ନୂଆଦିଲ୍ଲୀ: ଦେଶରେ ମାର୍ଚ୍ଚ ମାସରେ ଜିଏସଟି ସଂଗ୍ରହ ଏପର୍ଯ୍ୟନ୍ତ ସମସ୍ତ ରେକର୍ଡ ଭାଙ୍ଗିଛି, ଗତ ପାଞ୍ଚ ବର୍ଷ ମଧ୍ୟରେ ଏହା ସର୍ବାଧିକ ହୋଇଛି। ମାର୍ଚ୍ଚ ମାସରେ ଜିଏସଟି ସଂଗ୍ରହ ୧,୪୨,୦୯୫ କୋଟି ଟଙ୍କା ହୋଇଛି, ଯାହା ଅର୍ଥନୀତିରେ ପୁନରୁଦ୍ଧାର ଏବଂ ଶିଳ୍ପ ଗତି ପୁଣିଥରେ ଫେରି ଆସିବର ଏକ ଦୃଢ ସଙ୍କେତ ଦେଇଛି। ସରକାରଙ୍କ ଦ୍ଵାରା ପ୍ରକାଶିତ ତଥ୍ୟ ଅନୁଯାୟୀ, ଜାନୁୟାରୀ ୨୦୨୨ରେ ଜିଏସଟି ସଂଗ୍ରହ ରେକର୍ଡ ୧,୪୦,୯୮୬ କୋଟି ଥିଲା। କିନ୍ତୁ ମାର୍ଚ୍ଚର ରାଜସ୍ୱ ଦୁଇମାସ ପୂର୍ବେ ଏହି ରେକର୍ଡକୁ ଭାଙ୍ଗି ଦେଇଛି। ତେବେ ଅର୍ଥନୈତିକ ବିଶେଷଜ୍ଞମାନେ ବିଶ୍ଵାସ କରନ୍ତି ଯେ, ଆସନ୍ତା ମାସରେ ଜିଏସଟି ସଂଗ୍ରହ ଉପରେ ଏହାର ପ୍ରଭାବ ପଡିପାରେ। କାରଣ ଫେବୃଆରୀ ୨୪ ତାରିଖରେ ୟୁକ୍ରେନ ଉପରେ ଋଷର ଆକ୍ରମଣ ପରେ ଅର୍ଥନୀତି ଉପରେ ଖରାପ ପ୍ରଭାବ ପଡିପାରେ।
ଆଜି ଅର୍ଥ ମନ୍ତ୍ରଣାଳୟ ଜିଏସଟି ସମ୍ବନ୍ଧୀୟ ତଥ୍ୟ ପ୍ରକାଶ କରିଛି। ମାର୍ଚ୍ଚ ୨୦୨୨ରେ ମୋଟ ଜିଏସଟି ସଂଗ୍ରହ ୧,୪୨ ଲକ୍ଷ କୋଟି ଟଙ୍କା ରହିଛି। ଏଥିରେ ସିଜିଏସଟି ୨୫,୮୩୦ କୋଟି, ଏସଜିଏସଟି ୩୨,୩୭୮ କୋଟି ଏବଂ ଆଇଜିଏସଟି ୭୪,୪୭୦ କୋଟି ଟଙ୍କା ରହିଛି। ଆଇଜିଏସଟି ରେ ୩୯,୧୩୧ କୋଟି ଟଙ୍କା ସାମଗ୍ରୀ ଆମଦାନୀରୁ ସଂଗ୍ରହ କରାଯାଇଛି। ସେସରୁ ସଂଗ୍ରହ ୯୪୧୭ କୋଟି ଟଙ୍କା ହୋଇଛି। ଗତ ବର୍ଷ ତୁଳନାରେ ଅର୍ଥାତ୍ ମାର୍ଚ୍ଚ ୨୦୨୧ରେ ଜିଏସଟି ସଂଗ୍ରହରେ ୧୫ ପ୍ରତିଶତ ବୃଦ୍ଧି ଘଟିଛି। ଅର୍ଥ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ, ରାଜସ୍ୱ ସଂଗ୍ରହରେ ଜିଏସଟି ପରିଷଦ ଦ୍ୱାରା ଟ୍ୟାକ୍ସ ସ୍ଲାବରେ କରାଯାଇଥିବା ସଂସ୍କାର ମଧ୍ୟ ପ୍ରତିଫଳିତ ହୋଇଛି। ଏହା ସହିତ ଟିକସ ଫାଙ୍କିବା ମାମଲାରେ କଠୋରତାର ପ୍ରଭାବ ମଧ୍ୟ ଦେଖାଯାଉଛି।
ସରକାର କହିଛନ୍ତି ଯେ, କେବଳ ମାର୍ଚ୍ଚ ମାସରେ ୬.୯୧ କୋଟି ଇ-ୱେ ବିଲ ସଂଗ୍ରହ ହୋଇଛି, ଯାହା ଜାନୁଆରୀ ୨୦୨୨ରେ ୬.୮୮ କୋଟିରୁ ଅଧିକ। କରୋନା ମହାମାରୀ ସମ୍ବନ୍ଧୀୟ ପ୍ରତିବନ୍ଧକ ସମାପ୍ତ ହେବା ସହିତ ଏହା ଶିଳ୍ପ କାର୍ଯ୍ୟକଳାପରେ ଏକ ତୀବ୍ର ଉନ୍ନତି ସୂଚାଉଛି। ଆକଳନଗୁଡିକ ବିଷୟରେ କହିବାକୁ ଗଲେ, ଜୁନ୍ ୨୦୨୧ ଠାରୁ ଜିଏସଟି ସଂଗ୍ରହ କ୍ରମାଗତ ଭାବରେ ଏକ ଲକ୍ଷ କୋଟିରୁ ଅଧିକ ଟଙ୍କା ହୋଇଆସୁଛି ଏବଂ ସେହି ଦିନଠାରୁ ଏହା କ୍ରମାଗତ ଭାବରେ ବୃଦ୍ଧି ପାଉଛି। ଗତ ନଅ ମାସ ମଧ୍ୟରେ ଜିଏସଟି ରାଜସ୍ୱ ପ୍ରାୟ ୧୨ ଲକ୍ଷ ୬୦ ହଜାର କୋଟି ଟଙ୍କା ପାଖାପାଖି ରହିଛି। ଯଦି ଆମେ ୨୦୨୨ ଆର୍ଥିକ ବର୍ଷ ବିଷୟରେ କଥା ହେବା, ତେବେ ଜିଏସଟିର ମୋଟ ସଂଗ୍ରହ ୧୪.୩୮ ଲକ୍ଷ କୋଟି ଟଙ୍କା ହୋଇଛି, ଯାହା ୨୦୨୧ ଆର୍ଥିକ ବର୍ଷ ତୁଳନାରେ ୩୦ ପ୍ରତିଶତ ଅଧିକ। ୨୦୨୧ ଆର୍ଥିକ ବର୍ଷରେ ଏହା ୧୧.୩୭ ଲକ୍ଷ କୋଟି ଟଙ୍କା ଥିଲା।