ଢ଼ାକା: ବାଂଲାଦେଶର ଜଗନ୍ନାଥ ବିଶ୍ୱବିଦ୍ୟାଳୟ ପରିସରରେ ଉତ୍ତେଜନାପୂର୍ଣ୍ଣ ପରିସ୍ଥିତି ସୃଷ୍ଟି ହୋଇଛି। କ୍ୟାମ୍ପସ ମଧ୍ୟରେ ଥିବା ଜଗନ୍ନାଥ ମନ୍ଦିର ସାମ୍ନାରେ ଇସଲାମିକ୍ ହିଷ୍ଟ୍ରୀ କଲଚର୍ ବିଭାଗର କିଛି ମୁସଲିମ୍ ଛାତ୍ର ଉଦ୍ଦେଶ୍ୟମୂଳକ ଭାବେ ଗୋମାଂସ ରାନ୍ଧିବାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଏହାକୁ ନେଇ ହିନ୍ଦୁ ଛାତ୍ରଛାତ୍ରୀ ଏବଂ ସନାତନୀ ସଂଗଠନଗୁଡ଼ିକ ପକ୍ଷରୁ ପ୍ରତିବାଦ ଶୋଭାଯାତ୍ରା କରାଯିବା ସହ କଡ଼ା ବିରୋଧ କରାଯାଇଛି।
ଘଟଣାଟି ଅକ୍ଟୋବର ୧୨ ତାରିଖରେ ଘଟିଥିବା ବେଳେ, ପ୍ରତିବାଦ ପରେ ବିଶ୍ୱବିଦ୍ୟାଳୟ ପ୍ରଶାସନ କ୍ୟାମ୍ପସରେ ପଶୁବଳି ବା ହତ୍ୟା ଉପରେ କଟକଣା ଲଗାଇ ନୋଟିସ୍ ଜାରି କରିଥିଲା। ମାତ୍ର ଏହାର ପ୍ରତିବାଦରେ ମୁସଲିମ୍ ଛାତ୍ରମାନଙ୍କର ଏକ ଗୋଷ୍ଠୀ ଅକ୍ଟୋବର ୧୬ ତାରିଖରେ କ୍ୟାମ୍ପସରେ ଗାଈ କାଟି ଭୋଜି କରିବାକୁ ଖୋଲାଖୋଲି ଘୋଷଣା କରିଥିଲେ। ବିବାଦ ଅଧିକ ବଢ଼ିବାରୁ ପ୍ରଶାସନ ଦ୍ୱିତୀୟ ନୋଟିସ୍ ଜାରି କରି କହିଛି ଯେ, ଛାତ୍ରମାନଙ୍କର କାର୍ଯ୍ୟକ୍ରମ ଆୟୋଜନ କରିବାର ଅଧିକାର ଅଛି, କିନ୍ତୁ ଏହାଦ୍ୱାରା ଅନ୍ୟମାନଙ୍କ ଧାର୍ମିକ ଭାବନା ବା କାର୍ଯ୍ୟକଳାପରେ ବାଧା ପହଞ୍ଚିବା ଉଚିତ୍ ନୁହେଁ। ବାଂଲାଦେଶରେ ନିୟମିତ ଭାବେ ଅଳ୍ପସଂଖ୍ୟକ ହିନ୍ଦୁମାନଙ୍କ ପ୍ରତି ହେଉଥିବା ଏପରି ଆଚରଣ ବଡ଼ ଧରଣର ସାମ୍ପ୍ରଦାୟିକ ଅଶାନ୍ତି ସୃଷ୍ଟି କରିବାର ଆଶଙ୍କା ଉପୁଜାଇଛି।