ନୂଆଦିଲ୍ଲୀ: ଭାରତରେ ଗରିବୀ ଦ୍ରୁତ ଗତିରେ ହ୍ରାସ ପାଉଛି। ବିଶ୍ୱବ୍ୟାଙ୍କର ଅକ୍ଟୋବର ୨୦୨୬ ‘ପଭର୍ଟି ଆଣ୍ଡ ଇକ୍ୱିଟି ବ୍ରିଫ୍’ ରିପୋର୍ଟରେ ଏହା ପ୍ରକାଶ ପାଇଛି।
ରିପୋର୍ଟ ଅନୁସାରେ, ୨୦୧୧ରୁ ୨୦୨୩ ମଧ୍ୟରେ ପ୍ରାୟ ୪୯.୬ କୋଟି ଭାରତୀୟ ଗରିବୀରୁ ବାହାରି ଆସିଛନ୍ତି। ଅତି ଗରିବୀରେ ଥିବା ଲୋକଙ୍କ ସଂଖ୍ୟା ୨୭.୧% ରୁ କମି ୨.୬% କୁ ଖସି ଆସିଛି।
୨୦୨୧ PPP ଅନୁସାରେ ଦିନକୁ ୪.୨୦ ଡଲାର (ପ୍ରାୟ ୩୫୦ ଟଙ୍କା) ଲୋୟର-ମିଡଲ-ଇନକମ୍ ଗରିବୀ ରେଖା ତଳେ ଥିବା ଭାରତୀୟଙ୍କ ହାର ୫୭.୭% ରୁ ୧୬.୧% କୁ ଖସିଛି। ଅର୍ଥାତ୍ ୪୧.୬% ଲୋକ ଏହି ସୀମା ପାର କରି ଉନ୍ନତ ଆର୍ଥିକ ସ୍ଥିତିକୁ ଆସିଛନ୍ତି।
ଜୀବନଶୈଳୀରେ ଉନ୍ନତି: ବିଶ୍ୱବ୍ୟାଙ୍କ ଏହାକୁ ବିଶ୍ୱର ସବୁଠୁ ଦ୍ରୁତ ଗରିବୀ ହ୍ରାସ ବୋଲି କହିଛି। ଭାରତ ମୁଦ୍ରାଗତ ଓ ଅମୁଦ୍ରାଗତ ଉଭୟ ମାନଦଣ୍ଡରେ ଉନ୍ନତି କରିଛି। ଲୋକଙ୍କ ପାଖକୁ ପଇସା ଆସିବା ସହ ମୌଳିକ ସୁବିଧା ପହଞ୍ଚିଛି।ଏହାର ମୁଖ୍ୟ କାରଣ – ଦୈନିକ ମଜୁରୀ ବୃଦ୍ଧି, ମଜଭୁତ ଖର୍ଚ୍ଚ, ନିଯୁକ୍ତି ବୃଦ୍ଧି (ବିଶେଷ କରି ମହିଳାଙ୍କ ମଧ୍ୟରେ) ଓ ଖାଦ୍ୟ ସବସିଡି ସମେତ ସାମାଜିକ ସହାୟତା।
ଆଗକୁ ଗରିବୀ ଆହୁରି କମିବ, ହେଲେ ଗତି ଧୀର ହେବ। ବିଶ୍ୱବ୍ୟାଙ୍କ ଅନୁମାନ – ୪.୨୦ ଡଲାର ସୀମାରେ ଗରିବୀ ହାର ୨୦୨୬ର ୧୪.୨% ରୁ ୨୦୨୮ ସୁଦ୍ଧା ୧୨.୧% ହେବ।
ଚିନ୍ତାର ବିଷୟ: ମୋଟ ନିଯୁକ୍ତି ବଢ଼ିଲେ ବି ଯୁବ ବେକାରୀ ବଢ଼ିଛି। ୨୦୨୫-୨୬ ପ୍ରଥମ ତ୍ରୈମାସରେ ଯୁବ ବେକାରୀ ହାର ୧୪.୬% ଥିଲା, ୨୦୨୬-୨୭ ପ୍ରଥମ ତ୍ରୈମାସରେ ୧୫.୯% ହୋଇଛି। ଏହା ଗ୍ରାମାଞ୍ଚଳର ଯୁବତୀମାନଙ୍କ ଉପରେ ସବୁଠାରୁ ଖରାପ ପ୍ରଭାବ ପକାଇଛି, ଯେଉଁମାନେ କାମ ଖୋଜୁଛନ୍ତି କିନ୍ତୁ କାମ ପାଇପାରୁ ନାହାଁନ୍ତି।