ତେଲ୍ ଅବିଭ୍: ଦୁବାଇରୁ ଇସ୍ରାଏଲର ତେଲ୍ ଅବିଭ୍ ଅଭିମୁଖେ ଯାଉଥିବା ଫ୍ଲାଇଦୁବାଇ ବିମାନରେ ଘଟିଥିବା ଏକ ଭୟଙ୍କର ଆତଙ୍କବାଦୀ ଚକ୍ରାନ୍ତକୁ ନିଜର ସାହସିକତା ଓ ବୁଦ୍ଧିମତ୍ତା ବଳରେ ପାଣିଫୋଟକା କରିଦେଇଥିବା ଭାରତୀୟ ପାଇଲଟ କ୍ୟାପ୍ଟେନ ସ୍ମିତ ମାଛାରଙ୍କୁ ଚାରିଆଡ଼ୁ ପ୍ରଶଂସାର ସ୍ରୋତ ଛୁଟୁଛି। ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ସ୍ମିତଙ୍କ ସହ ଟେଲିଫୋନ୍ ଜରିଆରେ କଥା ହୋଇ ତାଙ୍କୁ ବିଶ୍ୱର ଜଣେ ପ୍ରକୃତ ନାୟକ ଭାବେ ଅଭିହିତ କରିଛନ୍ତି। ଏହାସହ ଆଗାମୀ ଇସ୍ରାଏଲ ସ୍ୱାଧୀନତା ଦିବସ ସମାରୋହରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ମିଶି ମୁଖ୍ୟ ମଞ୍ଚରେ ଉତ୍ସବର ମୁଖ୍ୟ ମସାଲ ପ୍ରଜ୍ୱଳନ କରିବାକୁ ନେତନ୍ୟାହୁ ତାଙ୍କୁ ନିମନ୍ତ୍ରଣ ଜଣାଇଛନ୍ତି। ଗୁରୁତର ଆହତ ହୋଇସୁଦ୍ଧା ୧୭୪ ଜଣ ଯାତ୍ରୀ ଓ ବିମାନ କର୍ମଚାରୀଙ୍କ ଜୀବନ ବଞ୍ଚାଇଥିବାରୁ ନେତନ୍ୟାହୁ ତାଙ୍କର ନିଷ୍ଠା ଓ ବୀରତ୍ୱର ଭୂୟସୀ ପ୍ରଶଂସା କରିଛନ୍ତି।
ଗତ ସେପ୍ଟେମ୍ବର ୩୦ ତାରିଖରେ ଘଟିଥିବା ଏହି ଆକ୍ରମଣ ଘଟଣା ସମ୍ପର୍କରେ କ୍ୟାପ୍ଟେନ ସ୍ମିତ ପ୍ରଧାନମନ୍ତ୍ରୀ ନେତନ୍ୟାହୁଙ୍କୁ ବିସ୍ତୃତ ସୂଚନା ଦେଇଛନ୍ତି। ଉଡ଼ାଣ ସମୟରେ ଓମାନର ସହପାଇଲଟ ହମାମ ଅଲ୍-ହମାମୀ ନମାଜ ପାଠ କରିବା ପାଇଁ ଇଚ୍ଛା ପ୍ରକାଶ କରିଥିଲେ। ସାଧାରଣତଃ ଅନେକ ସ୍ଥାନୀୟ ଲୋକ ଏହା କରୁଥିବାରୁ କ୍ୟାପ୍ଟେନ ସ୍ମିତ ଏହାକୁ ସାଧାରଣ କଥା ଭାବି ଅନୁମତି ଦେଇଥିଲେ। ସହପାଇଲଟ ପଛରେ ବସି ନମାଜ ପଢ଼ିବାର ପ୍ରାୟ ୪ ରୁ ୫ ମିନିଟ୍ ପରେ ହଠାତ୍ ବିମାନ ଜରୁରୀକାଳୀନ ପରିସ୍ଥିତି ପାଇଁ ରଖାଯାଉଥିବା କୁରାଢ଼ି ସାହାଯ୍ୟରେ କ୍ୟାପ୍ଟେନ ସ୍ମିତଙ୍କ ମୁଣ୍ଡ ପଛପଟେ ପ୍ରହାର କରିବା ଆରମ୍ଭ କରିଥିଲା। କ୍ରମାଗତ କୁରାଢ଼ି ଚୋଟ ଯୋଗୁଁ କ୍ୟାପ୍ଟେନଙ୍କ ଆଖି ଆଗରେ ଅନ୍ଧାର ଛାଇଯାଇଥିଲା ଏବଂ ବିମାନଟି ମାତ୍ର ଦୁଇ ମିନିଟରେ ପ୍ରାୟ ୧୭ ହଜାର ଫୁଟ ତଳକୁ ଖସିଆସିଥିଲା।
ଗୁରୁତର ଆହତ ଓ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ସୁଦ୍ଧା କ୍ୟାପ୍ଟେନ ସ୍ମିତ ହାର ନମାନି ନିଜ ସମସ୍ତ ଶକ୍ତି ଖଟାଇ ବିମାନର କକ୍ପିଟ୍ ଦ୍ୱାରର କବଜା ଓ ହାଣ୍ଡଲକୁ ଖୋଲିବାରେ ସଫଳ ହୋଇଥିଲେ। ଦ୍ୱାର ଖୋଲିବା ମାତ୍ରକେ ବାହାରେ ଥିବା ବିମାନ କର୍ମଚାରୀ ଓ ଯାତ୍ରୀମାନେ ଭିତରକୁ ପଶି ସେହି ଆକ୍ରମଣକାରୀ ସହପାଇଲଟକୁ କାବୁ କରିନେଇଥିଲେ। ପରେ ବିମାନକୁ ସାଉଦି ଆରବର ତବୁକ୍ ବିମାନବନ୍ଦରରେ ଜରୁରୀକାଳୀନ ଅବତରଣ କରାଯାଇ ସମସ୍ତ ଯାତ୍ରୀଙ୍କୁ ସୁରକ୍ଷିତ ଉଦ୍ଧାର କରାଯାଇଥିଲା। ସେଠାରେ କ୍ୟାପ୍ଟେନ ସ୍ମିତଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା ଯୋଗାଇ ଦିଆଯାଇଛି।
ଏହି ସାହସିକତା ପାଇଁ ପୂର୍ବରୁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଭିଡିଓ କଲ୍ ଜରିଆରେ କ୍ୟାପ୍ଟେନ ସ୍ମିତଙ୍କ ସହ କଥା ହୋଇ ତାଙ୍କ ସ୍ୱାସ୍ଥ୍ୟବସ୍ଥାର ପଚାରି ବୁଝିଥିଲେ। ସେହି ଆପତ୍ତିକାଳୀନ ମୁହୂର୍ତ୍ତରେ ସେ ହନୁମାନ ଚାଳିଶା ପାଠ କରୁଥିଲେ ଏବଂ ଈଶ୍ୱରଙ୍କ କୃପାରୁ ହିଁ ସମସ୍ତଙ୍କ ଜୀବନ ବଞ୍ଚିଗଲା ବୋଲି ସ୍ମିତ ପ୍ରଧାନମନ୍ତ୍ରୀ ମୋଦୀଙ୍କୁ ଜଣାଇଥିଲେ।
ତଦନ୍ତରୁ ପ୍ରକାଶ ଯେ, ଆକ୍ରମଣକାରୀ ସହପାଇଲଟ ହମାମ ଅଲ୍-ହମାମୀ ଉଗ୍ରବାଦୀ ଚିନ୍ତାଧାରା ଦ୍ୱାରା ପ୍ରଭାବିତ ଥିଲା। ସେ ବିମାନଟିକୁ ଇସ୍ରାଏଲ ଭିତରେ ପିଟି ଦୁର୍ଘଟଣାଗ୍ରସ୍ତ କରିବାକୁ ଲକ୍ଷ୍ୟ ରଖିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। ଓମାନ ଓ ଇସ୍ରାଏଲ ମଧ୍ୟରେ କୌଣସି କୂଟନୈତିକ ସମ୍ପର୍କ ନଥିବା ସତ୍ତ୍ୱେ ସେ କିପରି ଏହି ଉଡ଼ାଣର ଦାୟିତ୍ୱ ପାଇଲା, ସେ ନେଇ ଆନ୍ତର୍ଜାତୀୟ ତଦନ୍ତକାରୀ ସଂସ୍ଥା ଏବଂ ଇସ୍ରାଏଲର ଗୁପ୍ତଚର ସଂସ୍ଥାଗୁଡ଼ିକ ତଦନ୍ତ ଜାରି ରଖିଛନ୍ତି। ଏହି ଘଟଣା ପରେ ସମଗ୍ର ବିଶ୍ୱରେ ଭାରତୀୟ ପାଇଲଟଙ୍କ ଧୈର୍ଯ୍ୟ, ସାହସିକତା ଓ କର୍ତ୍ତବ୍ୟପରାୟଣତାକୁ ଉଚ୍ଚ ପ୍ରଶଂସା କରାଯାଉଛି।