ଭୁବନେଶ୍ବର: ବରଗଡ଼ ଜିଲ୍ଲାରେ ଏକ ଅତି ଚାଞ୍ଚଲ୍ୟକର ଏବଂ ନିର୍ଦ୍ଦୟ ହତ୍ୟାକାଣ୍ଡ ଘଟିଯାଇଛି। ନିଜ ଜୀବନସାଥୀକୁ ସ୍ୱାମୀ ନିଷ୍ଟୁର ଭାବେ ପିଟି ପିଟି ମାରିଦେଇଥିବା ଅଭିଯୋଗ ହୋଇଛି। ଏହି ବର୍ବରକାଣ୍ଡ ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ସାଙ୍ଗକୁ ଶୋକର ଛାୟା ଖେଳିଯାଇଛି।
ସୂଚନା ଅନୁଯାୟୀ, ବରଗଡ଼ ଜିଲ୍ଲା ଅତାବିରା ଥାନା ଅନ୍ତର୍ଗତ ଅମ୍ଳିପାଲି ପଞ୍ଚାୟତର ଗଡ଼ତିଆ ଟିକ୍ରା ଗାଁରେ ଏହି ସମ୍ବେଦନଶୀଳ ଘଟଣା ଘଟିଛି। ଗ୍ରାମର ରାଜକୁମାର ଖଡ଼ିଆ ଓ ତାଙ୍କ ପତ୍ନୀ ଭାଗ୍ୟବତୀ ଖଡ଼ିଆଙ୍କ ମଧ୍ୟରେ କୌଣସି କାରଣକୁ ନେଇ କଳହ ହୋଇଥିଲା। ଏହି କଳହ ଧୀରେ ଧୀରେ ସୀମା ଡେଇଁ ଉଗ୍ର ରୂପ ନେଇଥିଲା। ଉତ୍ତ୍ୟକ୍ତ ହୋଇ ସ୍ୱାମୀ ରାଜକୁମାର ନିଜର ଆପାତତଃ ନିୟନ୍ତ୍ରଣ ହରାଇ ପତ୍ନୀ ଭାଗ୍ୟବତୀଙ୍କୁ ନିଷ୍ଠୁର ଭାବେ ଆକ୍ରମଣ କରିଥିଲେ। ସ୍ୱାମୀର ଶାସନ ଓ ମାଡ଼ସହି ନପାରି ଘଟଣାସ୍ଥଳରେ ହିଁ ଭାଗ୍ୟବତୀ ଅଚେତ ହୋଇପଡ଼ିବା ସହ ତାଙ୍କର ପ୍ରାଣବାୟୁ ଉଡ଼ିଯାଇଥିଲା। ପରିବାର ଓ ସ୍ଥାନୀୟ ଲୋକଙ୍କଠାରୁ ଖବର ପାଇ ଅତାବିରା ଥାନା ପୁଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ତଦନ୍ତ ପ୍ରକ୍ରିୟା ଆରମ୍ଭ କରିଛି। ପୁଲିସ ପକ୍ଷରୁ ଘଟଣାସ୍ଥଳରୁ ଆବଶ୍ୟକ ତଥ୍ୟ, ଆକ୍ରମଣରେ ବ୍ୟବହୃତ ସାମଗ୍ରୀ ଓ ଅନ୍ୟାନ୍ୟ ପ୍ରମାଣ ସଂଗ୍ରହ କରାଯାଉଛି। ଏଥିସହିତ ଗାଁର ଲୋକଙ୍କ ସମେତ ପରିବାରବର୍ଗଙ୍କୁ ପୁଲିସ ପଚରାଉଚରା ଜାରି ରଖିଛି।
ଏହି ହତ୍ୟାକାଣ୍ଡ ପଛର ପ୍ରକୃତ କାରଣ କ’ଣ ଏବଂ କେଉଁ ପରିସ୍ଥିତିରେ ସ୍ୱାମୀ ଏପରି ଚରମ ନିଷ୍ପତ୍ତି ନେଲା, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଏହି ଘଟଣାକୁ ନେଇ ଗଡ଼ତିଆ ଟିକ୍ରା ଗାଁରେ ଆତଙ୍କ ଓ ଭୟର ବାତାବରଣ ସୃଷ୍ଟି ହୋଇଛି। ପୁଲିସର ସମ୍ପୂର୍ଣ୍ଣ ତଦନ୍ତ ସରିବା ପରେ ଏବଂ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ହତ୍ୟାକାଣ୍ଡର ପ୍ରକୃତ କାରଣ ସାମ୍ନାକୁ ଆସିବ ବୋଲି ଥାନା ଅଧିକାରୀ ସୂଚନା ଦେଇଛନ୍ତି।