ନୂଆଦିଲ୍ଲୀ: ସୁପ୍ରିମକୋର୍ଟଙ୍କୁ କହିଲେ କେନ୍ଦ୍ର ସରକାର-ଜନମତ ନେବାକୁ ୪ ସପ୍ତାହ ଦରକାର
ନୂଆଦିଲ୍ଲୀ: ସ୍କୁଲ ଛାତ୍ରୀମାନଙ୍କୁ ମାଗଣା ସାନିଟାରି ପ୍ୟାଡ ବଣ୍ଟନ ଯୋଜନା ପାଇଁ ଏକ ଜାତୀୟ ନୀତି ପ୍ରସ୍ତୁତ କରାଯାଇଛି। କେନ୍ଦ୍ର ସରକାର ସୋମବାର ସୁପ୍ରିମକୋର୍ଟଙ୍କୁ ଏହି ସୂଚନା ଦେଇଛନ୍ତି। ଏଥିସହ ସାଧାରଣ ଲୋକଙ୍କ ମତାମତ ନେବା ପାଇଁ କୋର୍ଟଙ୍କୁ ୪ ସପ୍ତାହ ସମୟ ମାଗିଛନ୍ତି।
ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କେନ୍ଦ୍ର ସରକାରଙ୍କୁ କହିଛନ୍ତି ଯେ ଛାତ୍ରୀମାନଙ୍କୁ ସାନିଟାରୀ ନାପକିନ୍ ବଣ୍ଟନ ପ୍ରକ୍ରିୟା ସମାନ ହେବା ଉଚିତ। ଦେଶର ସମସ୍ତ ସରକାରୀ ଓ ଆବାସିକ ବିଦ୍ୟାଳୟରେ ବାଳିକାଙ୍କ ସଂଖ୍ୟା ଅନୁପାତରେ ଶୌଚାଳୟ ନିର୍ମାଣ ପାଇଁ ଏକ ଜାତୀୟ ମଡେଲ ପ୍ରସ୍ତୁତ କରିବାକୁ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।
ଏପ୍ରିଲ ୧୦ ତାରିଖରେ ଶୁଣାଣିବେଳେ ସୁପ୍ରିମକୋର୍ଟ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ଏକ ସମାନ ନୀତି ପ୍ରସ୍ତୁତ କରିବାକୁ କହିଥିଲେ। ଏଥିପାଇଁ କୋର୍ଟ ୪ ସପ୍ତାହ ସମୟ ଦେଇଥିଲେ। ତେବେ ପ୍ରାୟ ୭ ମାସ ପରେ କେନ୍ଦ୍ର ଏହି ନୀତି ପ୍ରସ୍ତୁତ କରିବାରେ ସକ୍ଷମ ହୋଇଛି।
ଏହି ଜନସ୍ୱାର୍ଥ ମାମଲାରେ ଝିଅମାନଙ୍କ ପାଇଁ ମାଗଣା ପ୍ୟାଡ ଦାବି କରାଯାଇଥିଲା
ସାମାଜିକ କର୍ମୀ ଜୟା ଠାକୁର ସୁପ୍ରିମକୋର୍ଟରେ ଏକ ଜନସ୍ୱାର୍ଥ ମାମଲା ଦାୟର କରି ଝିଅମାନଙ୍କ ସ୍ୱାସ୍ଥ୍ୟ ସୁରକ୍ଷାକୁ ନେଇ ଚିନ୍ତା ପ୍ରକଟ କରିଥିଲେ। ପିଟିସନରେ ଦର୍ଶାଯାଇଥିଲା ଯେ ଋତୁସ୍ରାବ ଜନିତ ସମସ୍ୟା କାରଣରୁ ଅନେକ ଝିଅ ସ୍କୁଲ ଛାଡ଼ି ଦିଅନ୍ତି କାରଣ ସେମାନଙ୍କ ପରିବାର ପାଖରେ ପ୍ୟାଡରେ ଖର୍ଚ୍ଚ କରିବା ପାଇଁ ଟଙ୍କା ନ ଥାଏ ଏବଂ ସେହି ଦିନଗୁଡିକରେ ସ୍କୁଲ ଯିବା ପାଇଁ ପୋଷାକ ବ୍ୟବହାର କରିବାଦ୍ୱାରା ଅସୁବିଧା ହୋଇଥାଏ।
ସ୍କୁଲରେ ଝିଅମାନଙ୍କ ପାଇଁ ମାଗଣା ପ୍ୟାଡର ସୁବିଧା ମଧ୍ୟ ନାହିଁ। ଏହା ସେମାନଙ୍କ ପାଠପଢ଼ାକୁ ପ୍ରଭାବିତ କରୁଛି। ଖାଲି ସେତିକି ନୁହେଁ ସ୍କୁଲରେ ବ୍ୟବହୃତ ପ୍ୟାଡ ନିଷ୍କାସନ ପାଇଁ କୌଣସି ସୁବିଧା ନ ଥିବାରୁ ଝିଅମାନେ ଋତୁସ୍ରାବ ସମୟରେ ସ୍କୁଲ ଯାଇପାରୁନାହାନ୍ତି।
ସାନିଟାରୀ ପ୍ୟାଡ ଭେଣ୍ଡିଂ ମେସିନର ଖର୍ଚ୍ଚର ବିବରଣୀ ମାଗିଥିଲେ ସୁପ୍ରିମକୋର୍ଟ
ଏପ୍ରିଲ ୧୦ରେ ଶୁଣାଣି ସମୟରେ ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼, ଜଷ୍ଟିସ ପିଏସ ନରସିଂହ ଏବଂ ଜଷ୍ଟିସ ଜେବି ପାର୍ଦିୱାଲାଙ୍କୁ ନେଇ ଗଠିତ ଖଣ୍ଡପୀଠ ବିଦ୍ୟାଳୟରେ ବାଳିକା ଶୌଚାଳୟର ଉପଲବ୍ଧତା ଏବଂ ସାନିଟାରୀ ପ୍ୟାଡ ଯୋଗାଣ ସମ୍ପର୍କରେ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳମାନଙ୍କଠାରୁ ତଥ୍ୟ ମାଗିଥିଲେ। ଏଥିସହ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକ ସାନିଟାରୀ ପ୍ୟାଡ ଓ ସାନିଟାରି ପ୍ୟାଡ ଭେଣ୍ଡିଂ ମେସିନ୍ ପାଇଁ ହୋଇଥିବା ଖର୍ଚ୍ଚର ବିବରଣୀ ଦେବାକୁ କୁହାଯାଇଛି।
ଜୁଲାଇ ୨୪ ରେ ଶୁଣାଣି ସମୟରେ ଅଦାଲତ ସେହି ରାଜ୍ୟଗୁଡ଼ିକୁ ଚେତାବନୀ ଦେଇଥିଲେ ଯେଉଁମାନେ ମାଗଣା ସାନିଟାରୀ ନାପକିନ୍ ଯୋଗାଇବା ପାଇଁ ଏକ ସମାନ ଜାତୀୟ ନୀତି ପ୍ରଣୟନ କରିବା ନେଇ କେନ୍ଦ୍ର ନିକଟରେ ଏପର୍ଯ୍ୟନ୍ତ ଜବାବ ଦାଖଲ କରିନାହାଁନ୍ତି। ଅଗଷ୍ଟ ୩୧ ସୁଦ୍ଧା ଜବାବ ନ ଦେଲେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୋର୍ଟ କହିଥିଲେ।
