Tag: ଦକ୍ଷିଣ ଆଫ୍ରିକା

ନୂଆଦିଲ୍ଲୀ: ଦକ୍ଷିଣ ଆଫ୍ରିକା ବିପକ୍ଷ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ପାଇଁ ବିସିସିଆଇ ଭାରତୀୟ ଦଳ ଘୋଷଣା କରିଛି। ରୋହିତ ଶର୍ମା ଫିଟ୍ ନୁହଁନ୍ତି, ସେଥିପାଇଁ କେ.ଏଲ୍ ରାହୁଲଙ୍କୁ ଅଧିନାୟକତ୍ୱ ଦାୟିତ୍ଵ ଦିଆଯାଇଛି। ଅନ୍ୟପକ୍ଷରେ ଦ୍ରୁତ ବୋଲର ଜସପ୍ରୀତ ବୁମ୍ରାଙ୍କୁ ଉପ-ଅଧିନାୟକ କରାଯାଇଛି।

ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ୍ ପାଇଁ ଶିଖର ଧାୱନ, ୱାଶିଂଟନ୍ ସୁନ୍ଦର ଏବଂ ଦୀପକ ଚହର ଭାରତୀୟ ଦଳକୁ ଫେରିଛନ୍ତି। ଆହୁରି ମଧ୍ୟ ଆଇପିଏଲ ୨୦୨୧ ଏବଂ ଘରୋଇ କ୍ରିକେଟରେ ଭଲ ପ୍ରଦର୍ଶନ କରିଥିବା ରୁତୁରାଜ ଗାଇକ୍ଵାଡ ଏବଂ ଭେଙ୍କଟେଶ ଆୟରଙ୍କୁ ଦଳରେ ସାମିଲ କରାଯାଇଛି।

ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ ପାଇଁ ବିରାଟ କୋହଲି ମଧ୍ୟ ୧୮ ଜଣିଆ ଦଳରେ ସ୍ଥାନ ପାଇଛନ୍ତି। ପ୍ରଥମ ଥର ପାଇଁ ସେ ଜଣେ ବ୍ୟାଟ୍ସମ୍ୟାନ୍ ଭାବରେ ଖେଳିବେ। ଦକ୍ଷିଣ ଆଫ୍ରିକା ବିପକ୍ଷରେ ଚାଲିଥିବା ଟେଷ୍ଟ ସିରିଜ୍ ପୂର୍ବରୁ ମଧ୍ୟ ରୋହିତ ଶର୍ମାଙ୍କୁ ବିରାଟ କୋହଲିଙ୍କ ଦିନିକିଆ ଦଳର ଅଧିନାୟକତ୍ୱ ହସ୍ତାନ୍ତର କରାଯାଇଥିଲା। ତେବେ ଆଘାତ ହେତୁ ସେ ଏହି ସିରିଜରେ ଭାଗ ନେଇ ପାରିବେ ନାହିଁ। ଏଭଳି ପରିସ୍ଥିତିରେ କେ.ଏଲ୍ ରାହୁଲଙ୍କୁ ତାଙ୍କ ସ୍ଥାନରେ ଅଧିନାୟକ ଭାବେ ନିଯୁକ୍ତି ଦିଆଯାଇଛି।

୧୮ ସଦସ୍ୟ ବିଶିଷ୍ଟ ଦଳରେ ବିସିସିଆଇ ୬ ଟି ଦ୍ରୁତ ବୋଲରଙ୍କୁ ଅନ୍ତର୍ଭୁକ୍ତ କରିଛି। ଏଥିରେ ଜସପ୍ରୀତ ବୁମରା, ଭୂବନେଶ୍ୱର କୁମାର, ଦୀପକ ଚହର, ପ୍ରସିଦ୍ଧ କୃଷ୍ଣ, ଶାର୍ଦ୍ଦୁଲ ଠାକୁର ଏବଂ ମହମ୍ମଦ ସିରାଜ ଅନ୍ତର୍ଭୁକ୍ତ। ସ୍ପିନ୍ ବିଭାଗରେ ୟୁଜବେନ୍ଦ୍ର ଚହଲ, ଆର ଅଶ୍ୱିନ୍ ଏବଂ ୱାଶିଂଟନ୍ ସୁନ୍ଦରଙ୍କୁ ସୁଯୋଗ ମିଳିଛି। ଏହା ବ୍ୟତୀତ ଭେଙ୍କଟେଶ ଆୟର୍ ମଧ୍ୟ ପ୍ରଥମ ଥର ପାଇଁ ଭାରତୀୟ ଦିନିକିଆ ଦଳରେ ମନୋନୀତ ହୋଇଛନ୍ତି।

ଆହତ କାରଣରୁ କ୍ୟାପଟେନ ରୋହିତ ଶର୍ମା, ଅଲରାଉଣ୍ଡର ରବିନ୍ଦ୍ର ଜାଡେଜା ଏବଂ ହାର୍ଦ୍ଦିକ ପାଣ୍ଡ୍ୟା ଏହି ଦଳରେ ନାହାଁନ୍ତି। ଏଥି ସହିତ ଟେଷ୍ଟ ସିରିଜରେ ଚମତ୍କାର ପ୍ରଦର୍ଶନ କରିଥିବା ଦ୍ରୁତ ବୋଲର ମହମ୍ମଦ ଶାମି ଦଳରେ ଅନ୍ତର୍ଭୁକ୍ତ ହୋଇନାହାଁନ୍ତି। ଦକ୍ଷିଣ ଆଫ୍ରିକା ଗସ୍ତରେ ଭାରତର ଶେଷ ଗସ୍ତରେ ଚମତ୍କାର ପ୍ରଦର୍ଶନ କରିଥିବା କୁଲଦୀପ ଯାଦବ ମଧ୍ୟ ଦଳରେ ପ୍ରତ୍ୟାବର୍ତ୍ତନ କରିବାରେ ବିଫଳ ହୋଇଛନ୍ତି।

ଦିନିକିଆ ସିରିଜ୍ ପାଇଁ ଇଣ୍ଡିଆନ୍ ସ୍କ୍ବାଡ: କେ.ଏଲ୍ ରାହୁଲ (କ୍ୟାପଟେନ୍), ଶିଖର ଧାୱନ, ଋତୁରାଜ ଗାଇକୱାଡ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ଶ୍ରେୟାସ ଆୟର, ଭେଙ୍କଟେଶ ଆୟର, ଋଷଭ ପନ୍ତ (ୱିକି), ଇଶାନ କିଶନ (ୱିକି), ୟୁଜବେନ୍ଦ୍ର ଚହଲ, ଆର ଅଶ୍ୱିନ, ୱାଶିଂଟନ ସୁନ୍ଦର , ଜସପ୍ରୀତ ବୁମ୍ରା (ଉପ-ଅଧିନାୟକ), ଭୂବନେଶ୍ୱର କୁମାର, ଦୀପକ ଚହର, ପ୍ରସିଦ୍ଧ କୃଷ୍ଣ, ଶାର୍ଦ୍ଦୁଲ ଠାକୁର ଏବଂ ମହମ୍ମଦ ସିରାଜ।

ନୂଆଦିଲ୍ଲୀ: ସେଞ୍ଚୁରିଅନର ସୁପର ସ୍ପୋର୍ଟ ପାର୍କରେ ଖେଳାଯାଇଥିବା ପ୍ରଥମ ଟେଷ୍ଟରେ ଦକ୍ଷିଣ ଆଫ୍ରିକାକୁ ୧୧୩ ରନରେ ପରାସ୍ତ କରି ଟିମ୍ ଇଣ୍ଡିଆ ଇତିହାସ ସୃଷ୍ଟି କରିଛି। ବାସ୍ତବରେ ସେଞ୍ଚୁରିଅନରେ ଜିତିବାରେ ଭାରତ ଏସିଆର ପ୍ରଥମ ଦେଶ ହୋଇପାରିଛି।

ସେଞ୍ଚୁରିଅନରେ ଟିମ୍ ଇଣ୍ଡିଆର ଏହା ହେଉଛି ପ୍ରଥମ ବିଜୟ। ଏହାପୂର୍ବରୁ କୌଣସି ଏସୀୟ ଦଳ ସେଞ୍ଚୁରିଅନରେ ଦକ୍ଷିଣ ଆଫ୍ରିକାକୁ ପରାସ୍ତ କରିପାରନ୍ତି ନାହିଁ। ଏହି ଗ୍ରାଉଣ୍ଡରେ ଆୟୋଜକ ଦଳର ସର୍ବମୋଟ ତୃତୀୟ ପରାଜୟ।

ଚତୁର୍ଥ ଇନିଂସରେ ଦକ୍ଷିଣ ଆଫ୍ରିକାକୁ ଭାରତୀୟ ଦଳ ୩୦୫ ରନ୍‌ର ଟାର୍ଗେଟ ଦେଇଥିଲା। ଏହାର ଜବାବରେ ଆୟୋଜକ ଦଳ ୧୯୧ ରନ୍ ରେ ସମସ୍ତ ୱିକେଟ ହରାଇଥିଲା। ଭାରତ ପାଇଁ ଦ୍ୱିତୀୟ ଇନିଂସରେ ମହମ୍ମଦ ଶାମି ଏବଂ ଜସପ୍ରୀତ ବୁମ୍ରା ତିନିଟି ୱିକେଟ୍ ଲେଖାଏଁ ନେଇଥିଲେ। ଅନ୍ୟପକ୍ଷରେ ରବିଚନ୍ଦ୍ରନ ଅଶ୍ୱିନ ଏବଂ ମହମ୍ମଦ ସିରାଜ ପ୍ରତ୍ୟେକଙ୍କୁ ଦୁଇଟି ଲେଖାଏଁ ସଫଳତା ମିଳିଛି।

ଏହି ବିଜୟ ସହିତ ଭାରତ ତିନି ମ୍ୟାଚ୍ ବିଶିଷ୍ଟ ସିରିଜରେ ୧-୦ ରେ ଅଗ୍ରଣୀ ହାସଲ କରିଛି। ୩୦୫ ରନ୍ ପଛରେ ପକାଇ ଦକ୍ଷିଣ ଆଫ୍ରିକାର ଦଳ ପଞ୍ଚମ ଦିନରେ ୧୯୧ ରନରେ ସୀମିତ ରହିଥିଲା। ଦଳ ପାଇଁ ଦ୍ୱିତୀୟ ଇନିଂସରେ କ୍ୟାପଟେନ ଡିନ୍ ଏଲଗାର ସର୍ବାଧିକ ୭୭ ରନ୍ ସଂଗ୍ରହ କରିଥିଲେ। ଏଥିସହିତ ଭାରତୀୟ ଦ୍ରୁତ ବୋଲର ଜସପ୍ରୀତ ବୁମ୍ରା, ମହମ୍ମଦ ଶାମି ଏବଂ ମହମ୍ମଦ ସିରାଜ ଭଲ ବୋଲିଂ କରିଥିଲେ।

ନୂଆଦିଲ୍ଲୀ: ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜ୍ ପାଇଁ କେ.ଏଲ୍ ରାହୁଲଙ୍କୁ ଟିମ୍ ଇଣ୍ଡିଆର ଉପ-ଅଧିନାୟକ ଭାବରେ ବିସିସିଆଇ ନିଯୁକ୍ତ କରିଛି। ସେ ରୋହିତ ଶର୍ମାଙ୍କ ସ୍ଥାନ ନେବେ। ହାମଷ୍ଟ୍ରିଂ ଆଘାତ ହେତୁ ରୋହିତ ଶର୍ମା ଦଳରୁ ବାଦ ପଡିଛନ୍ତି।

ଏହାପୂର୍ବରୁ ରୋହିତ ଶର୍ମାଙ୍କୁ ଅଜିଙ୍କ୍ୟ ରାହାଣେଙ୍କ ସ୍ଥାନରେ ଟେଷ୍ଟ ଦଳର ଉପ-ଅଧିନାୟକ କରାଯାଇଥିଲା। କିନ୍ତୁ ଆଘାତ ହେତୁ ତାଙ୍କୁ ଦଳ ବାହାରେ ରହିବାକୁ ପଡିଲା। ବର୍ତ୍ତମାନ ରୋହିତଙ୍କ ଅନୁପସ୍ଥିତିରେ କେ.ଏଲ୍ ରାହୁଲଙ୍କୁ ଏହି ଦାୟିତ୍ଵ ଦିଆଯାଇଛି। ଏହା ସହିତ ଡିସେମ୍ବର ୨୬ତାରିଖରୁ ଆରମ୍ଭ ହୋଇଥିବା ପ୍ରଥମ ଟେଷ୍ଟରେ ମୟଙ୍କ ଅଗ୍ରୱାଲଙ୍କ ସହ କେ.ଏଲ୍ ରାହୁଲ ଓପନିଂ ମଧ୍ୟ ପ୍ରାୟ ନିଶ୍ଚିତ ହୋଇଛି।

୨୦୧୮ ମସିହାରେ ମଧ୍ୟ, କେ.ଏଲ୍ ରାହୁଲ ଟିମ୍ ଇଣ୍ଡିଆ ସହିତ ଦକ୍ଷିଣ ଆଫ୍ରିକା ଗସ୍ତ କରିଥିଲେ। କିନ୍ତୁ ସେ ଏହି ଭ୍ରମଣରେ ଏକ ଫ୍ଲପ୍ ଥିଲେ। ୨୦୧୮ ରେ ଖେଳାଯାଇଥିବା ଟେଷ୍ଟ ସିରିଜରେ ରାହୁଲ ହାରାହାରି ୭.୫୦ ରେ ୨ ଟି ଟେଷ୍ଟର ୪ ଇନିଂସରେ ମାତ୍ର ୩୦ ରନ୍ ସଂଗ୍ରହ କରିଥିଲେ।

ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚ୍ ଡିସେମ୍ବର ୨୬ ତାରିଖରୁ ସେଞ୍ଚୁରିଅନରେ ଖେଳାଯିବ। ଦ୍ୱିତୀୟ ମ୍ୟାଚ୍ ଜାନୁଆରୀ ୩ ତାରିଖରୁ ଜୋହାନ୍ସବର୍ଗରେ ଏବଂ ତୃତୀୟ ତଥା ଶେଷ ମ୍ୟାଚ୍ ଜାନୁଆରୀ ୧୧ ତାରିଖରୁ କେପଟାଉନରେ ଖେଳାଯିବ।

ନୂଆଦିଲ୍ଲୀ: ଭାରତୀୟ ଦଳର ବରିଷ୍ଠ ଖେଳାଳି ବିରାଟ କୋହଲି ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜରେ ଖେଳୁଥିବା ଦେଖିବାକୁ ମିଳିବେ ନାହିଁ। ବ୍ୟକ୍ତିଗତ କାରଣରୁ କୋହଲି ଜାନୁଆରୀରେ ବିସିସିଆଇରୁ ବିରତି ମାଗିଛନ୍ତି। ଯଦି ତାଙ୍କର ଏହି ଅନୁରୋଧ ଗ୍ରହଣ କରାଯାଏ, ତେବେ ଦିନିକିଆ ସିରିଜରେ ଟିମ୍ ଇଣ୍ଡିଆର ସମସ୍ୟା ବଢିପାରେ। ଏହାପୂର୍ବରୁ ସୋମବାର ଦିନ ବିସିସିଆଇ କହିଛି ଯେ, ରୋହିତ ଶର୍ମା ଆହତ ହୋଇଛନ୍ତି ଏବଂ ସେ ଟେଷ୍ଟ ସିରିଜରେ ଖେଳିବେ ନାହିଁ। ଆଗାମୀ ସିରିଜରେ ଏହି ଖେଳାଳିଙ୍କ ବିନା ଭାରତୀୟ ଦଳ ପଡ଼ିଆକୁ ଓହ୍ଳାଇବ।

ବିସିସିଆଇ ସୂତ୍ରରୁ ପ୍ରକାଶ ଯେ, ବିରାଟ କୋହଲି ଜାନୁଆରୀରେ ତାଙ୍କ ପରିବାର ସହ ସମୟ ବିତାଇବାକୁ ଚାହୁଁଛନ୍ତି ଏବଂ ତେଣୁ ବିସିସିଆଇରୁ ବିରତି ଲୋଡିଛନ୍ତି। ଏହାର ଅର୍ଥ ହେଉଛି ଯେ, ସେ ଦିନିକିଆ ସିରିଜରେ ଖେଳିବାକୁ ସମର୍ଥ ହେବେ ନାହିଁ। କୋହଲିଙ୍କ ଅନୁପସ୍ଥିତିରେ ଟିମ୍ ଇଣ୍ଡିଆକୁ ଦକ୍ଷିଣ ଆଫ୍ରିକାରେ ଅସୁବିଧାର ସମ୍ମୁଖୀନ ହେବାକୁ ପଡିପାରେ।

ନିକଟରେ ବିରାଟ କୋହଲିଙ୍କୁ ବିସିସିଆଇ ଦିନିକିଆର ଅଧିନାୟକତ୍ୱରୁ ହଟାଇ ଦେଇଥିଲା। ଏହା ପରେ ରୋହିତଙ୍କୁ ଦଳର ନୂତନ ଅଧିନାୟକ ଭାବରେ ନିଯୁକ୍ତ କରାଯାଇଥିଲା। ଦକ୍ଷିଣ ଆଫ୍ରିକା ଗସ୍ତରୁ ରୋହିତ ଏକଦିବସୀୟ ଦଳର ନେତୃତ୍ୱ ନେବେ। ବର୍ତ୍ତମାନ ବିସିସିଆଇ ଆଫ୍ରିକା ଗସ୍ତ ପାଇଁ ଦିନିକିଆ ଦଳ ଘୋଷଣା କରିନାହିଁ। ଏଭଳି ପରିସ୍ଥିତିରେ ବିରାଟ କୋହଲିଙ୍କ ବଦଳରେ କେଉଁ ଖେଳାଳିଙ୍କୁ ଦଳରେ ସାମିଲ କରାଯିବ, ତାହା ଦେଖିବା ମଜାଦାର ହେବ। ଉଲ୍ଲେଖଥାଉ କି, ଘରୋଇ ଟୁର୍ଣ୍ଣାମେଣ୍ଟ ବିଜୟ ହଜାରେ ଟ୍ରଫିରେ ଅନେକ ଯୁବ ଖେଳାଳି ଏହି ସମୟରେ ଭଲ ପ୍ରଦର୍ଶନ କରୁଛନ୍ତି। ସେମାନଙ୍କ ମଧ୍ୟରୁ କେତେକ ଦକ୍ଷିଣ ଆଫ୍ରିକା ଗସ୍ତ ପାଇଁ ଦିନିକିଆ ଦଳରେ ଅନ୍ତର୍ଭୁକ୍ତ ହୋଇପାରନ୍ତି। ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଜାନୁୟାରୀ ୨୨ ତାରିଖରୁ ଖେଳାଯିବ।

ଲକ୍ଷ୍ନୌ: ଭାରତୀୟ ମହିଳା ଟିମ୍ ଦ୍ଵିତୀୟ ଦିନିକିଆ ମ୍ୟାଚରେ ଦକ୍ଷିଣ ଆଫ୍ରିକା ମହିଳା ଟିମକୁ ହରାଇ ୫ ବିଶିଷ୍ଟ ସିରିଜକୁ ୧-୧ରେ ବରାବର କରିଛି। ଭାରତ ପକ୍ଷରୁ ଝୁଲଣ ଗୋସ୍ଵାମୀ ୪ ଟି ୱିକେଟ ନେଇଥିବା ବେଳେ ସ୍ମୃତ୍ତି ମାନ୍ଧନା ଅପରାଜିତ ୮୦ ରନ ସଂଗ୍ରହ କରିଥିଲେ।

ଭାରତୀୟ ଅଧିନାୟିକା ମିତାଲି ରାଜ ଟସ୍ ଜିତି ଦକ୍ଷିଣ ଆଫ୍ରିକାକୁ ବ୍ୟାଟିଂ କରିବାକୁ ନିମନ୍ତ୍ରଣ କରିଥିଲେ। ଦକ୍ଷିଣ ଆଫ୍ରିକା ଦଳ ମାତ୍ର ୪୧ ଓଭରରେ ୧୫୭ ରନ କରି ସମସ୍ତ ୱିକେଟ ହରାଇଥିଲା। ଦକ୍ଷିଣ ଆଫ୍ରିକା ପକ୍ଷରୁ ଲାରା ଗୁଡାଲ ୭୭ ଟି ବଲରେ ସର୍ବାଧିକ ୪୯ ସଂଗ୍ରହ କରିଥିବା ବେଳେ ଅଧିନାୟିକା ସାନେ ଲୁସ ୩୬ ରନ କରିଥିଲେ। ଭାରତୀୟ ଦୃତ ବୋଲର ଝୁଲଣ ଗୋସ୍ଵାମୀ ୪୨ ରନ ଦେଇ ସର୍ବାଧିକ ୪ ଟି ୱିକେଟ, ରାଜେଶ୍ଵରୀ ଗାୟକ୍ଵଡ ୩୭ ରନ ଦେଇ ୩ ଟି ୱିକେଟ ଏବଂ ମାନସୀ ଯୋଶୀ ୨୩ ରନ ଦେଇ ୨ ଟି ୱିକେଟ ଅକ୍ତିଆର କରିଥିଲେ।

୧୫୮ ରନ ଲକ୍ଷ୍ୟକୁ ପିଛା କରି ପଞ୍ଚମ ଓଭରରେ ଭାରତ ପ୍ରାରମ୍ଭିକ ଖେଳାଳି ଜେମିମାହ ରଡ୍ରିଗ୍ସ (୯)ର ୱିକେଟ ହରାଇଥିଲା। ଏହାପରେ ସ୍ମୃତ୍ତି ମାନ୍ଧନା ଆକ୍ରମକ ପାଳି ଖେଳି ଭାରତକୁ ମଜବୁତ ସ୍ଥିତିରେ ପହଞ୍ଚାଇଥିଲେ। ମାନ୍ଧନା ଇସ୍ମାଇଲଙ୍କ ପ୍ରଥମ ଓଭରରେ କ୍ରମାଗତ ଦୁଇଟି ଛକା ମାରିଥିଲେ। ସେ ପୁନମ ରାଉତଙ୍କ ସହ ୧୩୮ ରନର ପାର୍ଟନରଶିପ ପାଳି ଖେଳି ଭାରତକୁ ସହଜ ବିଜୟ ଦେଇଥିଲେ। ସ୍ମୃତ୍ତି ୬୪ ବଲରେ ୧୦ ଟି ଚୌକା ଏବଂ ୩ ଟି ଛକା ବଳରେ ଦୃତ ୮୦ ରନ ସଂଗ୍ରହ କରିଥିଲେ। ସେହିପରି ପୁନମ ରାଉତ ୮୯ ଟି ବଲରେ ୬୨ ରନ କରି ଅପରାଜିତ ରହିଥିଲେ।

ଚେନ୍ନାଇ: ଆଇପିଏଲ ନିଲାମୀରେ ଦକ୍ଷିଣ ଆଫ୍ରିକା ଅଲରାଉଣ୍ଡର କ୍ରିସ୍ ମୋରିଶ୍ ଆଜି ଇତିହାସ ରଚିଛନ୍ତି। ୩୩ ବର୍ଷୀୟ ମୋରିସକୁ ରାଜସ୍ଥାନ ରୟାଲ୍ସ ୧୬.୨୫ କୋଟି ଟଙ୍କାରେ କିଣି ନେଇଛି। ବର୍ତ୍ତମାନ ମୋରିଶ୍ ଆଇପିଏଲ ଇତିହାସରେ ଯୁବରାଜ ସିଂହଙ୍କ ରେକର୍ଡକୁ ଭାଙ୍ଗି ସବୁଠାରୁ ଦାମୀ ଖେଳାଳି ହୋଇପାରିଛନ୍ତି। ଆଇପିଏଲ ନିଲାମୀ ଲାଗି ମୋରିଶ୍ ନିଜର ବେସ ପ୍ରାଇସ ୭୫ ଲକ୍ଷ ଟଙ୍କା ରଖିଥିଲେ। ମୁମ୍ବାଇ ଇଣ୍ଡିଆନ୍ସ, ପଞ୍ଜାବ ଏବଂ ବେଙ୍ଗୁଲୁରୁ ତାଙ୍କୁ କିଣିବା ପାଇଁ ଦମ ଲଗାଇଥିଲେ। ଶେଷରେ ରାଜସ୍ଥାନ ବାଜି ମାରି ନେଇଥିଲା।

ଜାଣନ୍ତୁ ସବୁଠୁ ଅଧିକ ଦାମରେ ବିକ୍ରି ହୋଇଥିବା ଖେଳାଳି:

୧- କ୍ରିସ୍ ମୋରିଶ୍- ୨୦୨୧ ମସିହା- ରାଜସ୍ଥାନ ରୟାଲ୍ସ- ୧୬.୨୫ କୋଟି ଟଙ୍କା

୨- ଯୁବରାଜ ସିଂହ- ୨୦୧୫ ମସିହା- ଦିଲ୍ଲୀ ଡ଼େୟାରଡ଼େଭିଲ୍ସ- ୧୬ କୋଟି ଟଙ୍କା

୩- ପ୍ୟାଟ କମିନ୍ସ- ୨୦୨୦ ମସିହା- କୋଲକୋତା ନାଇଟ ରାଇଡ଼ର୍ସ- ୧୫.୫ କୋଟି

୪- ବେନ ଷ୍ଟୋକ୍ସ- ୨୦୧୭ ମସିହା- ରାଇଜିଙ୍ଗ ପୁନେ ସୁପରଜିଆଣ୍ଟସ- ୧୪.୫ କୋଟି

୫- ଯୁବରାଜ ସିଂହ- ୨୦୧୪ ମସିହା- ରୟାଲ ଚ୍ୟାଲେଞ୍ଜର୍ସ ବେଙ୍ଗୁଲୁରୁ- ୧୪ କୋଟି

୬- ବେନ ଷ୍ଟୋକ୍ସ- ୨୦୧୮ ମସିହା- ରାଜସ୍ଥାନ ରୟାଲ୍ସ- ୧୨.୫ କୋଟି

୭- ଦିନେଶ କାର୍ତ୍ତିକ- ୨୦୧୪ ମସିହା- ଦିଲ୍ଲୀ ଡ଼େୟାରଡ଼େଭିଲ୍ସ- ୧୨.୫ କୋଟି

୮- ଜୟଦେବ ଉନାଦକଟ- ୨୦୧୮- ରାଜସ୍ଥାନ ରୟାଲ୍ସ- ୧୧.୫ କୋଟି

୯- ଗୌତମ ଗମ୍ଭୀର- ୨୦୧୧ ମସିହା- କୋଲକୋତା ନାଇଟ ରାଇଡ଼ର୍ସ- ୧୧.୪ କୋଟି

୧୦- ଲୋକେଶ ରାହୁଲ- ୨୦୧୮ ମସିହା- କିଙ୍ଗସ ଇଲେଭେନ ପଞ୍ଜାବ- ୧୧ କୋଟି