Categories
ଆଜିର ଖବର ରାଜ୍ୟ ଖବର

ଲଗାଣ ବର୍ଷାରେ ଜୁନାଗଡ, ଧର୍ମଗଡ ଯାତାୟତ ଠପ, ଅସ୍ଥାୟୀ ପୋଲ ଉପରେ ୨ରୁ ୩ଫୁଟ ପାଣି

 ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: କଳାହାଣ୍ଡି ଜିଲ୍ଲାରେ ଲଗାଣ ବର୍ଷା ଯୋଗୁଁ ଅଞ୍ଚଳରେ ଜଣ ଜୀବନ ବେହାଲ ହୋଇଛି। ଧର୍ମଗଡ଼, ଜୁନାଗଡ଼ ଓ ଭବାନୀପାଟଣାକୁ ସଂଯୋଗ କରୁଥିବା ମୁଖ୍ୟ ରାଜପଥର ବସୁଲ ଓ ବଣ୍ଡାକୁଟୁରା ମଝିରେ ଥିବା ହାଲେର ଜୋର ନାଳରେ ବର୍ତ୍ତମାନ ଏକ ସ୍ଥାୟି ପୋଲ ନିର୍ମାଣ କରାଯାଉଅଛି। କିନ୍ତୁ କିଛି ଦିନ ପୂର୍ବରୁ ଲଗାଣ ବର୍ଷା ଯୋଗୁଁ ଦୁଇ ଦୁଇ ଥର ଆପ୍ରୋଚ ରୋଡ଼ ବା ଅସ୍ଥାୟୀ ପୋଲ ଭାଙ୍ଗିଯାଇ ଧୋଇ ହୋଇ ଯାଇଥିଲା।

କଳାହାଣ୍ଡିରେ ଲଗାଣ ବର୍ଷା ଯୋଗୁଁ ଗତ ସନ୍ଧ୍ୟା ଠାରୁ ଅସ୍ଥାୟୀ ପୋଲ ଉପରେ ୩ ରୁ ୪ ଫୁଟ ପାଣି ପ୍ରବାହିତ ହେଉ ଥିବା ଦ୍ୱାରା ଯାନବାହନ ଚଲା ଚଳରେ ବାଧା ସୃଷ୍ଟି ହେଉଛି। କିଛି ଦିନ ପୂର୍ବରୁ ଗମନାଗମନ ର ସୁବିଧା ଦୃଷ୍ଟିରୁ ଯୁଦ୍ଧ କାଳୀନ ଭିତ୍ତିରେ ଏହି ନାଳ କୁ ଦୁଇ ଦୁଇ ଥର ମରାମତି କରାଯାଇ ଅସ୍ଥାୟୀ ପୋଲ ନିର୍ମାଣ କରାଯାଇ ଥିଲା , କିନ୍ତୁ ଆଜି ସେହି ପୋଲ ପୁଣି ଲଗାଣ ବର୍ଷା ଯୋଗୁଁ ଧୋଇ ହେବାକୁ ବସିଲାଣି। ଯାହାଦ୍ୱାରା ଧର୍ମଗଡ଼ ,ଜୁନାଗଡ଼, ଭବାନୀପାଟଣା ରାସ୍ତା ରେ ଲୋକେ ନାହିଁ ନଥିବା ଅସୁବିଧାର ସମୁଖିନ ହେଉଥିବା ଜଣାଯାଇଛି। ଏହି ଏନ, ଏଚ,୧୩୦ କୁ ନିର୍ମାଣ କରୁଥିବା ସଂସ୍ଥା ର ଯନ୍ତ୍ରି ଓ ଏସ, ଡି,ଓ ଙ୍କ ଖାମଖିଆଳି ନୀତି ଯୋଗୁଁ ଲୋକେ ହନ୍ତସନ୍ତ ହେଉଥିବା ଲୋକେ ଅଭିଯୋଗ କରିଛନ୍ତି।

ପ୍ରଶାସନ କିମ୍ବା ନିର୍ମାଣ କାରୀ ସଂସ୍ଥା ମଧ୍ୟ ଜାଣିବା କଥା ଯେ, ବର୍ତ୍ତମାନ ବର୍ଷା ଦିନ ଚାଲିଛି।ତେଣୁ ଭଲ ଭାବରେ ଏପ୍ରୋଚ ରୋଡ଼ ତିଆରି କରିବା କଥା କିନ୍ତୁ ଖାମ ଖିଆଲି ଭାବରେ ନିମ୍ନମାନର କାର୍ଯ୍ୟ କରୁଥିବା ଯୋଗୁଁ ବର୍ତ୍ତମାନ ବର୍ଷା ହେଲେ ବାରମ୍ବାର ଭାଙ୍ଗିଯାଉଛି ଯାହା ଫଳରେ ଲୋକଙ୍କୁ ବହୁ ଅସୁବିଧା ଭୋଗିବା କୁ ପଡୁଥିବା ବେଳେ ଜନ ଅସନ୍ତୋଷ ମଧ୍ୟ ଦେଖା ଦେଇଛି।

ବର୍ତ୍ତମାନ ଦୁଇ କି.ମି ରାସ୍ତା ପାରି ହେବା ବଦଳରେ ୨୦ ରୁ ୩୦ କି ମି ଦୂର ରାସ୍ତା ଅତିକ୍ରମ କରି ବୁଲି କି ଯିବା ଆସିବା କରିବାକୁ ପଡୁଛି। ବର୍ତ୍ତମାନ ପ୍ରଶାସନ ପକ୍ଷରୁ ଉକ୍ତ ରାସ୍ତା ମଧ୍ୟ ଦେଇ ଭାରି ଯାନ ଚଳାଚଳ କୁ ବନ୍ଦ କରି ଦିଆଯାଇଅଛି। ଯଦି ସନ୍ଧ୍ୟା ପର୍ୟ୍ୟନ୍ତ ବର୍ଷା ନ ହୁଏ ତାହା ଯାନ ବାହନ ଚଲା ଚଳରେ ସ୍ୱାଭାବିକ କରି ଦିଆଯିବ ବୋଲି ଧର୍ମଗଡ଼ ତହସିଲଦାର ହରେକୃଷ୍ଣ ବରିହା ପ୍ରକାଶ କରିଛନ୍ତି।

Categories
ଆଞ୍ଚଳିକ

ଲଗାଣ ବର୍ଷାରେ ଅଧା ବାଣପୁର ହେଲା ଜଳମଗ୍ନ, ପ୍ରଶାସନର ଉଦ୍ଧାର କାର୍ଯ୍ୟ ଜାରି

ସୀତାରାମ ଅଗ୍ରୱାଲ

ବାଣପୁର: ଗତ ଦୁଇ ଦିନ ଧରି ଲଗାଣ ବର୍ଷାରେ ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଓ ଏନଏସି ର ଏକାଧିକ ଅଞ୍ଚଳ ଜଳମଗ୍ନ ହୋଇଛି। ବିଶେଷ କରି ବ୍ଲକର ଦେଓଗାଁ, ଗାଲୁଆ, ଭେଟେଶ୍ୱର, ଭବାନୀପୁର ଆୟତ୍ତପୁର ଓ ଦେଓଗାଁ ପଞ୍ଚାୟତର କିଛି ଗ୍ରାମ ଜଳମଗ୍ନ ହୋଇଥିବା ବେଳେ ଏନଏସି ର ୨ ନମ୍ବର ୱାର୍ଡ ଏବଂ ୧୨ ନମ୍ବର ୱାର୍ଡର କିଛି ଅଞ୍ଚଳ ଜଳମଗ୍ନ ହୋଇଥିବାର ଖବର ହସ୍ତଗତ ହୋଇଛି।

ଅନୁରୂପ ଭାବେ ଦେଓଗାଁ ଉଚ୍ଚ ପ୍ରାଥମିକ ବିଦ୍ୟାଳୟ ଏବଂ ନେହେରୁ ସେବା ସଂଘ ପରିସରର ବିଦ୍ୟାଳୟ ମଧ୍ୟ ଜଳମଗ୍ନ ହୋଇଥିବାର ଦେଖାଯାଇଛି। ତେବେ ଏ ନେଇ ବାଣପୁର ବିଡ଼ିଓ ପ୍ରଦ୍ୟୁମ୍ନ ନାୟକଙ୍କୁ ଯୋଗାଯୋଗ କରାଯିବାରୁ ଅଳ୍ପ ଅଞ୍ଚଳ ଜଳମଗ୍ନ ହୋଇଥିବାର ରିପୋର୍ଟ ମିଳିଛି ଏବଂ ସେ ସବୁ ଅଞ୍ଚଳ ଗ୍ରାମ ବାହାରେ ଥିବା ତଳି ଅଞ୍ଚଳ ବୋଲି ବିଡ଼ିଓ କହିଛନ୍ତି। ତେବେ ଆଜି ସକାଳୁ ପାଣି କଟିବାରେ ଲାଗିଛି ଏବଂ ବ୍ଲକ ପ୍ରଶାସନ ଏଥି ନିମନ୍ତେ ପଦକ୍ଷେପ ନେଇଥିବାର କହିଛନ୍ତି ବିଡ଼ିଓ ଶ୍ରୀ ନାୟକ।

ଅନୁରୂପ ଭାବେ ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମହାନ୍ତିଙ୍କୁ ଯୋଗାଯୋଗ କରିବାରୁ ବର୍ତ୍ତମାନ ନେହେରୁ ସେବା ସଂଘ ପରିସରରେ ଜେସିବି ଦ୍ୱାରା ରାସ୍ତା ସଫା କରାଯାଉଛି ଏବଂ ୧୨ ନମ୍ବର ୱାର୍ଡ କରଞ୍ଜିଆ ସାହିକୁ କର୍ମଚାରୀମାନେ ପାଣି ପମ୍ପ ନେଇ ଜଳ ନିଷ୍କାସନ ପାଇଁ ଯାଇଥିବାର କହିଛନ୍ତି। କିନ୍ତୁ କରଞ୍ଜିଆ ସାହି ଚତୁଃପାର୍ଶ୍ୱରେ ଥିବା କେନାଲ ବନ୍ଦ ଥିବାରୁ ଜଳ ନିଷ୍କାସନ ହୋଇପାରୁନାହିଁ ବୋଲି ଅଞ୍ଚଳ ବାସି କହିଛନ୍ତି।

ସେହିପରି ଭାବେ ବିଇଓ ସନାତନ ଜାଲି ସମସ୍ତ ସିଆରସିସି ଙ୍କୁ ଜଳମଗ୍ନ ହୋଇଥିବା ବିଦ୍ୟାଳୟ ଗୁଡ଼ିକ ନିକଟରେ ତୁରନ୍ତ ପହଞ୍ଚି ରିପୋର୍ଟ କରିବା ପାଇଁ ନିର୍ଦ୍ଦେଶ ଦେଇଛନ୍ତି।

Categories
ଅପରାଧ ଆଜିର ଖବର ଜାତୀୟ ଖବର

ତିନି କୃଷକଙ୍କ ଆତ୍ମହତ୍ୟା: ବାତ୍ୟା ଜୱାଦ ଯୋଗୁଁ ଫସଲ କ୍ଷତି ସହ୍ୟ କରିନପାରିଥିବା ଅଭିଯୋଗ

ବର୍ଦ୍ଦମାନ: ପଶ୍ଚିମବଙ୍ଗର ପୂର୍ବ ବର୍ଦ୍ଧମାନ ଜିଲ୍ଲାରେ ଗତ ଦୁଇ ଦିନ ମଧ୍ୟରେ ତିନିଜଣ ଚାଷୀଙ୍କ ମୃତଦେହ ମିଳିଛି। ପୋଲିସ ଆଜି ଏହି ସୂଚନା ଦେଇଛି। ମୃତ କୃଷକଙ୍କ ପରିବାର ଦାବି କରିଛନ୍ତି ଯେ, ଘୂର୍ଣ୍ଣିବଳୟ ଜୱାଦରେ ଲଗାଣ ବର୍ଷା ହେତୁ ଆଳୁ ଏବଂ ଧାନ ଫସଲ ନଷ୍ଟ ହେବା ପରେ ସେମାନେ ଆତ୍ମହତ୍ୟା କରିଛନ୍ତି। ଜିଲ୍ଲା ପ୍ରଶାସନ ଏହି ଘଟଣାର ଅନୁସନ୍ଧାନ କରୁଛି। ଶନିବାର ଦିନ ରାଇନା ପ୍ରଥାମ ମଣ୍ଡଳର ଦେବିପୁର ଏବଂ ବନ୍ତିର ଗ୍ରାମରେ ଦୁଇଜଣ ଚାଷୀଙ୍କୁ ଝୁଲୁଥିବା ଦେଖିବାକୁ ମିଳିଥିଲା। ଅନ୍ୟ ଜଣେ ଚାଷୀଙ୍କୁ ଶୁକ୍ରବାର ଦିନ କଲନା ଦ୍ୱିତୀୟ ମଣ୍ଡଳର ବିରୁହା ଗ୍ରାମରେ ଗୋଟିଏ ଘରେ ଝୁଲୁଥିବା ଦେଖିବାକୁ ମିଳିଥିଲା।

ଜଣେ ପୋଲିସ ଅଧିକାରୀ କହିଛନ୍ତି ଯେ, ମୃତଦେହକୁ ପୋଷ୍ଟମର୍ଟମ ପାଇଁ ବର୍ଦ୍ଧମାନ ମେଡିକାଲ କଲେଜ ଏବଂ ହସ୍ପିଟାଲକୁ ପଠାଯାଇଛି। ଜିଲ୍ଲା ମାଜିଷ୍ଟ୍ରେଟ ପ୍ରିୟଙ୍କା ସିଙ୍ଗଲା କହିଛନ୍ତି ଯେ, ଘଟଣାର ତଦନ୍ତ ଚାଲିଛି।

କୃଷି ଉପରେ ରାଜ୍ୟ ସରକାରଙ୍କ ପରାମର୍ଶଦାତା ପ୍ରଦୀପ ମଜୁମଦାର କହିଛନ୍ତି ଯେ, ଫସଲ ନଷ୍ଟ ହେତୁ କୃଷକମାନେ ଆତ୍ମହତ୍ୟା କରି ନଥାଇ ପାରନ୍ତି। କାରଣ ସେମାନେ ଏକ ସପ୍ତାହ ପୂର୍ବରୁ ‘କୃଷକ ବନ୍ଧୁ’ ଯୋଜନା ଅଧୀନରେ ଆର୍ଥିକ ସହାୟତା ପାଇଥିଲେ। ସ୍ଥାନୀୟ ବିଧାୟକ ଶମ୍ପା ଧାରା ମଧ୍ୟ ଦାବି କରିଛନ୍ତି ଯେ ଫସଲ ନଷ୍ଟ ହେତୁ କୌଣସି ମୃତ୍ୟୁ ହୋଇନାହିଁ।

Categories
ଆଜିର ଖବର ରାଜ୍ୟ ଖବର

ଅଦିନଆ ଲଗାଣ ବର୍ଷାରେ ଚାଷୀ ଫସଲର ଉପଯୁକ୍ତ କ୍ଷତିପୂରଣ ପାଇଁ ସ୍ୱତନ୍ତ୍ର ପ୍ୟାକେଜ ଦାବି

ଭୁବନେଶ୍ୱର: ଲଘୁଚାପ ଜନିତ ଲଗାଣ ବର୍ଷାରେ ଚାଷୀ ଫସଲର ଉପଯୁକ୍ତ କ୍ଷତିପୂରଣ ପ୍ରଦାନ ଦାବି କରି ଓଡ଼ିଶା କୃଷକ ସଭା ତରଫରୁ ପ୍ରଧାନମନ୍ତ୍ରୀ ଏବଂ ମୁଖ୍ୟମନ୍ତ୍ରୀଙ୍କୁ ସ୍ମାରକପତ୍ର ପ୍ରଦାନ କରାଯାଇଛି।

ଆମ ରାଜ୍ୟ ଓଡ଼ିଶାରେ ଏକମାସ ମଧ୍ୟରେ ଦୁଇଥର ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ଧାନଫସଲ ଉଜାଡ଼ି ଦେଇଛି। ପନିପରିବା ଚାଷ ବି ନଷ୍ଟ ହୋଇଛି, ଚାଷୀମୁଣ୍ଡରେ ହାତ ଦେଇ ବସିଛି କ’ଣ କରିବ। କୃଷକ ସର୍ବସ୍ୱାନ୍ତ ହୋଇଛନ୍ତି ଏବଂ କୃଷକର ଆର୍ଥିକ ମେରୁଦଣ୍ଡ ଭାଙ୍ଗିଯାଇଛି। ରାଜ୍ୟ ସରକାର ବର୍ଷା ପ୍ରପୀଡ଼ିତ ଜିଲ୍ଲାଗୁଡ଼ିକର ଫସଲ କ୍ଷତିର ଯଥାର୍ଥ ଭାବେ ଜରୁରୀ ଆକଳନ କରିବା ପାଇଁ ବ୍ୟବସ୍ଥା ନିମନ୍ତେ ଓଡ଼ିଶା କୃଷକସଭା ଦାବି କରିଛି। କୃଷକମାନଙ୍କୁ ଫସଲ ଜନିତ କ୍ଷତି ପାଇଁ ଉପଯୁକ୍ତ କ୍ଷତିପୂରଣ ଦେବା ପାଇଁ ଦାବୀ କରାଯାଇଛି। କେନ୍ଦ୍ର ଏବଂ ରାଜ୍ୟ ଉଭୟ ସରକାର କୃଷକମାନଙ୍କର ଏହି ଦୁର୍ଦ୍ଦିନରେ ପ୍ରକୃତ କ୍ଷତିପୂରଣ ରାଶି ପ୍ରକୃତ ଚାଷୀମାନଙ୍କୁ ପ୍ରଦାନ କରିବା ପାଇଁ ଏକ ସ୍ୱତନ୍ତ୍ର ପ୍ୟାକେଜ ଘୋଷଣା କରିବା ନିମନ୍ତେ ଓଡ଼ିଶା କୃଷକ ସଭା ତରଫରୁ ପ୍ରାଦେଶିକ କୃଷକ କମିଟି ଦୃଢ ଭାବେ ଦାବି ଜଣାଇଛନ୍ତି।

ଫସଲଜନିତ କ୍ଷତିରେ ଗଞ୍ଜାମ ଜିଲ୍ଲାର ପାତ୍ରପୁର ବ୍ଲକର ଚାଷୀ ମାନସିକ ଭାରସାମ୍ୟ ହରାଇ ଆତ୍ମହତ୍ୟା କରିବା ଅତ୍ୟନ୍ତ ଉଦ୍‌ବେଗଜନକ ଏବଂ ଦୁର୍ଭାଗ୍ୟପୂର୍ଣ୍ଣ ଘଟଣା ଘଟିଛି। କୃଷକମାନଙ୍କ ପାଇଁ ସୁନିଶ୍ଚିତ ଏବଂ ଭରଷାଯୋଗ୍ୟ ପଦକ୍ଷେପ ଗ୍ରହଣ କରି ଆସନ୍ନ କୃଷକ ଆତ୍ମହତ୍ୟାକୁ ରୋକିବା ପାଇଁ କୃଷକସଭା ଦୃଢ ଭାବେ ଦାବି କରିଛି।

(୧) ଲଘୁଚାପଜନିତ ଲଗାଣ ବର୍ଷାରେ ଧାନ, ପନିବା ଏବଂ ଅନ୍ୟାନ୍ୟ ଅର୍ଥକାରୀ ଫସଲ କ୍ଷୟକ୍ଷତିର ତୁରନ୍ତ ଆକଳନ କରାଯାଉ।

(୨) ଧାନ ଫସଲ ପାଇଁ ଏକରପ୍ରତି ୨୦ ହଜାର ଟଙ୍କା ଏବଂ ପନିପରିବା ତଥା ଅନ୍ୟାନ୍ୟ ଅର୍ଥକାରୀ ଫସଲ ପାଇଁ ଏକରପ୍ରତି ୨୫ ହଜାର ଟଙ୍କା କ୍ଷତିପୂରଣ ଦିଆଯାଉ।

(୩) ସମସ୍ତ କୃଷିଋଣ ଛାଡ଼ କରାଯାଉ। ରବି ଫସଲ ପାଇଁ ବିନା ସୁଧରେ ଋଣଦେବା ସହିତ ବିହନ, ସାର, କୀଟନାଶକ ଔଷଧ ମାଗଣାରେ ପ୍ରଦାନ କରାଯାଉ।

(୪) ଚାଷୀ ଅମଳ କରୁଥିବା ସମସ୍ତ ଧାନକୁ ଗୁଣାତ୍ମକ ମାନ ନିର୍ବିଶେଷରେ ସରକାରୀ ଧାର୍ଯ୍ୟ ସର୍ବନିମ୍ନ ସହାୟକ ମୂଲ୍ୟ (ଏମ.ଏସ୍‌.ପି) ପ୍ରଦାନ କରି ସରକାର କିଣନ୍ତୁ।

(୫) ଓଡ଼ିଶାରେ ସମସ୍ତ କ୍ଷତିପୂରଣ ସହାୟତା ରାଶି, ଋଣ ଏବଂ ଚାଷୀ ପାଉଥିବା ଅନ୍ୟାନ୍ୟ ସରକାରୀ ସୁବିଧାଗୁଡ଼ିକୁ ପ୍ରକୃତ ଚାଷୀ/ଭାଗଚାଷୀମାନଙ୍କୁ ପ୍ରଦାନ କରାଯାଉ।

(୬) କୃଷକମାନେ ଫସଲ ଜନିତ କ୍ଷୟକ୍ଷତିର ଉପଯୁକ୍ତ କ୍ଷତିପୂରଣ ପାଇବା ନିମନ୍ତେ ଜାତୀୟ ବିପର୍ଯ୍ୟୟ ସହାୟତା ପାଣ୍ଠି (ଏନ୍‌ଡ଼ିଆରଏଫ୍‌)ର ନିର୍ଦ୍ଦେଶାବଳୀକୁ ଉନ୍ନତ କରାଯାଉ। ସେହି ଅନୁଯାୟୀ ରାଜ୍ୟ ବିପର୍ଯ୍ୟୟ ସହାୟତା ପାଣ୍ଠି (ଏସ୍‌ଡ଼ିଆରଏଫ୍‌)ର ନିର୍ଦ୍ଦେଶାବଳୀକୁ ମଧ୍ୟ ଉନ୍ନତକରଣ କରାଯାଉ।

(୭) କୃଷକମାନଙ୍କ ପାଇଁ ସୁନିଶ୍ଚିତ ଏବଂ ଭରସାଯୋଗ୍ୟ ନୀତିଗ୍ରହଣ କରି ଆସନ୍ନ କୃଷକ ଆତ୍ମହତ୍ୟାକୁ ରୋକିବା ପାଇଁ ପଦକ୍ଷେପ ଗ୍ରହଣ କରାଯାଉ।

ଏଭଳି ସାତଦଫା ଦାବି ସମ୍ବଳିତ ଏକ ସ୍ମାରକପତ୍ର ଓଡ଼ିଶା କୃଷକ ସଭା ତରଫରୁ ପ୍ରଧାନମନ୍ତ୍ରୀ, ରାଜ୍ୟପାଳ, ମୁଖ୍ୟମନ୍ତ୍ରୀ, କୃଷିମନ୍ତ୍ରୀ, ମୁଖ୍ୟ ଶାସନ ସଚିବ ଏବଂ ସ୍ୱତନ୍ତ୍ର ରିଲିଫ କମିଶନରଙ୍କୁ ଦିଆଯାଇଛି। ସରକାର ଜରୁରୀ ପଦକ୍ଷେପ ଗ୍ରହଣ ନକଲେ ଆନ୍ଦୋଳନ କରିବା ପାଇଁ ବାଧ୍ୟ ହେବେ ବୋଲି ଓଡ଼ିଶା କୃଷକସଭାର ରାଜ୍ୟ ସଭାପତି ଜମେଶ୍ୱର ସମାନ୍ତରାୟ ଏବଂ ରାଜ୍ୟ ସାଧାରଣ ସମ୍ପାଦକ ସୁରେଶ ପାଣିଗ୍ରାହୀ ଏକ ପ୍ରେସ୍ ବିଜ୍ଞପ୍ତିରେ ପ୍ରକାଶ କରିଛନ୍ତି।

Categories
ଆଜିର ଖବର ରାଜ୍ୟ ଖବର

ଦୀର୍ଘ ବର୍ଷ ପରେ ଜଗତସିଂହପୁର ଜିଲ୍ଲାରେ ଏପରି ଉତ୍ପାତିଆ ବର୍ଷା: ଜିଲ୍ଲା ପ୍ରଶାସନ ପକ୍ଷରୁ କ୍ଷୟକ୍ଷତିର ସମୀକ୍ଷା

ରମେଶ ମହାନ୍ତି

ଜଗତସିଂହପୁର: ଦୀର୍ଘ ବର୍ଷ ପରେ ଜଗତସିଂହପୁର ଜିଲ୍ଲାରେ ଏପରି ଉତ୍ପାତିଆ ଲଘୁଚାପ ବର୍ଷା ହୋଇଥିବା ଦେଖିବାକୁ ମିଳିଛି। ଏହି ଲଗାଣ ବର୍ଷାର ପ୍ରକୋପରେ ଚାଷଜମି ଗୁଡିକ ପାଣିରେ ବୁଡ଼ି ରହିଥିବାରୁ ଚାଷୀ ମାନଙ୍କ ମୁଣ୍ଡ ବ୍ୟଥାର କାରଣ ପାଲଟିଛି। ଏମିତିକି ଅନେକ ସ୍ଥାନରେ ସାଧାରଣ ଲୋକଙ୍କ ଘରେ ବର୍ଷା ପାଣି ପଶିଯାଇ ଥିବାରୁ ସେମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି।

ଗତକାଲି ଠାରୁ ଲାଗିରହିଥିବା ଏହି ଲଘୁଚାପ ଜନିତ ବର୍ଷାର ପ୍ରଭାବରେ ଜିଲ୍ଲାର ୮ଟି ବ୍ଲକ ଓ ୨ଟି ମ୍ୟୁନିସିପାଲିଟି ପ୍ରଭାବିତ ହୋଇଛି। ଜିଲ୍ଲା ପ୍ରଶାସନ ପକ୍ଷରୁ କରାଯାଇଥିବା ସମୀକ୍ଷା ଅନୁଯାୟୀ ଜିଲ୍ଲାର ୧୯୮ଟି ପଞ୍ଚାୟତର ୧୩୨୧ଟି ଗ୍ରାମ ଓ ୨ଟି ମ୍ୟୁନିସିପାଲିଟିର ୪୦ଟି ୱାର୍ଡ଼ ବର୍ଷା ଯୋଗୁଁ ପ୍ରଭାବିତ ହୋଇଛି। ଜିଲ୍ଲାର ୯୯ଟି ଗାଁର ୧୬୯୨୦ ଲୋକ ବର୍ଷାଜଳ ଦ୍ୱାରା ବିଶେଷ ପ୍ରଭାବିତ ହୋଇଛନ୍ତି। ଜିଲ୍ଲାରେ ୪୩ଟି ଆଶ୍ରୟ ସ୍ଥଳୀରେ ୧୫୯୦ଜଣ ଲୋକଙ୍କୁ ସ୍ଥାନାନ୍ତରଣ କରାଯାଇଥିବା ବେଳେ ୨୯ଟି କେନ୍ଦ୍ରରେ ମାଗଣା ଖାଦ୍ୟ ପ୍ରଦାନ କରାଯାଇଛି। ଜିଲ୍ଲାରେ କୌଣସି ବ୍ୟକ୍ତି ମୃତାହତ ହୋଇନଥିବା ଜିଲ୍ଲାପାଳ ସୂଚନା ପ୍ରଦାନ କରିଛନ୍ତି। ଜିଲ୍ଲାରେ ୩୦୦୦ କୁକୁଡ଼ା ଚିଆଁ ମରିଥିବା ପ୍ରାଣୀ ଚିକିତ୍ସା ବିଭାଗ ପକ୍ଷରୁ ସୂଚନା ମିଳିଛି। ଜିଲ୍ଲାରେ କୃଷି ଓ ଉଦ୍ୟାନ କୃଷିକୁ ମିଶାଇ ୫୩୦୪୨.୯ ହେକ୍ଟର ଚାଷଜମି କ୍ଷତିଗ୍ରସ୍ତ ହୋଇଛି।

ପ୍ରବଳ ବର୍ଷା ଯୋଗୁଁ ୭୫ଟି ଘର ଆଂଶିକ କ୍ଷତିଗ୍ରସ୍ତ ହେବା ସହିତ ୨୮ଟି ଗୁହାଳ କ୍ଷତିଗ୍ରସ୍ତ ହୋଇଥିବା ବେଳେ ବର୍ଷା ପ୍ରଭାବିତ ଲୋକଙ୍କୁ ୧୫୦ ପ୍ୟାକେଟ୍ ବିସ୍କୁଟ, ୧୨.୬୦ କ୍ୱିଣ୍ଟାଲ ଚୁଡ଼ା ଓ ୧.୦୮ କ୍ୱିଣ୍ଟାଲ ଗୁଡ ବଣ୍ଟନ କରାଯାଇଛି। ୨ଟି ଅଗ୍ନିଶମ ବାହୀନି ଉଦ୍ଧାର କାର୍ଯ୍ୟରେ ନିୟୋଜିତ ରହିଥିବା ବେଳେ କ୍ଷତିଗ୍ରସ୍ତ ଅଞ୍ଚଳରେ ୩ଟି ମେଡିକାଲ ଟିମ୍ ନିୟୋଜିତ ହୋଇଛନ୍ତି। ବର୍ଷା ଜଳରେ ୭ଟି ରାସ୍ତା ବିଛିନ୍ନ ହୋଇଯାଇଥିବା ବେଳେ ୬ଟି କୋଠାଘର କ୍ଷତିଗ୍ରସ୍ତ ହୋଇଥିବା ଜିଲ୍ଲା ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି।

Categories
ଆଜିର ଖବର ରାଜ୍ୟ ଖବର

ବର୍ଷା ଯୋଗୁଁ ଦୁଇ ଦିନ ପାଇଁ ସମସ୍ତ ସ୍କୁଲ ଛୁଟି, ଗଣଶିକ୍ଷା ବିଭାଗର ଘୋଷଣା

ଭୁବନେଶ୍ୱର: ପ୍ରବଳ ବର୍ଷା ଯୋଗୁଁ ୧୨ ଜିଲ୍ଲାରେ ସ୍କୁଲକୁ ୨ ଦିନ ପାଇଁ ଛୁଟି ଘୋଷଣା କରାଯାଇଛି। ଏ ନେଇ ସୂଚନା ଦେଇଛନ୍ତି ଗଣଶିକ୍ଷା ମନ୍ତ୍ରୀ ସମୀର ଦାଶ।  ସେହି ୧୨ଟି ଜିଲ୍ଲା ହେଲା ପୁରୀ, କଟକ, ଖୋର୍ଦ୍ଧା, ଜଗତସିଂହପୁର, ଢେଙ୍କାନାଳ, କେନ୍ଦ୍ରାପଡା, ନୟାଗଡ, ସମ୍ବଲପୁର, ଦେବଗଡ, ଅନୁଗୁଳ, ସୋନପୁର ଓ ବରଗଡ ଜିଲ୍ଲା। ଏହି ଜିଲ୍ଲାଗୁଡିକୁ ପୂର୍ବରୁ ରେଡ୍ ଓ୍ବାର୍ଣ୍ଣିଂ ଜାରି କରାଯାଇଛି।

ବର୍ତ୍ତମାନ ଲଗାଣ ବର୍ଷା ଯୋଗୁଁ ବିଭିନ୍ନ ସ୍ଥାନରେ ପାଣି ଜମି ରହିଛି। ଏପରିକି ରାସ୍ତାଘାଟ ଉପରେ ପାଣି ପ୍ରବାହିତ ହେବାରେ ଲାଗିଛି। ବର୍ଷା ସହିତ ପ୍ରବଳ ପବନ ମଧ୍ୟ ପ୍ରବାହିତ ହେବାରେ ଲାଗିଛି। ଫଳରେ ଛାତ୍ରଛାତ୍ରୀଙ୍କ ସୁରକ୍ଷା ଦୃଷ୍ଟିରୁ ଏପରି ପଦକ୍ଷେପ ଗ୍ରହଣ କରାଯାଇଛି।

Categories
ଆଜିର ଖବର ରାଜ୍ୟ ଖବର

ଲଗାଣ ବର୍ଷା ଯୋଗୁଁ ବ୍ରିଜ୍‌ ଭାସିଗଲା : 15 ଖଣ୍ଡ ଗାଁ ବାହ୍ୟ ଜଗତରୁ ବିଚ୍ଛିନ୍ନ

ବ୍ରହ୍ମପୁର : ଆନ୍ଧ୍ର ପ୍ରଦେଶ ଉପକୂଳ କାକିନାଡ଼ାଠାରେ ଅବପାତ ସ୍ଥଳଭାଗ ଛୁଇଁଛି । ଏହାର ପ୍ରଭାବରେ ଆନ୍ଧ୍ର ଓ ଦକ୍ଷିଣ ଓଡ଼ିଶାର ଅଧକାଂଶ ଜିଲ୍ଲାରେ ବର୍ଷା ହେଉଛି ।  ଲଗାଣ ବର୍ଷା ଯୋଗୁଁ ସୋରଡା ବ୍ଲକ ବରଦା ପଞ୍ଚାୟତର ଖାରିଗୁଡାରେ ନିର୍ମିତ ବ୍ରିଜ୍‌ ଭାସିଯାଇଛି । ଫଳରେ 15 ଖଣ୍ଡ ଗାଁ ବାହ୍ୟଜଗତରୁ ବିଚ୍ଛିନ୍ନ ହୋଇଛି । ବ୍ରିଜ୍‌ଟି ଗୋକୁଳପୁର-ଖାରିଗୁଡାକୁ ସଂଯୋଗ କରୁଥିଲା । ଅପରପକ୍ଷରେ ଲଗାଣ ବର୍ଷା ଯୋଗୁଁ ବ୍ରହ୍ମପୁର ଅଞ୍ଚଳର ପାତ୍ରପୁର ବ୍ଲକ ଅନ୍ତର୍ଗତ 5ଟି ଗାଁ ଜଳ ମଗ୍ନ ହୋଇପଡ଼ିଛି । ଆଙ୍ଗୁଲି ଓ ବୁରାତାଲ ପଞ୍ଚାୟତର 5ଟି ଗାଁ ଜଳମଗ୍ନ ହୋଇଛି । ଅବପାତଜନିତ ବର୍ଷା, ଝରଣା ପାଣି ଓ ବାଘଲଟି ଜଳ ପ୍ରକଳ୍ପ ପାଣିରେ ସମ୍ପୃକ୍ତ ଗାଁଗୁଡ଼ିକ ବୁଡ଼ି ଯାଇଛି। ସେହିପରି ପାତ୍ରପୁର ବ୍ଲକ ଆଙ୍କୁଲି ପଞ୍ଚାୟତରେ ଅଘଟଣ ଘଟିଛି । ତଡ଼କାସାହି ଓ ଚରିଆବାଡ଼ ରାସ୍ତାରେ ପାହାଡ଼ ଧସି ପଡ଼ିଥିବା ଜଣାଯାଇଛି। ପାହାଡ଼ରୁ ମାଟି ଅତଡ଼ା ଖସିବାରୁ ଯୋଗାଯୋଗ ସମ୍ପୂର୍ଣ୍ଣ ବ୍ୟାହତ ହୋଇଛି ।

Categories
ଆଜିର ଖବର ରାଜ୍ୟ ଖବର

ରାଜ୍ୟରେ ଲଗାଣ ବର୍ଷା ଜାରୀ, ୯ ଟି ଜିଲ୍ଲାକୁ ରେଡ୍ ୱାର୍ଣ୍ଣି, ଆହୁରି ଦୁଇ ଦିନ ପର୍ଯ୍ୟନ୍ତ ପାଗ ଏପରି ରହିବ

ଭୁବନେଶ୍ବର, ଉତ୍ତର ବଙ୍ଗୋପସାଗରରେ ସୃଷ୍ଟ ଲଘୁଚାପ ପ୍ରଭାବରେ ସାରା ରାଜ୍ୟରେ ଲଗାଣ ବର୍ଷା ଜାରୀ ରହିଛି। ପାଣିପାଗ ବିଭାଗ ଅନୁସାରେ ଗତ 24 ଘଣ୍ଟା ମଧ୍ୟରେ ରାଜ୍ୟ ୨୧ ଜିଲ୍ଳାରେ ବର୍ଷା ହେଉଛି । ତେବେ ଏହିପରି ପାଗ ଆହୁରି ଦୁଇ ଦିନ ଧରି ଲାଗି ରହିବ ବୋଲି ଜଣାପଡିଛି। ସେଥିପାଇଁ ୯ ଟି ଜିଲ୍ଲାକୁ ରେଡ ୱାର୍ଣ୍ଣିଂ ଜାରି କରାଯାଇଛି। ସେଗୁଡିକ ହେଲା ସମ୍ବଲପୁର, ସୋନପୁର, ଝାରୁସୁଗୁଡା, ବରଗଡ, ବୌଦ୍ଧ, ବଲାଙ୍ଗୀର, କଳାହାଣ୍ଡି ସୁନ୍ଦରଗଡ ଓ ଦେଓଗଡ।  ଏହି ଜିଲ୍ଲା ଗୁଡିକରେ ପ୍ରବଳରୁ ଅତି ପ୍ରବଳ ବର୍ଷା ହେବ ସେଥିପାଇଁ ବନ୍ୟା ସ୍ଥିତି ମଧ୍ୟ ସୃଷ୍ଟି ହୋଇପାରେ। ସେହିପରି ଅନୁଗୁଳ, ନୂଆପଡା, ନବରଙ୍ଗପୁର, କେନ୍ଦୁଝର, ଢେଙ୍କାନାଳ, ମୟୁରଭଞ୍ଜ ଓ କନ୍ଧମାଳ ଜିଲ୍ଲାଗୁଡୁକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି ।