Tag: କେନ୍ଦ୍ର ସରକାର

ନୂଆଦିଲ୍ଲୀ: ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ହରଦୀପ ସିଂ ପୁରୀ କହିଛନ୍ତି ଯେ, ଜିଏସଟି ଅଧୀନରେ ପେଟ୍ରୋଲ ଏବଂ ଡିଜେଲ ଆଣିବାକୁ କେନ୍ଦ୍ର ସରକାର ପ୍ରସ୍ତୁତ ଅଛନ୍ତି। କିନ୍ତୁ ରାଜ୍ୟଗୁଡିକର ସହମତି ଆବଶ୍ୟକ। ଉଲ୍ଲେଖଥାଉ କି, କେନ୍ଦ୍ର ମନ୍ତ୍ରୀଙ୍କ ଏହି ବିବୃତ୍ତିରେ ଅନେକ ଲୋକ ଖୁସି ଅଛନ୍ତି, କାରଣ ଯଦି ପେଟ୍ରୋଲ ଜିଏସଟି ଅଧୀନରେ ଆସେ, ତେବେ ପେଟ୍ରୋଲ ବହୁତ ଶସ୍ତା ହୋଇପାରେ। ଏଭଳି ପରିସ୍ଥିତିରେ ପ୍ରଶ୍ନ ହେଉଛି, ଯଦି ପେଟ୍ରୋଲ-ଡିଜେଲକୁ ଜିଏସଟିରେ ଅନ୍ତର୍ଭୁକ୍ତ କରାଯାଏ, ତେବେ ପେଟ୍ରୋଲ-ଡିଜେଲ କେତେ ଶସ୍ତା ହେବ? ପ୍ରକାଶ ଥାଉ କି ଯଦି ରାଜ୍ୟମାନେ ମଧ୍ୟ ଏହି ଦିଗରେ ପଦକ୍ଷେପ ନିଅନ୍ତି, ତେବେ ଏହାର ଲାଭ କ’ଣ ହେବ ଏବଂ ବର୍ତ୍ତମାନ ପେଟ୍ରୋଲ ଉପରେ ବ୍ୟବସ୍ଥା କ’ଣ?

ଜିଏସଟି ସମ୍ବନ୍ଧରେ ନୀତି ନିର୍ମାତାଙ୍କ ବିବୃତ୍ତି:

ଜିଏସଟି ସମ୍ପର୍କିତ ପୂର୍ବ ବୈଠକରେ ବିଜେପି ସାଂସଦ ସୁଶୀଲ ମୋଦୀ ଜିଏସଟି ଅଧୀନରେ ପେଟ୍ରୋଲ ଡିଜେଲ ଆଣିବା ନେଇ କହିଛନ୍ତି ଯେ, ଏହା ମିଳିତ ଭାବେ ରାଜ୍ୟକୁ ବାର୍ଷିକ ୨ ଲକ୍ଷ କୋଟି କ୍ଷତି ଘଟାଇବ। ପେଟ୍ରୋଲିୟମ ମନ୍ତ୍ରୀ ହରଦୀପ ସିଂ ପୁରୀ କହିଥିଲେ ଯେ, ଯଦି ଜିଏସଟି ଅଧୀନରେ ପେଟ୍ରୋଲ ଏବଂ ଡିଜେଲ ଅଣାଯାଏ, ତେବେ ଏହା କେନ୍ଦ୍ର ସରକାରଙ୍କୁ ଖୁସି କରିବ, କିନ୍ତୁ ରାଜ୍ୟ ସରକାର ଏହା କରିବାକୁ ଚାହୁଁନାହାଁନ୍ତି। ପେଟ୍ରୋଲ ଏବଂ ଡିଜେଲ ମୂଲ୍ୟରେ ମୁଦ୍ରାସ୍ଫୀତି ବୃଦ୍ଧି ନେଇ ଅଭିଯୋଗ କରୁଥିବା ସାଧାରଣ ଜନତାଙ୍କ ଠାରୁ ଅନେକ ଅର୍ଥନୀତିଜ୍ଞ ମଧ୍ୟ ଜିଏସଟିରେ ଅନ୍ତର୍ଭୁକ୍ତ କରି ପେଟ୍ରୋଲ ଏବଂ ଡିଜେଲର ମୂଲ୍ୟ ହ୍ରାସ କରିବାକୁ ଦାବି କରୁଛନ୍ତି।

କେତେ ଟ୍ୟାକ୍ସ ପ୍ରଯୁଜ୍ୟ?:

ପେଟ୍ରୋଲ ଏବଂ ଡିଜେଲ ମୂଲ୍ୟର ପ୍ରାୟ ୫୦% ଟ୍ୟାକ୍ସ କରାଯାଏ। ଅନେକ ରାଜ୍ୟରେ ଏହି ସଂଖ୍ୟା ୫୦ ପ୍ରତିଶତରୁ ଅଧିକ ଅଟେ। ଏପରି ପରିସ୍ଥିତିରେ, ଯଦି ଜଣେ ସାଧାରଣ ଲୋକ ବୁଝିବାକୁ ଚାହାଁନ୍ତି ଯେ, ସେ ଏକ ଲିଟର ପେଟ୍ରୋଲ ଉପରେ କେତେ ଟ୍ୟାକ୍ସ ଦେଇଛନ୍ତି, ତେବେ ସେ ଏହି ଉଦାହରଣରୁ ବୁଝିପାରିବେ। ଯଦି ଆପଣ ଏକ ଲିଟର ପେଟ୍ରୋଲ ପାଇଁ ୧୦୫.୪୧ ଟଙ୍କା ଦିଅନ୍ତି, ତେବେ ୪୯.୦୯ ଟଙ୍କା ଟିକସ ହିସାବରେ ସରକାରୀ ପାଣ୍ଠିକୁ ଯାଏ। ଏଥିରେ ୨୭.୯୦ ଟଙ୍କା ଏକ୍ସାଇଜ୍ ଡ୍ୟୁଟି ଏବଂ ୧୭.୧୩ ଟଙ୍କା ଭ୍ୟାଟ୍ (ଡିଲର କମିଶନରେ ଭ୍ୟାଟ୍ ଅନ୍ତର୍ଭୂକ୍ତ କରାଯାଇଛି) ଅଛି। ଏଥିରେ ଡିଲର କମିଶନ ଲିଟର ପିଛା ୩.୮୬ ଟଙ୍କା ରହିଛି।

ଅନ୍ୟପକ୍ଷରେ, ଯଦି ଆମେ ଡିଜେଲ ବିଷୟରେ କଥା ହେଉ, ତେବେ ଧରାଯାଉ ଦିଲ୍ଲୀରେ ଡିଜେଲର ମୂଲ୍ୟ ଲିଟର ପିଛା ୯୬.୬୭ ଟଙ୍କା ରହିଛି। ଏଥିମଧ୍ୟରୁ ୩୮ ରୁ ଅଧିକ ଟଙ୍କା ସରକାରଙ୍କ ଭଣ୍ଡାରକୁ ଯାଇଥାଏ। ଏକ୍ସାଇଜ୍ ଡ୍ୟୁଟି ଏବଂ ଭ୍ୟାଟ୍ ବ୍ୟତୀତ ଡିଲରଙ୍କ ସମେତ ଏକ ଲିଟର ଡିଜେଲରୁ ୫୮.୧୬ ଟଙ୍କା ସରକାରଙ୍କ ଅଂଶକୁ ଯାଉଛି। ଏହା ଏକ ଲିଟର ଡିଜେଲ ମୂଲ୍ୟର ପ୍ରାୟ ୬୦ ପ୍ରତିଶତ ଅଟେ। ଯଦି ଆମେ ଏହି ପରିସଂଖ୍ୟାନ ବିଷୟରେ କହିବା, ତେବେ ପ୍ରତିବର୍ଷ ସରକାର ପେଟ୍ରୋଲ ଏବଂ ଡିଜେଲରୁ ପ୍ରାୟ ୪ ଲକ୍ଷ କୋଟି ଟଙ୍କା ରୋଜଗାର କରନ୍ତି।

ଡିଜେଲ ଏବଂ ପେଟ୍ରୋଲ କେତେ ଶସ୍ତା ହେବ?:

ପେଟ୍ରୋଲ ଏବଂ ଡିଜେଲ ମୂଲ୍ୟରେ ୪୬ ପ୍ରତିଶତ ଟ୍ୟାକ୍ସ ଅନ୍ତର୍ଭୂକ୍ତ କରାଯାଇଛି। ଯେତେବେଳେ ଏହା ଜିଏସଟିରେ ଅନ୍ତର୍ଭୂକ୍ତ ହେବ, ସେତେବେଳେ ସର୍ବୋଚ୍ଚ ସ୍ଲାବ୍ ଥିଲେ ମଧ୍ୟ ଏହା ଉପରେ କେବଳ ୨୮% ଟିକସ ରହିବ। ଏହିପରି ପେଟ୍ରୋଲ ଏବଂ ଡିଜେଲର ମୂଲ୍ୟ ଯଥେଷ୍ଟ ହ୍ରାସ ପାଇବ। ତେବେ କେବଳ ଏହି ଟ୍ୟାକ୍ସକୁ ମୌଳିକ ମୂଲ୍ୟରେ ଦେବାକୁ ପଡିବ। ଏହା ପରେ ରାଜ୍ୟମାନଙ୍କ ଦ୍ୱାରା ଆଦାୟ କରାଯାଉଥିବା ଭ୍ୟାଟ୍ ରଦ୍ଦ କରାଯିବ। ତା’ପରେ ସିଷ୍ଟମ ଏକ ଗ୍ୟାସ ସିଲିଣ୍ଡର ପରି ହେବ। ଯାହା ସାଧାରଣ ଲୋକଙ୍କ ପାଇଁ ଏକ ବଡ଼ ଆଶ୍ଵସ୍ତି ହେବ। ବିଶେଷଜ୍ଞଙ୍କ ବିଶ୍ଳେଷଣ ଅନୁଯାୟୀ ଯଦି ପେଟ୍ରୋଲ ଏବଂ ଡିଜେଲକୁ ଜିଏସ୍ଟି ପରିସରଭୁକ୍ତ କରାଯାଏ, ତା’ହେଲେ ଏହାର ମୂଲ୍ୟ ସମଗ୍ର ଦେଶରେ ହ୍ରାସ ପାଇପାରେ। ଏଭଳି ପରିସ୍ଥିତିରେ ପେଟ୍ରୋଲ ଲିଟର ପିଛା ୭୫ ଟଙ୍କା ଏବଂ ଡିଜେଲ ଲିଟର ପିଛା ୬୮ ଟଙ୍କା ହୋଇପାରେ ବୋଲି ଆକଳନ କରାଯାଇଛି। ତେବେ ଏହା ମଧ୍ୟ ନିର୍ଭର କରେ ସରକାର କେଉଁ ଜିଏସଟି ସ୍ଲାବରେ ପେଟ୍ରୋଲ ଏବଂ ଡିଜେଲ ଅନ୍ତର୍ଭୁକ୍ତ କରୁଛନ୍ତି। କେବଳ ଏହା ପରେ, ଜିଏସଟି ପ୍ରବର୍ତ୍ତନ ପରେ ପ୍ରକୃତ ମୂଲ୍ୟ ଜାଣିହେବ।

ଏକ ଆକଳନ ଅନୁଯାୟୀ, ଭାରତରେ ପ୍ରତିବର୍ଷ ପ୍ରାୟ ୧୦-୧୧ ହଜାର କୋଟି ଲିଟର ଡିଜେଲ ବିକ୍ରି ହୁଏ ଏବଂ ୩-୪ ହଜାର କୋଟି ଲିଟର ପେଟ୍ରୋଲ ମିଶାଇ ପ୍ରାୟ ୧୪ ହଜାର କୋଟି ଲିଟର ଡିଜେଲ-ପେଟ୍ରୋଲ ବିକ୍ରି ହୁଏ। ଜିଏସଟି ପରିସରକୁ ଆସିବା ଦ୍ଵାରା ପେଟ୍ରୋଲ-ଡିଜେଲ ଯୋଗୁଁ କେନ୍ଦ୍ର ଏବଂ ରାଜ୍ୟ ୪.୧୦ ଲକ୍ଷ କୋଟି ଟଙ୍କା କ୍ଷତି ସହିବେ। ଏପରି ପରିସ୍ଥିତିରେ, ଏହି କ୍ଷତିର ଗାଢାକୁ ଭରିବା ଏକ ଚ୍ୟାଲେଞ୍ଜ ହେବ।

କ୍ଷତିପୂରଣ ପାଇଁ ଦୁଇଟି ବିକଳ୍ପ:

୧- ଏହି କ୍ଷତିର ଭରଣ କରିବାକୁ, ୨୮% ଜିଏସଟି ବ୍ୟତୀତ ସରଚାର୍ଜ ଲାଗୁ କରାଯିବା ଉଚିତ୍। ବିଳାସପୂର୍ଣ୍ଣ କାର ଉପରେ ମଧ୍ୟ କେନ୍ଦ୍ର ସରକାର ସରଚାର୍ଜ ଆଦାୟ କରୁଛନ୍ତି। ଏଭଳି ପରିସ୍ଥିତିରେ ମୂଲ୍ୟ ଆଶା କରାଯାଉଥିବା ଠାରୁ ଅଧିକ ହୋଇପାରେ।

୨- ଜିଏସଟି ପରେ ମଧ୍ୟ କେନ୍ଦ୍ର ସରକାର ପେଟ୍ରୋଲ ଏବଂ ଡିଜେଲ ଉପରେ ଏକ୍ସାଇଜ୍ ଡ୍ୟୁଟି ଲାଗୁ କରିବା ଉଚିତ ଏବଂ ଏଥିରୁ ଆୟ କେନ୍ଦ୍ର ଏବଂ ରାଜ୍ୟ ସରକାର ବାଣ୍ଟିବା ଉଚିତ୍। ଏଥିପାଇଁ ଉଭୟ ସରକାରଙ୍କୁ ଏହି ସୂତ୍ରରେ ସହମତ ହେବାକୁ ପଡିବ।

ନୂଆଦିଲ୍ଲୀ: କେନ୍ଦ୍ର ସରକାର ଗୁରୁବାର ଦିନ ଦୁଇଟି କିସ୍ତିରେ ଟିକସ ହସ୍ତାନ୍ତର ଆକାରରେ ୧,୧୬,୬୬୫ କୋଟି ଟଙ୍କା ବିଭିନ୍ନ ରାଜ୍ୟକୁ ହସ୍ତାନ୍ତର କରିଛନ୍ତି। ସାଧାରଣ ମାସିକ ଟିକସ ହସ୍ତାନ୍ତର ପରିମାଣ ୫୮,୩୩୩ କୋଟି ଟଙ୍କା ତୁଳନାରେ ଏହି ଅର୍ଥ ଖୁବ ଅଧିକ।

ଓଡ଼ିଶାକୁ ଟିକସ ହସ୍ତାନ୍ତର ବାବଦରେ ୫୨୮୩ କୋଟି ଟଙ୍କା ମିଳିଛି।

ପୁଞ୍ଜି ଓ ବିକାଶ ବ୍ୟୟକୁ ତ୍ବରାନ୍ବିତ କରିବା ଲାଗି ରାଜ୍ୟମାନଙ୍କ ଆର୍ଥିକ ସ୍ଥିତି ସୁଦୃଢ଼ କରିବା ଲାଗି ପ୍ରତିବଦ୍ଧତା ଅନୁରୂପ ଭାରତ ସରକାର ଏହି ପଦକ୍ଷେପ ଗ୍ରହଣ କରିଛନ୍ତି।

ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଖାଉଟି ବ୍ୟାପାର ବିଭାଗ ପକ୍ଷରୁ ଏକ ସ୍ୱତନ୍ତ୍ର ଅଭିଯାନ ୨.୦ ମାଧ୍ୟମରେ ଦପ୍ତର ଓ ଏହାର ପରିସରର ସ୍ୱଚ୍ଛତା ରକ୍ଷା, ସଫେଇ ଓ ଶୋଭାବର୍ଦ୍ଧନ କାର୍ଯ୍ୟ ଦେଶବ୍ୟାପୀ କରାଯାଇଛି। ଏହି ଅଭିଯାନ କାଳରେ ବ୍ୟୁରୋ ଅଫ ଷ୍ଟାଣ୍ଡାର୍ଡ, ଜାତୀୟ ଟେଷ୍ଟ ହାଉସ,  ଜାତୀୟ ଖାଉଟି ସମବାୟ ମହାସଂଘ ଓ ଜାତୀୟ ଖାଉଟି ଆୟୋଗର କାର୍ଯ୍ୟାଳୟ ସହିତ ମୋଟ ୭୩ଟି ଦପ୍ତରରେ ଏହି ସ୍ୱଚ୍ଛତା ଓ ପରିଚ୍ଛନ୍ନତା ରକ୍ଷା କାର୍ଯ୍ୟକ୍ରମ ହାତକୁ ନିଆଯାଇ ତାହାକୁ ସମ୍ପୂର୍ଣ୍ଣ କରାଯାଇଛି। ଅକ୍ଟୋବର ୨ ଗାନ୍ଧୀ ଜୟନ୍ତୀରୁ ଆରମ୍ଭ ହୋଇଥିବା ଏହି ପରିଚ୍ଛନ୍ନତା କାର୍ଯ୍ୟ ଆନୁଷ୍ଠାନିକଭାବେ ଚଳିତମାସ ୩୧(୨୦୨୨ ଅକ୍ଟୋବର ୩୧ରେ ଶେଷ ହେବ।

ଏହି ଅଭିଯାନ ଆରମ୍ଭ କରିବା ପୂର୍ବରୁ ସମ୍ପୃକ୍ତ ବିଭାଗ ପକ୍ଷରୁ ଏକ ପ୍ରସ୍ତୁତି ପର୍ଯ୍ୟାୟ କାମ ହାତକୁ ନିଆଯାଇଥିଲାö। ପରିଚ୍ଛନ୍ନତା ଅଭିଯାନ କାଳରେ କେଉଁ କେଉଁ କାମ କରାଯିବ ତାହାର ଏକ ତାଲିକା ପ୍ରସ୍ତୁତ କରାଯାଇ ତଦନୁସାରେ ଅଭିଯାନକୁ କାର୍ଯ୍ୟକାରୀ କରାଯାଇଛି।

ଏଥିରେ ପୁରୁଣା ନଥିପତ୍ରଗୁଡିକୁ ହଟାଇବା ସହିତ ଦେଶର ୭୩ଟି ଦପ୍ତର ଓ ବିଭାଗର ସଦର କାର୍ଯ୍ୟାଳୟରେ ସଫେଇ ଓ ଅନ୍ୟାନ୍ୟ ସୌନ୍ଦର୍ଯ୍ୟକରଣ କାର୍ଯ୍ୟ କରିବାକୁ ସ୍ଥିର ହୋଇଥିଲା। ଏହି କାମରେ ସିପିଡବ୍ଲ୍ୟୁଡିର ସହାୟତା ନିଆଯାଇଥିଲା।

ଏହି ଅଭିଯାନ କାଳରେ ପାଞ୍ଚ ଜଣ ସଂସଦ ସଦସ୍ୟଙ୍କ ପ୍ରଶ୍ନର ଉତ୍ତର ଯଥାବିଧି ପ୍ରଦାନ କରାଯିବା ସହିତ ଦୁଇଟି ଆନ୍ତଃ ମନ୍ତ୍ରଣାଳୟ ମତାମତର ସ୍ପଷ୍ଟୀକରଣ ଉପସ୍ଥାପିତ କରାଯାଇଛି। ୨୦୨୨ ଅକ୍ଟୋବର ୨୬ ସୁଦ୍ଧା ୧୫୧୬ ସାଧାରଣ ଅଭିଯୋଗ ମଧ୍ୟରୁ ୧୦୭୪ର ସନ୍ତୋଷଜନକ ଉତ୍ତର ଦିଆଯାଇଛି । ଏହା ମୋଟ ଅଭିଯୋଗର ୭୦ଶତାଂଶ। ଏହାଛଡା ୧୫୬ ସାଧାରଣ ଅଭିଯୋଗର ଶୁଣାଣି କରାଯାଇ ତାହାର ସମାଧାନ କରାଯାଇଛି।

ଏହି ଅଭିଯାନ କାଳରେ ରେକର୍ଡ ପରିଚାଳନା ଉପରେ ଗୁରୁତ୍ୱ ପ୍ରଦାନ କରାଯାଇଥିଲା। ଏଥିରେ ୧୫, ୨୮୫ କାଗଜପତ୍ର ଫାଇଲକୁ ଚିହ୍ନଟ କରାଯାଇ ସେଗୁଡିକର ସମୀକ୍ଷ। କାମ ହାତକୁ ନିଆଯାଇଥିଲା। ସମୀକ୍ଷା ହୋଇଥିବା ମୋଟ ୧୩୧୩୧ ଫାଇଲ ମଧ୍ୟରୁ ୭୦୬୧ଟିକୁ ଡିଜିଟାଇଜ କରାଯିବା ପରେ ମୂଳ କାଗଜ ଫାଇଲଗୁଡିକୁ ନଷ୍ଟ କରି ଦିଆଯାଇଛି। ସେହିଭଳି ୬୦୨ ଇ-ଫାଇଲକୁ ସମୀକ୍ଷା କରାଯାଇ ଇ-ଅଫିସ ବର୍ଗରେ ୪୭୩ଟିକୁ ବନ୍ଦ କରାଯାଇଛି। ଅତଏବ ଚିହ୍ନଟ ହୋଇଥିବା ରେକର୍ଡ ପତ୍ର ମଧ୍ୟରୁ ୮୬%କୁ ସବୁଦିନ ପାଇଁ ବନ୍ଦ କରିଦିଆଯାଇଛି। ଏହି ଅଭିଯାନ କାଳରେ ପୁରୁଣା ଫାଇଲ, ରେକର୍ଡପତ୍ର ଓ ଅନ୍ୟାନ୍ୟ ଅଫିସ ଆବର୍ଜନାକୁ ୨, ୩୮, ୨୬୮ ଟଙ୍କାର ବିଭାଗ ବିକ୍ରି କରିଛି। ପୁରୁଣା ଫାଇଲ ଓ କାଗଜପତ୍ର ସବୁକୁ ହଟାଇବା ପରେ ବିଭିନ୍ନ ଦପ୍ତରରେ ମୋଟ ୫୧୨୧ ବର୍ଗଫୁଟ ସ୍ଥାନ ମୁକ୍ତ ହୋଇଛି।

ଏଥି ସହିତ ବିଭାଗ ପକ୍ଷରୁ  ସଦର କାର୍ଯ୍ୟାଳୟ ସମେତ ବିଭିନ୍ନ ବିଭାଗୀୟ ଦପ୍ତର ପରିସରରେ ବୃକ୍ଷରୋପଣ ଓ ଶୋଭାବର୍ଦ୍ଧନ କାର୍ଯ୍ୟକ୍ରମକୁ ହାତକୁ ନିଆଯାଇଥିଲା। ଏଥିରେ ଦେଶବ୍ୟାପୀ ବିଭିନ୍ନ ଦପ୍ତର ପରିସରରେ ୫୦୦ ଚାରା ରୋପଣ କରାଯାଇଛି। ଏସବୁ ଚାରା ମୁଖ୍ୟତଃ ଆଇଆଇଏଲ୍‌ଏଲ, ଏନ୍‌ଟିଏଚ୍ ଓ ବିଆଇଏଏସ୍ କ୍ୟାମ୍ପସରେ କରାଯାଇଥିଲା। ଏହାଛଡା ଏହି ଅଭିଯାନ କାଳରେ ସବୁ ବିଭାଗୀୟ ଦପ୍ତରରେ ଏଲ୍‌ଇଡି ଲାଇଟ୍ ଲଗାଯାଇ ବିଜୁଳି ସଂରକ୍ଷଣ ବ୍ୟବସ୍ଥା କାର୍ଯ୍ୟକାରୀ ହୋଇଛି।

ପ୍ରଚଳିତ ନିୟମ ଓ ନୀତି ଅନୁସାରେ ବିଭାଗର ଅଧସ୍ତନ କାର୍ଯ୍ୟାଳୟରୁୁ ନିୟମିତ ପରିତ୍ୟକ୍ତ, ଅବ୍ୟବହୃତ ସାମଗ୍ରୀ ଓ ଆବର୍ଜନା ସଂଗ୍ରହ ପାଇଁ ଭାରତ ସରକାରଙ୍କ ଏମ୍‌ଏସ୍‌ଟିସି ସହିତ ବୁଝାମଣାପତ୍ର ସ୍ୱାକ୍ଷରିତ ହୋଇଛି। ଏହି ଚୁକ୍ତି ଅନୁସାରେ ସେହି ସଂସ୍ଥା ସମ୍ପୃକ୍ତ ଦପ୍ତରଗୁଡିକରୁ ନିୟମିତ ଅବ୍ୟବହୃତ ଓ ପରିତ୍ୟକ୍ତ ସାମଗ୍ରୀ /କାଗଜପତ୍ର ସଫା କାମ କରୁଛି।

ଏହି ଅଭିଯୋଗ କାଳରେ ବିଭାଗ ପକ୍ଷରୁ ବିଭିନ୍ନ ହାଟ ଓ ସହରାଞ୍ଚଳରେ ଖାଉଟି ସଚେତନତା ବାର୍ତ୍ତା ପ୍ରଚାର  କାମ ହାତକୁ ନିଆଯାଇଥିଲା। ଏଥିରେ ଅଧିକରୁ ଅଧିକ ଖାଉଟି ସୁରକ୍ଷା ମାମଲା ବିଭିନ୍ନ ଖାଉଟି ଅଦାଲତର  ଇ-ଦାଖିଲା ପୋର୍ଟାଲରେ କିପରି ସହଜରେ କରାଯାଇପାରିବ ସେ ବିଷୟରେ ସାଧାରଣ ଲୋକଙ୍କୁ ଅବଗତ କରାଯାଇଥିଲା। ଏହି ପୋର୍ଟାଲରେ ଏକ ଜାଗୃତି ମାସକ୍‌ଟର ବ୍ୟାନର ରହିଛି।

ଏହି ଅଭିଯାନ ଅବସରରେ ନୂଆଦିଲ୍ଲୀ ଦପ୍ତରରେ ଏକ ରି-ମଡେଲ ସେକ୍ସନ ପଞ୍ଚମ ମହଲାରେ ଖୋଲାଯାଇଛି। ଆଗରୁ ସେଠାରେ ଏକ ଶସ୍ୟ ପରୀକ୍ଷାଗାର ଥିଲା। ମନ୍ତ୍ରୀଙ୍କ ନିର୍ଦ୍ଦେଶରେ ସେହି ପରୀକ୍ଷାଗାରକୁ ଉଠାଇ ଏକ ନୂଆ ସେକ୍ସନ ସେଠାରେ ତିଆରି କରାଯାଇଛି। ଏହି ପରୀକ୍ଷାଗାର ଗାଜିଆବାଦରେ ଥିବା  ଦପ୍ତରର ୫୪୫ ନମ୍ବର ପ୍ରକୋଷ୍ଠକୁ ସ୍ଥାନାନ୍ତରିତ ହୋଇଛି। ନୂଆ ସେକ୍ସନ ଓ ପରୀକ୍ଷାଗାରରେ ଆବଶ୍ୟକ ମୌଳିକ ସୁବିଧା ସୁଯୋଗ ଓ କର୍ମଚାରୀଙ୍କ ପାଇଁ ସ୍ୱତନ୍ତ୍ର ପେସାଦାରୀ ବ୍ୟବସ୍ଥା କରାଯାଇଛି।

ନୂଆଦିଲ୍ଲୀ: ଜାତୀୟ ଖାଦ୍ୟ ସୁରକ୍ଷା ଆଇନ (ଏନଏଫଏସଏ) ଏବଂ ସରକାରଙ୍କ ଅନ୍ୟ ଯୋଜନା ପାଇଁ ଆବଶ୍ୟକ ଖାଦ୍ୟଶସ୍ୟ ସମେତ ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା (ପିଏମଜିକେଏୱାଇ)ରେ ବିତରଣ ପାଇଁ ଆବଶ୍ୟକ ଅତିରିକ୍ତ ଖାଦ୍ୟଶସ୍ୟର ଚାହିଦା ପୂରଣ କରିବା ଲାଗି କେନ୍ଦ୍ରୀୟ ପୁଲରେ ଯଥେଷ୍ଟ ପରିମାଣରେ ଖାଦ୍ୟଶସ୍ୟ ମହଜୁଦ ହୋଇ ରହିଛି। ୧ ଅକ୍ଟୋବର, ୨୦୨୨ ସୁଦ୍ଧା ପ୍ରାୟ ୨୨୭ ଲକ୍ଷ ମେଟ୍ରିକ ଟନ ଗହମ ଏବଂ ୨୦୫ ଲକ୍ଷ ମେଟ୍ରିକ ଟନ ଚାଉଳ କେନ୍ଦ୍ରୀୟ ପୁଲରେ ଗଚ୍ଛିତ ରହିଛି। ଏହି ପରିମାଣ ବଫର ଷ୍ଟକ ସର୍ତ୍ତାବଳୀ/ପରିଚାଳନା ଆବଶ୍ୟକତା ଠାରୁ ଯଥେଷ୍ଟ ଅଧିକ।

ଏନଏଫଏସଏ ଅଧୀନରେ ଆବଶ୍ୟକ ଚାହିଦାକୁ ପୂରଣ କରିବା ପରେ, ଅନ୍ୟ କଲ୍ୟାଣମୂଳକ ଯୋଜନା ଏବଂ ପିଏମଜିକେଏୱାଇର ସପ୍ତମ ପର୍ଯ୍ୟାୟ ପାଇଁ ଆବଶ୍ୟକ ଖାଦ୍ୟଶସ୍ୟ ବିତରଣ କରିବା ପରେ ମଧ୍ୟ ୧ ଏପ୍ରିଲ ୨୦୨୩ ସୁଦ୍ଧା କେନ୍ଦ୍ରୀୟ ପୁଲରେ ଯଥେଷ୍ଟ ପରିମାଣରେ ଷ୍ଟକ ଉପଲବ୍ଧ ରହିବ ଯାହାକି ବଫର ସର୍ତ୍ତାବଳୀ ଠାରୁ ଅଧିକ ଏବଂ ଅତିରିକ୍ତ ହୋଇଥିବ। ସବୁ ଆବଶ୍ୟକତା ପୂରଣ କରିବା ପରେ ୧ ଏପ୍ରିଲ ୨୦୨୩ ସୁଦ୍ଧା ଆନୁମାନିକ ୧୧୩ ଲକ୍ଷ ମେଟ୍ରିକ ଟନ ଗହମ ଏବଂ ୨୩୭ ଲକ୍ଷ ମେଟ୍ରିକ ଟନ ଚାଉଳ ଉପଲବ୍ଧ ରହିଥିବ। ଏହା ବଫର ସର୍ତ୍ତାବଳୀ/ପରିଚାଳନା ଆବଶ୍ୟକତା ଯଥାକ୍ରମେ ୭୫ ଲକ୍ଷ ମେଟ୍ରିକ ଟନ ଗହମ ଏବଂ ୧୩୬ ଲକ୍ଷ ମେଟ୍ରିକ ଟନ ଚାଉଳ ଠାରୁ ଯଥେଷ୍ଟ ଅଧିକ।

ଚଳିତ ୨୦୨୨-୨୩ ଖରିଫ ବିପଣନ ଋତୁରେ ଖରିଫ ଧାନ କ୍ରୟ ଆରମ୍ଭ ହୋଇସାରିଛି। ୧୬ ଅକ୍ଟୋବର ୨୦୨୨ ସୁଦ୍ଧା ପ୍ରାୟ ୫୮ ଲକ୍ଷ ମେଟ୍ରିକ ଟନ ଧାନ (୩୯ ଲକ୍ଷ ମେଟ୍ରିକ ଟନ ଚାଉଳ) କିଣାଯାଇ ସାରିଛି। ଏହି ପରିମାଣ ୨୦୨୧-୨୨ ଖରିଫ ବିପଣନ ଋତୁରେ କିଣାଯାଇଥିବା ଧାନ ତୁଳନାରେ ଯଥେଷ୍ଟ ଅଧିକ। ଦେଶରେ ଚଳିତ ବର୍ଷ ଭଲ ମୌସୁମୀ ବର୍ଷା ହୋଇଛି ଏବଂ ଧାନ ଫସଲ ଅମଳ ସ୍ୱାଭାବିକ ରହିବ ବୋଲି ଆଶା କରାଯାଉଛି।

ଚଳିତ ୨୦୨୨-୨୩ ଖରିଫ ବିପଣନ ଋତୁରେ, ୭୭୧ ଲକ୍ଷ ମେଟ୍ରିକ ଟନ ଧାନ (୫୧୮ ଲକ୍ଷ ମେଟ୍ରିକ ଟନ ଚାଉଳ) କିଣାଯିବ ବୋଲି ଆକଳନ କରାଯାଇଛି। ରବି ଧାନକୁ ମିଶାଇଲେ, ସମ୍ପୂର୍ଣ୍ଣ ୨୦୨୨-୨୩ ଖରିଫ ବିପଣନ ଋତୁରେ ୯୦୦ ଲକ୍ଷ ମେଟ୍ରିକ ଟନ ଧାନ ସଂଗ୍ରହ କରାଯିବ ବୋଲି ଆଶା କରାଯାଉଛି।

ଅନ୍ୟପକ୍ଷରେ ଏପ୍ରିଲ ୨୦୨୩ ପରଠାରୁ ଗହମ କ୍ରୟ ଆରମ୍ଭ ହେବ। ଦେଶରେ ଏ ବର୍ଷ ଭଲ ବୃଷ୍ଟିପାତ ହୋଇଥିବାରୁ ପରବର୍ତ୍ତୀ ରବି ଋତୁରେ ଗହମ ଉତ୍ପାଦନ ଏବଂ କ୍ରୟ ସ୍ୱାଭାବିକ ରହିବ ବୋଲି ଆଶା କରାଯାଉଛି।

‘‘ନ୍ୟୁଟ୍ରି ସେରେଲ୍ସ’’ କୁହାଯାଉଥିବା ମୋଟା ଶସ୍ୟର ଉଚ୍ଚ ପୋଷକ ତତ୍ତ୍ୱକୁ ଦୃଷ୍ଟିରେ ରଖି ଭାରତ ସରକାର ୨୦୨୨-୨୩ ଖରିଫ ବିପଣନ ଋତୁରେ କେନ୍ଦ୍ରୀୟ ପୁଲ ଅଧୀନରେ  ୧୩.୭୨ ଲକ୍ଷ ମେଟ୍ରିକ ଟନ୍‌ ମୋଟା ଶସ୍ୟ କିଣିବା ଲାଗି ଲକ୍ଷ୍ୟ ଧାର୍ଯ୍ୟ କରିଛନ୍ତି। ୨୦୨୧-୨୨ ଖରିଫ ବିପଣନ ଋତୁରେ ସରକାର ୬.୩୦ ଲକ୍ଷ ମେଟ୍ରିକ ଟନ୍‌ ମୋଟା ଶସ୍ୟ କିଣିଥିଲେ।

କୋଭିଡ – ୧୯ କାରଣରୁ ଦେଶର ଗରିବ ଲୋକମାନଙ୍କୁ ବିଭିନ୍ନ ଆର୍ଥିକ ସମସ୍ୟାର ସମ୍ମୁଖିନ ହେବାକୁ ପଡ଼ିଛି। ଏହାକୁ ଦୃଷ୍ଟିରେ ରଖି ଭାରତ ସରକାର ଗରିବଙ୍କ ଅନୁକୂଳ ପଦକ୍ଷେପ ଗ୍ରହଣ କରିଛନ୍ତି ଏବଂ ପିଡିଏସ ଓ ଅନ୍ୟ କଲ୍ୟାଣମୂଳକ ଯୋଜନାରେ ମିଳୁଥିବା ଖାଦ୍ୟଶସ୍ୟ ବ୍ୟତୀତ ପିଏମଜିକେଏୱାଇ ଅଧୀନରେ ୮୦ କୋଟି ଲୋକଙ୍କୁ ମାଗଣା ଖାଦ୍ୟଶସ୍ୟ ଯୋଗାଇ ଦେଉଛନ୍ତି। ଏଥିପାଇଁ ମୋଟ୍‌ ୧୧୨୧ ଲକ୍ଷ ମେଟ୍ରିକ ଟନ ଖାଦ୍ୟଶସ୍ୟ ପିଏମଜିକେଏୱାଇ ଅଧୀନରେ ଆବଣ୍ଟନ କରାଯାଇଛି। କେନ୍ଦ୍ର ସରକାର ଏଥିପାଇଁ ମୋଟ୍‌ ୩.୯୧ ଲକ୍ଷ କୋଟି ଟଙ୍କା ଖର୍ଚ୍ଚ କରିବେ ବୋଲି ଅନୁମାନ କରାଯାଉଛି। ଏଭଳି ବିପୁଳ ପରିମାଣରେ ଖାଦ୍ୟଶସ୍ୟ ସାଧାରଣ ଲୋକଙ୍କ ଯୋଗାଇ ଦିଆଯିବା ସହିତ ରପ୍ତାନି ଉପରେ ନିୟନ୍ତ୍ରଣ ଲାଗୁ କରାଯାଇଛି, ଯାହାଫଳରେ ଏସବୁ ସାମଗ୍ରୀର ଅନ୍ତର୍ଜାତୀୟ ମୂଲ୍ୟ ତୁଳନାରେ ଘରୋଇ ବଜାରରେ ଦରଦାମ ବୃଦ୍ଧିକୁ ସ୍ଥିର ରଖାଯିବା ସମ୍ଭବ ହୋଇପାରିଛି।

ନୂଆଦିଲ୍ଲୀ: କେନ୍ଦ୍ର ସରକାର ବୈଧ ମାପ ବିଜ୍ଞାନ ବିଭାଗ ଜରିଆରେ ଓଜନ ଓ ମାପନ ଉପକରଣ ନିର୍ମାତା ଓ ରପ୍ତାନିକାରୀ ମାନଙ୍କୁ ୬୩ଟି କାରଣ ଦର୍ଶାଅ ନୋଟିସ ଜାରି କରିଛନ୍ତି। ଏସବୁ ନୋଟିସ ଜରିଆରେ ସେମାନଙ୍କ ଠାରୁ ଅନୁପାଳନ ବିବରଣୀ ମଗାଯାଇଛି। ବିଶେଷ କରି ଇ-କମର୍ସ ପ୍ଲାଟଫର୍ମରେ କାରବାର କରୁଥିବା ଉତ୍ପାଦନକାରୀ/ ରପ୍ତାନିକାରୀ/ ବିକ୍ରେତାମାନଙ୍କ ଠାରୁ ମଡେଲର ଅନୁମୋଦନ, ଉତ୍ପାଦନ, ରପ୍ତାନିକାରୀ/ ଡିଲର ଲାଇସେନ୍ସ ଏବଂ ଓଜନ ନିକିତି ଯାଞ୍ଚର ବିବରଣୀ ମଗାଯାଇଛି।

କେତେକ ଓଜନ ଓ ମାପନ ଉପକରଣ ଉତ୍ପାଦନକାରୀ/ରପ୍ତାନିକାରୀମାନେ ଆଇନରେ ଥିବା ବ୍ୟବସ୍ଥାକୁ ପାଳନ ନକରି ମଣିଷ ଓଜନ ମେସିନ ଏବଂ ରୋଷେଇ ଘର ପାଇଁ ବ୍ୟବହୃତ ନିକିତି ଆଦି ବିକ୍ରି କରୁଛନ୍ତି। ଇ-କମର୍ସ ସାଇଟରେ ଏଭଳି ଅନଧିକୃତ ଭାବେ ବିକ୍ରି କାରଣରୁ କେବଳ ଗ୍ରାହକମାନେ ଉଚିତ୍ ସେବାରୁ ବଞ୍ଚିତ ହେଉନାହାନ୍ତି ବରଂ ସରକାର ମଧ୍ୟ ରାଜସ୍ୱ କ୍ଷତି ସହୁଛନ୍ତି।

ଗ୍ରାହକମାନଙ୍କ ହିତ ରକ୍ଷା ଏବଂ ସଂରକ୍ଷଣ ନିମନ୍ତେ, ବୈଧ ମାପ ଆଇନ, ୨୦୦୯ ଅଧୀନରେ ଓଜନ ଓ ମାପନ ଉପକରଣର ନିର୍ମାତା/ରପ୍ତାନିକାରୀମାନେ ସେମାନଙ୍କର ଓଜନ ଓ ମାପ ଉପକରଣର ମଡେଲ (ଧାରା ୨୨) ପାଇଁ ଅନୁମତି ନେବାର ଆବଶ୍ୟକତା ରହିଛି। ସେହିପରି ଧାରା ୨୩ ଅନୁଯାୟୀ ସେମାନଙ୍କୁ ନିର୍ମାଣ ଲାଇସେନ୍ସ ଏବଂ ଧାରା ୧୯ ଅନୁଯାୟୀ ରପ୍ତାନିକାରୀ ପଞ୍ଜିକରଣ କରାଇବା ଜରୁରି। ଏହାଛଡ଼ା ଧାରା ୨୪ ଅଧୀନରେ ଓଜନ ଓ ମାପ ଉପକରଣର ଯାଞ୍ଚ/ ଷ୍ଟାମ୍ପିଙ୍ଗ କରାଯିବାର ମଧ୍ୟ ଆବଶ୍ୟକତା ରହିଛି।
ଆହୁରି ବୈଧ ମାପ (ପ୍ୟାକେଜ ହୋଇଥିବା ଉତ୍ପାଦ), ନିୟମାବଳୀ ୨୦୧୧ର ବ୍ୟବସ୍ଥା (ନିୟମ ୬) ଅନୁଯାୟୀ ଓଜନ ଏବଂ ମାପନ ଉପକରଣ ସମ୍ପର୍କରେ ଆଗୁଆ ପ୍ୟାକେଜିଂ ବେଳେ କିମ୍ବା ଇ-କମର୍ସ ପ୍ଲାଟଫର୍ମରେ ଘୋଷଣାନାମା ପ୍ରଦାନ କରିବାର ଆବଶ୍ୟକତା ରହିଛି।

ଗ୍ରାହକଙ୍କ ହିତ ରକ୍ଷା ପାଇଁ ଓଜନ ଓ ମାପ ଉପକରଣ ମଡେଲକୁ ମଞ୍ଜୁରି, ନିର୍ମାଣ ଲାଇସେନ୍ସ/ ରପ୍ତାନିକାରୀଙ୍କ ପଞ୍ଜୀକରଣ ଏବଂ ଓଜନ ଓ ମାପ ଉପକରଣର ଯାଞ୍ଚ/ଷ୍ଟାମ୍ପିଙ୍ଗ ବାଧ୍ୟତାମୂଳକ। ଏହା ଓଜନ, ମାପ ତଥା ଓଜନ ମାପନ ଓ ସଂଖ୍ୟା ଆଧାରରେ ବିକ୍ରି ହେଉଥିବା ଅନ୍ୟ ସାମଗ୍ରୀର ବ୍ୟବସାୟ ଓ ବାଣିଜ୍ୟକୁ ନିୟନ୍ତ୍ରଣ କରିବା ଲାଗି ମଧ୍ୟ ଅତି ଜରୁରି। ପୂର୍ବରୁ ପ୍ୟାକେଜ୍ ହୋଇଥିବା ଉତ୍ପାଦ/ ଇ-କମର୍ସ ପ୍ଲାଟଫର୍ମ ଉପରେ ଉତ୍ପାଦ ସମ୍ପର୍କରେ ଘୋଷଣା କରାଯିବା ମଧ୍ୟ ବାଧ୍ୟତାମୂଳକ, ଯାହାଫଳରେ ଗ୍ରାହକମାନେ ସୂଚିତ ହୋଇ ସଠିକ ନିଷ୍ପତ୍ତି ନେଇପାରିବେ।

ନିର୍ମାତା/ଉତ୍ପାଦନକାରୀମାନେ ନିର୍ମାଣ, ରପ୍ତାନି, ବିକ୍ରି, ବିତରଣ ହେଉଥିବା ଓଜନ ଏବଂ ମାପ ଉପକରଣ ସଂଖ୍ୟାର ରେକର୍ଡ ରଖିବାର ଆବଶ୍ୟକତା ରହିଛି। ଏସବୁ ସାମଗ୍ରୀର ଯାଞ୍ଚ ପାଇଁ ସରକାରଙ୍କୁ ପଇଠ କରାଯାଉଥିବା ଶୁଳ୍କର ରେକର୍ଡ ମଧ୍ୟ ରଖାଯିବା ଜରୁରି।

ବୈଧ ମାପ ଆଇନର ଏହିସବୁ ବ୍ୟବସ୍ଥାର ଉଲ୍ଲଙ୍ଘନ କ୍ଷେତ୍ରରେ, ଧାରା ୩୨ (ମଡେଲ ପାଇଁ ମଞ୍ଜୁରି ନେବାରେ ବିଫଳତା କ୍ଷେତ୍ରରେ), ଧାରା ୪୫ (ବିନା ଲାଇସେନ୍ସରେ ଓଜନ ଏବଂ ମାପ ଉପକରଣ ନିର୍ମାଣ ପାଇଁ ଜୋରିମାନା), ଧାରା ୩୮ (ଓଜନ କିମ୍ବା ମାପ ଉପକରଣ ରପ୍ତାନିକାରୀମାନେ ପଞ୍ଜିକରଣ ନକରିବା କ୍ଷେତ୍ରରେ ଜୋରିମାନା), ଧାରା ୩୩ (ଓଜନ କିମ୍ବା ମାପର ବିନା ଯାଞ୍ଚରେ ବ୍ୟବହାର ପାଇଁ ଜୋରିମାନା) ଏବଂ ଧାରା ୩୬ (ଅଣ-ମାନକୀକୃତ ପ୍ୟାକେଜ ପାଇଁ ଜୋରିମାନା ଆଦି) ଅଧୀନରେ ଜୋରିମାନା କିମ୍ବା ଜେଲ ଦଣ୍ଡାଦେଶ ଅଥବା ଉଭୟ ଦଣ୍ଡାଦେଶର ବ୍ୟବସ୍ଥା ରହିଛି।

ନୂଆଦିଲ୍ଲୀ: ତାପମାତ୍ରା ବିନା ଖାଇବା ତେଲର ନିଟ୍ ପରିମାଣ ଓ ତାହାର ଓଜନ ଘୋଷଣା କରିବାକୁ କେନ୍ଦ୍ର ସରକାର ଖାଇବା ତେଲ ଉତ୍ପାଦକ, ପ୍ୟାକର ଓ ଆମଦାନୀକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଏ ସଂକ୍ରାନ୍ତ ଘୋଷଣାନାମା ପ୍ରକାଶ ପାଇବାର ଛ’ମାସ ମଧ୍ୟରେ, ଅର୍ଥାତ୍ ଆସନ୍ତା ୨୦୨୩ ଜାନୁୟାରୀ ୧୫ତାରିଖ ସୁଦ୍ଧା ନିଜର ଲେବଲ ସଂଶୋଧନ କରି ପ୍ରତି ପ୍ୟାକେଟ, ଟିଣ ବା ବୋତଲରେ ରହୁଥିବା ଖାଇବା ତେଲର ଉଭୟ ପରିମାଣ (ତାପମାତ୍ରା ବିନା) ଓ ଓଜନ ଦର୍ଶାଇବାକୁ କେନ୍ଦ୍ର ଖାଉଟି ବ୍ୟାପାର ବିଭାଗ ପକ୍ଷରୁ ସମ୍ପୃକ୍ତ ପକ୍ଷମାନଙ୍କୁ ପରାମର୍ଶ ଦିଆଯାଇଛି।

୨୦୧୧ର ମାପ ଓ ଓଜନ ଆଇନ (ପ୍ୟାକେଟ କରା ସାମଗ୍ରୀ ସଂକ୍ରାନ୍ତ) ଅନୁସାରେ ଖାଉଟିଙ୍କ ସ୍ୱାର୍ଥ ଦୃଷ୍ଟିରୁ ପୂର୍ବରୁ ପ୍ୟାକେଟ ହୋଇଥିବା ସବୁ ସାମଗ୍ରୀର ପ୍ରକୃତ ଓଜନ ଓ ପରିମାଣ ସେହି ପ୍ୟାକେଟର ଲେବଲ ଉପରେ ଲେଖିବା ବାଧ୍ୟତାମୂଳକ। ସେହି ପ୍ୟାକେଟର ଲେବଲ ଉପରେ ଖାଇବା ତେଲର ପରିମାଣ ଓ ଓଜନ ପ୍ରକୃତରେ କେତେ ତାହାକୁ ପ୍ରସ୍ତୁତକର୍ତ୍ତା, ପ୍ୟାକର ଓ ଆମଦାନୀକାରୀଙ୍କୁ ଉଲ୍ଲେଖ କରିବାକୁ ପଡିବ। ଏହାର ଅର୍ଥ ପ୍ରକୃତରେ ଉଭୟ ଲିଟର ଓ ଗ୍ରାମରେ ଏସବୁ ସାମଗ୍ରୀର ମୂଲ୍ୟ ଲେଖିବାକୁ ହେବ। ଏବେ ଅନେକ ଖାଇବା ତେଲ ଉତ୍ପାଦନକାରୀ କମ୍ପାନୀ ତେଲର ନିଟ୍ ବା ପ୍ରକୃତ ପରିମାଣର ଓଜନ ଘୋଷଣା କରିବାବେଳେ ନିଜ ଆଡୁ ଏକତରଫା ଭାବେ ତାପମାତ୍ରା ଉଲ୍ଲେଖ କରୁଛନ୍ତି। ତାପମାତ୍ରା ଉଲ୍ଲେଖ ରହିଲେ ତେଲର ଓଜନ ଲିଟର ଓ ଗ୍ରାମରେ ସମାନ ରହିବ ନାହିଁ। ପ୍ରକୃତରେ ଖାଉଟି ଯେତିକି ଓଜନର ତେଲ ପାଇଁ ପଇସା ଦେଉଛି ତାକୁ ସେତିକି ମିଳୁନାହିଁ।

ଏବେ ଉତ୍ପାଦକ, ପ୍ୟାକର ଓ ଆମଦାନୀକାରୀ ପ୍ୟାକେଟରେ ନିଟ୍ ପରିମାଣ ଉଲ୍ଲେଖ କରିବାବେଳେ ପ୍ୟାକିଂ ସମୟରେ ତେଲର ତାପମାତ୍ରାକୁ ଉଲ୍ଲେଖ କରୁଛନ୍ତି ଏବଂ ଏଥିସହିତ ଏହାର ପରିମାଣ ଦର୍ଶାଉଛନ୍ତି। କେତେକ ଉତ୍ପାଦକ ତାପମାତ୍ରାକୁ ଅତି ଅଧିକ ୬୦୦ ସେଲସିୟସ ଉଲ୍ଲେଖ କରୁଛନ୍ତି। ଏହା ଫଳରେ ବନସ୍ପତି ଭଳି ସାମଗ୍ରୀର ବାସ୍ତବ ଓଜନ ଓ ପରିମାଣରେ ଫରକ ରହୁଛି। ଉଦାହରଣ ସ୍ୱରୂପ ଗୋଟିଏ ଲିଟର ବନସ୍ପତିକୁ ବିଭିନ୍ନ ତାପମାତ୍ରାରେ ମାପିଲେ ଏହାର ଓଜନ ଓ ପରିମାଣ ଭିନ୍ନ ଭିନ୍ନ ହେଉଛି। ସୋୟାବିନ୍ ତେଲ କ୍ଷେତ୍ରରେ ମଧ୍ୟ ସମାନ ସ୍ଥିତି ଘଟୁଛି। ନିମ୍ନରେ ପ୍ରଦତ୍ତ ଟେବୁଲରୁ ଏହି ପାର୍ଥକ୍ୟ ବୁଝା ପଡିବ।
କ୍ରମିକ ସଂଖ୍ୟା ତାପମାତ୍ରା ଗ୍ରାମରେ ଓଜନ

୧-୨୧ଡିଗ୍ରୀ ସେଲସିୟସ ୯୧୯.୧
୨- ୩୦ଡିଗ୍ରୀ ସେଲସିୟସ ୯୧୩.୦
୩- ୪୦ଡିଗ୍ରୀ ସେଲସିୟସ ୯୦୬
୪- ୫୦ଡିଗ୍ରୀ ସେଲସିୟସ ୮୯୯.୪
୫- ୬୦ଡିଗ୍ରୀ ସେଲସିୟସ ୮୯୨.୬

ଅତଏବ ଖାଇବା ତେଲର ପ୍ରକୃତ ଓଜନ ଭିନ୍ନ ଭିନ୍ନ ତାପମାତ୍ରାରେ ପ୍ୟାକେଜ ବେଳେ ଅଲଗା ରହୁଛି। ତେଣୁ ଖାଉଟି ପ୍ୟାକେଟ ତେଲ କିଣିବାବେଳେ ଲିଟର ବା କେଜି ପିଛା ଯେତିକି ପଇସା ଦେଉଛନ୍ତି ସେହି ଅନୁସାରେ ପ୍ରକୃତ ଓଜନର ସାମଗ୍ରୀ ପାଉନାହାନ୍ତି। ତେଣୁ ପ୍ୟାକେଟ କରିବାବେଳେ ଖାଇବା ତେଲର ତାପମାତ୍ରା କେତେ ତାହା ନିର୍ଦ୍ଦିଷ୍ଟଭାବେ ବିକ୍ରି ପାଇଁ ଉଦ୍ଦିଷ୍ଟ ପ୍ୟାକେଟରେ ଉଲ୍ଲେଖ କରିବାକୁ ସରକାର ସବୁ ଉତ୍ପାଦକ, ପ୍ୟାକେଟ ପ୍ରସ୍ତୁତକାରୀ ଏବଂ ଆମଦାନୀକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଖାଉଟିଙ୍କୁ ବୃହତ୍ତର ସ୍ୱାର୍ଥ ଦୃଷ୍ଟିରୁ ସରକାର ଏହି ପଦକ୍ଷେପ ନେଇଛନ୍ତି। (ପିଆଇବି)

ନୂଆଦିଲ୍ଲୀ: ଅତୀତର ସବୁ ରେକର୍ଡ ଭଙ୍ଗ କରି କେନ୍ଦ୍ର ସରକାର ୨୦୨୨-୨୩ ଆର୍ଥିକ ବର୍ଷରେ ଚାଷୀଙ୍କଠାରୁ ୨.୫୦ଲକ୍ଷ ଟନ୍ ପିଆଜ ସଂଗ୍ରହ କରିଛନ୍ତି। ଭବିଷ୍ୟତରେ ତିରୋଟ ସମୟର ଆବଶ୍ୟକତା ପୂରଣ କରିବାକୁ ଏହି ପିଆଜକୁ ମହଜୁଦ (ବଫର ଷ୍ଟକ) ରଖାଯାଇଛି। ୨୦୨୧-୨୨ରେ କେନ୍ଦ୍ର ସରକାର ୨ଲକ୍ଷ ଟନ୍ ପିଆଜ ମହଜୁଦ ରଖିଥିଲେ। ଚଳିତବର୍ଷ ଏହାକୁ ଆଉ ୦.୫୦ଲକ୍ଷ ଟନ୍ ବଢାଇ ଦିଆଯାଇଛି। ଚଳିତ ରବି ଋତୁରେ ଅମଳ ହୋଇଥିବା ପିଆଜକୁ ସଂଗ୍ରହ କରି ସରକାର ଏହାର ମୂଲ୍ୟ ସ୍ଥିର ରଖିବାକୁ ଏହି ମହଜୁଦ ବ୍ୟବସ୍ଥା କରିଛନ୍ତି। ଜାତୀୟ ଭାରତୀୟ କୃଷି ସମବାୟ ବିପଣନ ସହଯୋଗ ମହାସଂଘ ବା ନାଫେଡ ସହାୟତାରେ କୃଷକ ଉତ୍ପାଦନ ସଂଗଠନ(ଏଫ୍‌ପିଓ) ମାଧ୍ୟମରେ ଏହି ପିଆଜ ସବୁ ସରକାର ମହାରାଷ୍ଟ୍ର, ଗୁଜରାଟ ଓ ମଧ୍ୟପ୍ରଦେଶ ଭଳି ପିଆଜ ଉତ୍ପାଦନକାରୀ ରାଜ୍ୟର ଚାଷୀଙ୍କଠାରୁ କିଣିଛନ୍ତି।

ଆସନ୍ତା ଅଗଷ୍ଟରୁ ଡିସେମ୍ବର ପର୍ଯ୍ୟନ୍ତ ପିଆଜ ଉତ୍ପାଦନ ପ୍ରାୟତଃ କମ୍ ରହିବ। ଏହି ନିଅଣ୍ଟିଆ ସମୟରେ ମହଜୁଦ ରହିଥିବା ଏହି ପିଆଜକୁ ବିଭିନ୍ନ ରାଜ୍ୟ ଓ ସରକାରୀ ସଂସ୍ଥାଙ୍କୁ ଆବଶ୍ୟକତା ଅନୁସାରେ କେନ୍ଦ୍ର ଯୋଗାଇବା ସହିତ ଖୋଲା ବଜାରରେ ବିକ୍ରି ପାଇଁ ଯୋଗାଇ ଦିଆଯିବ। ତିରୋଟ ବା ନିଅଣ୍ଟିଆ ସମୟରେ ପିଆଜର ମୂଲ୍ୟ ଯେପରି ଅସ୍ୱାଭାବିକ ଭାବେ ଅତି ଅଧିକ ନ ରହେ ସେଥି ପାଇଁ ସରକାର ଦେଶର ବିଭିନ୍ନ ବଡ ବଡ ମଣ୍ଡି ଏବଂ ଅନ୍ୟାନ୍ୟ ଖୁଚୁରା ବିକ୍ରୟ କେନ୍ଦ୍ର ମାଧ୍ୟମରେ ସୁଲଭ ମୂଲ୍ୟରେ  ପିଆଜ ଖୋଲା ବଜାରକୁ ଛାଡିବେ।

ଏହି ମହଜୁଦ(ବଫର ଷ୍ଟକ) ଦ୍ୱାରା ଦୁଇଟି ପ୍ରମୁଖ ଉଦ୍ଦେଶ୍ୟ ସାଧିତ ହେବ। ପ୍ରଥମତଃ ଚାଷୀଙ୍କଠାରୁ ଲାଭଦାୟକ ମୂଲ୍ୟରେ ସରକାର ପିଆଜ ସଂଗ୍ରହ କରିବା ଦ୍ୱାରା ସେମାନେ ଉପକୃତ ହେବେ। ଦ୍ୱିତୀୟତଃ ସମଗ୍ର ଦେଶର ଖାଉଟିଙ୍କୁ ମଧ୍ୟ ସୁଲଭ ମୂଲ୍ୟରେ ପିଆଜ ମିଳିବ। ପିଆଜ ଏକ ପଚାସଢା ସାମଗ୍ରୀ ଏବଂ ଏହା ଅଧିକ ଦିନ ରହେ ନାହିଁ। ଏହା ଶୁଖିଯିବା ଫଳରେ ଓଜନ କମିଯାଏ, ଗଜା ହୋଇଯାଏ ଓ ପ୍ରାୟତଃ ପଚିସଢି ଯାଇଥାଏ।

ରବିଋତୁରେ ପିଆଜ ଏପ୍ରିଲରୁ ଜୁନ ମାସ ମଧ୍ୟରେ ଅମଳ ହୋଇଥାଏ। ଏହି ସମୟରେ ଭାରତର ମୋଟ ପିଆଜ ଚାହିଦାର ୬୫% ଉତ୍ପାଦିତ ହୋଇଥାଏ ଏବଂ ଏହା ଖରିଫ ପିଆଜ ଅମଳ ହେବା ପର୍ଯ୍ୟନ୍ତ ଅକ୍ଟୋବର – ନଭେମ୍ବର ଯାଏ ବଜାର ଆବଶ୍ୟକତା ପୂରଣ କରେ। ଅତଏବ ନିୟମିତ ପିଆଜ ଯୋଗାଣ ପାଇଁ ଏହାର ଉପଯୁକ୍ତ ସଂରକ୍ଷଣ ଓ ଭଣ୍ଡାରଣ ବିଶେଷ ଗୁରୁତ୍ୱପୂର୍ଣ୍ଣ।

ପିଆଜ ଅମଳ ପରବର୍ତ୍ତୀ କ୍ଷତିକୁ ଯଥାସମ୍ଭବ ହ୍ରାସ କରିବାକୁ କେନ୍ଦ୍ର ଖାଉଟି କଲ୍ୟାଣ ବିଭାଗ ଟେକ୍‌ନୋଲୋଜି ବିକଶିତ କରିବାକୁ ବିଭିନ୍ନ ସମ୍ପୃକ୍ତ ପକ୍ଷଙ୍କୁ ପ୍ରସ୍ତାବ ଦେବା ସହିତ ଏ କ୍ଷେତ୍ରରେ ଆଗେଇ ଆସିବାକୁ ଆହ୍ୱାନ ଜଣାଇଛି। ଏଥିରେ ପିଆଜର ପ୍ରାଥମିକ ପ୍ରକ୍ରିୟାକରଣ, ଭଣ୍ଡାରଣ ଓ ମୂଲ୍ୟ ବର୍ଦ୍ଧନକୁ ଗୁୁରୁତ୍ୱ ଦିଆଯାଇଛି। ଅମଳ ପରବର୍ତ୍ତୀ କ୍ଷତିକୁ କମାଇବା ପାଇଁ କି ପ୍ରକାର ସମ୍ଭାବ୍ୟ ଉପାୟ ଓ ଟେକ୍‌ନୋଲୋଜି ବାହାର କରାଯାଇପାରିବ ସେଥିପାଇଁ ଖାଉଟି କଲ୍ୟାଣ ବିଭାଗ ୟୁଜି/ପିଜି/ସ୍ତରର ବିଦ୍ୟାର୍ଥୀ, ଗବେଷକ ଓ ଷ୍ଟାର୍ଟଅପଗୁଡିକ ସହ କଥାବାର୍ତ୍ତା କରୁଛି। ଏବେ ଯେଉଁ ଭଣ୍ଡାରଣ ଢାଞ୍ଚା ରହିଛି ତାହାର ବିକାଶ, ପ୍ରାକ୍ ଅମଳ ସ୍ତରର ଯତ୍ନ ଓ ନଷ୍ଟ ହେଉଥିବା ପିଆଜ ବର୍ଜ୍ୟବସ୍ତୁର ଉପଯୋଗ କରିବା ଉପରେ ଗବେଷଣା କରି ଉପାୟ ବାହାର କରିବାକୁ ମଧ୍ୟ ଗୁରୁତ୍ୱ ଦିଆଯାଇଛି।

ସରକାର ଏଥିପାଇଁ  ଯେଉଁ ପ୍ରସ୍ତାବ ଦେଇଛନ୍ତି  ତାହା ତିନିସ୍ତରୀୟ। ପ୍ରଥମେ ଏଥିପାଇଁ ଆଗ୍ରହୀ ପକ୍ଷ ସରକାରଙ୍କୁ ପ୍ରସ୍ତାବ ଦେବେ ଓ ତାହାକୁ ପରୀକ୍ଷା କରି ଦେଖାଯିବ। ଏହା ପରେ ପ୍ରସ୍ତାବର ରୂପାୟନ ଓ ଟେକ୍‌ନୋଲୋଜି ବିକାଶ ଜନିତ ପ୍ରସ୍ତାବକୁ ସରକାର ବିଚାର କରି ଦେଖିବେ। ଏହା ଯଦି ଗ୍ରହଣୀୟ ହୁଏ, ତାହେଲେ ତାହାର ନିର୍ମାଣ କରି ପରୀକ୍ଷାମୂଳକ ପ୍ରୟୋଗ ପାଇଁ ସମ୍ପୃକ୍ତ ପକ୍ଷଙ୍କୁ ଅନୁମତି ପ୍ରଦାନ କରାଯିବ। ଏହି ପ୍ରକ୍ରିୟାରେ ନିର୍ବାଚିତ ଅଂଶଗ୍ରହଣକାରୀଙ୍କୁ ପ୍ରତ୍ୟେକ ସ୍ତରରେ ଆକର୍ଷଣୀୟ ପୁରସ୍କାର ରାଶି ପ୍ରଦାନ କରାଯିବାର ବ୍ୟବସ୍ଥା କରାଯାଇଛି।

ଏହି ଯୋଜନା /କାର୍ଯ୍ୟକ୍ରମ ସମ୍ପର୍କରେ ଦେଶର ସବୁ କୃଷି ବିଶ୍ୱବିଦ୍ୟାଳୟ ଓ କେନ୍ଦ୍ରୀୟ ବିଶ୍ୱବିଦ୍ୟାଳୟକୁ କେନ୍ଦ୍ର ଖାଉଟି କଲ୍ୟାଣ ବିଭାଗ ପକ୍ଷରୁ ଅବଗତ କରାଯାଇଛି। ଟେକ୍‌ନୋଲୋଜି ବିକାଶ କ୍ଷେତ୍ରରେ ଅଧିକରୁ ଅଧିକ ପକ୍ଷ ଯେପରି ସମ୍ପୃକ୍ତ ହୁଅନ୍ତି ସେଥିପାଇଁ ସରକାର ଉତ୍ସାହିତ କରୁଛନ୍ତି। ଆଗ୍ରହୀ ପକ୍ଷ ଏଥିପାଇଁ … ମାଧ୍ୟମରେ ନିଜର ପଞ୍ଜୀକରଣ କରିପାରିବେ।