୌଚାଳୟରେ ମୃତଦେହ ପଡିଥିବା ସତ୍ତ୍ବେ ଏହା ସମ୍ପର୍କରେ ହସ୍ପିଟାଲ କର୍ତ୍ତୃପକ୍ଷ କିପରି ଜାଣିପାରିନଥିଲେ ସେନେଇ ସନ୍ଦେହ ସୃଷ୍ଟି ହୋଇଛି । (ଏଜେନ୍ସି)