ନୂଆଦିଲ୍ଲୀ: ଆଜିକାଲି ପାକିସ୍ତାନ ଏକ ଆର୍ଥିକ ସଙ୍କଟ ଦେଇ ଗତି କରୁଛି। ସ୍ଥିତି ଏଭଳି ହେଇଛି ଯେ, ସେଠାରେ ଥିବା ଲୋକମାନେ ଖାଇବାକୁ ଅଟା ପାଉନାହାଁନ୍ତି। ଏହି ସମୟରେ ପାକିସ୍ତାନର ପ୍ରଧାନମନ୍ତ୍ରୀ ଶାହାବାଜ ସରିଫଙ୍କ ଏକ ବିବୃତ୍ତି ସାମ୍ନାକୁ ଆସିଛି। ଯେଉଁଥିରେ ପଡୋଶୀ ଦେଶର ସ୍ୱର ବଦଳୁଛି। ପାକିସ୍ତାନ ପ୍ରଧାନମନ୍ତ୍ରୀ କହିଛନ୍ତି ଯେ, ପାକିସ୍ତାନ ଏହାର ଶିକ୍ଷା ଲାଭ କରିଛି ଏବଂ ବର୍ତ୍ତମାନ ଶାନ୍ତିରେ ବଞ୍ଚିବାକୁ ଚାହୁଁଛି।
ଏକ ପାକିସ୍ତାନ ଗଣମାଧ୍ୟମକୁ ଦେଇଥିବା ସାକ୍ଷାତକାରରେ ପାକିସ୍ତାନର ପ୍ରଧାନମନ୍ତ୍ରୀ ମଧ୍ୟ କହିଛନ୍ତି ଯେ, ସେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଆଲୋଚନା କରିବାକୁ ପ୍ରସ୍ତୁତ। ଶାହାବାଜ ସରିଫ କହିଛନ୍ତି ଯେ, ମୁଁ ଭାରତୀୟ ନେତୃତ୍ୱ ତଥା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନିବେଦନ କରୁଛି ଯେ, ଆଲୋଚନା ଟେବୁଲରେ ବସି ପ୍ରତ୍ୟେକ ସମସ୍ୟାର ସମାଧାନ କରିବାକୁ ଚେଷ୍ଟା କରିବା।
ଭାରତ ସହ ସମ୍ପର୍କ ସୁଦୃଢ କରିବାକୁ ଓକିଲାତି କରି ପାକିସ୍ତାନୀ ପ୍ରଧାନମନ୍ତ୍ରୀ କହିଛନ୍ତି ଯେ, ଆମେ ପଡୋଶୀ। ଶାନ୍ତିରେ ବଞ୍ଚିବା ଆମର ଦାୟିତ୍ଵ ଅଟେ। ସେ ଆହୁରି ମଧ୍ୟ କହିଛନ୍ତି ଯେ,“ ଆମେ ଭାରତ ସହିତ ତିନୋଟି ଯୁଦ୍ଧ କରିଛୁ ଏବଂ ପ୍ରତ୍ୟେକ ଥର ଏହା ଲୋକଙ୍କ ପାଇଁ ଅଧିକ ଦାରିଦ୍ର୍ୟତା ଏବଂ ବେକାରୀ ଆଣିଛି। ଆମେ ଆମର ଶିକ୍ଷା ପାଇଛୁ ଏବଂ ଆମେ ଶାନ୍ତିରେ ବଞ୍ଚିବାକୁ ଚାହୁଁଛୁ।
ଶାହାବାଜ ସରିଫ କହିଛନ୍ତି ଯେ, ଆମେ ଆମର ସମସ୍ୟାର ସମାଧାନ ପାଇଁ ପ୍ରସ୍ତୁତ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମୋର ବାର୍ତ୍ତା ହେଉଛି ଆସନ୍ତୁ ବସି ଆଲୋଚନା କରିବା। ଆମର ସମ୍ବଳ ବୋମା ଏବଂ ବନ୍ଧୁକ ତିଆରି କରି ଖର୍ଚ୍ଚ କରିବାକୁ ଚାହୁଁନାହିଁ।
ପରମାଣୁ ଶକ୍ତି ବୋଲି ଦର୍ଶାଇ ସରିଫ କହିଛନ୍ତି ଯେ, ଯୁଦ୍ଧ କାହା ପାଇଁ ଭଲ ନୁହେଁ। ଆମେ ଆଣବିକ ଶକ୍ତି, ସଶସ୍ତ୍ର ରାଷ୍ଟ୍ର। ଭଗବାନ କରନ୍ତୁ ସମସ୍ତେ ଯୁଦ୍ଧରୁ ନିବୃତ୍ତ ରୁହନ୍ତୁ, ନଚେତ ଯାହା ଘଟିବ, ତାହାକୁ ବର୍ଣ୍ଣନା କରିବା ପାଇଁ କେହି ଜୀବିତ ନଥିବେ। ମୁଁ ରାଷ୍ଟ୍ରପତି ମହମ୍ମଦ ବିନ ଜାୟଦଙ୍କୁ ଅନୁରୋଧ କରିଛି କି ସେ ଭାରତ ଓ ପାକିସ୍ତାନ ମଧ୍ୟରେ ମୁଖ୍ୟ ଭୂମିକା ଗ୍ରହଣ କରିପାରିବେ।”
ପାକିସ୍ତାନ ତିନିଥର ଭାରତ ସହ ସିଧାସଳଖ ଯୁଦ୍ଧ କରିଛି ଏବଂ ତିନିଥର ହାରିଛି। ୧୯୬୫ ମସିହାରେ ଭାରତ ଏବଂ ପାକିସ୍ଥାନ ମଧ୍ୟରେ ପ୍ରଥମ ଯୁଦ୍ଧ ହୋଇଥିଲା। ସେତେବେଳେ ଭାରତର ପ୍ରଧାନମନ୍ତ୍ରୀ ଲାଲ ବାହାଦୂର ଶାସ୍ତ୍ରୀ ଥିଲେ ଏବଂ ଜେନେରାଲ ୟାହ୍ଵା ଖାନଙ୍କ ନେତୃତ୍ୱରେ ପାକିସ୍ତାନରେ ସାମରିକ ଶାସନ ଥିଲା। ଭାରତୀୟ ସେନା ପାକିସ୍ତାନ ଉପରେ ହଇଚଇ ସୃଷ୍ଟି କରିଥିଲା। ଏହି ଯୁଦ୍ଧ ତାସକେଣ୍ଟ ଚୁକ୍ତି ପରେ ସମାପ୍ତ ହୋଇଥିଲା।
୧୯୭୧ ମସିହାରେ ଭାରତ ଏବଂ ପାକିସ୍ଥାନ ମଧ୍ୟରେ ଦ୍ୱିତୀୟ ଯୁଦ୍ଧ ହୋଇଥିଲା। ଏହି ଯୁଦ୍ଧରେ ପାକିସ୍ତାନକୁ ଏପରି ଲଜ୍ଜାଜନକ ପରାଜୟ ମିଳିଥିଲା ଯେଉଁଥିରୁ ଆଜି ପର୍ଯ୍ୟନ୍ତ ପୁନରୁଦ୍ଧାର ହୋଇପାରି ନାହିଁ। ୭୧ ଯୁଦ୍ଧରେ ପାକିସ୍ତାନକୁ ଦୁଇ ଭାଗରେ ବିଭକ୍ତ କରି ବାଂଲାଦେଶ ଗଠନ କରାଯାଇଥିଲା। ଏହି ଯୁଦ୍ଧରେ ଆମେରିକା ଭଳି ଏକ ମହାଶକ୍ତିର ଚାପକୁ ଭାରତ ପ୍ରତ୍ୟାଖ୍ୟାନ କରିଥିଲା। ଏହି ଯୁଦ୍ଧରେ ପାକିସ୍ତାନର ୯୦ ହଜାର ସୈନିକ ଆତ୍ମସମର୍ପଣ କରିଥିଲେ। ଏହି ଭାରତୀୟ ସାମରିକ ରଣନୀତିକୁ ସାରା ବିଶ୍ୱରେ ପ୍ରଶଂସା କରାଯାଇଥିଲା।
୧୯୯୯ ରେ କାର୍ଗିଲରେ ପାକିସ୍ତାନ ଦ୍ଵାରା ତୃତୀୟ ଯୁଦ୍ଧ ହୋଇଥିଲା। ଏହି ସମୟରେ ପାକିସ୍ତାନୀ ସୈନିକମାନେ ଶୀତ ଋତୁରେ ଗୁପ୍ତ ଭାବରେ ଆସି ଶିଖରରେ ବସିଥିଲେ। ପରେ, ଭାରତ ପୁଣି ଥରେ ଏକ ବଡ଼ ଅଭିଯାନ ଚଳାଇ ସମସ୍ତ ଆଉଟପୋଷ୍ଟକୁ କାବୁ କରି ପାକିସ୍ତାନକୁ ଦର୍ପଣ ଦେଖାଇଲା। ପ୍ରଥମେ ଏହି ଯୁଦ୍ଧରେ ପାକିସ୍ତାନ ଏହାର ସୈନିକଙ୍କ ଉପସ୍ଥିତିକୁ ଅସ୍ୱୀକାର କରିଥିଲା, କିନ୍ତୁ ପରେ ଏହା ତତ୍କାଳୀନ ଜେନେରାଲ ପରଭେଜ ମୁଶରଫଙ୍କ ନେତୃତ୍ଵରେ କରାଯାଇଥିଲା ବୋଲି ସ୍ୱୀକାର କରିଥିଲା। ମୁଶରଫ ଆଶା କରିଥିଲେ ଯେ ,ପାକିସ୍ତାନୀ ସେନା ଏହି ଅଞ୍ଚଳକୁ ଭାରତରୁ ଛଡ଼ାଇ ନେବ, କିନ୍ତୁ ଭାରତର ସାହସୀ ସୈନିକମାନେ ତାଙ୍କର ଯୋଜନାଗୁଡ଼ିକୁ ନଷ୍ଟ କରିଦେଲେ।
