Tag: ପଞ୍ଜାବ

ନୂଆଦିଲ୍ଲୀ: ପଞ୍ଜାବର ମାନସାରେ କୃଷକମାନଙ୍କୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଆଜି ସମ୍ବୋଧିତ କରିଛନ୍ତି। ଏହି ଅବସରରେ ସେ କହିଛନ୍ତି ଯେ, ଆଜି ସେ ପଞ୍ଜାବରେ ପହଞ୍ଚିବା ପରେ ଦୁଃଖଦ ଖବର ଶୁଣିବାକୁ ମିଳିଥିଲା। ଚାଷୀ ଆନ୍ଦୋଳନରେ ସଂଘର୍ଷ କରୁଥିବା ତିନିଜଣ ମହିଳା ଟ୍ରକ୍ ଦ୍ୱାରା ଧକ୍କା ହୋଇ ମୃତ୍ୟୁବରଣ କରିଥିଲେ। ମୁଁ ତାଙ୍କ ଆତ୍ମାର ଶାନ୍ତି ପାଇଁ ପ୍ରାର୍ଥନା କରୁଛି। ସରକାର ତୁରନ୍ତ ଦୋଷୀଙ୍କୁ ଗିରଫ କରିବା ଉଚିତ୍ ଏବଂ କଠୋର ଦଣ୍ଡ ଦେବା ଉଚିତ୍।

ଦେଶର ଯେକୌଣସି ସ୍ଥାନରୁ କୃଷକଙ୍କ ଆତ୍ମହତ୍ୟା ଖବର ଆସିଲେ, ଏହା ବହୁତ କଷ୍ଟ ଦେଇଥାଏ। ସ୍ୱାଧୀନତାର ୭୦ ବର୍ଷ ପରେ ମଧ୍ୟ ଆଜି କୃଷକମାନଙ୍କୁ ଆତ୍ମହତ୍ୟା କରିବାକୁ ପଡୁଛି। ଦିଲ୍ଲୀ ମୁଖ୍ୟମନ୍ତ୍ରୀ କହିଛନ୍ତି ଯେ, ‘ମୁଁ ସମସ୍ତଙ୍କୁ ସମ୍ପୂର୍ଣ୍ଣ ନିଶ୍ଚିତ କରୁଛି ଯେ ଫେବୃଆରୀରେ ପଞ୍ଜାବରେ ବିଧାନସଭା ନିର୍ବାଚନ ହେବ, ମାର୍ଚ୍ଚରେ ଫଳାଫଳ ଆସିବ କିନ୍ତୁ ଏପ୍ରିଲ୍ ପରେ ଆମେ କୌଣସି ଚାଷୀଙ୍କୁ ଆତ୍ମହତ୍ୟା କରିବାକୁ ଦେବୁ ନାହିଁ, ଏହା ଆମର ଦାୟିତ୍ଵ।’

ନୂଆଦିଲ୍ଲୀ: ପଞ୍ଜାବରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ବିଜେପି ଏବଂ ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ଏକାଠି ହୋଇପାରନ୍ତି। କ୍ୟାପଟେନ ଅମରିନ୍ଦର ସିଂଙ୍କ ଏକ ନୂତନ ଦଳ ଗଠନ ଘୋଷଣା ପରେ ବର୍ତ୍ତମାନ ବିଜେପି ମଧ୍ୟ ତାଙ୍କୁ ସମର୍ଥନ କରିବାକୁ ଘୋଷଣା କରିଛି। ଏହି ପରିପ୍ରେକ୍ଷୀରେ ବିଜେପିର ପଞ୍ଜାବର ଦାୟିତ୍ୱରେ ଥିବା ରାଷ୍ଟ୍ରୀୟ ସାଧାରଣ ସଂପାଦକ ଦୁଶ୍ୟନ୍ତ ଗୌତମ କହିଛନ୍ତି ଯେ, କ୍ୟାପ୍ଟେନ ଅମରିନ୍ଦର ସିଂଙ୍କ ନୂଆ ଦଳ ସହିତ ମିଳିତ ମଞ୍ଚ ପାଇଁ ବିଜେପି ପ୍ରସ୍ତୁତ ଅଛି। ସେ କହିଛନ୍ତି ଯେ ମିଳିତ ମଞ୍ଚ ପାଇଁ ଆମର ଦ୍ୱାର ଖୋଲା ଅଛି, କିନ୍ତୁ ଏହା ଉପରେ କେବଳ ସଂସଦୀୟ ବୋର୍ଡ ନିଷ୍ପତ୍ତି ନେଇପାରିବ।

ସେ କହିଛନ୍ତି ଯେ, ଯେତେବେଳେ ସେ ପଞ୍ଜାବର ଲୋକଙ୍କ ସ୍ୱାର୍ଥ ପ୍ରସଙ୍ଗରେ ଅବହେଳା କଲେ ଆମେ ଏହାକୁ ବିରୋଧ କରିଥିଲୁ। କିନ୍ତୁ ଯେତେବେଳେ ଦେଶର ସୁରକ୍ଷା କଥା, ଯେତେବେଳେ ସୀମାର ସୁରକ୍ଷା କଥା ଆସେ, ଆମେ ତାଙ୍କୁ ମଧ୍ୟ ଅଭିନନ୍ଦନ ଜଣାଉଛୁ। ସେ ସୈନିକ ଥିଲେ। ଆମେ ବିଶ୍ୱାସ କରୁଛୁ ଯେ, ଅମରିନ୍ଦର ସିଂ ଜଣେ ଭଲ ଦେଶପ୍ରେମୀ।

କୃଷକମାନେ ଏବେ ମଧ୍ୟ ଆମ ସହିତ ଅଛନ୍ତି। ଆମେ କୃଷକଙ୍କ ସ୍ୱାର୍ଥ ପାଇଁ ସଂଗ୍ରାମ କରଛୁ। ସେ ମଧ୍ୟ ଚାଷୀଙ୍କ ସ୍ଵାର୍ଥ ବିଷୟରେ କହୁଛନ୍ତି। ଆମେ ଏକାଠି ବସି ଆଲୋଚନା କରିବୁ। କୃଷକଙ୍କ ଆନ୍ଦୋଳନ ବିଷୟରେ ସେ କହିଛନ୍ତି ଯେ ଏହି ଆନ୍ଦୋଳନ ଏକ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଆନ୍ଦୋଳନ।

ଚଣ୍ଡିଗଡ଼: ପଞ୍ଜାବର ନୂତନ ମୁଖ୍ୟମନ୍ତ୍ରୀ ଚରଣଜିତ ସିଂ ଚାନ୍ନି ସୋମବାର ଦିନ ସମସ୍ତ ସରକାରୀ କର୍ମଚାରୀ ଏବଂ କର୍ମଚାରୀଙ୍କୁ ଅଫିସ୍ ସମୟରେ ଆସିବାକୁ ନିର୍ଦ୍ଦେଶ ଦେଇଛନ୍ତି। ସକାଳ ୯ ଟା ସୁଦ୍ଧା କାର୍ଯ୍ୟାଳୟରେ ପହଞ୍ଚିବାକୁ ଏବଂ ସନ୍ଧ୍ୟାରେ ଅଫିସ୍ ସମୟ ପର୍ଯ୍ୟନ୍ତ ଜନସାଧାରଣଙ୍କ ନିକଟରେ ଉପଲବ୍ଧ ହେବାକୁ ମୁଖ୍ୟମନ୍ତ୍ରୀ ଚାନ୍ନି ନିର୍ଦ୍ଦେଶ ଦେଇଛନ୍ତି। ଏହି ପଦକ୍ଷେପର ଉଦ୍ଦେଶ୍ୟ ହେଉଛି ସରକାରୀ କାର୍ଯ୍ୟାଳୟରେ ଅନୁଶାସନ ଆଣିବା ବୋଲି ବିବୃତ୍ତିରେ କୁହାଯାଇଛି।

ସରକାରୀ କାର୍ଯ୍ୟାଳୟରେ ସମସ୍ତ ସରକାରୀ କର୍ମଚାରୀ ଏବଂ କର୍ମଚାରୀଙ୍କ ଉପଲବ୍ଧତାକୁ ସୁନିଶ୍ଚିତ କରିବା ପାଇଁ ପ୍ରଶାସନିକ ସଚିବ ଏବଂ ବିଭାଗୀୟ ମୁଖ୍ୟମାନେ ସପ୍ତାହରେ ଦୁଇଥର ଆଶ୍ଚର୍ଯ୍ୟଜନକ ଯାଞ୍ଚ କରିବା ଉଚିତ ଏବଂ ସେମାନଙ୍କ ଅଧୀନରେ କାର୍ଯ୍ୟ କରୁଥିବା କର୍ମଚାରୀଙ୍କ ଉପରେ ନଜର ରଖିବା ଉଚିତ ବୋଲି ସେ କହିଛନ୍ତି।

ମୁଖ୍ୟମନ୍ତ୍ରୀ ଚାନ୍ନିଙ୍କ ନେତୃତ୍ୱରେ ସନ୍ଧ୍ୟାରେ ପ୍ରଥମ କ୍ୟାବିନେଟ୍ ବୈଠକ ଅନୁଷ୍ଠିତ ହୋଇଥିଲା। ପ୍ରାୟ ତିନି ଘଣ୍ଟା ଧରି ଚାଲିଥିବା ବୈଠକରେ ଉପମୁଖ୍ୟମନ୍ତ୍ରୀ ସୁଖଜିନ୍ଦର ସିଂ ରନ୍ଧୱା ଏବଂ ଓପି ସୋନିଙ୍କ ସହ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଏହି ବୈଠକରେ ସୁଲଭ ମୂଲ୍ୟରେ ବାଲି ଯୋଗାଇବା, ଅନୁସୂଚିତ ଜାତି, ପଛୁଆ ବର୍ଗ ଏବଂ ଦାରିଦ୍ର୍ୟ ସୀମାରେଖା ତଳେ ଲୋକଙ୍କୁ ୧୦୦ ଟି ବିଦ୍ୟୁତ୍ ୟୁନିଟ୍ ମାଗଣାରେ ପ୍ରଦାନ କରିବା ଏବଂ ଗ୍ରାମାଞ୍ଚଳକୁ ମାଗଣାରେ ଜଳ ଯୋଗାଇବା ପାଇଁ ନିଷ୍ପତ୍ତି ନିଆଯାଇଥିଲା।

ଚଣ୍ଡିଗଡ଼: ପଞ୍ଜାବର ମୁଖ୍ୟମନ୍ତ୍ରୀ ଭାବରେ ଦାୟିତ୍ଵ ଗ୍ରହଣ କରିବା ପରେ ତାଙ୍କର ପ୍ରଥମ ସାମ୍ବାଦିକ ସମ୍ମିଳନୀରେ ଚରଣଜିତ ସିଂ ଚାନ୍ନି ଅନେକ ବଡ଼ ଘୋଷଣା କରିଛନ୍ତି। ଚାନ୍ନି ଚାଷୀଙ୍କ ଜଳ ଏବଂ ବିଦ୍ୟୁତ୍ ବିଲ୍ ଛାଡ କରିବାକୁ ଘୋଷଣା କରିଛନ୍ତି। ବାଲି ମାଫିଆ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆଶ୍ଵାସନା ଦେଇଛନ୍ତି। ଏଥି ସହିତ ସେ ତିନୋଟି କୃଷି ଆଇନ ପ୍ରତ୍ୟାହାର କରିବାକୁ କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି। ମୁଖ୍ୟମନ୍ତ୍ରୀ ଚାନ୍ନି କଂଗ୍ରେସ ହାଇକମାଣ୍ଡକୁ ଧନ୍ୟବାଦ ଜଣାଇବା ସହ କ୍ୟାପଟେନ ଅମରିନ୍ଦର ସିଂଙ୍କୁ ମଧ୍ୟ ପ୍ରଶଂସା କରିଛନ୍ତି।

ଚରଣଜିତ ସିଂ ଚାନ୍ନି ଚାଷୀଙ୍କ ବିଷୟରେ ବଡ଼ ଘୋଷଣା କରିଛନ୍ତି। ସେ କହିଛନ୍ତି, ‘ଏହା ହେଉଛି କୃଷକଙ୍କ ସରକାର। ଯଦି ଚାଷୀଙ୍କ ପାଇଁ କୌଣସି କ୍ଷତି ଆସେ, ତେବେ ମୁଁ ମୋର ଗଳା କାଟିଦେବି। ଯଦି କୃଷକ ବୁଡ଼ିଯାଏ ତେବେ ଦେଶ ମଧ୍ୟ ବୁଡ଼ିଯିବ, ଅର୍ଥନୀତି ବୁଡ଼ିଯିବ। କୃଷି ଖୁସି ହେଲେ ହିଁ ପଞ୍ଜାବ ଖୁସି ହେବ। ଚାଷୀଙ୍କ ପାଇଁ ବିଦ୍ୟୁତ୍ ଏବଂ ଜଳ ମାଗଣା ହେବା ଉଚିତ୍। କୃଷକଙ୍କ ବଡ ବିଦ୍ୟୁତ୍ ବିଲ୍ ଆମ ସରକାର ଛାଡ କରିବ। ଯଦି କାହାର ବିଦ୍ୟୁତ୍ କାଟ ହୁଏ, ତେବେ ଆମେ ତାଙ୍କ ଘରକୁ ବିଦ୍ୟୁତ୍ ପୁନଃସ୍ଥାପନ କରିବୁ। ଏହା ହେଉଛି ପଞ୍ଜାବର ସାଧାରଣ ଲୋକଙ୍କ ସରକାର। ଆମେ ନିଶ୍ଚିତ କରୁଛୁ ଯେ, କାହା ସହିତ କିଛି ଭୁଲ ହେବ ନାହିଁ। ଆଇନ ସମସ୍ତଙ୍କ ପାଇଁ ସମାନ ହେବ।

କୃଷକଙ୍କ ଆନ୍ଦୋଳନ ସମ୍ପର୍କରେ ସେ କହିଛନ୍ତି ଯେ, କେନ୍ଦ୍ର ସରକାର କୃଷି ଆଇନକୁ ରଦ୍ଦ କରିବା ଉଚିତ। ପଞ୍ଜାବ ସରକାର ଚାଷୀଙ୍କ ସହ ଅଛନ୍ତି। ଏହାସହ କୃଷକମାନେ ଆନ୍ଦୋଳନ ଶେଷ କରିବାକୁ ସେ ଅନୁରୋଧ କରିଛନ୍ତି। ମୋତେ କିଛି ସମୟ ଦିଅନ୍ତୁ, ଆପଣମାନଙ୍କର ସମସ୍ତ ଦାବି ପୂରଣ କରିବି। ମୋତେ ବିଶ୍ୱାସ କରନ୍ତୁ, ପ୍ରତ୍ୟେକ ଅଭିଯୋଗର ସମାଧାନ କରାଯିବ। ଏହା ଏକ ସାଧାରଣ ଲୋକର ସରକାର। କ୍ୟାପଟେନ ଅମରିନ୍ଦର ସିଂ ପଞ୍ଜାବରେ ବହୁତ ଭଲ କାମ କରିଥିଲେ।

ନୂଆଦିଲ୍ଲୀ: ପଞ୍ଜାବ ପରେ ଏବେ ଛତିଶଗଡ କଂଗ୍ରେସର ଲଢେଇ ଏବେ ଦିଲ୍ଲୀରେ ପହଞ୍ଚିଛି। ସୂଚନାନୁସାରେ ଆସନ୍ତାକାଲି ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ବଘେଲ ଏବଂ ସ୍ୱାସ୍ଥ୍ୟମନ୍ତ୍ରୀ ଟି.ଏସ୍ ସିଂହଦେଓ ଦିଲ୍ଲୀ ଆସୁଛନ୍ତି। କୁହାଯାଉଛି ଯେ, ଛତିଶଗଡ କଂଗ୍ରେସର ଦାୟିତ୍ୱରେ ଥିବା ପିଏଲ ପୁନିଆଙ୍କ ସହ ଉଭୟ ନେତା ଆସନ୍ତାକାଲି ରାହୁଲ ଗାନ୍ଧୀଙ୍କୁ ଭେଟି ପାରିବେ। ଅଢେଇ ବର୍ଷ ପରେ ମୁଖ୍ୟମନ୍ତ୍ରୀ ହୋଇ ନ ଥିବାରୁ ଟି.ଏସ୍ ସିଂଦେବ ଅସନ୍ତୋଷ ଥିବା ସୂଚନା ରହିଛି।

ଗତ ମାସରେ କଂଗ୍ରେସ ବିଧାୟକ ବୃହସ୍ପତି ସିଂ ସ୍ୱାସ୍ଥ୍ୟମନ୍ତ୍ରୀ ଟି.ଏସ୍ ସିଂଦେବଙ୍କ ଉପରେ ହତ୍ୟା ଧମକ ଦେବା ଅଭିଯୋଗ କରିଥିଲେ। ସେବେଠାରୁ ସମଗ୍ର ରାଜ୍ୟର ରାଜନୈତିକ ମହୋଲ ଗରମ ଅଛି। ବିଧାୟକ ଅଭିଯୋଗ କରିଥିଲେ ଯେ, ଯେବେଠାରୁ ସେ ମୁଖ୍ୟମନ୍ତ୍ରୀ ଭୁପେଶ ବାଘେଲଙ୍କୁ ପ୍ରଶଂସା କରିବା ସହ ଅଢେଇ ବର୍ଷ ପରେ ମୁଖ୍ୟମନ୍ତ୍ରୀ ପରିବର୍ତ୍ତନ କଥାକୁ ଅସ୍ୱୀକାର କରିଥିଲେ, ସେବେ ଠାରୁ ସ୍ୱାସ୍ଥ୍ୟମନ୍ତ୍ରୀ ଟି.ଏସ୍ ସିଂଦେବଙ୍କ ଟାର୍ଗେଟରେ ସେ ରହିଆସିଛନ୍ତି।

ଛତିଶଗଡ ଏପରି ଏକ ରାଜ୍ୟ ଯେଉଁଠାରେ କଂଗ୍ରେସ ୯୦ ଟି ବିଧାନସଭା ଆସନ ମଧ୍ୟରୁ ୭୦ ଟି ଦଖଲ କରିଛି। ସମଗ୍ର ଦେଶରେ ଯଦି କଂଗ୍ରେସ ସବୁଠାରୁ ଶକ୍ତିଶାଳୀ ଦେଖାଯାଏ, ତେବେ ଛତିଶଗଡରେ ସବୁଠୁ ଶକ୍ତିଶାଳୀ କହିଲେ ଅତ୍ଯୁକ୍ତି ହେବ ନାହିଁ। ଛତିଶଗଡରେ କଂଗ୍ରେସ ସରକାର ଗଠନ ହେବା ଦିନଠାରୁ ଅଢେଇ ବର୍ଷ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ରହିବାର ଫର୍ମୁଲା ଉପରେ ଆଲୋଚନା ହେଉଛି। ଜୁନ୍ ୧୭ ତାରିଖରେ, ଭୁପେଶ ବାଘେଲଙ୍କ ଅଢେଇ ବର୍ଷ କାର୍ଯ୍ୟକାଳ ମଧ୍ୟ ସମାପ୍ତ ହୋଇଛି। ସେବେଠାରୁ ରାଜ୍ୟରେ ନେତୃତ୍ୱ ବଦଳାଇବା ନେଇ ଆଲୋଚନା ଆରମ୍ଭ ହୋଇଛି। ତେବେ କଂଗ୍ରେସ ହାଇକମାଣ୍ଡ ଏହା ଉପରେ ଖୋଲାଖୋଲି ଭାବେ କିଛି କହିନାହାଁନ୍ତି। କଂଗ୍ରେସ ଦାୟିତ୍ୱରେ ଥିବା ପିଏଲ ପୁନିଆ ଏନେଇ ଅନେକ ଥର କହିଛନ୍ତି ଯେ, ଅଢେଇ ବର୍ଷ ପାଇଁ କୌଣସି ସୂତ୍ର ନାହିଁ।

ଜୟପୁର/ନୂଆଦିଲ୍ଲୀ: ରାଜସ୍ଥାନ କଂଗ୍ରେସରେ ଦୁଇ ଗୋଷ୍ଠୀ ମଧ୍ୟରେ ଲାଗିରହିଥିବା ବିବାଦର ସମାଧାନ ପାଇଁ ବର୍ତ୍ତମାନ ଉଦ୍ୟମ ଜାରି ରହିଛି। ଏ ସମ୍ପର୍କରେ ରାଜ୍ୟ କଂଗ୍ରେସ ସଭାପତି ଗୋବିନ୍ଦ ସିଂ ଡୋଟାସରା ଆଜି ସମସ୍ତ ବିଧାୟକଙ୍କ ବୈଠକ ଡାକିଛନ୍ତି। ସଚିନ ପାଇଲଟ ଏବଂ ଅଶୋକ ଗେହଲୋଟ୍ କ୍ୟାମ୍ପ ମଧ୍ୟରେ ଥିବା ବ୍ୟବଧାନକୁ ଦୂର କରିବା ପାଇଁ ଆସନ୍ତା ସପ୍ତାହରେ ରାଜ୍ୟରେ କ୍ୟାବିନେଟର ସମ୍ପ୍ରସାରଣ ସମ୍ଭବ ବୋଲି ଆଲୋଚନା ଚାଲିଛି। ପଞ୍ଜାବରେ କ୍ୟାପଟେନ ଅମରିନ୍ଦର ସିଂ ଏବଂ ନବଜୋତ ସିଂ ସିଦ୍ଧୁଙ୍କ ମଧ୍ୟରେ ଚାଲିଥିବା ଯୁଦ୍ଧ ବର୍ତ୍ତମାନ ଶେଷ ହେଉଥିବା ଜଣାପଡିଛି। ତେବେ ରାଜସ୍ଥାନରେ ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ ଏବଂ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କ ମଧ୍ୟରେ ବିବାଦ ଲାଗି ରହିଛି।

କଂଗ୍ରେସର ସାଧାରଣ ସମ୍ପାଦକ କେ.ସି ଭେନୁଗୋପାଲ ଏବଂ ରାଜସ୍ଥାନର ଦାୟିତ୍ୱରେ ଥିବା ଅଜୟ ମାକେନ୍ ଶନିବାର ରାଜସ୍ଥାନରେ ପହଞ୍ଚି ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ ଙ୍କୁ ଭେଟିଥିଲେ। ଭେନୁଗୋପାଲ ଏହାକୁ ଏକ ସରକାରୀ ଯାତ୍ରା ବୋଲି କହିଛନ୍ତି। ସଚିନ ପାଇଲଟ, ୧୮ ଜଣ ବିଧାୟକଙ୍କ ସହ ଗତ ବର୍ଷ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କ ବିରୋଧରେ ଏକ ମୋର୍ଚ୍ଚା ଖୋଲିଥିଲେ। ଏହି ସପ୍ତାହ ପୂର୍ବରୁ ପାଇଲଟ ସୂଚିତ କରିଥିଲେ ଯେ ଖୁବ ଶୀଘ୍ର ତାଙ୍କ ଦ୍ୱାରା ଉଠାଯାଇଥିବା ପ୍ରସଙ୍ଗ ଉପରେ କଂଗ୍ରେସ ଉପଯୁକ୍ତ ପଦକ୍ଷେପ ଗ୍ରହଣ କରିବ।

ନୂଆଦିଲ୍ଲୀ: ପଞ୍ଜାବରେ ହେବାକୁ ଥିବା ବିଧାନସଭା ନିର୍ବାଚନ ଲାଗି ଆମ ଆଦ୍ମି ପାର୍ଟି ଜୋର ଲଗାଇଦେଇଛି। ଆପ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏନେଇ ଆଜି ଏକ ସାମ୍ବାଦିକ ସମ୍ମିଳନୀ କରିଛନ୍ତି। ସାମ୍ବାଦିକ ସମ୍ମିଳନୀରେ ଅରବିନ୍ଦ କହିଛନ୍ତି ଯେ, ପଞ୍ଜାବରେ ଆମ ଆଦ୍ମି ପାର୍ଟି ଜିତିଲେ, ପ୍ରତ୍ୟେକ ପରିବାରକୁ ୩୦୦ ୟୁନିଟ ପର୍ଯ୍ୟନ୍ତ ମୁକ୍ତରେ ବିଜୁଳି ମିଳିବ। ଏହାସହ ରାଜ୍ୟରେ ୨୪ ଘଣ୍ଟିଆ ବିଦ୍ୟୁତ ପାଇଁ ବ୍ୟବସ୍ଥା କରିବେ। ଯେଉଁମାନଙ୍କ ପୁରୁଣା ବିଦ୍ୟୁତ ଦେୟ ବାକି ଥିବେ, ସେମାନଙ୍କୁ ମଧ୍ୟ ମୁକ୍ତ କରାଯିବ।

ଉଲ୍ଲେଖ ଯୋଗ୍ୟ ଯେ, ପଞ୍ଜାବରେ ଆସନ୍ତା ବର୍ଷ ବିଧାନସଭା ନିର୍ବାଚନ ଅନୁଷ୍ଠିତ ହେବ। ହେଲେ ପଞ୍ଜାବରେ ଏବେଠାରୁ ରାଜନୈତିକ ସରଗରମ ଆରମ୍ଭ ହୋଇଗଲାଣି। ରାଜ୍ୟରେ ଶାସକ ଦଳ କଂଗ୍ରେସ ଏବଂ ଶିରୋମଣି ଅକାଳୀ ଦଳ ସହ ଆମ ଆଦ୍ମି ପାର୍ଟି ମଧ୍ୟରେ ଟକ୍କର ଦେବା ଲାଗି ପ୍ରସ୍ତୁତ ଆରମ୍ଭ କରିଦେଇଛି।

ନୂଆଦିଲ୍ଲୀ: ବିଗତ ତିନି ମାସରୁ ଉର୍ଦ୍ଧ୍ଵ ଦିନ ଧରି ଦିଲ୍ଲୀ ସୀମାରେ କୃଷକ ଆନ୍ଦୋଳନ ଜାରି ରହିଛି। ଏହା ଭିତରେ ପଞ୍ଜାବରୁ ଏକ ଆଶ୍ବସ୍ତିକର ଖବର ମିଳିଛି। ପଞ୍ଜାବର ଅମୃତସରରେ କୃଷି ଆଇନକୁ ନେଇ ରେଳ ଧାରଣାରେ କୃଷକ ଆନ୍ଦୋଳନରେ ବସିଥିଲେ। ଯାହାଫଳରେ ସେହି ରୁଟରେ ଯାଉଥିବା ସମସ୍ତ ଟ୍ରେନର ଯାତାୟତା ଉପରେ ବାଧା ସୃଷ୍ଟି ହୋଇଥିଲା। ଯାହାକୁ ଆଜି ଆନ୍ଦୋଳନରତ କୃଷକମାନେ ରେଳ ଧାରଣା ଖାଲି କରିଛନ୍ତି।

ସୂଚନା ଅନୁଯାୟୀ, ଟ୍ରେନ ରଦ୍ଦ ହେବା କାରଣରୁ ଚାଷୀ ଏବଂ ବ୍ୟବସାୟୀମାନଙ୍କୁ ବେଶୀ କ୍ଷତି ହେଉଥିଲା। ସେଥିପାଇଁ ୧୬୯ ଦିନ ପରେ ଏହି ଧାରଣାକୁ ସମାପ୍ତ କରିବା ପାଇଁ ନିଷ୍ପତ୍ତି ନିଆଗଲା।

ସେପଟେ ଦିଲ୍ଲୀ ସୀମାରେ ଆନ୍ଦୋଳନ ଜାରି ରହିଛି। ଏହି ଆନ୍ଦୋଳନ ଆସନ୍ତା ୨୬ ତାରିଖକୁ ୪ ମାସରେ ପହଞ୍ଚିବ। ତେଣୁ ନୂଆ କୃଷି ଆଇନ ବିରୋଧରେ ଆସନ୍ତା ୨୬ ତାରିଖରେ କୃଷକ ସଂଗଠନ ଭାରତ ବନ୍ଦ ଡାକରା ଦେଇଛି।

କୃଷକ ନେତା ବୁଟା ସିଂହଙ୍କ କହିଛନ୍ତି ଯେ, ଏହା ପୂର୍ବରୁ ମାର୍ଚ୍ଚ ୧୫ ତାରିଖରେ କୃଷକ ଏବଂ ବ୍ୟବସାୟୀ ସଂଘ ମିଶି ପେଟ୍ରୋଲ-ଡ଼ିଜେଲର ଦାମ ବୃଦ୍ଧି ଏବଂ ରେଳବାଇକୁ ଘରୋଇକରଣ ବିରୋଧରେ ପ୍ରତିବାଦ କରିବ। ସେଥିପାଇଁ ଦେଶର ସବୁ ରେଲୱେ ଷ୍ଟେସନରେ ପ୍ରତିବାଦ କରାଯିବ ବୋଲି ବୁଟା ସିଂହ କହିଛନ୍ତି।