ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର ଦିନ ଜି-୨୦ ଶିଖର ସମ୍ମିଳନୀର ଲୋଗୋ, ଥିମ୍ ଏବଂ ୱେବସାଇଟ୍ ପ୍ରକାଶ କରିଛନ୍ତି। ଡିସେମ୍ବର ୧ ତାରିଖ ୨୦୨୨ରୁ ନଭେମ୍ବର ୩୦ ତାରିଖ ୨୦୨୩ ପର୍ଯ୍ୟନ୍ତ ଭାରତ ଏକ ବର୍ଷ ପାଇଁ ଜି-୨୦ ଗୋଷ୍ଠୀର ଅଧ୍ୟକ୍ଷ ହେବ। ଭାରତ ଏହି ଗ୍ରୁପ୍ ର ଶିଖର ସମ୍ମିଳନୀ ୯ ଏବଂ ୧୦ ସେପ୍ଟେମ୍ବର ୨୦୨୩ ରେ ନୂଆଦିଲ୍ଲୀରେ ଆୟୋଜନ କରିବ। ବର୍ତ୍ତମାନ କଂଗ୍ରେସ ଦଳ ଜି-୨୦ସମ୍ମିଳନୀର ଲୋଗୋ ଉପରେ ପ୍ରଶ୍ନ ଉଠାଇଛି।
ଜି-୨୦ ଶିଖର ସମ୍ମିଳନୀର ଲୋଗୋକୁ ପ୍ରଧାନମନ୍ତ୍ରୀ ମୋଦୀ ଉନ୍ମୋଚନ କରିଛନ୍ତି, ଯେଉଁଥିରେ ଏକ ପଦ୍ମ ଫୁଲ ମଧ୍ୟ ପ୍ରସ୍ତୁତ କରାଯାଇଛି। ପଦ୍ମ ଫୁଲ ହେଉଛି ବିଜେପିର ନିର୍ବାଚନ ଚିହ୍ନ। କଂଗ୍ରେସ ଏହାକୁ ବିରୋଧ କରି ସରକାରଙ୍କୁ ସମାଲୋଚନା କରିଛି।
କଂଗ୍ରେସ ନେତା ଜୟରାମ ରମେଶ ଟୁଇଟ୍ କରି କହିଛନ୍ତି ଯେ, ୭୦ ବର୍ଷ ପୂର୍ବେ କଂଗ୍ରେସର ପତାକାକୁ ଜାତୀୟ ପତାକା କରିବା ପ୍ରସ୍ତାବକୁ ନେହେରୁ ପ୍ରତ୍ୟାଖ୍ୟାନ କରିଥିଲେ। ବିଜେପିର ନିର୍ବାଚନ ଚିହ୍ନ ବର୍ତ୍ତମାନ ଜି-୨୦ ର ଅଧ୍ୟକ୍ଷତା ସରକାରୀ ଲୋଗୋ ପାଲଟିଛି। ଆମେ ଜାଣୁ ଯେ, ପିଏମ ମୋଦୀ ଏବଂ ବିଜେପି ଲଜ୍ଜାଜନକ ଭାବରେ ନିଜକୁ ପ୍ରୋତ୍ସାହିତ କରିବା ପାଇଁ କୌଣସି ସୁଯୋଗ ହରାଇବେ ନାହିଁ।
କଂଗ୍ରେସ ନେତା ରସିଦ ଅଲଭି ମଧ୍ୟ ଜି-୨୦ ର ଅଫିସିଆଲ ଲୋଗୋରେ ପଦ୍ମ ଫୁଲ ଉପରେ ପ୍ରଶ୍ନ କରିଛନ୍ତି। ସେ କହିଛନ୍ତି ଯେ, ଏହା ଭାରତ ସରକାରଙ୍କ ପ୍ରତୀକ ଠାରୁ କମ୍ ଏବଂ ଭାରତୀୟ ଜନତା ପାର୍ଟିର ଚିହ୍ନ ପରି ଅଧିକ ମନେହୁଏ। ଏହି ପ୍ରତୀକରେ ପଦ୍ମ ଫୁଲ କେଉଁଠୁ ଆସିଲା? କ’ଣ ଏହି ସରକାର ଭାରତର ନୁହେଁ, ବିଜେପିର ଅଟେ? ଏହି ପ୍ରତୀକକୁ ହଟାଇବା ଉଚିତ ଏବଂ ଏଥିରୁ କମଲ ପଦ୍ମ ହଟାଇବା ଉଚିତ୍।