ନୂଆଦିଲ୍ଲୀ: ଆଜି ବ୍ରିକ୍ସ ଶିଖର ସମ୍ମିଳନୀର ଶେଷ ଅଧିବେଶନରେ ସର୍ବସମ୍ମତିକ୍ରମେ ଦିଲ୍ଲୀ ଘୋଷଣାନାମା ୨୦୨୬କୁ ମଞ୍ଜୁର କରାଯାଇଛି। ବ୍ରିକ୍ସ ଘୋଷଣାନାମା ଭାରତ ପାଇଁ ଏକ କୂଟନୈତିକ ବିଜୟ ବୋଲି ଦର୍ଶାଯାଇଛି, ଯେଉଁଥିରେ ପହଲଗାମ ଆତଙ୍କବାଦୀ ଆକ୍ରମଣକୁ ନିନ୍ଦା କରାଯାଇଛି। ଘୋଷଣାନାମାରେ ଆତଙ୍କବାଦ ପ୍ରତି ଶୂନ୍ୟ ସହନଶୀଳତା ଉପରେ ଗୁରୁତ୍ୱ ଦିଆଯାଇଛି। ଏଥିରେ କୁହାଯାଇଛି ଯେ, ଆତଙ୍କବାଦର କୌଣସି କାରଣ ଗ୍ରହଣୀୟ ନୁହେଁ।
ପହଲଗାମ ଆତଙ୍କବାଦୀ ଆକ୍ରମଣ ଘୋଷଣାନାମାର ଧାରା ୪୦ରେ ଉଲ୍ଲେଖ କରାଯାଇଛି। ଏଥିରେ କୁହାଯାଇଛି ଯେ, “ଆମେ ଯେକୌଣସି ଆତଙ୍କବାଦ କାର୍ଯ୍ୟକୁ ନିନ୍ଦା କରୁ। ଉଦ୍ଦେଶ୍ୟ ଯାହା ହେଉ ନା କାହିଁକି, ଏହା ଯେଉଁଠାରେ ଘଟୁ କିମ୍ବା ଯାହା ଦ୍ୱାରା କରାଯାଉ, ଏହାକୁ ଅପରାଧୀ ଏବଂ ଯେକୌଣସି ପରିସ୍ଥିତିରେ ଅନୁଚିତ ବିଚାର କରୁ।। ଆମେ ୨୨ ଏପ୍ରିଲ୍ ୨୦୨୫ରେ ଜମ୍ମୁ ଏବଂ କାଶ୍ମୀରରେ ହୋଇଥିବା ଆତଙ୍କବାଦୀ ଆକ୍ରମଣକୁ ଦୃଢ଼ ନିନ୍ଦା କରୁ, ଯେଉଁଥିରେରେ ୨୬ ଜଣଙ୍କର ମୃତ୍ୟୁ ହୋଇଥିଲା ଏବଂ ଅନେକ ଆହତ ହୋଇଥିଲେ।” ଏଥିରେ କୁହାଯାଇଛି ଯେ, ଆମେ ସମସ୍ତ ପ୍ରକାରର ଆତଙ୍କବାଦ ବିରୋଧରେ ଲଢ଼ିବାକୁ ପ୍ରତିବଦ୍ଧ।
ଚୀନ୍ ଏବଂ ରୁଷ ସମେତ ସମସ୍ତ ବ୍ରିକ୍ସ ଦେଶ ପହଲଗାମ ଆତଙ୍କବାଦୀ ଆକ୍ରମଣକୁ ଦୃଢ଼ ନିନ୍ଦା କରିଥିଲେ। ଘୋଷଣାପତ୍ରରେ କୁହାଯାଇଛି ଯେ, “ତୁମେ କାହାକୁ ତାଙ୍କ ଧର୍ମ ଆଧାରରେ ହତ୍ୟା କରିପାରିବ ନାହିଁ।” ଏହା ସିଧାସଳଖ ପାକିସ୍ତାନକୁ ଦାୟୀ କରୁଛି। କାରଣ ପାକିସ୍ତାନର ସେନା ମୁଖ୍ୟ ଅସୀମ ମୁନିର ହିନ୍ଦୁଙ୍କ ଉପରେ ଆକ୍ରମଣ ବିଷୟରେ ଆପତ୍ତିଜନକ ମନ୍ତବ୍ୟ ଦେଇଥିଲେ। ଆକ୍ରମଣ ପୂର୍ବରୁ ମୁନିର ଏହି ବୟାନ ଦେଇଥିଲେ।
ଘୋଷଣାପତ୍ରରେ କୁହାଯାଇଛି ଯେ, “ଆମେ ବ୍ରିକ୍ସ ଆତଙ୍କବାଦ ବିରୋଧୀ କାର୍ଯ୍ୟାନୁଷ୍ଠାନ ଗୋଷ୍ଠୀ (CTWG) ଏବଂ ଏହାର ପାଞ୍ଚଟି ଉପ-ଗୋଷ୍ଠୀର କାର୍ଯ୍ୟକଳାପକୁ ସ୍ୱାଗତ କରୁଛୁ। ଆମେ ଆତଙ୍କବାଦ ବିରୋଧୀ କାର୍ଯ୍ୟକଳାପକୁ ଆହୁରି ମଜବୁତ କରିବା ଆଶା କରୁଛୁ।” ଏହାର ଅର୍ଥ ହେଉଛି CTWG ମାଧ୍ୟମରେ ବ୍ରିକ୍ସ ଦେଶଗୁଡ଼ିକ ଏବେ ଆତଙ୍କବାଦକୁ ଦମନ କରିବା ପାଇଁ ଆଗକୁ ବଢ଼ିବେ।
ବ୍ରିକ୍ସକୁ ପୂର୍ବରୁ ଏକ ଅର୍ଥନୈତିକ ମେଣ୍ଟ ଭାବରେ ବିବେଚନା କରାଯାଉଥିଲା। ବର୍ତ୍ତମାନ, ବ୍ରିକ୍ସ ଏଥିରୁ ଆଗକୁ ବଢ଼ିଛି ଏବଂ ଆତଙ୍କବାଦ ବିରୋଧୀ ପାଇଁ ସୁରକ୍ଷା ଦୃଷ୍ଟିକୋଣରୁ ଗୁରୁତ୍ୱପୂର୍ଣ୍ଣ ହୋଇଯାଇଛି। ଜାତିସଂଘରେ ଆତଙ୍କବାଦ ବିରୋଧୀ ପ୍ରସଙ୍ଗଗୁଡ଼ିକୁ କିପରି ଆଣିବା, ବିଶେଷକରି ପହଲଗାମ ଆତଙ୍କବାଦୀ ମାମଲା ଉପରେ ମଧ୍ୟ ଗୁରୁତ୍ୱ ଦିଆଯାଇଛି। ଏଥିରେ କୁହାଯାଇଛି ଯେ, ନ୍ୟାୟ କେବଳ ସେତେବେଳେ ହାସଲ ହେବ ଯେତେବେଳେ ଆତଙ୍କବାଦକୁ ପାଣ୍ଠି ଯୋଗାଉଥିବା ଲୋକଙ୍କୁ ଦୂର କରାଯିବ। ଏହାକୁ ବ୍ରିକ୍ସ ଘୋଷଣାପତ୍ରରେ ଅନ୍ତର୍ଭୁକ୍ତ କରାଯାଇଛି।