ବାଲୁଗାଁ (ସୀତାରାମ ଅଗ୍ରୱାଲ): ବିଗତ କିଛି ଦିନ ହେଲା ଖୋର୍ଦ୍ଧା ଜିଲ୍ଲା ବାଲୁଗାଁ ଓ ବାଣପୁର ଅଞ୍ଚଳରେ ବିଭିନ୍ନ ଗୋଦାମ ସମେତ ସୁନା ଗହଣା ଦୋକାନରେ ଜିଏସଟି ଟିମ ଚଢ଼ାଉ କରିଛି। ଯାହାଫଳରେ ଦୋକାନୀ ମାଲିକମାନଙ୍କ ଭିତରେ ଏକ ପ୍ରକାର ଛନକା ପଶିଯାଇଛି। ଯାହାର ସୁଯୋଗ ନେଇ ଆଜି ସନ୍ଧ୍ୟାରେ ଜଣେ ବ୍ୟକ୍ତି ନିଜକୁ ଜିଏସଟି ଅଧିକାରୀ ପରିଚୟ ଦେଇ ଏକ ବେକରି ଫ୍ୟାକ୍ଟ୍ରିରେ ପହଞ୍ଚି କାଗଜପତ୍ର ଦେଖାଇବାକୁ କହିଥିଲେ।
ଏଥିସହିତ ସମ୍ପୃକ୍ତ ବେକରି ଫ୍ୟାକ୍ଟ୍ରି ମାଲିକଙ୍କ ସହ ନାନାଦି ବଚସା କରି ଲାଞ୍ଚ ମାଗିଥିଲେ। ମାତ୍ର ଫ୍ୟାକ୍ଟ୍ରି ମାଲିକଙ୍କ ଉପସ୍ଥିତ ବୁଦ୍ଧି ଖଟାଇ ଉକ୍ତ ନକଲି ଜିଏସଟି ଅଧିକାରୀଙ୍କ ପରିଚୟପତ୍ର ଦେଖାଇବାକୁ କହିବା ସହ ଆପଣଙ୍କ ଟିମ କାହଁନ୍ତି କହିବାରୁ ସେ ସେଠାରୁ ନିଜ ବାଇକ ଯୋଗେ କ୍ଷିପ୍ର ଗତିରେ ପଳେଇ ଯାଇଥିଲେ। ଏନେଇ ଥାନାରେ କୌଣସି ଅଭିଯୋଗ ହୋଇନଥିବା ବେଳେ ନକଲି ଜିଏସଟି ଅଧିକାରୀଙ୍କ କାର୍ଯ୍ୟକଳାପ ନେଇ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।