ବର୍ତ୍ତମାନ ସୁଦ୍ଧା ଦାମ ରାଉତ ନାମାଙ୍କନ ପତ୍ର ଦାଖଲ ନ କରିବା କାରଣ କଣ ? ତାଙ୍କର ଭୂମିକା ନେଇ ଜଗତସିଂହପୁର ଜିଲ୍ଲାରେ ସନ୍ଦେହ

ସମୀକ୍ଷା ବ୍ୟୁରୋ

ବରିଷ୍ଠ ନେତା ଦାମୋଦର ରାଉତଙ୍କୁ ନେଇ ବର୍ତ୍ତମାନ ସନ୍ଦେହ ଘନିଭୂତ ହେବାରେ ଲାଗିଛି। କାରଣ ବର୍ତ୍ତମାନ ଦାମ କଣ କରିବେ ସେ ନେଇ କିଛି ନିଷ୍ପତି ନେଇପାରୁ ନାହାଁନ୍ତି। ବିଜେପିରୁ ଟିକେଟ ପାଇଥିଲେ ମଧ୍ୟ ସେ ଏ ପର୍ଯ୍ୟନ୍ତ ନା ନାମାଙ୍କନ ଦାଖଲ କରିଛନ୍ତି ନା ବିଜେପି କର୍ମିଙ୍କ ସହିତ ଆଲୋଚନା କରୁଛନ୍ତି। ଏପରି ଦ୍ବଦଲ୍ୟମାନ ସ୍ଥିତିରେ ପଡିଛନ୍ତି ଦାମୋଦର ରାଉତ। ଗୋଟିଏ ପଟେ ପୁଅ ସମ୍ବିତ ରାଉତରାୟ ଅନ୍ୟପଟେ ବିଜେପି ଦଳ ଏବଂ ତାଙ୍କର ପ୍ରାର୍ଥୀତ୍ବ, ଏସବୁ ଭିତରେ ଦାମ ପେଶି ହେବାରେ ଲାଗିଛନ୍ତି। ଦାମ ବିଜେପିରେ ଯୋଗଦେବା ପରେ ସେ ଗୋଟିଏ ଗୁଳିରେ ଦୁଇଟି ଶିକାର କରି ଦେଇଛନ୍ତି ସତ, ହେଲେ ତାହା ତାଙ୍କ ପାଇଁ ଲାଭଦାୟ ସାବ୍ୟସ୍ତ ହୋଇପାରୁ ନାହିଁ । ପ୍ରଥମତଃ ସେ ବାଲିକୂଦା ଏରସମାର ବିଧାୟକ ଟିକେଟ ହାସଲ କରିଥିବା ବେଳେ ଅନ୍ୟପଟେ ସେ ଦଳର ପ୍ରଚାର କମିଟ ଦାୟିତ୍ବ ମଧ୍ୟ ଦିଆଯାଇଛି। ନିଜ ନିର୍ବାଚନ ମଣ୍ଡଳି ସହ ରାଜ୍ୟର ଅନ୍ୟସ୍ଥାନକୁ ମଧ୍ୟ ସେ ପ୍ରଚାରରେ ଯିବା କଥା। ହେଲେ ଟିକେଟ ମିଳିବା ପରେ ସେ ବର୍ତ୍ତମାନ ଯେପରି ସକ୍ରିୟ ହେବା କଥା ତାହା ପରିଲକ୍ଷିତ ହେଉନାହିଁ। ପ୍ରକୃତ କଥା ହେଲା ସେ ଭାବି ଥିଲେ ଯେ, ବିଜେପିରେ ଯୋଗଦେବା ପରେ ବିଜେଡି ତାଙ୍କ ପରିବାରକୁ ସଂପୂର୍ଣ୍ଣ ଭୂଲିଯିବ। ଯାହାଦ୍ବାରା ସେ ଅନାୟସରେ ବିଜେପି ପାଇଁ ପ୍ରଚାର କରିପାରିବେ। ହେଲେ ନବୀନ ଯେଉଁ ଦୁଇଟି ମାଷ୍ଟର ଷ୍ଟ୍ରୋକ ଖେଳିଲେ ତାହା ତାଙ୍କ ପାଇଁ ବର୍ତ୍ତମାନ ଅଡୁଆ ପରିସ୍ଥିତି ସୃଷ୍ଟି କରିଦେଇଛି।

ବିଜେଡି ସୁପ୍ରିମ ନବୀନ ପଟ୍ଟନାୟକ ତାଙ୍କ ପୁଅ ସମ୍ବିତ ରାଉତରାୟଙ୍କୁ ଟିକେଟ ଦେଇ ପ୍ରଥମ ମାଷ୍ଟର ଷ୍ଟ୍ରୋକ ଖେଳିଛନ୍ତି। ନବୀନ ଦାମଙ୍କ ଗଡ ପାରାଦ୍ବୀପରେ ତାଙ୍କ ପୁଅଙ୍କୁ ଟିକେଟ ଦେଲେ। ଆଉ ଏକ ଘଟଣା ହେଲା ଦାମଙ୍କ ପତ୍ନୀଙ୍କ ବିୟୋଗ ସମୟରେ ନିଜେ ନବୀନ ତାଙ୍କ ବାସଭବନକୁ ଯାଇ ଶେଷ ଦର୍ଶନ କରିଥିଲେ। ଏହି ଦୁଇ ଘଟଣା ପରେ ଦାମଙ୍କ ମନରେ କୁଆଡେ ପରିବର୍ତ୍ତନ ଆସିଯାଇଛି ବୋଲି ଶୁଣାଯାଉଛି। ପରିସ୍ଥିତି ଏପରି ହୋଇଛି ଯେ, ବର୍ତ୍ତମାନ ବିଜେଡି ବିରୋଧରେ ସେ ପ୍ରଚାର କରିବା କାହିଁକି କେଉଠି ତାଙ୍କ ବିବେକ ବାଧା ଦେଉଛି। ସେ ନେଇ ବର୍ତ୍ତମାନ ଦାମ କୁଆଡେ ମାନସ ମନ୍ଥନ କରୁଛନ୍ତି ବୋଲି ତାଙ୍କ ନିକଟତମ ମହଲରୁ ଜଣାପଡିଛି।

ବର୍ତ୍ତମାନ ସବୁ ନେତା ଦଳୀୟ ଟିକେଟ ମିଳିବା ପରେ ସେମାନେ ବୈଠକ କରିବାଠାରୁ ଆରମ୍ଭ କରି ପ୍ରଚାର କାର୍ଯ୍ୟ ଜୋର କରିସାରିଲେଣି। ହେଲେ ଦାମୋଦର ରାଉତଙ୍କୁ ଟିକେଟ ମିଳିବା ପରେ ସେ ନାଁ ବିଜେପି କର୍ମିଙ୍କ ସହିତ କଥା ହେଉଛନ୍ତି ନା ସେ କର୍ମିଙ୍କୁ ଡାକି ବୈଠକ କରୁଛନ୍ତି। ଏପରି ସ୍ଥିତିରେ ଏରସମା ବାଲିକୂଦା ବିଜେପି କର୍ମିମାନେ ମଧ୍ୟ ବଡ ଅଡୁଆ ପରିସ୍ଥିତିରେ ପଡିଯାଇଛନ୍ତି। ଭିତିରିଆ ଖବର ଅନୁସାରେ ଦାମ ବର୍ତ୍ତମାନ ନିଜ କଥା ଛାଡି ପୁଅ ପାଇଁ କୁଆଡେ କର୍ମିମାନଙ୍କ ସହିତ ଅଲୋଚନା କରୁଥିବାର ଜଣାପଡିଛି। ସମ୍ବିତ କିପରି ନିଜ ଗଡରେ ସ୍ଥିତି ବଜାଇ ରଖି ବହୁ ଭୋଟରେ ଜିତିବେ ସେଥିପାଇଁ ଦାମ କୁଆଡେ ଗୁପ୍ତ ମନ୍ତ୍ରଣା କରୁଥିବାର ମଧ୍ୟ ଜଣାପଡିଛି। ତେବେ ସମ୍ବିତ 8 ତାରିଖରେ ପ୍ରାର୍ଥୀ ପତ୍ର ଦାଖଲ କରିବା ଭିତରେ ଦାମଙ୍କ ଭୂମିକା କଣ ରହିବ ତାହା ସ୍ପଷ୍ଟ ହେବ ବୋଲି ଜଣାପଡିଛି।

( ମୋବାଇଲରେ ଫାଟଫଟ ଖବର ଜାଣିବା ପାଇଁ ପ୍ଲେଷ୍ଟୋରକୁ ଯାଇ ଡାଉନଲୋଡ କରନ୍ତୁ sankhipta app )