କେଦାର ମିଶ୍ର
ଯଦି ବରଗଡ ଲୋକସଭା ସଦସ୍ୟ ସୁରେଶ ପୂଜାରୀଙ୍କ କଥାକୁ ବିଶ୍ଵାସ କରାଯାଏ ତାହେଲେ ଦେଶର ଦୀର୍ଘତମ ମାଟିବନ୍ଧ ହୀରାକୁଦ ବିପଜ୍ଜନକ ସ୍ଥିତିରେ ରହିଛି। ଗତକାଲି ଅର୍ଥାତ ୨ ଅଗଷ୍ଟ ଦିନ ଲୋକସଭାରେ ବନ୍ଧ ସୁରକ୍ଷା ବିଲ-୨୦୧୯ ପ୍ରସଙ୍ଗରେ ଆଲୋଚନା କରି ବରଗଡର ବିଜେପି ସାଂସଦ ସୁରେଶ ପୂଜାରୀ ଗୋଟେ ଆତଙ୍କଜନକ କଥା କହିଛନ୍ତି। ବିଲ ର ପ୍ରାବଧାନ ବା ବ୍ୟବସ୍ଥା ଉପରେ କିଛି ନକହି ଶ୍ରୀ ପୂଜାରୀ ହୀରାକୁଦ ନଦୀବନ୍ଧ ଏକ ପ୍ରକାର ଭାଙ୍ଗିଯିବା ଅବସ୍ଥାରେ ରହିଛି ବୋଲି କହିଥିଲେ। କେଉଁ ସୂତ୍ର ଓ ତଥ୍ୟ ଆଧାରରେ ସେ ଏ କଥା କହୁଛନ୍ତି, ତାହା ମଧ୍ୟ ଆମକୁ ଜଣାନାହିଁ। ସୁରେଶ ପୂଜାରୀଙ୍କ ନିଜ ଭାଷାରେ- I think, the Hirakud dam is dying a natural death. So, it needs immediate repairing. Unless it is repaired this dam may collapsed at any time. ଏହା ସହିତ ସାଂସଦ ମହାଶୟ ଆହୁରି ମଧ୍ୟ କହିଛନ୍ତି ଯେ- “ବର୍ଷାଦିନରେ ମୋ ନିର୍ବାଚନ ମଣ୍ଡଳୀର ଲୋକମାନେ ଶୋଇପାରୁନାହାନ୍ତି। ସେମାନଙ୍କୁ ଲାଗୁଛି, ଏହା କୌଣସି ମୁହୂର୍ତ୍ତରେ ଭାଙ୍ଗି ପଡିବ। ୧୯୮୨ରେ ଏମିତି ଗୁଜବ ହୋଇଥିବାରୁ ଲୋକେ ପଳାୟନ କରିବା ଆରମ୍ଭ କରିଥିଲେ। ଏମିତି ଆଗରୁ ଦୁଇଥର ହେଲାଣି। ଲୋକଙ୍କର ଏହି ବନ୍ଧ ଉପରେ କୌଣସି ବିଶ୍ଵାସ ନାହିଁ”। ବଡ ସାଂଘାତିକ କଥା- ହୀରାକୁଦ କୁ ନେଇ ଲୋକଙ୍କ ମନରେ ଏତେ ଭୟ ରହିଛି ଅଥଚ ଏହାର କୌଣସି ଆଲୋଚନା ନାହିଁ! ଯଦି ସତରେ ହୀରାକୁଦର ସ୍ଥାୟୀତ୍ଵକୁ ନେଇ ଲୋକଙ୍କ ମନରେ ଅବିଶ୍ଵାସ ରହିଛି, ତାହେଲେ ଏହାକୁ ନେଇ ପୂରା ହୀରାକୁଦ ତଳମୁଣ୍ଡରେ ବ୍ୟାପକ ଜଣ ଅସନ୍ତୋଷ ଦେଖାଦେବା କଥା। କାହିଁ, ସେମିତି କିଛି ଘଟୁଛି କି?
ବନ୍ଧ ସୁରକ୍ଷା ବିଲ ଆଳରେ କେନ୍ଦ୍ର ସରକାର ରାଜ୍ୟ ଅଧୀନରେ ଥିବା ନଦୀବନ୍ଧଗୁଡିକ ଉପରେ ନିଜର କର୍ତ୍ତୃତ୍ଵ ଜାହିର କରିବାକୁ ଚାହୁଁଛନ୍ତି କି, ଏ ପ୍ରଶ୍ନକୁ ନେଇ ଲୋକସଭାରେ ବିତର୍କ ଚାଲିଥିବାବେଳେ ସୁରେଶ ବାବୁ ହୀରାକୁଦ ପ୍ରସଙ୍ଗରେ ଏକ ଭୟଙ୍କର ଭବିଷ୍ୟବାଣୀ କରିଛନ୍ତି। ଲୋକସଭାରେ ହୀରାକୁଦ ବନ୍ଧ ବିପଦରେ ଅଛି ବୋଲି ଜଣେ ସାଂସଦ କହିଲା ବେଳେ, ଏହାର ଗୁରୁତ୍ଵ ରହିଛି ବୋଲି ଆମେ ବିଚାର କରୁଛୁ। ହେଲେ ବିଲର ଆଲୋଚନା ପରେ କେନ୍ଦ୍ର ଜଳ ସମ୍ପଦ ମନ୍ତ୍ରୀ ଗଜେନ୍ଦ୍ର ସିଂ ଶେଖାବତ ଯେଉଁ ଉତ୍ତର ରଖିଲେ, ସେଥିରେ ସେ ସୁରେଶ ପୂଜାରୀ ଉଠାଇଥିବା ପ୍ରସଙ୍ଗର ଉତ୍ତର ରଖି କହିଲେ ଯେ ବନ୍ଧର ମରାମତି ଲାଗି ୬୦୦ କୋଟି ଟଙ୍କାର ଯୋଜନା ଲାଗୁ ହୋଇଛି। ପୁରୁଣା ନଦୀବନ୍ଧ ଗୁଡିକର ମରାମତି ଏକ ନିରନ୍ତର ପ୍ରକ୍ରିୟା ଓ ଏଥିଲାଗି ଲୋକେ ଭୟଭୀତ ହେବାର କୌଣସି କାରଣ ନାହିଁ। ଏପରିକି ହୀରାକୁଦ ନଦୀବନ୍ଧ ବିପଦ ସଙ୍କୁଳ ଅବସ୍ଥାରେ ରହିଛି ବୋଲି ସାଂସଦ ଯାହା କହିଥିଲେ, ତାର କୌଣସି ଉତ୍ତର ମନ୍ତ୍ରୀ ରଖିନଥିଲେ। ସେ ଫରକ୍କା ଓ ହୀରାକୁଦ ଭଳି ପୁରୁଣା ନଦୀବନ୍ଧ ଗୁଡିକର ମରାମତି କରାଯାଉଛି ବୋଲି କହିବା ସହିତ ଶ୍ରୀ ପୂଜାରୀଙ୍କ ଅନ୍ୟ କୌଣସି ପ୍ରସଙ୍ଗର ଉତ୍ତର ରଖିନଥିଲେ।
ହୀରାକୁଦ ନଦୀବନ୍ଧ ବିଷୟରେ ବିଭ୍ରାନ୍ତିକର ଓ ଭୟ ସୃଷ୍ଟି କଳା ପରି ବକ୍ତବ୍ୟ ରଖିବା ପଛରେ ସୁରେଶ ପୂଜାରୀଙ୍କର କି ଉଦ୍ଦେଶ୍ୟ ରହିଛି, ତାହା ବୁଝା ପଡୁନାହିଁ। ନଦୀବନ୍ଧର ମୌଳିକ ସମସ୍ୟା ବିଷୟରେ ଶ୍ରୀ ପୂଜାରୀ କିଛି ନ କହି କେବଳ ଉପରଠାଉରିଆ ଭାବରେ ବିସ୍ଥାପନ ଓ ବନ୍ଧର ଜଳ ଯୋଗାଣ କଥାକୁ ଉଠାଇଥିଲେ। ଏକଥା ସତଯେ ହୀରାକୁଦ ନଦୀବନ୍ଧ ମରିବାକୁ ଯାଉଛି। ହେଲେ ଏହାର ମୃତ୍ୟୁ କାରଣ ଏହାର ମରାମତିର ଅଭାବ ନୁହଁ, ବରଂ ପାଣିର ଅଭାବ। ଛତିଶଗଡ ସରକାର ମହାନଦୀକୁ ଏକ ମୃତନଦୀରେ ପରିଣତ କରିଦେବାର ସବୁ ବ୍ୟବସ୍ଥା କରି ସାରିଛନ୍ତି। ବନ୍ଧ ସୁରକ୍ଷା ବିଲର ଆଲୋଚନା ବେଳେ ବନ୍ଧର ଉପର ମୁଣ୍ଡ ଓ ବେସିନରେ ରହିଥିବା ଜଳ ବଣ୍ଟନକୁ ନେଇ କିଛି ଆଲୋଚନା ହେଲାନାହିଁ। ହୀରାକୁଦ ନଦୀବନ୍ଧ ବିସ୍ଥାପିତଙ୍କ ପ୍ରସଙ୍ଗ ଶ୍ରୀ ପୂଜାରୀ ଉଠାଇଲେ, ହେଲେ ଏ ସମ୍ପର୍କରେ ତାଙ୍କ ପାଖରେ ବିଶେଷ କିଛି ତଥ୍ୟ ଥିଲାପରି ମନେହେଲାନାହିଁ।
ହୀରାକୁଦ ନିର୍ମାଣ ସମୟରେ ବିସ୍ଥାପିତ ହୋଇଥିବା ଲୋକଙ୍କୁ ଆଜି ମଧ୍ୟ କ୍ଷତିପୂରଣ ମିଳିନାହିଁ ବୋଲି ଶ୍ରୀ ପୂଜାରୀ ଯାହା କହିଛନ୍ତି, ତାହା ସତ୍ୟ। ତେବେ ଏହି ପ୍ରସଙ୍ଗ ରଖିଲା ବେଳେ ବାସ୍ତବ ତଥ୍ୟ ଓ ସଠିକ ପ୍ରସ୍ତାବ ତାଙ୍କ ପାଖରେ ନଥିଲା। ହୀରାକୁଦ ପାଣି ବିଷାକ୍ତ ହେଉଛି ଓ ଏହାର ପ୍ରଭାବରେ ବରଗଡ ଅଞ୍ଚଳରେ କ୍ୟାନ୍ସର ରୋଗୀଙ୍କ ସଂଖ୍ୟା ବଢୁଛି ବୋଲି ସେ ଯାହା କହିଛନ୍ତି, ତାହା ଉଦ୍ବେଗଜନକ। ହେଲେ ଏ ବିଷୟରେ କିଏ ଓ କି ପ୍ରକାର ଅନୁଧ୍ୟାନ କରିଛି, ତାର ସଠିକ ତଥ୍ୟ ରଖିଥିଲେ, ତାହାର ଭିନ୍ନ ପ୍ରଭାବ ପଡିଥାନ୍ତା।
ହୀରାକୁଦ ନଦୀବନ୍ଧ ଭୁଷୁଡି ପଡିବା ଭଳି ସ୍ଥିତିରେ ଅଛି ବୋଲି କୌଣସି ରିପୋର୍ଟ ନଥିବା ବେଳେ ଏହାକୁ ନେଇ ଅଯଥା ଲୋକଙ୍କ ମନରେ ଭୟ ଓ ବିଭ୍ରାନ୍ତି ସୃଷ୍ଟି କରିବା, ଆଦୌ ଗ୍ରହଣୀୟ ନୁହେଁ।