The Samikhsya Odia
ଖୋର୍ଦ୍ଧା: ଆଜି ଟାଙ୍ଗୀ ଚାନ୍ଦପୁର ରାସ୍ତାର ପ୍ରଶସ୍ତିକରଣ ପାଇଁ ଭିତ୍ତି ପ୍ରସ୍ତର ସ୍ଥାପନ କରାଯାଇଛି। ଏହି ଅବସରରେ ବାଚସ୍ପତି ତଥା ରଣପୁର ବିଧାୟିକା ଶ୍ରୀମତୀ ସୁରମା ପାଢୀ, ପୁରୀ ସାଂସଦ ସଂବିତ ପାତ୍ର, ଭୁବନେଶ୍ବର ସାଂସଦ ଶ୍ରୀମତୀ ଅପରାଜିତା ଷଡଙ୍ଗୀ ଏବଂ ଖୋର୍ଦ୍ଧା ବିଧାୟକ ପ୍ରଶାନ୍ତ ଜଗଦ୍ଦେବ ଯୋଗ ଦେଇଥିଲେ।
ଏହି ପ୍ରକଳ୍ପ ଦ୍ବାରା ଖୋରଧା ନିର୍ବାଚନ ମଣ୍ଡଳୀ ଓ ରଣପୁର ନିର୍ବାଚନ ମଣ୍ଡଳୀ ର ଜନ ସାଧାରଣ ମାନେ ବହୁ ମାତ୍ରାରେ ଉପକୃତ ହେବେ।
ଚାନ୍ଦପୁର: ଖୋର୍ଦ୍ଧା ଜିଲ୍ଲା ୧୬ ନମ୍ବର ଜାତୀୟ ରାଜପଥ ବେଣ୍ଟ ଛକରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ଯେଉଁଥିରେ ଜଣେ ମୋଟର ସାଇକେଲ ଚାଳକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ହୋଇଛନ୍ତି। ଗୁରୁତରଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ଭର୍ତ୍ତି କରିଛନ୍ତି। ପରେ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି।
ଖବର ମୁତବକ ନିରଞ୍ଜନ ପ୍ରଧାନ (୪୧) ଓ ତାଙ୍କ ସାଥି ବୁଲେଟ ଯୋଗେ କୌଣସି କାମରେ ଖୋର୍ଦ୍ଧା ଜିଲ୍ଲା କୁହୁଡି ଯାଇଥିଲେ। ସେଠାରୁ ନିଜ ଗାଁ ପୁରୀ ଜିଲ୍ଲା କଣାସ ଥାନା ଅନ୍ତର୍ଗତ ଗଡ଼ ଖାରଦକୁ ଫେରୁଥିଲେ। ହେଲେ ବୁଲେଟ ଟି ବେଣ୍ଟ ଛକ ନିକଟରେ ଦୁର୍ଘଟଣା ଗ୍ରସ୍ତ ହୋଇଥିଲା। ଫଳରେ ନିରଞ୍ଜନଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ସାଆଠିଏ ଗୁରୁତର ହୋଇଥିଲେ। ଦୁର୍ଘଟଣାର କାରଣ ଜଣା ପଡିନାହିଁ। ଚାନ୍ଦପୁର ପୋଲିସ ଶବ ସହ ବୁଲେଟକୁ ଜବତ କରି ଘଟଣାର ତଦନ୍ତ କରୁଛି।
ଚାନ୍ଦପୁର/ନୟାଗଡ: ଆସନ୍ତା କାଲି ସାରା ଦେଶରେ ହେବ ଭୋଟ ଗଣତି। ସେଥିପାଇଁ ସବୁଆଡେ ଲାଗି ରହିଛି ରାଜନୈତିକ ତାତି। ଉଭୟ ଶାସକ ବିରୋଧିଙ୍କ ମଧ୍ୟରେ ଲାଗି ରହିଛି ଛକା ପଞ୍ଜା। ଏତିକି ବେଳେ ବିଭିନ୍ନ ପ୍ରକାର ଅଘଟଣ ଘଟାଇ ନିଜର ମନ୍ଦ ଯୋଜନାକୁ ଫଳବ୍ରତ କରିବା ପାଈଁ କେତେକ ଅସାମାଜିକ ଚରିତ୍ରର ବ୍ୟକ୍ତି ସୁଯୋଗକୁ ଅପେକ୍ଷା କରିଥାନ୍ତି। ହେଲେ ପ୍ରଶାସନ ଏବେ ଠାରୁ ଏହାକୁ ପ୍ରତିହତ କରିବା ପାଇଁ ପ୍ରସ୍ତୁତି ଆରମ୍ଭ କରି ଦେଇଛି।
ଆସନ୍ତାକାଲି ନୟାଗଡ ଜିଲ୍ଲାରେ କିଭଳି ସୁରୁଖୁରୁରେ ଭୋଟ ଗଣତି ହୋଇ ପାରିବ ସେଥିପାଇଁ ସମସ୍ତ ପ୍ରସ୍ତୁତି କରିବା ସହ ନୟାଗଡ଼ ଜିଲ୍ଲା ପ୍ରଶାସନ ପକ୍ଷରୁ ଆସନ୍ତା କାଲି ସକାଳ ୬ ଟାରୁ ୫ ତାରିଖ ସକାଳ ୬ ଟା ପର୍ଯ୍ୟନ୍ତ ଜିଲ୍ଲାରେ ୧୪୪ ଧାରା ଲାଗୁ କରିଛି। ଏଥିପାଇଁ ଆଜି ନୟାଗଡ଼ ଜିଲ୍ଲା ଚାନ୍ଦପୁର ପୋଲିସ ପକ୍ଷରୁ ଚାନ୍ଦପୁର ଥାନାର କେରଣ୍ଡା ଟାଙ୍ଗୀ, ମୟୁର ଝାଲିଆ, କନ୍ଧ ନୟାଗଡ଼ ଓ ଚାନ୍ଦପୁର ବଜାରରେ ଫ୍ଲାଗ ମାର୍ଚ୍ଚ କରାଯାଇଛି।
ଚାନ୍ଦପୁର ଥାନା ଆଇଆଇସି ଜଗଦୀଶ ଚନ୍ଦ୍ର କରଙ୍କ ନେତୃତ୍ୱରେ ଫ୍ଲାଗ ମାର୍ଚ୍ଚ କରାଯାଇଛି। କେନ୍ଦ୍ରୀୟ ସୁରକ୍ଷା ବଳଙ୍କ ସହ ଫ୍ଲାଗ ମାର୍ଚ୍ଚରେ ଚାନ୍ଦପୁର ପୋଲିସ ସାମିଲ ହୋଇଛନ୍ତି। ଯେକୌଣସି ପରିସ୍ଥିତିକୁ ସମ୍ମୁଖୀନ କରିବା ପାଇଁ ଚାନ୍ଦପୁର ପୋଲିସ ସମକ୍ଷ ବୋଲି ପୋଲିସ କହିଛି।
ନୟାଗଡ/ଚାନ୍ଦପୁର: ସାରା ରାଜ୍ୟରେ ଏବେ ଗ୍ରୀଷ୍ମ ତାତି ଠାରୁ ନିର୍ବାଚନ ତାତି କାହିଁରେ କେତେ। ନିର୍ବାଚନ ଆସିଲେ ନିର୍ବାଚନରେ ବିଭିନ୍ନ ପ୍ରକାର ଅଘଟଣ ଘଟାଇ ନିଜର ମନ୍ଦ ଯୋଜନାକୁ ଫଳପ୍ରଦ କରିବା ପାଇଁ କେତେକ ଅସାମାଜିକ ଚରିତ୍ରର ବ୍ୟକ୍ତି ସୁଯୋଗକୁ ଅପେକ୍ଷା କରିଥାନ୍ତି। ହେଲେ ପ୍ରଶାସନ ଏବେ ଠାରୁ ଏହାକୁ ପ୍ରତିହତ କରିବା ପାଇଁ ପ୍ରସ୍ତୁତି ଆରମ୍ଭ କରି ଦେଇଛି।
ଆସନ୍ତା ସାଧାରଣ ନିର୍ବାଚନ କିଭଳି ଭାବେ ଭୟ ମୁକ୍ତ ସହ ନିରପେକ୍ଷ ଭାବେ ଅନୁଷ୍ଠିତ ହୋଇ ପାରିବ ସେଥିପାଇଁ ନୟାଗଡ ଜିଲ୍ଲା ଚାନ୍ଦପୁର ଥାନା ପୋଲିସ ପକ୍ଷରୁ ଚାନ୍ଦପୁର ଥାନାର ବିଭିନ୍ନ ସମ୍ବେଦନଶୀଳ ସହ ଅତି ସମ୍ବେଦନ ଶୀଳ ସ୍ଥାନରେ ସଶସ୍ତ୍ର ସୁରକ୍ଷା ବଳଙ୍କୁ ନେଇ ଫ୍ଲାଗ ମାର୍ଚ୍ଚ କରାଯାଇଛି। ଏହା ସହ କାନ୍ଧ ନୟାଗଡ଼, ଜଙ୍କିଆ, ମୟୁରଝଲିଆ, ଖଣ୍ଡିସୀ ଗ୍ରାମ ପଂଚାୟତରେ ଫ୍ଲାଗ ମାର୍ଚ୍ଚ କରିଛି ଚାନ୍ଦପୁର ପୋଲିସ।
ଥାନା ଆଇ ଆଇ ସି ଜଗଦୀଶ କୁମାର କରଙ୍କ ନେତୃତ୍ୱରେ ଏହି ଫ୍ଲାଗ ମାର୍ଚ୍ଚ କରାଯାଇଛି।
ଶାନ୍ତି ଶୃଙ୍ଖଳାର ସହିତ ନିର୍ବାଚନରେ ସମସ୍ତ ମତଦାତା ସେମାନଙ୍କର ମତ ସାବ୍ୟସ୍ତ କରିବା ପାଇଁ ନିବେଦନ କରିଛନ୍ତି ଚାନ୍ଦପୁର ଥାନା ଅଧିକାର ଜଗଦୀଶ କୁମାର କର।
ଚାନ୍ଦପୁର: ଆଊ ଦିନ କେଇଟା ପରେ ଅନୁଷ୍ଠିତ ହେବ ସାଧାରଣ ନିର୍ବାଚନ। ନିର୍ବାଚନ କୁ ଶାନ୍ତି ଶୃଙ୍ଖଳା ର ସହ ଅନୁଷ୍ଠିତ କରିବା ପାଇଁ ନୟାଗଡ଼ ଜିଲ୍ଲା ଚାନ୍ଦପୁର ପୋଲିସ ଅଣ୍ଟା ଭିଡିଛି। ଏଥିପାଇଁ ଚାନ୍ଦପୁର ପୋଲିସ ପକ୍ଷରୁ କେରଣ୍ଡା ଟାଙ୍ଗୀ ଛକ ରେ ଯାନ ବାହନ ତନଖି କରାଯାଉଥିଲା ବେଳେ ଯାତ୍ରୀ ଵାହୀ ଅଟୋ ରିକ୍ସା ରୁ 5 କେଜି ଗଞ୍ଜେଇ ଜବତ କରିଛି ଚାନ୍ଦପୁର ପୋଲିସ।
ଏହି ଗଞ୍ଜେଇ କାରବାର ଅଭିଯୋଗ ରେ ଜଣେ ବ୍ୟକ୍ତିଙ୍କୁ ଗିରଫ କରିଛି ପୋଲିସ। ଗିରଫ ଅଭିଯୁକ୍ତ ର ନାମ ରମେଶ ବେହେରା ଏବଂ ତାଙ୍କର ବୟସ 35 ବର୍ଷ। ତାଙ୍କ ଘର ନୟାଗଡ଼ ଜିଲ୍ଲା ଖଣ୍ଡପଡା ଗ୍ରାମରେ ବୋଲି ଜଣା ପଡିଛି। ଅଭିଯୁକ୍ତ ଜଣକ ନୟାଗଡ଼ ରୁ ଚାନ୍ଦପୁରକୁ ଗଞ୍ଜେଇ ଚୋରା ଚାଲାଣ କରୁଥିଲା। ଜବତ ଗଞ୍ଜେଇ ର ମୂଲ୍ୟ 25 ହଜାର ଟଙ୍କା ହେବ ବୋଲି ଜଣା ପଡିଛି। ଗଞ୍ଜେଇ ସହ ଅଟୋ ରିକ୍ସା କୁ ଜବତ କରି ତଦନ୍ତ କରୁଛି ପୋଲିସ।
ରଣପୁର: ପ୍ରଚଣ୍ଡ ତାତି କଲାଣି କଲବଲ। ଜଳୁଛି ସାରା ଓଡିଶା, ପ୍ରତିଦିନ ଭାଙ୍ଗୁଛି ତାତି ରେକର୍ଡ। ଆକାଶରୁ ବର୍ଷୁଛି ନିଆଁ ପିଣ୍ଡୁଳା। ଏହି ଭଳି ପରିସ୍ଥିତିରେ ପାଣି ପାଗ ବିଭାଗ ଲୋକମାନଙ୍କୁ ଘରୁ ନ ବାହାରିବା ପାଇଁ ବାରମ୍ବାର ସଚେତନ କରୁଛି। କିନ୍ତୁ ଲୋକମାନେ ପେଟ ପୋଷିବା ପାଇଁ ତଥା ଜରୁରୀ କାମରେ ବାହାରକୁ ଯିବା ପାଇଁ ବାଧ୍ୟ ହେଉଛନ୍ତି। ଏ ପଟେ ରାସ୍ତା ଉନ୍ନତିକରଣ ନାଁ ରେ ରାସ୍ତା କଡ଼ରୁ ଗଛଗୁଡିକୁ କାଟି ଦିଆ ଯାଇଛି। ଯାହା ଫଳରେ ତାପମାତ୍ରା ବଢିବା ଯୋଗୁଁ ବାଟୋଇମାନେ ଛାଇରେ ଟିକେ ଆଶ୍ରା ନେଇ ପାରୁ ନାହାନ୍ତି। ଶୋଷରେ ମଧ୍ୟ ଡହଳ ବିକଳ ହେଉଛନ୍ତି।
ଏହିଭଳି ପରିସ୍ଥିତିରେ ବାଟୋଇମାନଙ୍କ କଷ୍ଟକୁ ଲାଘବ କରିବା ପାଇଁ ରଣପୁର ଥାନା ପକ୍ଷରୁ ଥାନା ଅଧିକାରୀ ନିହାର ରଞ୍ଜନ ମହାନ୍ତିଙ୍କ ତତ୍ୱାବଧାନରେ ଥାନା ସମ୍ମୁଖରେ ଏକ ଜଳଛତ୍ର ଆଜି ଠାରୁ ଖୋଲା ଯାଇଛି। ଥାନା ଅଧିକାରୀ ଶ୍ରୀ ମହାନ୍ତି ନିଜେ ଉପସ୍ଥିତ ରହି ଲୋକମାନଙ୍କୁ ଥଣ୍ଡା ପାଣି ଓ ଦହି ସର୍ବତ ବାଣ୍ଟି ଥିଲେ। ଥାନାର ଅନ୍ୟ ସମସ୍ତ କର୍ମଚାରୀ ଉପସ୍ଥିତ ରହି ଜଳ ବଣ୍ଟନରେ ସାହାଯ୍ୟ କରିଥିଲେ। ସେହିଭଳି ଭାବେ ଚାନ୍ଦପୁର ଥାନା ପକ୍ଷରୁ ମଧ୍ୟ ଚାନ୍ଦପୁରରେ ଏକ ଜଳଛତ୍ର ଖୋଲା ଯାଇଛି।
ଉଲ୍ଲେଖ ଥାଉ କି ଆଜି ରଣପୁର ଅଂଚଳରେ ୪୦ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିବା କୁହାଯାଇଛି।
ଚାନ୍ଦପୁର: ନୟାଗଡ ଜିଲ୍ଲା ଚାନ୍ଦପୁର ପୋଲିସକୁ ବଡ ସଫଳତା ମିଳିଛି। ସିମେଣ୍ଟ ବୋଝେଇ ଟ୍ରକରୁ ୨୫୦ ବସ୍ତା ଚୋରୀ ମାମଲାର ପୋଲିସ ପର୍ଦ୍ଦାଫାସ କରି ୩ ଲୁଟେରାଙ୍କୁ ଗିରଫ କରିବା ସହ ରାମକୋ କମ୍ପାନୀର ୭୨ ବସ୍ତା ସିମେଣ୍ଟ ଏବଂ ଦୁଇଟି ଟ୍ରାକ୍ଟର ଜବତ କରିଛି।
ସୂଚନା ଅନୁଯାୟୀ, ଗତ ୨୫ ତାରିଖରେ ଯାଜପୁର ଜିଲ୍ଲାର ରାମକୋ ସିମେଣ୍ଟ କମ୍ପାନୀରୁ ୫୦୦ ବସ୍ତା ସିମେଣ୍ଟ ବୋଝେଇ ଟ୍ରକ ଚାନ୍ଦପୁର ଅଭିମୁଖେ ବାହାରିଥିଲା। ଚାନ୍ଦପୁର ନିକଟ ରାଇପଡା ଠାରେ ୨୫୦ ବସ୍ତା ସିମେଣ୍ଟ ଖାଲି କରିବା ପରେ ଟ୍ରକଟି ଚଣ୍ଡେଶ୍ୱର ଅଭିମୁଖେ ବାହାରିଥିଲା। ହେଲେ ରାସ୍ତାରେ ସିମେଣ୍ଟ ବୋଝେଇ ଟ୍ରକଟି ଖରାପ ହେବାରୁ ଟ୍ରକ ଚାଳକ କେରେଣ୍ଡା ଟାଙ୍ଗୀ ନିକଟସ୍ଥ ରାସ୍ତା ପାର୍ଶ୍ଵରେ ପାର୍କିଂ କରି ସେହି ଟ୍ରକ କ୍ୟାବିନରେ ବିଶ୍ରାମ ନେଇଥିଲେ। ତେବେ ୨୬ ତାରିଖ ଭୋର ସମୟରେ କେତେକ ଲୁଟେରା ଘଟଣା ସ୍ଥଳରେ ପହଁଚି ଟ୍ରକ ଚାଳକକୁ ଭୟଭୀତ କରି ୪୦୭ ଓ ଟ୍ରାକ୍ଟର ଲଗାଇ ନିମିଷକ ମଧ୍ୟରେ ଟ୍ରକରୁ ସମସ୍ତ ୨୫୦ ବସ୍ତା ସିମେଣ୍ଟ ଲୁଟି ନେଇଥିଲେ।
ଟ୍ରକ ଚାଳକ ଚାନ୍ଦପୁର ଥାନାରେ ପହଁଚି ଲିଖିତ ଅଭିଯୋଗ କରିବା ପରେ ଚାନ୍ଦପୁର ପୋଲିସ ଆଇଆଇସି ଜଗଦୀଶ ଚନ୍ଦ୍ର କର ଓ ସବ ଇନ୍ସପେକ୍ଟର କ୍ଷେତ୍ରବାସୀ ହରିଚନ୍ଦନ ବିଭିନ୍ନ ସ୍ଥାନରେ ଚଢ଼ାଉ କରି ୩ ଲୁଟେରାଙ୍କୁ ଗିରଫ କରିଛନ୍ତି। ଗିରଫ ଲୁଟେରା ମାନେ ହେଲେ ଚାନ୍ଦପୁର ଥାନା ଅଞ୍ଚଳର କୁଶ ବେହେରା (୨୪ ବର୍ଷ) ସୁବଳ ପ୍ରଧାନ (୨୨ ବର୍ଷ) ଓ ରାଧାକୃଷ୍ଣ ପାଇକରାୟ ବୋଲି ଜଣା ପଡିଛି। ଏହା ସହ ଚାନ୍ଦପୁର ପୋଲିସ ଏହି ଘଟଣାରେ ଅନ୍ୟ ଅଭିଯୁକ୍ତ ମାନଙ୍କୁ ଗିରଫ କରିବା ପାଇଁ ଚଢ଼ାଉ ଜାରୀ ରଖିଛି।
ରଣପୁର: ଆଜି ଚାନ୍ଦପୁର ଜୋନ-୨୪ କଂଗ୍ରେସ କମିଟି ତରଫରୁ ବରକନ୍ୟା ଠାରେ ଏକ କର୍ମୀ ସମ୍ମିଳନୀ ଅନୁଷ୍ଠିତ ହୋଇଥିଲା। ବରିଷ୍ଠ ନେତା ସାରଙ୍ଗ ପ୍ରଧାନଙ୍କ ସଭାପତିତ୍ବରେ ଉକ୍ତ ବୈଠକରେ ପୁରୁଖା କର୍ମୀ ସୁକାନ୍ତ ସେନାପତି, ରଙ୍କନିଧି ମହାପାତ୍ର, ଭିକାରୀ ପାତାଳସିଂ, ରମେଶ ନାୟକ, ଧ୍ରୁବ ଚରଣ ପରିଡ଼ା, ମାନସ ମହାପାତ୍ର, ପିସିସି ଛାତ୍ର କଂଗ୍ରେସ ସମ୍ପାଦକ ଅନିଲ ଚୁଆଲାସିଂ, ଭରତ ପାଇକରାୟଙ୍କ ସମେତ ପାଞ୍ଚ ଶହରୁ ଉର୍ଦ୍ଧ୍ୱ କର୍ମୀ ଯୋଗ ଦେଇଥିଲେ। ଆଗାମୀ ନିର୍ବାଚନରେ ସମ୍ପୂର୍ଣ୍ଣ ସହଯୋଗ କରିବା ସହ ସଂଗଠନକୁ ମଜବୁତ୍ କରିବାକୁ କର୍ମୀମାନେ ଦୃଢ଼ ସଂକଳ୍ପ ନେଇଥିଲେ।
ଚାନ୍ଦପୁର: ଗାଧୋଇବା ବେଳେ ପୋଖରୀରେ ବୁଡି ୧୦ ବର୍ଷିୟା ନାବାଳିକାର ମୃତ୍ୟୁ ହୋଇଥିବା ଖବର ହସ୍ତଗତ ହୋଇଛି। ନୟାଗଡ ଜିଲ୍ଲା ଚାନ୍ଦପୁର ଥାନା କନ୍ଧ ନୟାଗଡ ଗ୍ରାମରେ ଏଭଳି ଏକ ଅଭାବନୀୟ ଘଟଣା ଘଟିଛି।
ସୂଚନା ଅନୁଯାୟୀ, ଚାନ୍ଦପୁର ଥାନା କନ୍ଧ ନୟାଗଡ ଗ୍ରାମର ଶେଷଦେବ ଜେନାଙ୍କ ନାବାଳିକା ଝିଅ ସଂଘମିତ୍ରା ଗାଧୋଇବା ପାଇଁ ପୋଖରୀକୁ ଯାଇଥିଲା। ପୋଖରୀରେ ଗାଧୋଇବା ବେଳେ ଗଭୀର ଜଳକୁ ପଳାଇ ଯିବାରୁ କୂଳକୁ ଫେରି ପାରିନଥିଲା। ଫଳରେ ପୋଖରୀରେ ବହୁ ଖୋଜା ଖୋଜି ପରେ ନାବାଳିକାକୁ ଉଦ୍ଧାର କରି ଚାନ୍ଦପୁର ମେଡିକାଲରେରେ ଭର୍ତ୍ତି କରାଯାଇଥିଲା। ଡାକ୍ତର ସେଠାରେ ନାବାଳିକାଙ୍କୁ ମୃତ ଘୋଷଣା କରିଥିଲେ। ଚାନ୍ଦପୁର ପୋଲିସ୍ ଶବ ଜବତ କରି ତଦନ୍ତ ଜାରି ରଖିଛି।
ଚାନ୍ଦପୁର: ନୟାଗଡ଼ ଜିଲ୍ଲା ଚାନ୍ଦପୁର ଥାନା ଅନ୍ତର୍ଗତ ଚମ୍ପାପେଡି ଜଙ୍ଗଲର ଜୁଆ ଆଡ୍ଡା ଉପରେ ଗତକାଲି ରାତିରେ ବଡ଼ ଧରଣର ଚଢ଼ାଉ ହୋଇଛି। ଚାନ୍ଦପୁର ଆଇଆଇସି ମୁକେଶ ଚନ୍ଦ୍ର ବେହେରାଙ୍କ ନେତ୍ରୁତ୍ୱରେ ଉକ୍ତ ଚଢାଉ ହୋଇଥିଲା। ଚଢ଼ାଉରେ ଗୋଟିଏ ସ୍କୁଟି ସହ ଗୋଟିଏ ପଲସର ବାଇକ୍, ଘୁଡୁଘୁଡି ପାଲି ଏବଂ ୧ ଲକ୍ଷ ନକଦ ଟଙ୍କା ଜବତ କରିଛି ପୋଲିସ।
ସେହିପରି ଭାବେ ଗୋପାଳପୁର ଗ୍ରାମର ଜୁଆ ଆଡ୍ଡା ମାଲିକ ବ୍ରଜ କିଶୋର ମାଝୀ (୬୩) ଗିରଫ ହୋଇଥିବା ବେଳେ ଅନ୍ୟ ସହଯୋଗୀ ଅନ୍ଧାରର ସୁଯୋଗ ନେଇ ଫେରାର ହୋଇଯାଇଛନ୍ତି। ଅଭିଯୁକ୍ତଙ୍କ ବିରୁଦ୍ଧରେ ୩ ଓପିଜି ଅଧିନିୟମ ଅନୁଯାୟୀ କେସ ନମ୍ବର ୫୦/୨୩ ରେ ମାମଲା ରୁଜୁ କରାଯାଇ ଆଜି କୋର୍ଟଚାଲାଣ କରାଯିବ ବୋଲି ଆଇଆଇସି ଶ୍ରୀ ବେହେରା କହିଛନ୍ତି। ଉକ୍ତ ଚଢ଼ାଉରେ ଏସଆଇ କୃତିବାସ ହରିଚନ୍ଦନ ଏବଂ ଅନ୍ୟ ପୋଲିସ କର୍ମଚାରୀ ମାନେ ସାମିଲ ଥିଲେ।
ଚାନ୍ଦପୁର: ଖୋର୍ଦ୍ଧା ଜିଲ୍ଲା ୧୬ ନଂ ଜାତୀୟ ରାଜପଥରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଯେଉଁଥିରେ ଗୋଟିଏ ପରିବାରର ୩ ଜଣ ଗୁରୁତର ଆହତ ହୋଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ଆଜି ଦୁହେଁ ଦମ୍ପତି ବାଇକ୍ ରେ ଚାନ୍ଦପୁରରୁ ବଜାର କାମ ସାରି ଗୌରଚନ୍ଦ୍ରପୁର ଘରକୁ ଫେରୁଥିଵା ବେଳେ ଏକ ଦୃତଗାମୀ ଟ୍ରକ୍ ବାଇକ୍ କୁ ଧକ୍କା ଦେଇଥିଲା। ଫଳରେ ଦମ୍ପତ୍ତି ଏବଂ ତାଙ୍କ ସାଥିରେ ଥିବା ନାବାଳକ ପୁତ୍ର ଗୁରୁତର ହୋଇଛନ୍ତି। ସେମାନେ ହେଲେ ଚାନ୍ଦପୁର ଥାନା ଗୌରଚନ୍ଦ୍ରପୁର ଗ୍ରାମର ଜଗଵନ୍ଧୁ ରାଉତ (୩୫) ପତ୍ନୀ ଟିକି ରାଉତ (୨୮) ପୁତ୍ର ଆୟୁଷ ରାଉତ (୧୦) ବୋଲି ଜଣାପଡିଛି।
ଗୁରୁତରଙ୍କୁ ଉଦ୍ଧାର କରି ୧୦୮ ଆମ୍ବୁଲାନସ ଯୋଗେଁ ଚାନ୍ଦପୁର ବସନ୍ତ ମଂଜରୀ ସ୍ୱାସ୍ଥ୍ୟ ନିବାସରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ସମସ୍ତ ଗୁରୁତରଙ୍କୁ ଭୁବନେଶ୍ୱର ସ୍ଥାନାନ୍ତରିତ କରିଥିଲେ।
ଦୁର୍ଘଟଣା ପରେ ଉତ୍ୟକ୍ତ ଲୋକେ ଟାୟାର ଜାଳି ରାସ୍ତା ଅବରୋଧ କରିଥିଲେ। ଫଳରେ ରାସ୍ତାରେ ଗାଡି ଚଳାଚଳ ଠପ୍ ହୋଇ ଯାଇଥିଲା। ଖବର ପାଇ ଚାନ୍ଦପୁର ପୋଲିସ୍ ଘଟଣା୍ସ୍ଥଳରେ ପହଂଚି ଲୋକଙ୍କୁ ବୁଝାସୁଝା ପରେ ରାସ୍ତାରେ ଗାଡି ଚଳାଚଳ ସ୍ୱାଭାବିକ ହୋଇଥିଲା।
ଚାନ୍ଦପୁର: ନୟାଗଡ଼ ଜିଲ୍ଲା ଚାନ୍ଦପୁର ଥାନା ଅଞ୍ଚଳରେ ଏକ ଅଭାବନୀୟ ଘଟଣା ଘଟିଯାଇଛି।ଏକ ଟେଣ୍ଟ ହାଉସ୍ ଘରେ ନିଆଁ ଲାଗିଯିବାରୁ ପାଖାପାଖି କୋଟିଏ ଟଙ୍କାର ଅସବାବପତ୍ର ପୋଡ଼ି ପାଉଁଶ ହୋଇଯାଇଥିବାର ଜଣାପଡିଛି।
ସୂଚନା ମୁତାବକ ଗତକାଲି ବିଳମ୍ବିତ ରାତିରେ କନ୍ଧ ନୟାଗଡ଼ ଗ୍ରାମରେ ଥିବା ମା ତାରିଣୀ ଟେଣ୍ଟ ହାଉସ ରେ ନିଆଁ ଲାଗିଯାଇଥିଲା। ଫଳରେ ଉକ୍ତ ଟେଣ୍ଟ ହାଉସ ର ସାଉଣ୍ଡ, ଲାଇଟ, ହଣ୍ଡାହାଣ୍ଡି, ଚେୟାର, ଦୁଇ ଗୋଟି ବାଇକ ଏବଂ ଗୋଟିଏ ଟାଟା ଏସି ଗାଡ଼ି ଜଳି ପୋଡ଼ି ପାଉଁଶ ହୋଇଯାଇଛି । ଖବର ପାଇ ଟାଙ୍ଗୀ ଅଗ୍ନୀଶମ ବାହିନୀ ଘଟଣା ସ୍ଥଳରେ ପହଂଚି ନିଆଁକୁ ଆୟତ କରିଥିଲେ ସୁଦ୍ଧା ସବୁ କିଛ ସ୍ୱାହା ହୋଇ ଯାଇଥିଲା।
ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଥିବା ବେଳେ ପାଖାପାଖି କୋଟିଏ ଟଙ୍କାର ଅସବାବପତ୍ର ପୋଡ଼ିଯାଇଥିବାର ଟେଣ୍ଟ ହାଉସ ମାଲିକ ବଳଭଦ୍ର ପ୍ରଧାନ କହିଛନ୍ତି ।
ଚାନ୍ଦପୁର: ଚାନ୍ଦପୁର ୧୬ ନମ୍ବର ଜାତୀୟ ରାଜପଥରେ ଆଜି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଯେଉଁଥିରେ ୫ ଜଣ ଗୁରୁତର ଆହତ ହୋଇଥିବାର ଖବର ହସ୍ତଗତ ହୋଇଛି। ୧୬ ନମ୍ବର ଜାତୀୟ ରାଜପଥ କନ୍ଧ ନୟାଗଡ ଓଭର ବ୍ରିଜ ଉପରେ ଏହି ଦୁର୍ଘଟଣା ଘଟିଛି।
ସୂଚନା ମୁତାବକ ଆଜି ଅପରାହ୍ନରେ ଓଡି ୧୩ ଜି ୨୨୮୯ ନମ୍ବର ବିଶିଷ୍ଟ ଏକ ଯାତ୍ରୀବାହୀ ଅଟୋଟି ପୁରୀରୁ ନାଚୁଣୀ ନିକଟସ୍ଥ କହ୍ନେଇପୁୁର ଗ୍ରାମକୁ ଫେରୁଥିବାବେଳେ ଉକ୍ତ ଦୁର୍ଘଟଣା ଘଟିଥିଲା। କୌଣସି କାରଣବଶତଃ ଡ୍ରାଇଭର ଅଟୋ ରିକ୍ସା ଉପରୁ ନିୟନ୍ତ୍ରଣ ହରାଇବାରୁ ତାହା ରାସ୍ତାର ଡିଭାଇଡର ସହ ପିଟି ହୋଇ ଯାଇଥିଲା। ଫଳରେ ଅଟୋଟି ଓଭରବ୍ରିଜ୍ ଉପରୁ ତଳକୁ ଖସି ପଡିବାରୁ ଯାତ୍ରୀମାନେ ଗୁରୁତର ଆହତ ହୋଇଥିଲେ।
ଖବର ପାଇ ସ୍ଥାନୀୟ ଯୁବକମାନେ ଘଟଣା ସ୍ଥଳରେ ପହଂଚି ସମସ୍ତଙ୍କୁ ଉଦ୍ଧାର କରି ଚାନ୍ଦପୁର ମେଡିକାଲରେ ଭର୍ତ୍ତି କରିଥିଲେ। ଗୁରୁତର ଆହତମାନେ ହେଲେ କହ୍ନେଇପୁର ଗ୍ରାମର ମୀନା ମୁଦୁଲି (୫୦), ଉମାକାନ୍ତ ମୁଦୁଲି (୫୩), ପ୍ରକାଶ ଚନ୍ଦ୍ର ମୁଦୁଲି (୩୬), ରିନା ମୁଦୁଲି (୨୪) ଏବଂ ଅଖିଳେଶ ମୁଦୁଲି (୭)।
ସମସ୍ତ ଗୁରୁତର ଆହତଙ୍କୁ ଚାନ୍ଦପୁର ମେଡିକାଲରେ ପ୍ରାଥମିକ ଚିକିତ୍ସା ପରେ ଭୁବନେଶ୍ୱର ସ୍ଥାନାନ୍ତରିତ କରାଯାଇଛି।
ଚାନ୍ଦପୁର: ହଠାତ ଯାତ୍ରୀ ଯାତ୍ରୀ ବାହୀ ବସ୍ ରେ ନିଆଁ ଲାଗିଯାଇଥିବା ଭଳି ଘଟଣା ସାମ୍ନାକୁ ଆସିଛି। ପୁରୁଣା ୧୬ ନଂ ଜାତୀୟ ରାଜପଥ ଚାନ୍ଦପୁର ବଜାର ନିକଟରେ ଏଭଳି ଘଟଣା ଘଟିଛି। ବାଙ୍କେଶ୍ୱରୀ ନାମକ ଯାତ୍ରୀ ବାହୀ ଘରୋଇ ବସ୍ ବ୍ରହ୍ମପୁର ରୁ ରଣପୁର ଆସୁଥିବା ବେଳେ ସର୍ଟ ସର୍କିଟ୍ ରୁ ଇଂଜିନ୍ ରେ ନିଆଁ ଲାଗିଯାଇଥିବା ସୂଚନା ରହିଛି। ପ୍ରବଳ ଧୁଆଁ ହେବା ସହ ଇଂଜିନ୍ ଜଳିବାରୁ ଚାଳକ ବସ୍ କୁ ଅଟକାଇଲେ। ଉପସ୍ଥିତ ଲୋକଙ୍କ ସହଯୋଗରେ ନିଆଁକୁ ଆୟତ୍ତ କରାଯାଇଥିଲା। ତେବେ ଏଥିରେ ଯାତ୍ରୀଙ୍କ କୌଣସି କ୍ଷତି ହୋଇନଥିବା ଜଣାପଡିଛି। ବର୍ତ୍ତମାନ ରାସ୍ତାରେ ଗାଡି ଚଳା ଚଳ ବନ୍ଦ ରହିଛି।
ଚାନ୍ଦପୁର: ଚାନ୍ଦପୁର ଥାନା ଅର୍ଜୁନପୁର ଜଙ୍ଗଲରୁ ଯୁବକଙ୍କ ମୃତ ଦେହ ଉଦ୍ଧାର ହୋଇଛି। ମୃତ ନାମ ବିପିନ ପରିଡା (୨୮ ବର୍ଷ) ହୋଇଥିବା ବେଳେ ତାଙ୍କ ଘର ଅର୍ଜୁନ ପୁର ଗ୍ରାମରେ ବୋଲି ଜଣା ପଡିଛି। ସେ ଗତ ଦୁଇ ଦିନ ଧରି ଘରୁ ନିଖୋଜ ଥିଲେ। ବହୁ ଖୋଜା ଖୋଜି ପରେ ବିପିନଙ୍କୁ ନପାଇ ପରିବାର ଲୋକେ ଚାନ୍ଦପୁର ଥାନାରେ ଅଭିଯୋଗ କରିଥିଲେ। ଏହା ପରେ ବିପିନଙ୍କୁ ପୋଲିସ୍ ଏବଂ ଗ୍ରାମବାସୀ ଗ୍ରାମ ନିକଟସ୍ଥ ଜଙ୍ଗଲରେ ବହୁ ଖୋଜା ଖୋଜି କରିଥିଲେ। ତେବେ ଆଜି ବିପିନଙ୍କ ମୃତ ଦେହ ଠାବ କରାଯାଇଛି।
ମୃତ ଦେହ ନିକଟରୁ ଏକ ବିଷ ବୋତଲ ଉଦ୍ଧାର କରିଛି ପୋଲିସ୍। ତେଣୁ ଏହା ଆତ୍ମହତ୍ୟା ଜନିତ ମୃତ୍ୟୁ ବୋଲି ସନ୍ଦେହ କରୁଛି ଚାନ୍ଦପୁର ପୋଲିସ୍। ଏ ନେଇ ଚାନ୍ଦପୁର ଥାନାରେ ୧୦/୨୨ ରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ କରୁଥିବା ଚାନ୍ଦପୁର ଥାନା ଆଇଆଇସି ମୁକେଶ ବେହେରା ପ୍ରକାଶ କରିଛନ୍ତି।
ସୀତାରାମ ଅଗ୍ରୱାଲ
ଚିଲିକା: ଟାଙ୍ଗୀ ଓ ଏହାର ଆଖ ପାଖ ଅଂଚଳରେ ଦିନକୁ ଦିନ ସାପ ଆତଙ୍କ ବୃଦ୍ଧି ପାଇବାରେ ଲାଗିଛି। ବିଷାକ୍ତ ସାପ କାମୁଡାରେ ଅନେକ ଜୀବନ ଅକାଳରେ ଝଡି ପଡୁଛନ୍ତି। ରାଜ୍ୟ ସରକାରଙ୍କ ବ୍ୟାପକ ପ୍ରଚାର ପ୍ରସାର ସତ୍ତ୍ୱେ ଲୋକେ ଏବେ ବି ସାପ କାମୁଡିବା ପରେ ମେଡିକାଲକୁ ନଯାଇ ଗାଁ ଗୁଣିଆ ଉପରେ ନିର୍ଭର କରୁଥିବାରୁ ଲୋକଙ୍କ ଜୀବନ ଚାଲିଯାଉଛି। ଖୋର୍ଦ୍ଧା ଜିଲା ଚିଲିକା ବ୍ଲକର ବଉଳା ବନ୍ଧ ଗ୍ରାମ ପଂଚାୟତ ମଙ୍ଗରାଜ ପୁର ଗ୍ରାମରେ ଏଭଳି ଘଟଣା ଦେଖିବାକୁ ମିଳିଛି।
ମଙ୍ଗରାଜ ପୁର ଗ୍ରାମର ଚଇନି ମହାରଣା (୪୫) ପ୍ରତିଦିନ ନିଜ ଚାଷ କ୍ଷେତକୁ ଚାଷ କାମ ପାଇଁ ଯାଇଥାନ୍ତି। ଗତ ସୋମବାର ଦିନ ଚଇନି ମହାରଣା ନିଜ ଚାଷ କ୍ଷେତରେ କାମ କରୁଥିବା ବେଳେ ଏକ ବିଷାକ୍ତ ସାପ ଚଇନିଙ୍କ ଗୋଡକୁ କାମୁଡି ଦେଇଥିଲା। ତେବେ ସ୍ଥାନୀୟ ଲୋକେ ଚଇନିଙ୍କୁ ତୁରନ୍ତ ମେଡିକାଲ ନେବା ପରିବର୍ତ୍ତେ ଗାଁ ଗୁଣିଆ ନିକଟରେ ସାପ ବିଷ କାଢିବା ପାଇଁ ଝଡା ଫୁଙ୍କା କରିବା ପରେ ଘରକୁ ପଳାଇଥିଲେ। ହେଲେ ସାପ କାମୁଡିବା ଯୋଗୁଁ ବିଷ କ୍ରିୟା ବେଳକୁ ବେଳ ଅଧିକ ହେବାରୁ ତାର ପରିବାର ଚଇନିଙ୍କୁ ଆଣି ଟାଙ୍ଗୀ ଗୋଷ୍ଠୀ ସ୍ୱାସ୍ଥ କେନ୍ଦ୍ରରେ ଭର୍ତ୍ତି କରିଥିଲେ।
ହେଲେ ସାପ କାମୁଡିବାର ବହୁ ଘଣ୍ଟା ପରେ ମେଡିକାଲକୁ ଆଣିଥିବାରୁ ତାଙ୍କର ଅବସ୍ଥା ସଂକଟାପନ୍ନ ହୋଇଥିଲା। ତେଣୁ ଡାକ୍ତର ଚଇନିଙ୍କୁ ଭୁବନେଶ୍ୱର ସ୍ଥାନାନ୍ତର କରିଥିଲେ। ଟାଙ୍ଗୀ ମେଡିକାଲରୁ ମାତ୍ର କିଛି ବାଟ ଯିବା ପରେ ଘରୋଇ ଆମ୍ବୁଲାନସ ଭିତରେ ଚଇନିଙ୍କର ପ୍ରାଣ ବାୟୁ ଉଡି ଯାଇଥିଲା।
ତେଣୁ ତାଙ୍କୁ ଭୁବନେଶ୍ୱର ନ ନେଇ ପୁଣି ଟାଙ୍ଗୀ ମେଡିକାଲ ନେଇ ଆସିଥିଲେ। ଖବର ପାଇ ଟାଙ୍ଗୀ ପୋଲିସ୍ ମେଡିକାଲରେ ପହଂଚି ଶବ ଜବତ କରି ତଦନ୍ତ ଆରମ୍ଭ କରିଛି।
ସେହିଭଳି ଭାବେ ନୟାଗଡ ଜିଲ୍ଲା ଚାନ୍ଦପୁର ଥାନା ନୂଆପଡା ଗ୍ରାମର ହୁଲାସ ନାୟକ (୪୦) ନାମକ ଜଣେ ମହିଳା ଛେଳି ଚରାଇ ଯାଇଥିବା ବେଳେ ଏକ ବିଷଧର ସାପ କାମୁଡିବାରୁ ସେ ମଧ୍ୟ ମେଡିକାଲକୁ ନ ଆସି ଗୁଣିଆ ନିକଟକୁ ଯାଇ ଝଡା ଫୁଙ୍କା କରିଥିଲେ। ତେବେ ସେ ମହିଳା ଜଣକ ସୁସ୍ଥ ହେବା ପରିବର୍ତ୍ତେ ଗୁରୁତର ହେବାରୁ ପରିବାର ଲୋକେ ଟାଙ୍ଗୀ ମେଡିକାଲକୁ ଆଣିଥିଲେ। ତେବେ ମହିଳାଙ୍କର ବିଷକ୍ରିୟା ଯୋଗୁଁ ସେ ଅଧିକ ଗୁରୁତର ହେବାରୁ ତାଙ୍କୁ ଭୁବନେଶ୍ୱରକୁ ସ୍ଥାନାନ୍ତର କରାଯାଇଛି।
ଚାନ୍ଦପୁର: ପୂର୍ବ ଶତ୍ରୁତାକୁ କେନ୍ଦ୍ର କରି ବୃଦ୍ଧଙ୍କୁ ମରଣାନ୍ତକ ଆକ୍ରମଣ ହୋଇଛି। ଆକ୍ରମଣରେ ବୃଦ୍ଧ ଗୁରୁତର ଅବସ୍ଥାରେ ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଥିଲେ। କିନ୍ତୁ ବୃଦ୍ଧଙ୍କ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ଟାଙ୍ଗୀରୁ ଭୁବନେଶ୍ୱର ଏମ୍ସ ହସପିଟାଲକୁ ସ୍ଥାନାନ୍ତର କରାଯାଇଛି। ନୟାଗଡ ଜିଲ୍ଲା ଚାନ୍ଦପୁର ଥାନା ରାଜ ଜଙ୍କିଆ ଗ୍ରାମର ଏଭଳି ଘଟଣା ଘଟିଛି।
ରାଜ ଜଙ୍କିଆ ଗ୍ରାମର ପବିତ୍ର ମୋହନ ରଣବିଜୁଳି (୬୦) ଆଜି ଏକ ବାଇକ୍ ରେ ଜଣେ ବନ୍ଧୁଙ୍କ ଘରକୁ ଦଶାହ କାର୍ଯ୍ୟରେ ଯୋଗ ଦେବାପାଇଁ ଯାଉଥିଲେ। ଏହି ସମୟରେ ପୂର୍ବ ଶତ୍ରୁତାକୁ କେନ୍ଦ୍ର କରି ୫ ରୁ ୬ ଜଣ ଦୁର୍ବୁତ୍ତ ଲୁହା ରଡ ଏବଂ ଜଗ୍ ରଡ୍ ରେ ପବିତ୍ର ମୋହନ ରଣବିଜୁଳିଙ୍କୁ ଅତର୍କିତ ଆକ୍ରମଣ କରିଥିଲେ। ପବିତ୍ରଙ୍କ ଚିତ୍କାର ଶୁଣି ସ୍ଥାନୀୟ ଲୋକ ଘଟଣା ସ୍ଥଳରେ ପହଞ୍ଚିବାରୁ ଦୁର୍ବୁତ୍ତ ମାନେ ତାଙ୍କୁ ଛାଡି ଚାଲିଯାଇଥିଲେ।
ସ୍ଥାନୀୟ ଲୋକେ ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି ୧୦୮ ଆମ୍ବୁଲାନସ ଯୋଗେ ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ। ତାଙ୍କ ମସ୍ତିଷ୍କରେ ଗଭୀର କ୍ଷତ ହୋଇଥିବାରୁ
କ୍ରମେ ସେଠାରେ ତାଙ୍କର ଅବସ୍ଥା ସଂକଟାପନ୍ନ ହୋଇଥିଲା। ପରେ ତାଙ୍କୁ ଭୁବନେଶ୍ୱରକୁ ସ୍ଥାନାନ୍ତର କରାଯାଇଥିଲା। ଏହି ଘଟଣାକୁ ନେଇ ରାଜ ଜଙ୍କିଆ ଗ୍ରାମରେ ଉତ୍ତେଜନା ଲାଗି ରହିଥିବାବେଳେ ଚାନ୍ଦପୁର ପୋଲିସ୍ ଘଟଣା ଉପରେ ତୀକ୍ଷ୍ନ ନଜର ରଖି ତଦନ୍ତ ଆରମ୍ଭ କରିଥିବାର ଜଣା ପଡିଛି।
ଚାନ୍ଦପୁର: ନୟାଗଡ ଜିଲା ଚାନ୍ଦପୁରରେ ନକଲି ଡିଜେଲ କାରଖାନା କରି ଲକ୍ଷାଧିକ ଟଙ୍କା ରୋଜଗାର କରୁଥିବା ୫ ଜଣ ଅଭିଯୁକ୍ତକୁ ଗିରଫ କରିଛି ଚାନ୍ଦପୁର ପୋଲିସ୍। ସେମାନଙ୍କ ନିକଟରୁ ୩ ଟି ଅଟୋ ରିକ୍ସା, ୧୩୦୦ ଲିଟର ନୀଳ କିରୋସିନ, ୨୦୦ ଲିଟର ନକଲି ଡିଜେଲ, କିରୋସିନିକୁ ଡିଜେଲ କରିବା ପାଇଁ ବ୍ୟବହାର କରାଯାଉଥିବା ପାଉଡର ଆଦି ଜବତ କରି ତଦନ୍ତ କରୁଛି ଚାନ୍ଦପୁର ପୋଲିସ୍।
ସ୍ୱଳ୍ପ ଖର୍ଚ୍ଚରେ ଅଧିକ ଲାଭ ଆଶା ରଖି ଚାଲିଛି ଅପମିଶ୍ରଣ। ଅତ୍ୟାବଶ୍ୟକୀୟ ସାମଗ୍ରୀ କିରୋସିନିରେ କେମିକାଲ ପାଉଡର ଅପମିଶ୍ରଣ କରି ପ୍ରସ୍ତୁତ କରାଯାଉଛି ଡିଜେଲ। ଏହି ଅପମିଶ୍ରିତ ଡିଜେଲ ଦ୍ଵାରା ଚିଲିକାରେ ଚାଲୁଛି ଶତାଧିକ ମେସିନ ଚାଳିତ ଡଙ୍ଗା। ଏପରିକି କମ ଦାମରେ ଉପଲବ୍ଧ ହେଉଥିବା ନକଲି ଡିଜେଲରେ ମଧ୍ୟ ବିଭିନ୍ନ ଗାଡି ମୋଟର ଚାଲିଛି।
କିଛି ଦିନ ତଳେ ନୟାଗଡ ଏସପି ଅଲେଖ ଚନ୍ଦ୍ର ପହିଙ୍କ ନିର୍ଦ୍ଦେଶକ୍ରମେ ଚାନ୍ଦପୁର ଆଇଆଇସି ରଶ୍ମିରଞ୍ଜନ ଦାସଙ୍କ ନେତୃତ୍ବରେ ଗଠିତ ହୋଇଥିବା ଟିମ ଗତକାଲି ଏହି ଥାନା ଅଧିନସ୍ଥ ୧୬ ନମ୍ବର ଜାତୀୟ ରାଜପଥର ବେଣ୍ଟ ଛକ ନିକଟରେ ଚଢାଉ କରି ୧୩ ଶହ ଲିଟର କିରୋସିନ, ଦୁଇ ଶହ ଲିଟର କେମିକାଲ ମିଶ୍ରିତ ନକଲି ଡିଜେଲ, କେମିକାଲ ପାଉଡର, ତିନୋଟି ଅଟୋରିକ୍ସା ଜବତ କରିବା ସହ ଦୁଇ ଜଣଙ୍କୁ ଗିରଫ କରିଥିବା ବେଳେ ଗତ ଦୁଇ ସପ୍ତାହ ମଧ୍ୟରେ ସମୁଦାୟ ତିନୋଟି ମୋକବ୍ଦମା କରାଯାଇଥିବା ବେଳେ ପାଞ୍ଚ ଜଣ ଅଭିଯୁକ୍ତ ଗିରଫ ହୋଇଛନ୍ତି।
ଡିଜେଲ ଲିଟର ଏବେ ଏକ ଶହ ଟଙ୍କା ପାଖାପାଖି। ବିଭିନ୍ନ ଅଞ୍ଚଳରୁ ପିଡିଏସ କିରୋସିନ ସଂଗ୍ରହ କରାଯାଇ ସେଥିରେ ଭାଗ ମାପ ଅନୁସାରେ କେମିକାଲ ପାଉଡର ମିଶାଇ ଡିଜେଲ ପରି ଦିଶୁଥିବା ନକଲି ଡିଜେଲ ସରକାରୀ ମୂଲ୍ୟ ଠାରୁ ଯଥେଷ୍ଟ କମ ମୂଲ୍ୟରେ ନିର୍ଦିଷ୍ଟ ବ୍ୟକ୍ତିି ମାନଙ୍କ ଦ୍ବାରା ଯୋଗାଇ ଦିଆଯାଇଥାଏ। ଏହି ଅପମିଶ୍ରିତ ଡିଜେଲ ଚିଲିକାରେ ମେସିନ ଚାଳିତ ଡଙ୍ଗାରେ ବ୍ୟବହାର କରାଯିବା ଫଳରେ ଅନେକ ସମୟରେ ଚିଲିକା ମଧ୍ୟରେ ଡଙ୍ଗା ଅଟକି ରହିବା ଏପରିକି ଦୂର୍ଘଟଣା ମଧ୍ୟ ଘଟୁଥିବାର ଅନେକ ଉଦାହରଣ ରହିଛି।
ଏହି ନକଲି ଡିଜେଲ ମଧ୍ୟ ଅଧିକାଶଂ ଲାଭଖୋର ଗାଡି ମାଲିକ, ଟ୍ରକ, ମିନିଟ୍ରକ, ଜେସିବି ଏପରିକି କିଛି ବସ ମାଲିକ ମଧ୍ୟ ବ୍ୟବହାର କରି ବାୟୁ ପ୍ରଦୂଷଣ କରୁଥିବାର ଯଥେଷ୍ଟ ଉଦାହରଣ ରହିଛି।
ସବୁଠାରୁ ସମ୍ବେଦନଶୀଳ ବିଷୟ ହେଲାକି ରାଜ୍ୟ ଜାତୀୟ ରାଜପଥ ଦେଇ ଯାଉଥିବା ଡିଜେଲ ଟ୍ୟାଙ୍କର ଗୁଡିକୁ ନିର୍ଦିଷ୍ଟ ନିକାଞ୍ଚନ ସ୍ଥାନରେ ରଖାଯାଇ ସେଥୁରୁ ଶହ ଶହ ଲିଟର ପ୍ରକୃତ ଡିଜେଲ କଢ଼ାଯାଇ ଅପମିଶ୍ରିତ ଡିଜେଲ ଭର୍ତି କରାଯାଉଥିବା ମଧ୍ୟ ଆଇଆଇସି ଶ୍ରୀ ଦାସ ସୂଚନା ପ୍ରଦାନ କରିଛନ୍ତି।
ଏହିସବୁ ବେଆଇନ କାର୍ଯ୍ୟ ଗୁଡିକ ଦିର୍ଘ ଦିନ ଧରି କରାଯାଉଥିବା ଅଭିଯୋଗ ପାଇବାପରେ ଗତକାଲି ଚଢାଉ କରିି ୧୩ ଶହ ଲିଟର କିରୋସିନ, ୨ ଶହ ଲିଟର କେମିକାଲ ମିଶ୍ରିତ ଭେଜାଲ ଡିଜେଲ,କେମିକାଲ ପାଉଡର, ତିନୋଟି ଅଟୋରିକ୍ସା ଜବତ କରିଥିବା ବେଳେ ଟାଙ୍ଗୀ ଥାନା ଅଧିନସ୍ଥ ଜରିପଡା ଡିଗିରି ସାହିର ଜିତେନ୍ଦ୍ର ବେହେରା ଓ ସୁକାନ୍ତ ବେହେରାଙ୍କୁ ଗିରଫ କରିଛି ପୋଲିସ୍।
ଏହି ସବୁ ଘଟଣାରେ ଚାନ୍ଦପୁର ପୋଲିସ ଚଳିତ ମାସ ୬ ତାରିଖ ଠାରୁ ଆଜିି ସୁଦ୍ଧା ଥାନାରେ କେଶ ନମ୍ବର ୭୧, ୭୨ ଓ ୮୨ ରେ ଭାରତୀୟ ପିଙ୍ଗଳ କୋର୍ଡ ଧାରା ୩୭୯, ୪୧୧, ୪୨୦ ଇସି ଆକ୍ଟରେ ମାମଲା ରୁଜୁ କରାଯାଇଥିବାବେଳେ ଆଜି ଗିରଫ ହୋଇଥିବା ଆଉ ଦୁଇ ଜଣ ଅଭିଯୁକ୍ତଙ୍କୁ ମିଶାଇ ସମୁଦାୟ ପାଞ୍ଚ ଜଣ ଅଭିଯୁକ୍ତ ଗିରଫ ହୋଇଥିବାର ଜଣାପଡିଛିା
ଚାନ୍ଦପୁର: ନୟାଗଡ଼ ଜିଲ୍ଲା ଚାନ୍ଦପୁର ଥାନା ଅନ୍ତର୍ଗତ କଟକ ସହର ନିକଟବର୍ତ୍ତୀ ଡୁଙ୍ଗୁରିମୁଣ୍ଡିଆ ଜଙ୍ଗଲ ମଧ୍ୟରେ ଅପମିଶ୍ରିତ ଡ଼ିଜେଲ କାରବାର ଚାଲିଥିବାର ଖବର ପାଇ ଆଇଆଇସି ରଶ୍ମିରଂଜନ ଦାସଙ୍କ ନେତୃତ୍ୱରେ ଚଢ଼ାଉ କରାଯାଇଥିଲା। ଚଢ଼ାଉ ବେଳେ ପୋଲିସ ୧୨ ଶହ ଲିଟର ପିଡ଼ିଏସ କିରୋସିନ ଜବତ କରିବା ସହ ୨ ଜଣଙ୍କୁ ଗିରଫ କରିଛି। ଅଭିଯୁକ୍ତ ଦ୍ବୟ ହେଲେ କଟକ ସହର ଅଞ୍ଚଳର ଟୁଲୁ ସେନାପତି ଓ ପଠାଣି ସେନାପତି।
ଅଭିଯୁକ୍ତ ମାନେ ଏକ ଗ୍ୟାଙ୍ଗ ଗଠନ କରି ବେଆଇନ ଭାବେ ପିଡ଼ିଏସ କିରୋସିନ ଲିଟର ପିଛା ୮୫ ଟଙ୍କା ଦେଇ କିଣୁଥିଲେ। ଏହାପରେ ବିଭିନ୍ନ ତେଲ କମ୍ପାନୀ ଟ୍ୟାଙ୍କର ଡ୍ରାଇଭରଙ୍କୁ ୨୦୦୦ ଟଙ୍କା ଲେଖାଏଁ ଦେଇ ସେମାନଙ୍କ ଟାଙ୍କିରୁ ଡ଼ିଜେଲ କାଢ଼ିବା ସହ ସମ ପରିମାଣର କିରୋସିନ ମିଶାଇଦେଉଥିଲେ।
ପରବର୍ତ୍ତୀ ସମୟରେ ଅଭିଯୁକ୍ତ ମାନେ ରାସାୟନିକ ଦ୍ରବ୍ୟ ଏବଂ ଗିୟର ଅଏଲ ପିଡ଼ିଏସ କିରୋସିନରେ ମିଶାଇ ନକଲି ଡ଼ିଜେଲ ତିଆରି କରୁଥିଲେ ଏବଂ ଚୋରି କରିଥିବା ଅସଲି ଡ଼ିଜେଲ ସହ ତାକୁ ମିଶାଇ ଅପମିଶ୍ରିତ ଡ଼ିଜେଲ ତିଆରି କରି ବିଭିନ୍ନ ଜେସିବି ଓ ଟ୍ରାକ୍ଟର ଡ୍ରାଇଭରଙ୍କୁ ବିକି ଲାଭବାନ ହେଉଥୁଲେ।
ତେବେ ଉକ୍ତ ଗ୍ୟାଙ୍ଗର ଆହୁରି ୬ ଜଣ ସଦସ୍ୟ ଫେରାର ଥିବାବେଳେ ଚାନ୍ଦପୁର ପୋଲିସ କେଶ ନମ୍ବର ୭୧/୨୨ ରେ ମାମଲା ରୁଜୁ କରିବା ସହ ତଦନ୍ତ ଜାରିରଖିଛି।
ଚାନ୍ଦପୁର: ନୟାଗଡ ଜିଲ୍ଲା ଚାନ୍ଦପୁର ଅଞ୍ଚଳରେ ଏକ ହୃଦୟ ବିଦାରକ ଘଟଣା ଦେଖିବାକୁ ମିଳିଛି। ଆମ୍ବୁଲାନ୍ସ ମିଳିନଥିବାରୁ ଅସହ୍ୟ ତାତିରେ ଟ୍ରଲି ଦ୍ଵାରା ବୁହା ହେଲେ ରୋଗୀ।
ସୂଚନା ଅନୁଯାୟୀ, ଚାନ୍ଦପୁର ଇନ୍ଦିରା ଆବାସ କଲୋନୀର ଯୁଗଳ କାଣ୍ଡି (୭୫)ଙ୍କ ହଠାତ ଦେହ ଅସୁସ୍ଥ ହେବାରୁ ହସ୍ପିଟାଲ ଯିବା ପାଇଁ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ। ହେଲେ ଆମ୍ବୁଲାନ୍ସ ମିଳିନଥିବାରୁ ତାଙ୍କୁ ଟ୍ରଲି ଦ୍ଵାରା ହସ୍ପିଟାଲକୁ ନିଆଯାଇଥିଲା। ରୋଗୀଙ୍କ ବୟସ ୭୫ ବର୍ଷ ହେଇଥିବା ବେଳେ ଯଦି ଅଂଶୁଘାତରେ କିଛି ଅଘଟଣ ଘଟିଥାନ୍ତା, କି ଉତ୍ତର ଦେଇଥାନ୍ତେ ଜିଲ୍ଳା ସ୍ୱାସ୍ଥ୍ୟ ବିଭାଗ।
ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦେଖାଯାଇଛି। ଅଂଶୁଘାତକୁ ନଜ଼ରରେ ରଖି ଆମ୍ବୁଲାନ୍ସ ସେବାକୁ ଆହୁରି ବ୍ୟାପକ କରିବା ଆବଶ୍ୟକ ବୋଲି ଦାବି କରାଯାଇଛି।
ଚାନ୍ଦପୁର: ନୟାଗଡ ଜିଲ୍ଲା ୧୬ ନମ୍ବର ଜାତୀୟ ରାଜପଥ ଆନ୍ତର୍ଗତ ଚାନ୍ଦପୁର ବାଇପାସରେ ଘଟିଯାଇଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା। ଯେଉଁଥିରେ ଜଣେ ବାଇକ ଆରୋହୀ ପ୍ରାଣ ହରାଇଛନ୍ତି।
ସୂଚନା ମୁତାବକ ଚାନ୍ଦପୁର ଥାନା ଗୌରଚନ୍ଦ୍ରପୁର ଗ୍ରାମର ଅରୁଣ କୁମାର ସାହୁ (୪୦) ଆଜି ଅପରାହ୍ନରେ ଚାନ୍ଦପୁର ବଜାରରୁ ନିଜ ଗ୍ରାମକୁ ଫେରୁଥିଲେ। ତେବେ ଚାନ୍ଦପୁର ବାଇପାସରେ ତାଙ୍କୁ ଭୁବନେଶ୍ୱର ଆଡୁ କ୍ଷିପ୍ର ଗତିରେ ଆନ୍ଧ୍ର ଯାଉଥିବା ଏକ ମାଲ ବୋଝେଇ ଟ୍ରକଟି ଅରୁଣଙ୍କୁ ଧକ୍କା ଦେଇଥିଲା। ଏବଂ ଅରୁଣଙ୍କୁ ଟ୍ରକଟି କିଛି ବାଟ ଘୋଷାରି ନେଇଥିଲା। ଫଳରେ ଘଟଣାସ୍ଥଳରେ ଅରୁଣଙ୍କ ମୃତ୍ୟୁ ହୋଇଯାଇଥିଲା।
ହେଲେ ବର୍ତ୍ତମାନ ଗ୍ରାମବାସୀ ଘଟଣାସ୍ଥଳରେ ପହଞ୍ଚି ଜାତୀୟ ରାଜପଥକୁ ଅବରୋଧ କରିଛନ୍ତି। ଅନ୍ୟପକ୍ଷେ ଚାନ୍ଦପୁର ପୋଲିସ ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା ଜାରି ରଖିଛି।