ଭୁବନେଶ୍ବର: ଭୁବନେଶ୍ୱର ବାଲିଅନ୍ତା ଜିଆରପି କନଷ୍ଟେବଳ ସୌମ୍ୟରଞ୍ଜନଙ୍କ ମୃତ୍ୟୁ ରହସ୍ୟକୁ ନେଇ ଚାଲିଥିବା ନ୍ୟାୟିକ ଲଢ଼େଇରେ ଏକ ନାଟକୀୟ ମୋଡ଼ ସାମ୍ନାକୁ ଆସିଛି। ସୌମ୍ୟରଞ୍ଜନଙ୍କ ମୃତ୍ୟୁର ସିବିଆଇ ତଦନ୍ତ ଦାବି କରି ହାଇକୋର୍ଟରେ ଦାଖଲ ହୋଇଥିବା ପିଟିସନ୍ ସମ୍ପୂର୍ଣ୍ଣ ଭାବେ ତାଙ୍କ ଅଜାଣତରେ ଏବଂ ସମ୍ମତି ବିନା କରାଯାଇଥିବା ନେଇ ଅଭିଯୋଗ ଆଣିଛନ୍ତି ତାଙ୍କ ପିତା ଦୁଃଶାସନ ସ୍ୱାଇଁ। ଏହି ଆବେଦନକୁ ତୁରନ୍ତ ପ୍ରତ୍ୟାହାର କରିବା ପାଇଁ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି।
କେବଳ ସୌମ୍ୟରଞ୍ଜନଙ୍କ ପିତା ନୁହଁନ୍ତି, ବରଂ ତାଙ୍କ ସାଙ୍ଗ ନିଶିକାନ୍ତ ମହାନ୍ତି ମଧ୍ୟ ଏହି ମାମଲାରେ ତାଙ୍କ ନାମ ବେଆଇନ ଭାବେ ବ୍ୟବହାର କରାଯାଇଥିବା ନେଇ ଆପତ୍ତି ପ୍ରକାଶ କରିଛନ୍ତି। ଉଭୟଙ୍କ କହିବା ଅନୁଯାୟୀ, ହାଇକୋର୍ଟରେ ସିବିଆଇ ତଦନ୍ତ ପାଇଁ ମାମଲା ଦାଏର କରିବାକୁ ସେମାନେ କୌଣସି ପ୍ରକାର ସମ୍ମତି ଦେଇନଥିଲେ। ସେମାନଙ୍କ ଗୋଚରରେ ନଥାଇ ନାମ ବ୍ୟବହାର କରାଯାଇଥିବାରୁ ଏହାକୁ ନେଇ ଦୃଢ଼ ବିରୋଧ କରାଯାଇଛି।
ଗୁରୁବାର ସୌମ୍ୟରଞ୍ଜନଙ୍କ ପିତା ଓ ତାଙ୍କ ସାଙ୍ଗ ହାଇକୋର୍ଟ ପରିସରରେ ପହଞ୍ଚି ଷ୍ଟେଟ୍ ବାର୍ କାଉନସିଲ୍ର ଅଧିକାରୀଙ୍କୁ ଭେଟି ଏକ ଲିଖିତ ଅଭିଯୋଗପତ୍ର ଦାଖଲ କରିଛନ୍ତି। ନିଶିକାନ୍ତଙ୍କ ସୂଚନା ମୁତାବକ, ସମ୍ପୃକ୍ତ ଆଇନଜୀବୀ ମଧ୍ୟ ମାମଲାଟିକୁ ପ୍ରତ୍ୟାହାର କରିନେବାକୁ ଆଶ୍ୱାସନା ଦେଇଛନ୍ତି। ତେବେ କାହା ସ୍ୱାର୍ଥରେ ଏବଂ କାହାର ନିର୍ଦ୍ଦେଶରେ ଏହି ମାମଲା ଦାଏର କରାଯାଇଥିଲା, ତାହାକୁ ନେଇ ଏବେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି। ପୂର୍ବରୁ ସୌମ୍ୟରଞ୍ଜନଙ୍କ ପରିବାର ପକ୍ଷରୁ ନିରପେକ୍ଷ ତଦନ୍ତ ଓ ନ୍ୟାୟ ଦାବିରେ ବିଭିନ୍ନ ଆଇନଗତ ପଦକ୍ଷେପ ନିଆଯାଇଥିବା ବେଳେ, ବର୍ତ୍ତମାନ ହାଇକୋର୍ଟରୁ ମାମଲା ପ୍ରତ୍ୟାହାର ପାଇଁ ପିତାଙ୍କ ଆବେଦନ ଏହି ପୂରା ଘଟଣାକୁ ଏକ ନୂଆ ଦିଗକୁ ନେଇଯାଇଛି।