ୟୁରିକ୍ ଏସିଡ୍ ହେଉଛି ମଣିଷ ଶରୀରର ଏକ ପ୍ରାକୃତିକ ବର୍ଜ୍ୟ ପଦାର୍ଥ। ଶରୀରରେ ଏହାର ମାତ୍ରା ବୃଦ୍ଧି ପାଇଲେ ଏହା ହାଡ଼ର ଗଣ୍ଠିଗୁଡ଼ିକରେ ଜମା ହୋଇ ତୀବ୍ର ଯନ୍ତ୍ରଣା, ଫୁଲା ଏବଂ ଚାଲିବୁଲି କରିବାରେ ଅସୁବିଧା ସୃଷ୍ଟି କରିଥାଏ। ଭାରତରେ ପ୍ରାୟ ୯୦ ପ୍ରତିଶତ ଲୋକଙ୍କଠାରେ ଏହି ସମସ୍ୟା ଦେଖିବାକୁ ମିଳୁଥିବା ବେଳେ ଏଥିପାଇଁ ଆଦୌ ଭୟଭୀତ ହେବାର ଆବଶ୍ୟକତା ନାହିଁ। ବିଶେଷଜ୍ଞଙ୍କ ମତରେ, କେବଳ ନିଜର ଆହାର ଓ ଜୀବନଶୈଳୀରେ ସାମାନ୍ୟ ପରିବର୍ତ୍ତନ ଆଣି ଏହାକୁ ସହଜରେ ନିୟନ୍ତ୍ରଣ କରାଯାଇପାରିବ।
ଉଚ୍ଚ ୟୁରିକ୍ ଏସିଡ ଥିଲେ ଦୂରେଇ ରୁହନ୍ତୁ:
ଉଚ୍ଚ ୟୁରିକ୍ ଏସିଡ଼ ଥିବା ବ୍ୟକ୍ତି ବିଶେଷ ନିଶା ଠାରୁ ଦୂରେଇ ରହିବା ଉଚିତ। ବିଶେଷ କରି ଆଲକହଲ ସେବନ କରିବେ ନାହିଁ। ଏଥିରେ ପ୍ୟୁରିନ୍ସର ମାତ୍ରା ଅଧିକ ଥିବାରୁ ଏହା ଶରୀରକୁ ଗଲେ ଜଳାପୋଡ଼ା କରିଥାଏ। ମହୁ ଓ ବଜାରରେ ଏବେ ଉପଲବ୍ଧ ହେଉଥିବା ସିରପରେ ଫ୍ଲକସ ପରିମାଣ ଅଧିକ ଥିବାରୁ ଏହା ୟୁରିକ ଏସିଡ ସ୍ତରକୁ ଅଧିକ ବଢ଼ାଇଥାଏ। ଏହାକୁ ସେବନ କରିବା ଉଚିତ ନୁହେଁ। ସେହିପରି ରେଡ ମିଟ୍ ଖାଇବା ଠାରୁ ଦୂରେଇ ରହିବା ଉଚିତ। ସେଥିରେ କୋଲେଷ୍ଟରଲ ଓ ପ୍ରୋଟିନର ମାତ୍ରା ଅଧିକ ରହିଥାଏ। ଯାହା ୟୁରିକ ଏସିଡ ଥିବା ବ୍ୟକ୍ତି ପାଇଁ ଭଲ ନୁହେଁ। ଡାଲି ଜାତୀୟ ଖାଦ୍ୟ ଠାରୁ ଯଥା ସମ୍ଭବ ଦୂରେଇ ରହିବା ଉଚିତ।
କ’ଣ ଖାଇବେ:
ଶରୀରରେ ୟୁରିକ୍ ଏସିଡ଼ର ମାତ୍ରା କମ୍ କରିବା ପାଇଁ ନିୟମିତ ଖାଦ୍ୟରେ ଭିଟାମିନ-ସି ଯୁକ୍ତ ଖାଦ୍ୟ ସାମିଲ କରନ୍ତୁ। ଯେମିତିକି କମଳା, ଅଁଳା, ଅମୃତଭଣ୍ଡା ଆଦିକୁ ଖାଇଲେ ଏହା ନିୟନ୍ତ୍ରଣକୁ ଆସିବ। ଏଥିରେ ଓଟସ, ବ୍ରାଉନ ରାଇସ, ଗହମ ଅଟା ଆଦି ଖାଇପାରିବେ। ସକାଳୁ ଖାଲିପେଟରେ ହାଲକା ଉଷୁମ ପାଣିରେ ଲେମ୍ବୁ ରସ ଚିପୁଡି ପିଇଲେ ମଧ୍ୟ ଏହା ନିୟନ୍ତ୍ରଣରେ ରହିଥାଏ। ପାଣି କଖାରୁ, ଗାଜର, ବିଟର ଜୁସ ପ୍ରସ୍ତୁତ କରି ପିଇଲେ ଶରୀରରେ ୟୁରିକ ଏସିଡ ସ୍ତର କମିଥାଏ। ଉଚ୍ଚ ୟୁରିକ୍ ଏସିଡ଼ ଥିବା ବ୍ୟକ୍ତିମାନେ ଆପଲ ସାଇଡ ଭିନେଗାରକୁ ପାଣିରେ ପକାଇ ପିଇପାରିବେ। ଅଦା, ସପୁରି ଜୁସ, ହଳଦୀ, ରସୁଣ, କାକୁଡି, ଚେରି ଆଦି ଏହାକୁ ନିୟନ୍ତ୍ରଣ କରିବାରେ ଭଲ କାମ ଦେଇଥାଏ।
ଏସବୁ ଛୁଇଁବେନି:
ଯେଉଁମାନଙ୍କର ଉଚ୍ଚ ୟୁରିକ୍ ଏସିଡ଼ ଥାଏ ସେମାନଙ୍କୁ ଅଧିକ ସତର୍କ ରହିବାକୁ ପଡ଼େ। ଖାଦ୍ୟପଦାର୍ଥ ଠାରୁ ଆରମ୍ଭ କରି ଖାଇବା ପିଇବାର ସମୟ ଠିକ୍ କରିବାକୁ ପଡିଥାଏ। ଉଚ୍ଚ ୟୁରିକ ଏସିଡ ଥିବା ବ୍ୟକ୍ତିମାନେ ଏହାକୁ ନିୟନ୍ତ୍ରଣରେ ରଖିବା ନିମନ୍ତେ ବାଇଗଣ, ପାଳଙ୍ଗ, ସାରୁ, ଭେଣ୍ଡି, ଛୁଇଁ, ଫୁଲକୋବି, ପତ୍ରକୋବି, ଛତୁ ଆଦି ଖାଇବା ଉଚିତ ନୁହେଁ।