ଉଦଳା: ଗୋଟିଏ ହାତରେ ଜୀବନ ବଞ୍ଚାଇବାର ଆଶା, ଆଉ ଅନ୍ୟ ହାତରେ ବିଷାକ୍ତ ସାପ। ମୟୂରଭଞ୍ଜ ଜିଲ୍ଲା ଉଦଳା ଅଞ୍ଚଳରେ ଏପରି ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି, ଯାହା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଉଦଳା ନଗରପାଳିକା (ଏନଏସି) ୧୦ ନମ୍ବର ୱାର୍ଡସ୍ଥିତ ଉଠା ଜଳସେଚନ ପ୍ରକଳ୍ପର ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟରେ ଜଗୁଆଳି ଭାବେ କାର୍ଯ୍ୟରତ ମୋଚିରାମ ଟୁଡୁଙ୍କ ଗୋଡ଼କୁ ଏକ ବିଷାକ୍ତ ସାପ କାମୁଡ଼ିଥିଲେ ହେଁ ସେ ତିଳେହେଲେ ଭୟଭୀତ ନହୋଇ ଅପୂର୍ବ ସାହସର ପରିଚୟ ଦେଇଛନ୍ତି।
ସୂଚନାଯୋଗ୍ୟ ଯେ, ବହଳଦା ଅଞ୍ଚଳର ମୋଚିରାମ ଟୁଡୁ ଗତକାଲି ରାତି ପ୍ରାୟ ୮ଟା ସମୟରେ କାର୍ଯ୍ୟାଳୟରେ ଡ୍ୟୁଟିରେ ଥିବାବେଳେ ହଠାତ୍ ଏକ ସାପ ଆସି ତାଙ୍କ ଗୋଡ଼କୁ କାମୁଡ଼ି ଦେଇଥିଲା। ପ୍ରଥମେ ସେ ସାପଟିକୁ ସଠିକ୍ ଭାବେ ଚିହ୍ନିପାରି ନଥିଲେ, ମାତ୍ର ପରିସ୍ଥିତିର ଗୁରୁତ୍ୱ ଓ ସାପଟି ବିଷାକ୍ତ ହୋଇଥାଇପାରେ ଭାବି ସେ ତୁରନ୍ତ ତାକୁ କାବୁ କରି ମାରିଦେଇଥିଲେ। ଚିକିତ୍ସା ସମୟରେ ସାପର ସଠିକ୍ ଚିହ୍ନଟ ପାଇଁ କୌଣସି ବିଳମ୍ବ ନକରି ସେ ମୃତ ସାପଟିକୁ ଏକ ପଲିଥିନ୍ ମୁଣିରେ ପୁରାଇଥିଲେ।
ଏହାପରେ ପଲିଥିନ୍ରେ ବିଷାକ୍ତ ସାପକୁ ଧରି ସେ ନିଜ ସାଇକେଲ୍ ଚଳାଇ ଚିକିତ୍ସା ପାଇଁ ସିଧାସଳଖ ଉଦଳା ଉପଖଣ୍ଡ ଚିକିତ୍ସାଳୟରେ ପହଞ୍ଚିଥିଲେ। ସାଇକେଲ୍ରେ ଆସି ମେଡିକାଲ୍ରେ ପହଞ୍ଚିବା ପରେ ତାଙ୍କ ହାତରେ ସାପ ଥିବା ଦେଖି ଉପସ୍ଥିତ ଲୋକେ ଓ ଡାକ୍ତରୀ ଦଳ ସ୍ତବ୍ଧ ହୋଇଯାଇଥିଲେ। ପରୀକ୍ଷା ପରେ ତାହା ଏକ ସାଙ୍ଘାତିକ ବିଷାକ୍ତ ଚିତି ସାପ ବୋଲି ଚିହ୍ନଟ ହୋଇଥିଲା। ଡାକ୍ତରମାନେ ତୁରନ୍ତ ମୋଚିରାମଙ୍କ ଚିକିତ୍ସା ଆରମ୍ଭ କରିଥିଲେ। ରାତିରେ ତାଙ୍କ ସ୍ୱାସ୍ଥ୍ୟବସ୍ଥାରେ ଅବନତି ଦେଖାଦେବାରୁ ଡାକ୍ତରଙ୍କ ପରାମର୍ଶ କ୍ରମେ ତାଙ୍କୁ ଅଧିକ ଚିକିତ୍ସା ପାଇଁ ବାରିପଦାସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡିକାଲ୍ କଲେଜ୍ ଓ ହସ୍ପିଟାଲ୍କୁ ସ୍ଥାନାନ୍ତର କରାଯାଇଛି।