Tag: ଚିଲିକା

ସୀତାରାମ ଅଗ୍ରୱାଲ

ଚିଲିକା: ବାତ୍ୟା ଜୱାଦ ପ୍ରଭାବରେ ଖୋର୍ଦ୍ଧା ଜିଲ୍ଲା ଚିଲିକା ନିର୍ବାଚନମଣ୍ଡଳୀରେ ଚାଷୀ ଚିନ୍ତା ଓ ଭୟଭିତ ଅବସ୍ଥାରେ ଥିବାବେଳେ ବର୍ତ୍ତମାନ ପରିସ୍ଥିତିରେ ସେମାନଙ୍କ ଆଖିରୁ ନିଦ ହଜିଗଲାଣି। ଚିଲିକାରେ ଏହି ବାତ୍ୟା ଜୱାଦ ଯୋଗୁଁ ଚାଷୀଙ୍କ ଫସଲ ନଷ୍ଟ ହୋଇଯାଇଛି। ଶହ ଶହ ଏକର କ୍ଷେତରେ ଧାନ ପାଚି ଅମଳ ହେବା ଅବସ୍ଥାରେ ଥିବା ବେଳେ ବର୍ତ୍ତମାନ ବର୍ଷା ଯୋଗୁଁ ଧାନ ଫସଲରେ ପାଣି ମାଡିଯାଇଛି। ଯାହାଫଳରେ ଚାଷୀର ବର୍ଷ ଯାକର ଅକ୍ଲାନ୍ତ ପରିଶ୍ରମ ବୃଥା ହୋଇଛି।

ଏହାର ପୂର୍ବ ବର୍ଷାରେ ଅନେକ ଜମିରେ ପାଣି ମାଡି ଯିବାରୁ ଚାଷୀଙ୍କ ଧାନ ଗଜା ହୋଇଥିବା ଅଭିଯୋଗ ହୋଇଥିବା ବେଳେ ପୁଣି ଉକ୍ତ ବର୍ଷା ଚାଷୀଙ୍କ ଉପରେ ବୋଝ ଉପରେ ନଳିତା ବିଡା ପାଲଟିଛି। ଏପରିକି କିଛି ଚାଷୀ ଧାନ କାଟି ତରବରିଆ ଭାବେ ଜମି ହୁଡାରେ ପକେଇଦେଇଛନ୍ତି। ମାତ୍ର ଜୱାଦ ପ୍ରଭାବରେ ଲଗାଣ ବର୍ଷା ଯୋଗୁଁ ବର୍ତ୍ତମାନ ଅମଳ ଧାନରୁ ଗଜା ବାହାରିବା ନେଇ ଚାଷୀ ମୁଣ୍ଡରେ ଏବେ ଚଡକ ପଡିଛି।

ବର୍ତ୍ତମାନ ଚାଷୀର ଏହି ସମସ୍ୟାକୁ ନେଇ ରାଜ୍ୟ ସରକାର ବାତ୍ୟା ଜନିତ କ୍ଷୟକ୍ଷତି କେବେ ଆକଳନ କରୁଛନ୍ତି ଏବଂ ନଷ୍ଟ ହୋଇଥିବା ଚାଷର ଭରଣ ପୋଷଣ କେବେ ପ୍ରଦାନ କରୁଛନ୍ତି ତାହାକୁ ଅପେକ୍ଷା କରିଛନ୍ତି ଚାଷୀକୂଳ।

ରାଜ୍ୟରେ ବାରମ୍ବାର ପ୍ରାକୃତିକ ଦୁର୍ବିପାକ ଯେଉଁ ଭଳି ଗ୍ରାସ କରିଛି ବାସ୍ତବରେ ତାହା ସାଧାରଣ ଲୋକଙ୍କ ମେରୁ ଦଣ୍ଡ ଭାଙ୍ଗି ଦେଇଛି। ଛୋଟବଡ ବ୍ୟବସାୟୀଙ୍କ ଠାରୁ ଆରମ୍ଭ କରି ଦିନ ମଜୁରିଆଙ୍କୁ ଅମେକ କ୍ଷୟକ୍ଷତିର ସମ୍ମୁଖୀନ ହେବାକୁ ପଡୁଛି। ଅନୁରୂପ ଭାବେ ଚିଲିକା ଅଞ୍ଚଳର ମତ୍ସ୍ୟଜୀବୀ ଏବଂ ମାଛ ବ୍ୟବସାୟୀମାନେ ବାତ୍ୟା ଜୱାଦ କୋପରୁ ବର୍ତ୍ତିପାରିନାହାନ୍ତି।

ପାଣିପାଗ ବିଭାଗର ସତର୍କ ସୂଚନା ପରେ ତଳିଆ ଅଞ୍ଚଳ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରିବାପାଇଁ ସରକାର ବିହିତ ପଦକ୍ଷେପ ଗ୍ରହଣ କରିଥିଲେ। ଏଥି ସହିତ ମତ୍ସ୍ୟଜୀବୀ ମାନଙ୍କ ଡ଼ଙ୍ଗାକୁ ସୁରକ୍ଷିତ ସ୍ଥାନକୁ ଅଣାଯାଇଥିଲା। ଚିଲିକା ଏକ ଉପକୂଳବର୍ତ୍ତି ଅଞ୍ଚଳ ହୋଇଥିବାରୁ ବାତ୍ୟାର ପ୍ରଭାବ ଅଧିକ ରହିବ ବୋଲି ପୂର୍ବାନୁମାନ କରାଯାଇଥିଲା। ଯାହାକି ଅଧିକାଂଶ ଲୋକ ମତ୍ସ୍ୟଜିବୀ ହେତୁ ପରିବାର ପ୍ରତିପୋଷଣ ପାଇଁ ଚିଲିକା ଉପରେ ନିର୍ଭର କରନ୍ତି। ମାତ୍ର ପ୍ରଶାସନର ତାଗିଦ ଯୋଗୁଁ ଚିଲିକା ଭିତରକୁ ମାଛ ଧରାଳି କିମ୍ବା ଯାତ୍ରୀବାହି ଡ଼ଙ୍ଗା ନେବାପାଇଁ ବାରଣ କରାଯାଇଥିଲା।

ତେଣୁ ଚିଲିକାରୁ ମାଛ ସଂଗ୍ରହ ଯେଉଁ ପରିମାଣରେ ହବା କଥା ତାହା ହୋଇପାରିଲା ନାହିଁ। ଖାସ କରି ଛୁଟି ଦିନ ମାନଙ୍କରେ ମାଛ ଗୋଦାମ ଗୁଡିକ ଗ୍ରାହକଙ୍କ ଗହଳିରେ ଫାଟି ପଡୁଥିଲେ ମଧ୍ୟ ବାତ୍ୟା ଯୋଗୁଁ ଖାଁ ଖାଁ ପଡିଥିବାର ପରିଲକ୍ଷିତ ହୋଇଛି। ଯାହାଫଳରେ ମାଛ ଧରାଳିଙ୍କ ରୋଜଗାର ଉପରେ ବିଶେଷ ପ୍ରଭାବ ପଡିଛି। ସରକାର ଏଥିପ୍ରତି ଏକ ସକାରାତ୍ମକ ଦୃଷ୍ଟି ଦେବାପାଇଁ ରାଜ୍ୟ ସରକାରଙ୍କୁ ବିଭିନ୍ନ ମତ୍ସ୍ୟଜୀବୀ ସଂଘ ଅନୁରୋଧ କରିଛନ୍ତି।

ସୀତାରାମ ଅଗ୍ରୱାଲ

ଚିଲିକା: ମାଡିଆସୁଛି ବାତ୍ୟା ଜୱାଦ। ଏଥି ନିମନ୍ତେ ରାଜ୍ୟ ସରକାର ସମସ୍ତ ପୂର୍ବପ୍ରସ୍ତୁତି ସାରିଥିବାବେଳେ ଖୋର୍ଦ୍ଧା ଜିଲ୍ଲା ଚିଲିକା ଅଞ୍ଚଳରେ ମଧ୍ୟ ସମାନ ପଦକ୍ଷେପ ନେଇଛି ସ୍ଥାନୀୟ ପ୍ରଶାସନ। ଚିଲିକା ତହସିଲଦାର ପୁନମ ମହାପାତ୍ରଙ୍କ ସୂଚନା ମୁତାବକ ଏନଡ଼ିଆରଅଫ ର ଗୋଟେ ଟିମ ଖୋର୍ଦ୍ଧାରୁ ଆସି ଚିଲିକା ବ୍ଲକ ହେଡ଼ କ୍ୱାର୍ଟରରେ ସଜାଗ ଅଛି।

ସେହିପରି ଭାବେ ଚିଲିକା ତଟବର୍ତ୍ତୀ ଅଞ୍ଚଳଗୁଡିକରେ ଡାକବାଜି ଯନ୍ତ୍ର ଦ୍ୱାରା କୂଳକୁ ନଯିବା ପାଇଁ ପ୍ରଚାର ଜାରିରହିଥିବା ବେଳେ ଜରିପଡ଼ା ପଞ୍ଚାୟତର ମାଟିଆପଡା ପ୍ରାଥମିକ ବିଦ୍ୟାଳୟ, ପାଣିଦୁଆର ପ୍ରାଥମିକ ବିଦ୍ୟାଳୟ ଓ ଦାଶରଥି ଉଚ୍ଚ ବିଦ୍ୟାଳୟକୁ ବାତ୍ୟା ଆଶ୍ରୟସ୍ଥଳୀ ସେଣ୍ଟର ଭାବେ ଚି଼ହ୍ନଟ କରାଯାଇଥିବା ବେଳେ ସେଠାରେ ବିସ୍ଥାପିତଙ୍କ ପାଇଁ ରହିବା ଓ ଖାଇବା ବ୍ୟବସ୍ଥା କରାଯାଇଛି। ତେବେ ଅଦ୍ୟାବଧି ସ୍ୱଳ୍ପ ଜନସାଧାରଣ ବାତ୍ୟା ଆଶ୍ରୟସ୍ଥଳୀକୁ ଆସିଥିବାର କହିଛନ୍ତି ତହସିଲଦାର।

ସେହିପରି ଭାବେ ବାଲୁଗାଁ ଏନଏସି କାର୍ଯ୍ୟନିର୍ବାହୀ ଅଧିକାରୀ ପ୍ରାଣନାଥ ସେଠଙ୍କ ସୂଚନା ଅନୁଯାୟୀ ଚିଲିକା କୁଳ ନିକଟସ୍ଥ ଗୋପବନ୍ଧୁ କଲୋନୀ, ସନ୍ୟାସୀ ନଗର ଏବଂ ଶାନ୍ତି ନଗର ଅଞ୍ଚଳକୁ ବିପଦପୂର୍ଣ୍ଣ ଅଞ୍ଚଳ ଭାବେ ଚି଼ହ୍ନଟ କରାଯାଇଥିବା ବେଳେ ଉକ୍ତ ଅଞ୍ଚଳବାସୀଙ୍କୁ ବାଲୁଗାଁ ଉଚ୍ଚ ବିଦ୍ୟାଳୟକୁ ବିସ୍ଥାପିତ କରାଯାଉଛି। ସେଠାରେ କୋଭିଡ ନିୟମ ମୁତାବକ ଆଣ୍ଟିଜେନ ଟେଷ୍ଟ ହେବାପରେ ଜନସାଧାରଣମାନେ ଏକାଠି ରହିବେ ଓ ଖାଇବେ। ସେହିପରି ଭାବେ ମତ୍ସ୍ୟଜୀବୀମାନଙ୍କୁ ଚିଲିକା ଭିତରକୁ ଆସନ୍ତା ତିନି ଦିନ ଯାଏଁ ନଯିବା ପାଇଁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି। ସେମାନଙ୍କ ଡ଼ଙ୍ଗାଗୁଡିକୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ ପାଇଁ ବ୍ୟବସ୍ଥା କରାଯାଇଛି।

ସେହିପରି ଭାବେ ବାଣପୁର ତହସିଲଦାର କୁଞ୍ଜବିହାରୀ ବଡ଼ଜେନାଙ୍କ ସୂଚନା ମୁତାବକ ବାଣପୁର ବ୍ଲକର ୯ ଗୋଟି ବାତ୍ୟା ଆଶ୍ରୟସ୍ଥଳୀ ସଜାଗ ଅଛି। ତତସହିତ ଶାଳିଆ ଡ୍ୟାମ, ନନ୍ଦପୁର ପଞ୍ଚାୟତ ଏବଂ କୁମାରାଙ୍ଗ ପଞ୍ଚାୟତର ତଳୁଆ ଅଞ୍ଚଳଗୁଡ଼ିକ ଉପରେ ତୀକ୍ଷ୍ଣ ନଜର ରଖାଯାଇଛି। ବିଦ୍ୟୁତ, ଅଗ୍ନିଶମ, ମେଡିକାଲ ଏବଂ ସମସ୍ତ ଅନ୍ୟ ବିଭାଗୀୟ ଅଧିକାରୀଙ୍କ ସହ ବୈଠକ ସରିଛି ଓ ବାତ୍ୟା ପାଇଁ ସମସ୍ତେ ସଜାଗ ଥିବାର ସୂଚନା ଦେଇଛନ୍ତି ତହସିଲଦାର।

ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମହାନ୍ତିଙ୍କ ସୂଚନା ମୁତାବକ ପଲଟନ ପଡିଆ ନିକଟସ୍ଥ ଶହୀଦ କୃତିବାସ ଭବନକୁ ବାତ୍ୟା ଆଶ୍ରୟସ୍ଥଳୀ କରାଯାଇଥିବା ବେଳେ ସେଠାରେ ବିସ୍ଥାପିତଙ୍କ ରହିବା ଓ ଖାଇବା ପାଇଁ ସମସ୍ତ ପ୍ରକାର ବନ୍ଦୋବସ୍ତ କରାଯାଇଛି।  ଅନୁରୂପ ଭାବେ ପ୍ରତି ୱାର୍ଡର ସ୍କୁଲ ଓ କମ୍ୟୁନିଟି ସେଣ୍ଟର ଗୁଡିକୁ ମଧ୍ୟ ପ୍ରସ୍ତୁତ ରଖାଯାଇଥିବାର କହିଛନ୍ତି କାର୍ଯ୍ୟନିର୍ବାହୀ ଅଧିକାରୀ।

ବାତ୍ୟା ପାଇଁ ବାଣପୁର ଓ ଚିଲିକା ତହସିଲ ଅଞ୍ଚଳରେ ପୋଲିସ ପ୍ରଶାସନ ପୁରାପୁରି ଭାବେ ପ୍ରସ୍ତୁତ ରହିଥିବାର କହିଛନ୍ତି ବାଲୁଗାଁ ଏସଡ଼ିପିଓ ମାନସ ରଞ୍ଜନ ବାରିକ। ତଳୁଆ ଅଞ୍ଚଳରେ ପୋଲିସ କର୍ମଚାରୀମାନେ ଜନସାଧାରଣଙ୍କୁ ବିସ୍ଥାପିତ ଜାରି ରଖିଥିବାବେଳେ ବାତ୍ୟା ପାଇଁ ଚିଲିକା ଏବଂ ନଦୀ ଅଞ୍ଚଳକୁ ନଯିବା ପାଇଁ ଅନୁରୋଧ କରୁଛନ୍ତି। ଯଦି କୌଣସି ବ୍ୟକ୍ତି ବାତ୍ୟା ସମୟରେ କୌଣସି ଅସୁବିଧାର ସମ୍ମୁଖୀନ ହୁଅନ୍ତି, ତେବେ ଏସଡ଼ିପିଓଙ୍କ ବ୍ୟକ୍ତିଗତ ମୋବାଇଲ ନମ୍ବର ୯୦୭୮୯୩୪୯୩୪ କୁ ନିଃସଙ୍କୋଚ ଭାବେ ସହାୟତା ପାଇଁ ଯୋଗାଯୋଗ କରିପାରିବେ ବୋଲି ‘ସମୀକ୍ଷା’ ନିୟୁଜ ମାଧ୍ୟମରେ କହିଛନ୍ତି।

ତେବେ ଉଭୟ ଚିଲିକା ଏବଂ ବାଣପୁର ଅଞ୍ଚଳରେ ବର୍ତ୍ତମାନ ଖୋର୍ଦ୍ଧା ଅତିରିକ୍ତ ଜିଲ୍ଲପାଳ ଏବଂ ଉପଜିଲ୍ଲାପାଳ ଉପସ୍ଥିତ ରହି ବିଭିନ୍ନ ବ୍ୟବସ୍ଥାର ତଦାରଖ ଜାରି ରଖିଛନ୍ତି।

ସୀତାରାମ ଅଗ୍ରୱାଲ

ବାଲୁଗାଁ: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଲୁଗାଁ ସହର ଆଜି ସବୁଜମୟ ହୋଇଯାଇଛି। ନବୀନ ପଟ୍ଟନାୟକ ଜିନ୍ଦାବାଦ, ବିଜେଡ଼ି ଜିନ୍ଦାବାଦ ସ୍ଲୋଗାନରେ କମ୍ପି ଉଠିଲା ବାଲୁଗାଁ। ଦୀର୍ଘ ଅଢେଇ ବର୍ଷ ପରେ ଆଜି ଚିଲିକା ନିର୍ବାଚନମଣ୍ଡଳିର ପୂର୍ବତନ ବିଜେଡି ବିଧାୟକ ରଘୁନାଥ ସାହୁ ବାଲୁଗାଁ ଏନଏସିରେ ଏକ ବିଶାଳ ରାଲି କରିଛନ୍ତି। ପୂର୍ବତନ ବିଧାୟକ ଶ୍ରୀ ସାହୁଙ୍କ ନେତୃତ୍ୱରେ କେବଳ ବାଲୁଗାଁ ଏନଏସିର ପାଖାପାଖି ଏକ ହଜାରରୁ ଉର୍ଦ୍ଧ୍ଵ ପୁରୁଷ ଏବଂ ମହିଳା କର୍ମୀମାନେ ଆଜି ସମଗ୍ର ଏନଏସି ପରିକ୍ରମା କରିଥିଲେ। ଉକ୍ତ ବିଶାଳ ଶୋଭାଯାତ୍ରା ବାଲୁଗାଁ ପୂର୍ତ୍ତ ଡାକ ବଙ୍ଗଳାରୁ ବାହାରି ସମଗ୍ର ଏନଏସିର ୧୧ ଟି ୱାର୍ଡ ଅତିକ୍ରମ କରିଥିଲା।

ଏହି ସମୟରେ ସ୍ଥାନୀୟ ଗାନ୍ଧୀ ଛକରେ କର୍ମୀମାନଙ୍କୁ ଶ୍ରୀ ସାହୁ ସମ୍ବୋଧିତ କରିବା ସହ ଦରଦାମ ବୃଦ୍ଧି ବିରୋଧରେ ବିଜେପିକୁ ଟାର୍ଗେଟ କରିଥିଲେ। ଏବଂ କେନ୍ଦ୍ର ସରକାର ବିରୋଧରେ ବିକ୍ଷୋଭ ପ୍ରଦର୍ଶନ କରିଥିଲେ। ପରିଶେଷରେ ଉକ୍ତ ଶୋଭାଯାତ୍ରାଟି ରାମପୁର ସ୍ଥିତ ବିଜେଡି କାର୍ଯ୍ୟାଳୟରେ ସମାପ୍ତ ହୋଇଥିଲା।

ତେବେ ପୂର୍ବତନ ବିଧାୟକ ଶ୍ରୀ ସାହୁଙ୍କୁ ଆମ ପ୍ରତିନିଧି ପଚାରିବାରୁ ଚିଲିକା ନିର୍ବାଚନମଣ୍ଡଳିର ଅଢେଇ ଲକ୍ଷ ଭୋଟରଙ୍କ ହୃଦୟରେ ସେ ଅଛନ୍ତି ଏବଂ ରହିଥିବେ ବୋଲି କହିଥିଲେ। କର୍ମୀମାନଙ୍କ ସୁଖ ଦୁଃଖରେ ସଦାବେଳେ ସେ ଅଛନ୍ତି ଓ ରହିବେ। ଆଜି କେବଳ ଏନଏସିର ହଜାର ହଜାର କର୍ମୀଙ୍କୁ ନେଇ ଉକ୍ତ ଶୋଭାଯାତ୍ରା ଅନୁଷ୍ଠିତ ହୋଇଥିବାର ସେ କହିଛନ୍ତି।  ତତସହିତ ଆଗାମୀ ପୌର ଏବଂ ପଞ୍ଚାୟତ ନିର୍ବାଚନରେ ମଧ୍ୟ ଚିଲିକା ନିର୍ବାଚନମଣ୍ଡଳିରେ ତାଙ୍କ ନେତୃତ୍ୱରେ ପୁଣି ଥରେ ଶଙ୍ଖ ବାଜିବ ବୋଲି ଶ୍ରୀ ସାହୁ କହିଛନ୍ତି।

ସୀତାରାମ ଅଗ୍ରୱାଲ

ଚିଲିକା: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ନେଇ ନାନାଦି କଳ୍ପନାଜଳ୍ପନା ଲାଗି ରହିଥିବା ବେଳେ ଚିଲିକା ନିର୍ବାଚନମଣ୍ଡଳିରେ ଶାସକ ଦଳର ଅନ୍ତକନ୍ଦଳ ସାମ୍ନାକୁ ଆସୁଛି। କିନ୍ତୁ ସେପଟେ  ବିରୋଧୀ ଦଳଗୁଡିକ ମଧ୍ୟ ଏକରକମ ନିଷ୍କ୍ରିୟ ହୋଇଯାଇଥିବା ପରିଲକ୍ଷିତ ହେଉଛି। ମାତ୍ର  ଖୋର୍ଦ୍ଧା ଜିଲ୍ଲା ଚିଲିକା ବ୍ଳକ ବିରିବାଡ଼ି ଗ୍ରାମ ପଞ୍ଚାୟତର ମା’ ରତ୍ନମାଳି ଦେବୀଙ୍କ ପ୍ରାଙ୍ଗଣରେ ଚିଲିକାର ପୂର୍ବତନ ବିଜେଡ଼ି ବିଧାୟକ ରଘୁନାଥ ସାହୁ ଶତାଧିକ କର୍ମୀଙ୍କୁ ନେଇ କର୍ମୀ ସମ୍ମିଳନୀ ଆରମ୍ଭ କରିଛନ୍ତି। ଯାହାକି ଆଗାମୀ ପଞ୍ଚାୟତ ନିର୍ବାଚନ ପାଇଁ ବିଜୁଜନତା ଦଳର ପୂର୍ବତନ ବିଧାୟକ ରଘୁନାଥ ସାହୁ ସକ୍ରିୟ ହୋଇଥିବାର ସୂଚନା ଦେଉଛି।

ଚିଲିକା ନିର୍ବାଚନମଣ୍ଡଳୀରେ ବିଜେଡିର ବିବାଦ ଥମି ନ ଥିବାବେଳେ ଆଗାମି ଦିନରେ ପୁଣି ଶଙ୍ଖ ବାଜିମାତ କରିବା ନେଇ ଦୃଢ଼ୋକ୍ତି ପ୍ରକାଶ କରିଛନ୍ତି ପୂର୍ବତନ ବିଧାୟକ ଶ୍ରୀ ସାହୁ। ଏପରିକି ନିର୍ବାଚନମଣ୍ଡଳୀର ପ୍ରତିଟି ଜନସାଧାରଣଙ୍କ ହୃଦୟରେ ସେ ଅଛନ୍ତି ଏବଂ ଆଗକୁ ମଧ୍ୟ ଯେ କୋୖଣସି ପରିସ୍ଥିତିରେ ରହିବେ ବୋଲି ଗଣମାଧ୍ୟମ ସମ୍ମୁଖରେ ପରିପ୍ରକାଶ କରିଛନ୍ତି। ଦଳର ସୁପ୍ରିମୋ ତଥା ମୁଖ୍ୟମନ୍ତ୍ରୀଙ୍କ ଉପରେ ତାଙ୍କର ସଂପୂର୍ଣ୍ଣ ଆଶାଭରସା ଅଛି ଏବଂ ଅଦ୍ୟାବଧି ଦଳରେ ଥାଇ ମଧ୍ୟ କୌଣସି ପଦପଦବୀରେ ନରହି ଦଳ ମଜଭୁତ ପାଇଁ ନିଜ ପ୍ରଚେଷ୍ଟାରେ ଉଦ୍ୟମ ଜାରି ରଖିଥିବା ଶ୍ରୀ ସାହୁ କହିଛନ୍ତି।

ଉକ୍ତ କର୍ମୀ ସମ୍ମିଳନୀରେ ଚିଲିକା ବ୍ଲକ ବିଜେଡ଼ି ସଭାପତି ଦେବେନ୍ଦ୍ର ସାମନ୍ତସିଂହାର, ସାଂସଦ ପ୍ରତିନିଧି ରମେଶ ମହାପାତ୍ରଙ୍କ ସମେତ ଶତାଧିକ ବିଜେଡ଼ି କର୍ମୀମାନେ ଯୋଗଦେଇଥିଲେ।

ଅପରପକ୍ଷେ ଗତ କିଛି ଦିନ ତଳେ ଦଳରୁ ନିଲମ୍ବିତ ହୋଇଥିବା ବିଧାୟକ ପ୍ରଶାନ୍ତ ଜଗଦ୍ଦେବ ମଧ୍ୟ ଦଳୀୟ କର୍ମୀଙ୍କୁ ନେଇ ଚିଲିକାରେ ଏକ ବଡ ରାଲି କରିଥିଲେ। ଯେଉଁଥିରେ ଶହ ଶହ କର୍ମୀ ଯୋଗ ଦେଇଥିଲେ। ଏହି ବୈଠକରେ ବିରୋଧୀଙ୍କୁ ବିଧାୟକ ଶ୍ରୀ ଜଗଦ୍ଦେବ ଟାର୍ଗେଟ କରିଥିଲେ। ଏହି ଅବସରରେ ବିରୋଧୀ ଦଳ ନେତାମାନଙ୍କୁ ୱାର୍ଡ ମେମ୍ବର ହେବା ପାଇଁ ଯୋଗ୍ୟ ନୁହଁନ୍ତି ବୋଲି ସେ କଟାକ୍ଷ କରିଥିଲେ। ସେହିଭଳି ନିଜ ଦଳର କିଛି ନେତାଙ୍କୁ ‘ଢୋଲ ଭିତରେ ମୂଷା’ କହିବା ସହ ଦଳକୁ କ୍ଷତି ପହଞ୍ଚାଉଥିବା ସେଭଳି ନେତାଙ୍କୁ ଉଚିତ ଶିକ୍ଷା ଦିଆଯିବ ବୋଲି ସେ ଚେତାବନୀ ଦେଇଥିଲେ।

ତେବେ ଏଭଳି ବାକ୍ୟ ପ୍ରଶାନ୍ତ ଜଗଦ୍ଦେବ କାହା ଉଦ୍ଦେଶ୍ୟରେ ବ୍ୟବହାର କରିଥିଲେ ବୋଲି ଲୋକଙ୍କ ମନରେ ସସ୍ପେନ୍ସ ଲାଗି ରହିଥିଲା। କିନ୍ତୁ ପୂର୍ବତନ ବିଧାୟକ ରଘୁନାଥ ସାହୁଙ୍କ ଏହି ବୈଠକରେ ଜଣେ କର୍ମୀ ଏହି ବାକ୍ୟକୁ ଦୋହରାଇଥିବା ଦେଖାଯାଇଥିଲା। ରଘୁ ସାହୁଙ୍କ ଉପସ୍ଥିତିରେ ଉକ୍ତ କର୍ମୀଜଣଙ୍କ ପରୋକ୍ଷରେ ସମାଲୋଚନା କରୁଥିବା ସାମାଜିକ ଗଣମାଧ୍ୟମରେ ଭାଇରାଲ ହେଉଛି। ଯାହା ଫଳରେ ବର୍ତ୍ତମାନ ପରିସ୍ଥିତିରେ ଚିଲିକାରେ ବିଜେଡ଼ିର ସବୁ ଠିକ ଚାଲିଥିବା ଭଳି ମନେ ହେଉନାହିଁ।

ତେଣୁ ଏଭଳି ଘଟଣାକୁ ଦେଖି ବିଜେଡ଼ି କାର୍ଯ୍ୟକର୍ତ୍ତାଙ୍କ ମନରେ ଅନେକ ପ୍ରଶ୍ନ ଉଠୁଛି। ଆଗାମୀ ତ୍ରୀସ୍ତରୀୟ ପଞ୍ଚାୟତ ନିର୍ବାଚନରେ ଦଳର କିଏ ମଙ୍ଗ ଧରିବ, ତାହାକୁ ନେଇ କର୍ମୀମାନଙ୍କ ମନରେ ପ୍ରଶ୍ନ ଉଙ୍କି ମାରୁଛି।

ଅନ୍ୟପଟେ ଏଭଳି ରାଜନୈତିକ ବିରୋଧାଭାଷ ଯୋଗୁଁ ଚିଲିକାର ଉନ୍ନତିମୂଳକ କାର୍ଯ୍ୟରେ ବାଧା ସୃଷ୍ଟି ହେଉଛି ବୋଲି ସାଧାରଣ ଜନତା ଅଭିଯୋଗ କରୁଛନ୍ତି। ଚିଲିକାବାସୀଙ୍କ ସମସ୍ୟା ଶୁଣିବା ପରିବର୍ତ୍ତେ ନିଜର ରାଜନୈତିକ ଲାଭ ଉଠାଇବା ପାଇଁ ନେତାମାନେ ତତ୍ପରତା ଦେଖାଉଛନ୍ତି ବୋଲି ଅଭିଯୋଗ ହେଉଛି। ଗତ ଲଘୁଚାପଜନିତ ବର୍ଷାରେ ଚାଷୀମାନଙ୍କ ଧାନ ଫସଲ ଉଜୁଡିଯାଇଥିବା ବେଳେ ସେମାନଙ୍କ ଦୁଃଖ ବୁଝିବା ପାଇଁ ଉଭୟ ସରକାରୀ ଦଳର ନେତା କିମ୍ବା ବିରୋଧୀ ଦଳର ନେତାମାନେ ଆଗ୍ରହ ଦେଖାଉନଥିବା ଅଭିଯୋଗ ହେଉଛି। କେବଳ ନିର୍ବାଚନ ଆସିଲେ ଲୋକଙ୍କୁ ମିଥ୍ୟା ପ୍ରତିଶ୍ରୁତି ଦେବାକୁ ନେତାମାନେ ଦୁଆର ଦୁଆର ବୁଲିବେ ବୋଲି ଚିଲିକାବାସୀ କହିଛନ୍ତି।

ସୀତାରାମ ଅଗ୍ରୱାଲ

ଚିଲିକା: ମରାଳ ମ‍ାଳିନୀ ନିଳାମ୍ଵୁ ଚିଲିକାରେ ଶହ ଶହ ମତ୍ସ୍ୟଜୀବୀ ମାଛ ମାରି ନିଜର ପରିବାର ପ୍ରତିପୋଷଣ କରି ଆସୁଛନ୍ତି। ହେଲେ ଚିଲିକାରେ କେତେକ ଅସାଧୁ ମାଫିଆ ଵେଆଇନ ଘେରି କରିବା ଯୋଗୁଁ ଚିଲିକାରେ ମାଛ ଉତ୍ପାଦନ କମ୍ ହେବା ସହ ଚିଲିକା ତାର ସୌନ୍ଦର୍ଯ୍ୟ ହରାଉଛି। ତେଣୁ ରାଜ୍ୟ ସରକାର ଚିଲିକାରେ ଘେରି ଉଛେଦ ଅଭିଯାନ ଜାରି ରଖିଛନ୍ତି।

ଏହି ପ୍ରରିପ୍ରେକ୍ଷୀରେ ଚିଲିକାରେ ଆଜି ପୁଣି ଘେରି ଉଚ୍ଛେଦ ଅଭିଯାନ କରାଯାଇଥିଲା। ଘେରି ଉଚ୍ଛେଦ କାର୍ଯ୍ୟ ଟାଙ୍ଗୀ ଥାନା ଅନ୍ତର୍ଗତ ସୋରଣ ଏବଂ ମାନସିଂହପୁର ଅନ୍ତର୍ଗତ ଚିଲିକା ହ୍ରଦ ମଧ୍ୟ୍ୟରେ ଚାଲିଥିଲା। ଖୋର୍ଦ୍ଧା ଜିଲ୍ଲା ପ୍ରଶାସନ ଓ ସିଡିଏ ର ମିଳିତ ସହଯୋଗରେ ଘେରି ଉଚ୍ଛେଦ ଅଭିଯାନ ଚାଲିଥିଲା। ଶାନ୍ତିଶୃଙ୍ଖଳା ରକ୍ଷା କରିଵା ପାଇଁ ୨ ପ୍ଲାଟୁନ୍ ପୋଲିସ୍ ଫୋର୍ସ ମୁତୟନ କରାଯାଇଥିଲା।

ମାନସିଂହପୁର ଜେଟି ନିକଟରେ ପ୍ରଶାସନ ପକ୍ଷରୁ ଆଜି ଦୀର୍ଘ ସମୟ ଧରି ଘେରି ଉଚ୍ଛେଦ ଅଭିଯାନ ଜାରି ରହିଥିଲା। ଦେଶୀ ଡଙ୍ଗା ସାହାଯ୍ୟରେ ଘେରି ଉଚ୍ଛେଦ କରାଯାଇ ଜାଲି କିଳାଗୁଡିକୁ ଜଵତ କରିଥିଲା ପ୍ରଶାସନ। ଆଜି ଗୋଟିଏ ଦିନରେ ୨୫.୦୫ ହେକ୍ଟର ଅଂଚଳରୁ ଘେରି ଉଚ୍ଛେଦ କରାଯାଇଥିଲା।

ତେବେ ଏହି ଘେରି ଉଚ୍ଛେଦ ପ୍ରକ୍ରିୟା ଆଗକୁ ଜାରି ରହିବ ବୋଲି ପ୍ରଶାସନ କହିଛି। ଉକ୍ତ ଉଚ୍ଛେଦ ଅଭିଯାନର ଚିଲିକା ତହସିଲଦାର ପୁନମ ମହାପାତ୍ର ଏବଂ ଟାଙ୍ଗୀ ଥାନା ଆଇଆଇସି ବିଜୟ କୁମାର ମଲ୍ଲିକ ନେତୃତ୍ୱ ନେଇଥିଲେ।

ସୀତାରାମ ଅଗ୍ରୱାଲ

ଚିଲିକା: ରାଜ୍ୟ ଓ କେନ୍ଦ୍ର ସରକାର ଛାତ୍ର ଛାତ୍ରୀଙ୍କୁ ସରକାରୀ ବିଦ୍ୟାଳୟରେ ପଢ଼ାଇବା ନିମନ୍ତେ ପ୍ରୋତ୍ସାହନ ଦେବା ସହ ବିଭିନ୍ନ ଯୋଜନାମାନ ପ୍ରଣୟନ କରିଛନ୍ତି। ଏପରିକି ବର୍ତ୍ତମାନ ରାଜ୍ୟର ଶତାଧିକ ବିଦ୍ୟାଳୟ ଗୁଡିକ ୫-ଟି ରୂପାନ୍ତରିକରଣ କାର୍ଯ୍ୟକ୍ରମ ଅନ୍ତର୍ଗତ ରୂପାନ୍ତରିତ ହୋଇଛି। ତେବେ ଏହାର ସୁଫଳ ଦେଖିବାକୁ ମିଳିଛି ଖୋର୍ଦ୍ଧା ଜିଲ୍ଲା ଚିଲିକା ନିର୍ବାଚନମଣ୍ଡଳିରେ।

ବାଣପୁର ଓ ଏବଂ ଚିଲିକା ବ୍ଲକରେ ସରକାରୀ ବିଦ୍ୟାଳୟ ଯଥା ସରକାରୀ ଅନୁଦାନ ପ୍ରାପ୍ତ ବିଦ୍ୟାଳରେ ପାଠ ପଢିବା ଲାଗି ଛାତ୍ରଛାତ୍ରୀଙ୍କ ଆଗ୍ରହ ବଢ଼ିବାରେ ଲାଗିଛି। ଚଳିତ ଶିକ୍ଷାବର୍ଷରେ ବାଣପୁର ବ୍ଲକ ଓ ଏନଏସି ରେ ସର୍ବମୋଟ ୧୨୭ ଗୋଟି ସରକାରୀ ଓ ସରକାରୀ ଅନୁଦାନ ପ୍ରାପ୍ତ ବିଦ୍ୟାଳୟ ଗୁଡିକରେ ସମୁଦାୟ ୧୬ ହଜାର ୯ ଶହ ୬୯ ଜଣ ଛାତ୍ରଛାତ୍ରୀ ପ୍ରଥମରୁ ଦଶମ ଶ୍ରେଣୀ ମଧ୍ୟରେ ନାମ ଲେଖାଇଛନ୍ତି।

କିନ୍ତୁ ଗତ ବର୍ଷ ଏହାର ସଂଖ୍ୟା ଥିଲା ୧୬ ହଜାର ୩ ଶହ ୮୭। ସେହିପରି ଭାବେ ଚଳିତ ଶିକ୍ଷାବର୍ଷରେ ଚିଲିକା ବ୍ଲକ ଓ ବାଲୁଗାଁ ଏନଏସି ରେ ସର୍ବମୋଟ ୯୮ ଗୋଟି ସରକାରୀ ଓ ସରକାରୀ ଅନୁଦାନ ପ୍ରାପ୍ତ ବିଦ୍ୟାଳୟ ଗୁଡିକରେ ସମୁଦାୟ ୧୫ ହଜାର ୯ ଶହ ୮୪ ଜଣ ଛାତ୍ରଛାତ୍ରୀ ପ୍ରଥମରୁ ଦଶମ ଶ୍ରେଣୀ ମଧ୍ୟରେ ନାମ ଲେଖାଇଛନ୍ତି। କିନ୍ତୁ ଗତ ବର୍ଷ ଏହାର ସଂଖ୍ୟା ଥିଲା ୧୪ ହଜାର ୭ ଶହ ୮୯। ତେବେ ମୋଟାମୋଟି ଦେଖିବାକୁ ଗଲେ ଉଭୟ ବ୍ଲକ ଓ ଏନଏସିରେ ଗତବର୍ଷ ଠାରୁ ଚଳିତ ବର୍ଷ ୧ ହଜାର ୭ ଶହ ୭୭ ଜଣ ଅଧିକ ଛାତ୍ରଛାତ୍ରୀ ମାନେ ନାମ ଲେଖାଇଛନ୍ତି। ଏପରିକି ଅଦ୍ୟାବଧି ପ୍ରତିଦିନ ଏକାଧିକ ଛାତ୍ରଛାତ୍ରୀ ବିଭିନ୍ନ ଘରୋଇ ବିଦ୍ୟାଳୟରୁ ସରକାରୀ ବିଦ୍ୟାଳୟକୁ ନାମ ଲେଖାଉଥିବାର ଦେଖିବାକୁ ମିଳିଛି।

ପୂର୍ବରୁ ସରକାରୀ ବିଦ୍ୟାଳୟ ଅପେକ୍ଷା ଘରୋଇ ବିଦ୍ୟାଳୟକୁ ଅଭିଭାବକମାନେ ପ୍ରାଥମିକତା ଦେଉଥିବା ବେଳେ ଏବେ ପୁଣି ସେମାନଙ୍କ ପିଲାମାନଙ୍କୁ ସରକାରୀ ବିଦ୍ୟାଳୟରେ ନାମ ଲେଖାଉଛନ୍ତି। ତେବେ ଏହାର ଏକାଧିକ କାରଣ ରହିଛି।

ସରକାରୀ ବିଦ୍ୟାଳୟରେ ପଢିଲେ ବର୍ତ୍ତମାନ ମେଡିକାଲ ଓ ଇଞ୍ଜିନିଅରିଙ୍ଗ ଆଦି ପାଠ୍ୟକ୍ରମରେ ସରଂକ୍ଷଣ ମିଳିବ ବୋଲି ରାଜ୍ୟ ସରକାର ଘୋଷଣା କରିଛନ୍ତି, ଯାହା ଏକ ପ୍ରମୁଖ କାରଣ। ସେହିପରି ଭାବେ ସରକାର ବର୍ତ୍ତମାନ ସମସ୍ତ ବିଦ୍ୟାଳୟଗୁଡିକର ଭିତ୍ତିଭୂମି ସୁଦୃଢ କରିବାକୁ ଶତଚେଷ୍ଟା କରୁଛନ୍ତି ଏବଂ ସେଥିନିମନ୍ତେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି।

୫-ଟି ରୂପାନ୍ତରିକରଣ ଯୋଜନା ଅନ୍ତର୍ଗତ ବର୍ତ୍ତମାନ ରାଜ୍ୟର ଏକାଧିକ ବିଦ୍ୟାଳୟର ନବୀକରଣ ହେବାସହ ସେଠାରେ ସମସ୍ତ ପ୍ରକାର ଉନ୍ନତ ସୁବିଧା ଉପଲବ୍ଧ ହେଉଛି। ଯାହାକି ଅଭିଭାବକମାନଙ୍କୁ ଆକୃଷ୍ଟ କରୁଛି। ଅନୁରୂପଭାବେ କରୋନା କାଳରେ ଆର୍ଥିକ ଅଭାବ ଲାଗି ମଧ୍ୟ ଏକାଧିକ ଅଭିଭାବକ ସେମାନଙ୍କୁ ପିଲାଙ୍କୁ ଘରୋଇ ବିଦ୍ୟାଳୟରୁ ସରକାରୀ ତଥା ସରକାରୀ ଅନୁଦାନ ପ୍ରାପ୍ତ ବିଦ୍ୟାଳୟ ଗୁଡିକରେ ନାମ ଲେଖଉଥୁବା ଦେଖାଯାଇଛି।

ଚିଲିକା ଓ ବାଣପୁର ଅଞ୍ଚଳରେ ମଧ୍ୟ ସରକାରୀ ବିଦ୍ୟାଳୟରେ ପିଲାଙ୍କୁ ଆକୃଷ୍ଟ ନିମନ୍ତେ ଏକାଧିକ କାର୍ଯ୍ୟକ୍ରମ ହାତକୁ ନିଆଯାଇଛି। ଉନ୍ନତ ମଧ୍ୟାହ୍ନ ଭୋଜନ, ମାଗଣା ସାଇକେଲ, ଭିନ୍ନକ୍ଷମ ଛାତ୍ରଛାତ୍ରୀଙ୍କୁ ମାଗଣା ଟ୍ରାଇ ସାଇକେଲ, ମାଗଣା ପୁସ୍ତକ ବଣ୍ଟନ, ବିଭିନ୍ନ ମେଧାବୃତ୍ତି, ପରୀକ୍ଷା ପାଇଁ ଉନ୍ନତ ତାଲିମ, ଏକାଧିକ ବୃତ୍ତି ଯୋଜନା, ପ୍ରତ୍ୟେକ ରବିବାରରେ ଅନଲାଇନ ମାଧ୍ୟମରେ ଶିକ୍ଷାଦାନ, ଖେଳକୁଦକୁ ପ୍ରୋତ୍ସାହାନ ଦେବା ଆଦି ବ୍ୟବସ୍ଥାକୁ କାର୍ଯ୍ୟକାରୀ କରାଯାଇଥିବାର ବାଣପୁର ବିଇଓ ସନାତନ ଜାଲି ଓ ଚିଲିକା ବିଇଓ ନଳିନୀକାନ୍ତ ମହାନ୍ତି ସୂଚନା ଦେଇଛନ୍ତି।

ସେହିପରି ଭାବେ ଆସନ୍ତା ଶିକ୍ଷାବର୍ଷରୁ ‘ରାଷ୍ଟ୍ରୀୟ ଶିକ୍ଷା ନୀତି’ ଲାଗୁ ହେବାକୁ ଯାଉଛି ଯାହାର ଅନ୍ତର୍ଗତ ପ୍ରି ପ୍ରାଇମେରୀରୁ ଏକାଦଶ ଶ୍ରେଣୀ ପର୍ଯ୍ୟନ୍ତ ସମସ୍ତ ଛାତ୍ରଛାତ୍ରୀ ମାନଙ୍କୁ ଆହୁରି ଦକ୍ଷ କରାଯିବାର ବ୍ୟବସ୍ଥା ହୋଇଥିବାର ଉଭୟ ବିଇଓ କହିଛନ୍ତି।

ସୀତାରାମ ଅଗ୍ରୱାଲ

ଚିଲିକା: ରନ୍ଧନ ଗ୍ୟାସ ଦର ବୃଦ୍ଧି ପ୍ରତିବାଦରେ ରାସ୍ତାକୁ ଓଲ୍ହାଇଛି ବିଜେଡି। ପୂର୍ବ ଘୋଷଣା ମୁତାବକ ଆଜିଠାରୁ ଆସନ୍ତା ତିନି ଦିନ ଧରି ରାଜ୍ୟର ସମସ୍ତ ଆରଡ଼ିସି ଜୋନ ଏବଂ ଏହା ଅନ୍ତର୍ଗତ ବ୍ଲକଗୁଡ଼ିକ ସମ୍ମୁଖରେ ଦଳ ପକ୍ଷରୁ ଆନ୍ଦୋଳନ କରାଯିବ।

ଏହି ପରିପ୍ରେକ୍ଷୀରେ ଆଜି ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ବ୍ଲକ ସମ୍ମୁଖରେ ରନ୍ଧନ ଗ୍ୟାସ ଦର ବୃଦ୍ଧି ପ୍ରତିବାଦରେ ବିଜେଡି ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯିବା ସହ ଏକ ପ୍ରତିବାଦ ସଭାର ଆୟୋଜନ କରାଯାଇଥିଲା। ଉକ୍ତ ପ୍ରତିବାଦ ସଭାରେ ବିଜୁ ଯୁବ, ଛାତ୍ର ଏବଂ ମହିଳା ଜନତା ଦଳର ଶହ ଶହ କର୍ମକର୍ତ୍ତା ମାନେ ସାମିଲ ହେବା ସହ କେନ୍ଦ୍ର ସରକାରକୁ ଟାର୍ଗେଟ କରିଥିଲେ। କେନ୍ଦ୍ର ସରକାର ଦର ହ୍ରାସ ନକରିବା ଯାଏଁ ଆନ୍ଦୋଳନ ଜାରି ରହିବ ବୋଲି କର୍ମୀ ମାନେ ଚେତାବନୀ ଦେଇଥିଲେ।

ଅନୁରୂପଭାବେ ଚିଲିକା ବ୍ଲକ ସମ୍ମୁଖରେ ବିଜେଡ଼ିର ଶତାଧିକ କର୍ମୀ ଧାରଣାରେ ବସିଛନ୍ତି। ସାଢେ ତିନି ବର୍ଷରେ ଯେଉଁଭଳି ଭାବେ ଗ୍ୟାସ ଦର ବୃଦ୍ଧି ପାଇଛି, ତାହାକୁ ନେଇ ବିଜେଡ଼ି ପକ୍ଷରୁ କେନ୍ଦ୍ର ବିରୋଧରେ ପ୍ରତିବାଦ କରାଯାଉଛି। ରନ୍ଧନ ଗ୍ୟାସ ସହ ଅତ୍ୟାବଶ୍ୟକ ଜିନିଷର ମୂଲ୍ୟ ବୃଦ୍ଧି ଯୋଗୁଁ କେନ୍ଦ୍ର ସରକାରକୁ ବିଜେଡ଼ି ଟାର୍ଗେଟ କରିଛି।

ସୀତାରାମ ଅଗ୍ରୱାଲ

ଚିଲିକା: ଆଜାଦୀ କା ଅମୃତ ମହୋତ୍ସବ, ସ୍ୱର୍ଣ୍ଣିମ ବିଜୟ ବର୍ଷ ଏବଂ ଆଗାମୀ ନୌସେନା ଦିବସ ପାଳନ ଅବସରରେ, ଆଇଏନଏସ ଚିଲିକା ଗତକାଲି ଭେଟେରାନ୍ ନାବିକ ଫୋରମ୍ (ଓଡିଶା) ର ସଦସ୍ୟମାନଙ୍କ ଏକ ଦିନିଆ ଭ୍ରମଣର ଆୟୋଜନ କରିଥିଲା।

ଏହି ଅବସରରେ କମୋରେଡ଼ ଏନପି ପ୍ରଦୀପ, ନାଭାଲ ଅଫିସର ଇନଚାର୍ଜ (ଓଡିଶା) ଏବଂ କମାଣ୍ଡିଂ ଅଫିସର ଆଇଏନଏସ ଚିଲିକା ଏବଂ ବିନ୍ଦୁ ପ୍ରଦିପ, ସଭାପତି ଏନଡବ୍ଲୁଡବ୍ଲୁଏ, ଚିଲିକାର ୧୨୦ ଜଣ ନାଭାଲ ଭେଟେରାନ ଏବଂ ସେମାନଙ୍କ ପରିବାରକୁ ମିଶାଇ ସମୁଦାୟ ୨୯୦ ଜଣ ସଦସ୍ୟଙ୍କୁ ସ୍ୱାଗତ କରିଥିଲେ। ଏହି ଭେଟେରାନ୍ ମାନଙ୍କୁ ଉକ୍ତ ସମ୍ମାନଜନକ ପ୍ରତିଷ୍ଠାନରେ ସେମାନଙ୍କର ଗୌରବମୟ ସମୟର ପ୍ରଶିକ୍ଷଣର ସ୍ମୃତି ଏବଂ ଅଭିଜ୍ଞତାକୁ ଉପଭୋଗ କରିବାର ସୁଯୋଗ ଦିଆଯାଇଥିଲା। ଦେଶ ତଥା ଭାରତୀୟ ନୌସେନା ପ୍ରତି ସେମାନଙ୍କର ନିସ୍ୱାର୍ଥପର ସେବାର ଏକ ସ୍ୱୀକୃତି ଭାବରେ ଏହା ଭେଟେରାନମାନଙ୍କ ପାଇଁ ଏକ ଭାବୁକ ମୁହୂର୍ତ୍ତ ଥିଲା।

ଏହି ଅବସରରେ ବର୍ତ୍ତମାନର ପିଢ଼ିର ପ୍ରଶିକ୍ଷକ, ନାବିକ, ଅଧିକାରୀ ଏବଂ ସେମାନଙ୍କ ପରିବାର ସହିତ ଭେଟେରାନମାନେ ସେମାନଙ୍କ ସେବା ସମୟର ଅନୁଭୂତିକୁ ପରିପ୍ରକାଶ କରିବାସହ ବିଭିନ୍ନ ଆଲୋଚନା କରିଥିଲେ। ଏହି ଅବସରରେ ପେନ୍‌ସନ୍‌, କଲ୍ୟାଣ ଯୋଜନା, ଇସିଏଚଏସ.ଓ ଭେଟେରାନମାନଙ୍କ ପାଇଁ କ୍ୟାଣ୍ଟିନ ସେବା ସମ୍ବନ୍ଧୀୟ ସମସ୍ୟାର ସମାଧାନ ପାଇଁ ଏକ ସୁବିଧା କେନ୍ଦ୍ର ପ୍ରତିଷ୍ଠା କରାଯାଇଥିଲା।

ତେବେ ଉକ୍ତ କାର୍ଯ୍ୟକ୍ରମଟି ଏକ ବଡ଼ ସଫଳ କାର୍ଯ୍ୟକ୍ରମ ଭାବେ ପରିଗଣିତ ହେବା ସହ “ଅତୀତ” ଓ “ବର୍ତ୍ତମାନ” ମଧ୍ୟରେ ଏକ ସେତୁ ରୂପକ ପ୍ରଭାବଶାଳୀ ପ୍ଲାଟଫର୍ମ ଭାବରେ ପ୍ରମାଣିତ ହୋଇପାରିଥିଲା।

ସୀତାରାମ ଅଗ୍ରୱାଲ

ଚିଲିକା: ଚିଲିକାରେ ଆରମ୍ଭ ହୋଇଯାଇଛି ସର୍ବଭାରତୀୟ ନୌଚାଳନା ପ୍ରତିଯୋଗିତା।  ଏନସିସି ନିର୍ଦ୍ଦେଶାଳୟ, ଓଡ଼ିଶା ଶାଖା ପକ୍ଷରୁ ଉକ୍ତ ପ୍ରତିଯୋଗିତା ଆୟୋଜନ କରାଯାଇଛି।  ଗତ ବୁଧବାର ସଂଧ୍ୟାରେ ଅନୁଷ୍ଠାନିକ ଭାବେ ଏହାର ଉଦଘାଟନ ହୋଇଥିବାବେଳେ ଆସନ୍ତା ୨୪ ତାରିଖରେ ଏହା ସମାରୋପ ହେବ।

ଚିଲିକା ହ୍ରଦ ସ୍ଥିତ ଭାରତୀୟ ନୌଚାଳନା ପ୍ରଶିକ୍ଷଣ କେନ୍ଦ୍ର ମଧ୍ୟରେ ଉକ୍ତ ପ୍ରତିଯୋଗିତା ଜାରି ରହିଛି। ସର୍ବାଭାରତରେ ଥିବା ଏନସିସିର ୧୭ ଗୋଟି ନିର୍ଦ୍ଦେଶାଳୟ ମଧ୍ୟରୁ ସମୁଦାୟ ୧୦୨ ଜଣ ଏନସିସି କ୍ୟାଡେଟ ଉକ୍ତ ପ୍ରତିଯୋଗିତାରେ ଭାଗ ନେଇଛନ୍ତି। ଯେଉଁଥିରେ ୫୧ ଜଣ ବାଳିକା ଏବଂ ୫୧ ଜଣ ବାଳକ ସାମିଲ ଅଛନ୍ତି।

ତେବେ ନୌଚାଳନା ସମେତ ଅନ୍ୟାନ୍ୟ ବିଭାଗରେ ମଧ୍ୟ କ୍ୟାଡେଟ ମାନଙ୍କ ପ୍ରତିଯୋଗିତା ଅନୁଷ୍ଠିତ ହେବ। ତେବେ ଉକ୍ତ ସର୍ବଭାରତୀୟ ପ୍ରତିଯୋଗିତାରେ ଓଡ଼ିଶା ଏନସିସି ର ସମସ୍ତ କ୍ୟାଡେଟ ମାନଙ୍କୁ ପ୍ରଶିକ୍ଷଣ ଦେଉଛନ୍ତି ବାଣପୁର ବ୍ଲକ ବୋରିଗାଁର ଜାତୀୟ ସ୍ତରର ଖେଳାଳି ତଥା ପ୍ରଶିକ୍ଷକ ରଞ୍ଜିତ ରାଉତରାୟ। ଉକ୍ତ ଶିବିରକୁ କଲୋନେଲ ଅମିତାଭ ରୟ ଏବଂ ଲିଉଟନାଣ୍ଟ ସିଡ଼ିଆର ଭି. ରବି ଜଦୁ ଆଦି ପରିଚାଳନା କରୁଛନ୍ତି।

ସୀତାରାମ ଅଗ୍ରୱାଲ

ଚିଲିକା: ବାର୍ଡ଼ ଫ୍ଲୁ କୁ ରୋକିବା ପାଇଁ କେନ୍ଦ୍ର ସରକାରଙ୍କ ଆଗୁଆ ପଦକ୍ଷେପ ସ୍ୱରୂପ ବିଭିନ୍ନ ପକ୍ଷୀମାନଙ୍କ ନମୁନା ସଂଗ୍ରହ ନିମନ୍ତେ ଏକ କେନ୍ଦ୍ରୀୟ ବିଶେଷଜ୍ଞ ଦଳ ଆଜି ଦୁଇ ଦିନିଆ ଚିଲିକା ଗସ୍ତରେ ଆସିଛନ୍ତି। ଉକ୍ତ ଟିମରେ ଭୋପାଳ ସ୍ଥିତ ଏଚ.ଏସ.ଏ.ଡ଼ି.ଏଲ ର ବୈଜ୍ଞାନିକ ଡ଼ା ଚକ୍ରଧର ତୋଷ, କଟକ ସ୍ଥିତ ଏ.ଡ଼ି.ଆର.ଆଇ ର ବୈଜ୍ଞାନିକ ଡ଼ା ଜ୍ୟୋତି ମିଶ୍ର, ବାଲୁଗାଁ ଅତିରିକ୍ତ ପ୍ରାଣୀଧନ ଅଧିକାରିଣୀ ଡ଼ା ସମାପିକା ମହାପାତ୍ର ଏବଂ ଚିଲିକା ବ୍ଲକ ପ୍ରାଣୀଧନ ବିଶେଷଜ୍ଞ ଡ଼ା ଦେବାଶିଷ ଦାସ ଆଦି ସାମିଲ ଥିଲେ।

ତେବେ ଆଜି ପ୍ରଥମ ଦିନରେ ଉକ୍ତ ଟିମ ଚିଲିକା ବନ୍ୟପ୍ରାଣୀ ଡିଭିଜନ ଅଧିକାରୀଣି ଆଇଏଫଏସ ଜ୍ୟୋତି କୋଟାଲଙ୍କ ଉପସ୍ଥିତିରେ ନଳବଣ ଅଞ୍ଚଳରୁ ୬୯ ଗୋଟି ବିଭିନ୍ନ ପ୍ରଜାତିର ପକ୍ଷୀ ମାନଙ୍କ ନମୁନା ସଂଗ୍ରହ କରିଥିଲେ। ସେହିପରି ଭାବେ ଚିଲିକା ତଟବର୍ତ୍ତୀ ଅଞ୍ଚଳରୁ ପ୍ରାଣୀସମ୍ପଦ ବିଭାଗ ପକ୍ଷରୁ ୧୬୦ ଗୋଟି ପକ୍ଷୀମାନଙ୍କ ନାସିକାରୁ ନମୁନା ସଂଗ୍ରହ କରାଯାଇଥିଲା।

ତେବେ ଉକ୍ତ କାର୍ଯ୍ୟକ୍ରମଟି ଜିଲ୍ଲା ମୁଖ୍ୟ ପ୍ରାଣୀ ସମ୍ପଦ ଅଧିକାରୀ ଡ଼ା ଆଶିଷ କୁମାର ଶତପଥୀଙ୍କ ତତ୍ୱାବଧାନରେ ଅନୁଷ୍ଠିତ ହୋଇଥିବାବେଳେ ଉକ୍ତ ଟିମ ଆସନ୍ତାକାଲି ଟାଙ୍ଗୀ, ମଙ୍ଗଳାଯୋଡି ଯାଇ ସେଠାରୁ ବିଭିନ୍ନ ପକ୍ଷୀଙ୍କ ନମୁନା ସଂଗ୍ରହ କରିବ ବୋଲି ସୂଚନା ମିଳିଛି।

ସୀତାରାମ ଅଗ୍ରୱାଲ

ଚିଲିକା: ଖୋର୍ଦ୍ଧା ଜିଲ୍ଲା ଚିଲିକା ନିର୍ବାଚନମଣ୍ଡଳିର ସମସ୍ତ ଶିବ ମନ୍ଦିରଗୁଡ଼ିକରେ ଆଜି ଠାରୁ ଜିଲ୍ଲା ପ୍ରଶାସନ ଦ୍ୱାରା ଧାରା ୧୪୪ ଜାରି କରାଯାଇଛି। ଆଗକୁ ବଡ଼ଓଷା ଓ କାର୍ତ୍ତିକ ପୂର୍ଣ୍ଣିମା ଆସୁଥିବାରୁ କୋଭିଡ ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି ଖୋର୍ଦ୍ଧା ଉପଜିଲ୍ଲାପାଳ ଉକ୍ତ ନିର୍ଦ୍ଦେଶନାମା ଜାରି କରିଛନ୍ତି।

ଆଜି ନଭେମ୍ବର ୧୭ ତାରିଖରୁ ଆସନ୍ତା ୧୯ ତାରିଖ ପର୍ଯ୍ୟନ୍ତ ବାଣପୁର ଓ ଚିଲିକା ତହସିଲର ସମସ୍ତ ଶିବାଳୟ ଗୁଡିକରେ ଭକ୍ତଙ୍କ ପ୍ରବେଶକୁ ବାରଣ କରାଯାଇଛି। ସେହିପରି ଭାବେ ମନ୍ଦିରର ପୋଖରୀ ଗୁଡିକରେ ଡ଼ଙ୍ଗା ଭସାଇବା ଉପରେ ମଧ୍ୟ କଟକଣା ଲଗାଯାଇଛି।

ଏହି ପରିପ୍ରେକ୍ଷୀରେ ବାଣପୁର ତହସିଲଦାର, ଚିଲିକା ତହସିଲଦାର, ବାଣପୁର ଆଇଆଇସି ଏବଂ ବାଲୁଗାଁ ଆଇଆଇସିଙ୍କ ଦ୍ୱାରା ଡାକବାଜି ଯନ୍ତ୍ର ଦ୍ୱାରା ପ୍ରଚାର କରାଯିବା ସହ ସମସ୍ତ ଶିବ ମନ୍ଦିର ସମ୍ମୁଖରେ ସର୍ବସାଧାରଣଙ୍କ ନିମନ୍ତେ ନୋଟିସ ଜାରି କରାଯାଇଛି।

ଅନୁରୂପ ଭାବେ ପ୍ରମୁଖ ଶିବ ମନ୍ଦିରଗୁଡିକ ସମ୍ମୁଖରେ ପୋଲିସ ପ୍ରଶାସନ ଦ୍ୱାରା ପୋଲିସ କର୍ମଚାରୀ ମୁତୟନ କରାଯାଇଛି। ତେବେ ଯଦି କୌଣସି ବ୍ୟକ୍ତି ଜିଲ୍ଲା ପ୍ରଶାସନର ଉକ୍ତ ନିର୍ଦ୍ଦେଶକୁ ଅବମାନନା କରନ୍ତି ତେବେ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବାଲୁଗାଁ ଏସଡ଼ିପିଓ ସୂଚନା ଦେଇଛନ୍ତି।

ସୀତାରାମ ଅଗ୍ରୱାଲ

ଚିଲିକା: ୧୯୭୧ ମସିହାର ଭାରତ ଓ ପାକିସ୍ତାନ ଯୁଦ୍ଧ ହେଉଛି ଏକ ସ୍ବର୍ଣ୍ଣିମ ଇତିହାସ। ଯେଉଁ ଯୁଦ୍ଧଦ୍ୱାରା ବାଂଲାଦେଶ ପାଇଥିଲା ନୂତନ ଜୀବନ। ଉକ୍ତ ଯୁଦ୍ଧ ୧୯୭୧ ମସିହା ଡିସେମ୍ବର ୩ ତାରିଖରୁ ଆରମ୍ଭ ହୋଇ ଡିସେମ୍ବର ୧୬ ତାରିଖରେ ସମାପ୍ତ ହୋଇଥିଲା। ଚୁରମାର ହୋଇଯାଇଥିଲା ପାକିସ୍ତାନର ଗର୍ବ ଓ ଅହଂକାର।

ଯୁଦ୍ଧର ଇତିହାସକୁ ଭାରତ ବାସୀଙ୍କ ମନରେ ଉଜ୍ଜୀବିତ ରଖିବାପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଡିସେମ୍ବର ୧୬ ତାରିଖ ୨୦୨୦ ମସିହାରେ ଦିଲ୍ଲୀର ଜାତୀୟ ଯୁଦ୍ଧ ମେମୋରିଆଲ ହଲ ଠାରେ ବିଜୟ ମଶାଲ ରେ ପ୍ରଥମେ ଅଗ୍ନି ସଂଯୋଗ କରି ଆନୁଷ୍ଠାନିକ ଭାବେ ଉଦଘାଟନ କରିଥିଲେ। ଯାହାକି ଭାରତର କୋଣ ଅନୁକୋଣରେ ଭାରତ ବିଜୟର ଗାଥା ଲୋକମାନଙ୍କ ମନରେ ଉଜ୍ଜୀବିତ କରିବା ସହ ଭାରତବାସୀ ଗର୍ବ ଅନୁଭବ କରିବେ।

ମଶାଲ ଶୋଭାଯାତ୍ରା ୨୦୨୧ ମସିହା ଡିସେମ୍ବର ୧୬ ତାରିଖରେ ଶେଷ ହେବାକୁ ଥିବାବେଳେ ଆଜି ଖୋର୍ଦ୍ଧା ଜିଲ୍ଲା ଚିଲିକାଠାରେ ଥିବା ଆଇଏନଏସ ଚିଲିକାର କମାଣ୍ଡିଙ୍ଗ ଅଫିସର, କମୋରେଡ଼ ଏନ ପି ପ୍ରଦୀପଙ୍କ ନିର୍ଦ୍ଦେଶକ୍ରମେ ଆଇଏନଏସ ଚିଲିକାର ପ୍ରିନସିପାଲ ମେଡିକାଲ ଅଫିସର ସର୍ଜନ କମାଣ୍ଡର ସ୍ମିତାରାଣୀ ନାୟକଙ୍କ ନେତୃତ୍ୱରେ ବଡ଼କୂଳ ପାନ୍ଥନିବାସ ଠାରେ ପହଞ୍ଚିଥିଲା ସ୍ୱର୍ଣ୍ଣିମ ବିଜୟ ମଶାଲ। ସେଠାରେ ମତ୍ସ୍ୟଜୀବୀ ସଂଘ ଉକ୍ତ ମଶାଲକୁ ସ୍ବାଗତ କରିଥିଲେ।

ଏହା ପରେ ଅପରାହ୍ନରେ ବାଣପୁର ଗୋଦାବରୀଶ ମହାବିଦ୍ୟାଳୟରେ ପହଞ୍ଚିଥିଲା ସ୍ବର୍ଣ୍ଣିମ ବିଜୟ ମଶାଲ। ମହାବିଦ୍ୟାଳୟର ଅଧ୍ୟକ୍ଷ, ଅଧ୍ୟାପକ, ଅଧ୍ୟାପିକାଙ୍କ ସହ ଏନସିସି ର ଛାତ୍ର ଛାତ୍ରୀମାନେ ମଶାଲକୁ ସ୍ୱାଗତ କରିବା ସହ ଏକ ଭବ୍ୟ ସମ୍ବର୍ଦ୍ଧନା ସଭାର ଆୟୋଜନ ମଧ୍ୟ କରିଥିଲେ। ସଭାରେ ସର୍ଜନ କମାଣ୍ଡର ସ୍ମିତା ନାୟକ ୧୯୭୧ ମସିହା ଯୁଦ୍ଧର ସେହି ସ୍ବର୍ଣ୍ଣିମ ବିଜୟ ଇତିହାସକୁ ସମସ୍ତଙ୍କ ଆଗରେ ଉପସ୍ଥାପନା କରିବା ସହ ଛାତ୍ର ଛାତ୍ରୀ ମାନଙ୍କ ଆଗରେ ସହିଦ ହୋଇଥିବା ବୀର ଜବାନ ମାନଙ୍କର ବଳିଦାନକୁ ମନେପକାଇଥିଲେ ଏବଂ ଏହି ବିଜୟ ମଶାଲ ପୁଣି ବାଣପୁରର ଆଦିବାସୀ ବହୁଳ ଅଞ୍ଚଳ ନୀଳାଦ୍ରି ପ୍ରସାଦକୁ ଯାତ୍ରା କରିବା ସହ ପରିଶେଷରେ ସଂନ୍ଧ୍ୟାରେ ବାଣପୁର ପୋଲିସ ଥାନା ପହଞ୍ଚିଥିଲା।

ସ୍ଥାନୀୟ ବିଇଓ କାର୍ଯ୍ୟାଳୟ ନିକଟରୁ ବାଣପୁର ଥାନା ପର୍ଯ୍ୟନ୍ତ ବିଜୟ ମଶାଲକୁ ଗର୍ବର ସହ ପାଛୋଟିନେଇଥିଲେ ସ୍ଥାନୀୟ ବୁଦ୍ଧିଜୀବୀମାନେ। କୋଭିଡ଼ କଟକଣାକୁ ଅନୁପାଳନ କରି ବାଲୁଗାଁ ଏସଡ଼ିପିଓଙ୍କ ତତ୍ୱାବଧାନରେ ବାଣପୁର ଥାନା ପରିସରରେ ଏକ କ୍ଷୁଦ୍ର ସାଧାରଣ ସଭାର ଆୟୋଜନ କରାଯାଇଥିବା ବେଳେ ଏହାକୁ ବାଣପୁର ଆଇଆଇସି ପରିଚାଳନା କରିଥିଲେ।

ପରିଶେଷରେ ଛାତ୍ରଛାତ୍ରୀମାନଙ୍କ ଦ୍ୱାରା ଦେଶାତ୍ମକବୋଧ ସଂଗୀତ ଗାନ କରାଯିବା ସହ ସ୍ୱର୍ଣ୍ଣିମ ବିଜୟ ଇତିହାସକୁ ଜନସାଧାରଣଙ୍କ ସମ୍ମୁଖରେ ଅବଗତ କରାଯାଇଥିଲା। ତେବେ ଉକ୍ତ ମଶାଲ ଆସନ୍ତାକାଲି ଓଡ଼ିଶାର ରାଜଭବନ ପହଞ୍ଚିବ ବୋଲି ଆଇଏନଏସ ଚିଲିକା ପକ୍ଷରୁ ସୂଚନା ମିଳିଛି।

ସୀତାରାମ ଅଗ୍ରୱାଲ

ଚିଲିକା: ଆସନ୍ତାକାଲି ଚିଲିକା ନିର୍ବାଚନମଣ୍ଡଳୀ ରେ ଦଶ ଘଣ୍ଟା ପାଇଁ ବିଦ୍ୟୁତ ସରବରାହ ସମ୍ପୂର୍ଣ୍ଣ ବନ୍ଦ ରହିବ। ଏନେଇ ଟି.ପି.ସି.ଓ.ଡି.ଏଲ ବାଲୁଗାଁ ଉପଖଣ୍ଡ ଅଧିକାରୀ ଟୁକୁନା ଦଳେଇ ସୂଚନା ଦେଇଛନ୍ତି। ୧୩୨/୩୩ ନାଭାଲ ଗ୍ରୀଡ଼ର ବାର୍ଷିକ ରକ୍ଷଣାବେକ୍ଷଣ କାର୍ଯ୍ୟ ନିମନ୍ତେ ଆସନ୍ତାକାଲି ସକାଳ ୭ ଘଟିକାରୁ ଅପରାହ୍ନ ୫ ଘଟିକା ଯାଏଁ ବାଣପୁର, ବାଲୁଗାଁ ଏବଂ ଚିଲିକା ଅଞ୍ଚଳରେ ବିଦ୍ୟୁତ ସରବରାହ ବନ୍ଦ ରହିବ। ନାଭାଲ ଗ୍ରୀଡ଼ ଅଧୀନରେ ଆସୁଥିବା ସମସ୍ତ ବିଦ୍ୟୁତ ଉପଭୋକ୍ତା ମାନଙ୍କୁ ଏହି ପରିପ୍ରେକ୍ଷୀରେ ସହଯୋଗ କରିବାକୁ ନିବେଦନ କରିଛନ୍ତି ଉପଖଣ୍ଡ ଅଧିକାରୀ ଶ୍ରୀ ଦଳେଇ।

ମିଳିଥିବା ସୂଚନା ଅନୁସାରେ ବାଣପୁର ବ୍ଲକର ସମସ୍ତ ଅଞ୍ଚଳ, ବାଣପୁର ଏନଏସି, ବାଲୁଗାଁ ଏନଏସିର ସମସ୍ତ ଅଞ୍ଚଳରେ ବିଦ୍ୟୁତ ସରବରାହ ବନ୍ଦ ରହିବ ବୋଲି ସୂଚନା ରହିଛି। ସେହିପରି ଚିଲିକା ବ୍ଲକ୍‌ର ସୋରଣ, କଳକଳେସ୍ୱର ଓ ଚଣ୍ଡେଶ୍ବର ପଞ୍ଚାୟତ‌ ବାଦ୍‌ ଅନ୍ୟ ସମସ୍ତ ଅଞ୍ଚଳରେ ବିଦ୍ୟୁତ୍‌ ସରବରାହ ବନ୍ଦ ରହିବ ବୋଲି ସୂଚନା ରହିଛି।