Tag: ବାଣପୁର ଥାନା

ସୀତାରାମ ଅଗ୍ରୱାଲ

ବାଣପୁର: ନୟାଗଡ଼ ଏସପି ଅଲେଖ ଚନ୍ଦ୍ର ପହିଙ୍କ ନିର୍ଦ୍ଦେଶକ୍ରମେ ଜିଲ୍ଲାର ସମସ୍ତ ଥାନାର ଆଇଆଇସି ମାନେ ଚୋରା ବାଇକ ଉଦ୍ଧାର ଅଭିଯାନ ଗତ ତିନି ଦିନ ହେବ ଜାରି ରଖିଛନ୍ତି। ତେବେ ଏହି ଅଭିଯାନ ମଧ୍ୟରେ ଏକ ଆଶ୍ଚର୍ଯ୍ୟକର ତଥ୍ୟ ସାମ୍ନାକୁ ଆସିଛି। ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରୁ ଗତ ୨ ଦିନ ମଧ୍ୟରେ ୧୪ ଗୋଟି ଚୋରା ବାଇକ ଓ ସ୍କୁଟି ଉଦ୍ଧାର କରିଛି ନୟାଗଡ଼ ଜିଲ୍ଲା ପୋଲିସ।

ଗତକାଲି ଚାନ୍ଦପୁର ଆଇଆଇସି ମୁକେଶ ବେହରା ରାତ୍ରକାଳିନ ଚଢ଼ାଉ କରି ବାଣପୁର ଥାନା କୋଷରଡ଼ା ଅଞ୍ଚଳରୁ ୪ ଗୋଟି ଚୋରା ବାଇକ ଉଦ୍ଧାର କରିଥିବା ବେଳେ ଆଜି ଜିଲ୍ଲା ପୋଲିସ ମୁଖ୍ୟାଳୟ ଇନ୍ସପେକ୍ଟର ବୈଦ୍ୟନାଥ ଭୋଇ ପୁନଶ୍ଚ ଉକ୍ତ ଅଞ୍ଚଳରେ ଚଢ଼ାଉ କରି ଆଉ ୧୦ ଚୋରା ବାଇକ ଓ ସ୍କୁଟି ଉଦ୍ଧାର କରିଛନ୍ତି ।

ତେବେ କୋଷରଡ଼ା ଅଞ୍ଚଳର ପାହାଡ଼ ଓ ନଦୀକୁ ଅତିକ୍ରମ କରି ଅକ୍ଲାନ୍ତ ପରିଶ୍ରମ କରି ପୋଲିସ ଅଧିକାରୀ ଓ କର୍ମଚାରୀମାନେ ଉକ୍ତ ବାଇକ ଗୁଡିକୁ ଠାବ କରିବାରେ ସଫଳ ହୋଇଛନ୍ତି।

ଅନୁରୂପ ଭାବେ ଗତକାଲି ନୟାଗଡ଼ ଟାଉନ ଥାନା ଆଇଆଇସି ପ୍ରଜ୍ଞା ପାରମିତା ମିଶ୍ର ମଧ୍ୟ ଗଞ୍ଜାମ ଜିଲ୍ଲା ମା ନାରାୟଣୀ ମନ୍ଦିର ରୋଡରୁ ୫ ଗୋଟି ଚୋରା ବାଇକ ଉଦ୍ଧାର କରିବାରେ ସଫଳ ହୋଇଛନ୍ତି। ତେବେ ବାଣପୁର ଅଞ୍ଚଳରୁ ଏତେ ସଂଖ୍ୟକ ଚୋରା ବାଇକ ଉଦ୍ଧାର ଘଟଣା ସମସ୍ତଙ୍କୁ ଚକିତ କରଦେଇଛି।

ଏ ନେଇ ନୟାଗଡ ଏସପିଙ୍କୁ ପଚାରିବାରୁ ଏଯାବତ ଜିଲ୍ଲା ପୋଲିସ ଦ୍ୱାରା ବିଭିନ୍ନ ଅଞ୍ଚଳରୁ ସମୁଦାୟ ୪୦ ରୁ ଉର୍ଦ୍ଧ୍ଵ ଚୋରା ବାଇକ ଓ ସ୍କୁଟି ଉଦ୍ଧାର ହୋଇଥିବା ବେଳେ ଆଗକୁ ଆହୁରି ବହୁତ ଚୋରା ବାଇକ ଉଦ୍ଧାର ହେବ ବୋଲି କହିଛନ୍ତି ଏବଂ ଏ ନେଇ ଖୁବ ଶୀଘ୍ର ଏସପି ସାମ୍ବାଦିକ ସମ୍ମିଳନୀ କରିବେ ବୋଲି ସୂଚନା ଦେଇଛନ୍ତି।

ତେବେ ନୟାଗଡ଼ ଏସପିଙ୍କ ଉକ୍ତ ପ୍ରୟାସକୁ ଉଭୟ ଖୋର୍ଦ୍ଧା ଓ ନୟାଗଡ ଜିଲ୍ଲାର ଜନସାଧାରଣ ମାନେ ଭୁରି ପ୍ରଶଂସା କରିଛନ୍ତି, ତତସହିତ ଏପରି ସ୍ୱତନ୍ତ୍ର ଅଭିଯାନ ସମସ୍ତ ଜିଲ୍ଲାରେ କରାଗଲେ ବହୁ ନିରୀହ ଜନସାଧାରଣ ଉପକୃତ ହୋଇପାରିବେ ବୋଲି ବୁଦ୍ଧିଜୀବୀ ମାନେ ମତ ପ୍ରକାଶ କରିଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ବାଲିପଦର ଗ୍ରାମ ମୁହଁରେ ଥିବା ବିଲ ଭିତରୁ ଜଣେ ମୃତ ଶରୀରକୁ ସନ୍ଦେହଜନକ ଅବସ୍ଥାରେ ଉଦ୍ଧାର କରିଛି ପୋଲିସ। ମୃତକ ଜଣକ ହେଉଛନ୍ତି ମଙ୍ଗରାଜପୁର ଗ୍ରାମର ସୁକାନ୍ତ ପଲାଇଙ୍କ ପୁତ୍ର କାଶୀନାଥ ପଲାଇ। ତାଙ୍କ ଶ୍ୱଶୁର ଘର ବାଲିପଦର ଗ୍ରାମ ତାରିଣୀ ସାହି ହୋଇଥିବା ବେଳେ ଉକ୍ତ ଗ୍ରାମ ସମ୍ମୁଖରୁ ମୃତ ଦେହ ଉଦ୍ଧାର ହେବା ସାଧାରଣରେ ବହୁ ସନ୍ଦେହ ସୃଷ୍ଟି କରିଛି। ତାଙ୍କର ଏକମାତ୍ର ପୁତ୍ର ଥିବା ଜଣାପଡିଛି।

ତେବେ ମୃତ ଶରୀର ନିକଟରେ ସ୍କୁଲ ଖାତାପତ୍ର ଭର୍ତ୍ତି ଏକ ବ୍ୟାଗ ମଧ୍ୟ ପଡିଥିବାର ଦେଖାଯାଇଛି। ବାଣପୁର ମେଡିକାଲରେ ଡାକ୍ତର ତାଙ୍କୁ ମୃତ ଘୋଷଣା କଲା ପରେ ବର୍ତ୍ତମାନ ପୋଲିସ ମୃତ ଶରୀରକୁ ନିଜ ହେପାଜତକୁ ନେଇ ତଦନ୍ତ ଜାରି ରଖିଛି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ଭାଟପଡା ଛକରେ ଆଜି ଭୋରରୁ ଏକ ଅଭାବନୀୟ ଘଟଣା ଘଟିଯାଇଛି। କୁଲେଇ ସରପଞ୍ଚ ସ୍ୱାମୀଙ୍କ ସମ୍ପର୍କୀୟଙ୍କୁ ଖଣ୍ଡାରେ ଆକ୍ରମଣ କରିଛନ୍ତି ତାଙ୍କରି ବଡବାପା ଓ ପୁଅ। ଏ ନେଇ ଗମ୍ଭାରୀମୁଣ୍ଡା ବିଟ ହାଉସରେ ଏକ ଲିଖିତ ଅଭିଯୋଗ କରିଛନ୍ତି ସରପଞ୍ଚଙ୍କ ଶ୍ୱଶୁର ରାମଚନ୍ଦ୍ର ବେହେରା।

ଅଭିଯୋଗ ମୁତାବକ ଟାଙ୍ଗୀ ଥାନା କୁହୁଡି ରତନପୁର ଗ୍ରାମରେ ଗତକାଲି କୁଲେଇ ସରପଞ୍ଚଙ୍କ ବୈଦିକ ରୀତିରେ ବିବାହ ଅନୁଷ୍ଠିତ ହୋଇଥିଲା। ବିବାହ ଶେଷ ହେବା ପରେ ବରଯାତ୍ରୀ ନେଇ ବରପକ୍ଷ ନିଜ ଗ୍ରାମ ବିଂଝଳାକୁ ଫେରିବା ପରେ ରାତି ୩ ଘଟିକାରେ ଉକ୍ତ ଗ୍ରାମର ଭାସ୍କର ବେହେରା ଓ ତାଙ୍କ ପୁତ୍ର ଉମକାନ୍ତ ବେହେରା ହଠାତ ସରପଞ୍ଚଙ୍କ ଘର ଦୁଆର ସମ୍ମୁଖରେ ଖଣ୍ଡା ଓ ଫାର୍ଷା ଧରି ଗାଳିଗୁଲଜ କରିବାକୁ ଲାଗିଥିଲେ।

ରାମଚନ୍ଦ୍ର ଦୁଆର ଖୋଲିବାରୁ ତାଙ୍କୁ ଆକ୍ରମଣ ପାଇଁ ଉଭୟ ଅଭିଯୁକ୍ତ ଦଉଡି ଆସିବା ବେଳେ ରାମଚନ୍ଦ୍ର ଦୁଆର ବନ୍ଦ କରିଦେଇଥିଲେ। କିନ୍ତୁ ଉଭୟ ଅଭିଯୁକ୍ତ ରାମଚନ୍ଦ୍ର ଏବଂ ତାଙ୍କ ପୁଅ ତଥା ସରପଞ୍ଚଙ୍କ ସ୍ୱାମୀ ପ୍ରକାଶ ବେହେରାଙ୍କୁ ଜୀବନରୁ ମାରିଦେବାକୁ ଧମକ ଦେଇ ଫେରିଯାଇଥିଲେ।

ତେବେ ଭାଟପଡ଼ା ଛକରେ କୁଲେଇ ସରପଞ୍ଚ ସ୍ୱାମୀଙ୍କ ସମ୍ପର୍କୀୟ କାଁହୁଚରଣ ବେହେରା ଏବଂ ତାଙ୍କ ସାଙ୍ଗ ଅଭୟ ସାହୁଙ୍କୁ ଦେଖି ଉକ୍ତ ଅଭିଯୁକ୍ତ ଦ୍ବୟ ଗାଳିଗୁଲଜ କରିବା ସହ କାହ୍ନୁଙ୍କ ଦୁଇ ହାତକୁ ଖଣ୍ଡାରେ ଏକାଧିକ ଥର ଚୋଟ ପକାଇଥିଲେ। କାହ୍ନୁ ସଙ୍ଗେ ସଙ୍ଗେ ତଳେ ପଡିଯାଇଥିଲେ ଏବଂ ଗ୍ରାମବାସୀ ତୁରନ୍ତ ତାଙ୍କୁ ଗମ୍ଭାରୀମୁଣ୍ଡା ମେଡିକାଲ ଏବଂ ପରେ ଗୁରୁତର ଭାବେ ଭୁବନେଶ୍ୱର ସ୍ଥାନାନ୍ତରିତ କରିଥିଲେ।

ଖବର ପାଇ ବାଣପୁର ପୋଲିସ ସଙ୍ଗେସଙ୍ଗେ ଘଟଣାସ୍ଥଳରେ ପହଞ୍ଚିବା ସହ ବର୍ତ୍ତମାନ ଭାସ୍କର ବେହେରାଙ୍କୁ ଅଟକ କରିଥିବା ବେଳେ ତାଙ୍କ ପୁତ୍ର ଉମାକାନ୍ତ ବେହେରା ଫେରାର ଅଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ଶ୍ରୀନିବାସପୁର ଗ୍ରାମରେ ଦେଖା ଦେଇଛି ବିଶୃଙ୍ଖଳା। ଉକ୍ତ ଗ୍ରାମର ଏକ ପୋଲ ମରାମତି କାର୍ଯ୍ୟ ଜାରି ରହିଥିବା ବେଳେ ସ୍ଥାନୀୟ କାଉନସିଲରଙ୍କୁ ଜଣେ ବ୍ୟକ୍ତି ଆକ୍ରମଣ କରିଥିବାର ଅଭିଯୋଗ ହୋଇଛି। ଏବଂ ଆକ୍ରମଣକାରିଙ୍କୁ ଗିରଫ ଦାବିରେ ବାଣପୁର ଥାନା ଘେରାଉ କରିଛନ୍ତି ଉକ୍ତ ଗ୍ରାମର ବହୁ ମହିଳା ଓ ପୁରୁଷ।

ଖବର ମୁତାବକ ଶ୍ରୀନିବାସପୁର ଗ୍ରାମର ଏକ ପୋଲର ମରାମତି କାର୍ଯ୍ୟ ଜାରି ରହିଥିଲା।  ମଧ୍ୟାହ୍ନରେ ଉକ୍ତ ଗ୍ରାମର ବିଜୁ ନିର୍ମାଣ କାର୍ଯ୍ୟ ନିମ୍ନମାନର ବୋଲି ଅଭିଯୋଗ କରିବା ସହ ଏହାର କାର୍ଯ୍ୟାଦେଶ କାଇଁ ବୋଲି ସମ୍ପୃକ୍ତ କାର୍ଯ୍ୟ ନେଇଥିବା ଠିକାଦାରଙ୍କୁ ପଚାରିଥିଲେ। ଉକ୍ତ ସମୟରେ ସେଠାରେ ଉପସ୍ଥିତ ଥିବା ସ୍ଥାନୀୟ କାଉନସିଲର ଅଭିମନ୍ୟୁ ପ୍ରଧାନଙ୍କ ସହ ତାଙ୍କର ବଚସା ହୋଇଥିଲା। ବଚସା ପରେ ଅଭିମନ୍ୟୁଙ୍କୁ ବିଜୁ ଆକ୍ରମଣ କରିଥିବାର ବାଣପୁର ଥାନାରେ ଲିଖିତ ଅଭିଯୋଗ ହୋଇଥିଲା।

ଏ ନେଇ ଅଭିମନ୍ୟୁଙ୍କ ସମର୍ଥନରେ ଉକ୍ତ ଗ୍ରାମର ଏକାଧିକ ମହିଳା ଓ ପୁରୁଷ ବାଣପୁର ଥାନା ଘେରାଉ କରିବା ସହ ଆକ୍ରମଣକାରୀଙ୍କୁ ଗିରଫ ପାଇଁ ଦାବି କରିଥିଲେ। ବର୍ତ୍ତମାନ ଘଟଣାର ତଦନ୍ତ ଜାରି ରଖିଥିବାର ଅତିରିକ୍ତ ଆଇଆଇସି କାଁହୁଚରଣ ସ୍ୱାଇଁ କହିଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ଗୋଡିଝର ଗ୍ରାମରେ ଜଣେ ବ୍ୟକ୍ତିଙ୍କୁ ମରଣାନ୍ତକ ଆକ୍ରମଣ ହୋଇଛି। ଯେଉଁଥିରେ ଫାର୍ଶା ଚୋଟ ଦ୍ୱାରା ତାଙ୍କ ବାମ ହାତ କ୍ଷତବିକ୍ଷତ ହୋଇଛି। ଏ ନେଇ ବାଣପୁର ଥାନାରେ ଲିଖିତ ଅଭିଯୋଗ ହୋଇଛି।

ଅଭିଯୋଗ ମୁତାବକ ଗତକାଲି ରାତିରେ ଗୋଡିଝର ଗ୍ରାମରେ ଠାକୁର ଘର ମରାମତି ପାଇଁ ଗ୍ରାମ କୋଠ ଘରେ ବୈଠକ ବସିଥିଲା। ସେହି ସମୟରେ ହଠାତ ୧୦ ରୁ ଉର୍ଦ୍ଧ୍ଵ ବ୍ୟକ୍ତି ଗ୍ରାମ ସଭା ନିକଟକୁ ଆସି ଗ୍ରାମବାସୀଙ୍କୁ ଗାଳି କରିବାକୁ ଲାଗିଥିଲେ। ଏହାକୁ ଗ୍ରାମର ବିଜୟ ବରାଳ ଏବଂ ଅନ୍ୟ ବ୍ୟକ୍ତିମାନେ ବିରୋଧ କରିବାରୁ ଉକ୍ତ ଦୁର୍ବୃତ୍ତ ମାନଙ୍କ ମଧ୍ୟରୁ ଜଣେ ଏକ ଫାର୍ଶା ଦ୍ଵାରା ବିଜୟଙ୍କୁ ଆକ୍ରମଣ କରିଥିଲେ।

ଫଳରେ ବିଜୟଙ୍କ ବାମ ହାତ କଟିଯାଇ ପ୍ରବଳ ରକ୍ତସ୍ରାବ ହୋଇଥିଲା। ସଙ୍ଗେ ସଙ୍ଗେ ବିଜୟଙ୍କୁ ଅନ୍ୟ ଗ୍ରାମବାସୀ ମାନେ ମେଡିକାଲ ନେଇଥିଲେ। ଏ ନେଇ ବିଜୟ ବାଣପୁର ଥାନାରେ ଲିଖିତ ଅଭିଯୋଗ କରିବା ପରେ ଦୋଷୀ ମାନଙ୍କୁ ତୁରନ୍ତ ଗିରଫ ଦାବିରେ ବିଜୟଙ୍କ ସମେତ ଶତାଧିକ ଗ୍ରାମବାସୀ ଓ ମହିଳା ମାନେ ଆଜି ବାଣପୁର ଥାନାରେ ଏକତ୍ରିତ ହୋଇଥିବାର ଦେଖିବାକୁ ମିଳିଥିଲା।

ମହିଳା ମାନଙ୍କ ଅଭିଯୋଗ ଯେ, ଅଭିଯୁକ୍ତ ଜଣକ ଗ୍ରାମରେ ମଦ ବିକ୍ରି କରି ସଦାବେଳେ ପରିବେଶକୁ ଅଶାନ୍ତି କରୁଛନ୍ତି। ତେଣୁ ତାଙ୍କ ଗ୍ରାମକୁ ମଦମୁକ୍ତ କରିବା ପାଇଁ ମଧ୍ୟ ମହିଳା ମାନେ ପୋଲିସ ନିକଟରେ ଦାବି କରିଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ବଜାର ମଧ୍ୟରେ ଏକାଧିକ କୋଚିଂ ସେଣ୍ଟର ଥିବାରୁ ବହୁ ସଂଖ୍ୟାରେ ଛାତ୍ର ଛାତ୍ରୀ ଏଠାରେ ଟ୍ୟୁସନ ପାଇଁ ଆସନ୍ତି। ତେବେ ବିଶେଷ କରି ରାତ୍ର ଆଠ ଘଣ୍ଟିକାରୁ ନଅ ଘଣ୍ଟିକା ମଧ୍ୟରେ ସମସ୍ତ କୋଚିଂ ସେଣ୍ଟର ଛୁଟି ହୋଇଥାଏ। ତେବେ ଏହାର ସୁଯୋଗ ନେଇ ଦୀର୍ଘ ଦିନ ହେବ ସହରର ପ୍ରମୁଖ ସ୍ଥଳ ମା’ ଭଗବତୀଙ୍କ ପୀଠ ଠାରୁ ବିଷରପାଟଣା ଛକ ଓ କିଛି ଅନ୍ୟ ସ୍ଥାନରେ ଅସାମାଜିକ ଯୁବକମାନେ ଛପି ବସୁଛନ୍ତି। ସୁଯୋଗ ପାଇ ଛାତ୍ରୀମାନଙ୍କୁ କମେଣ୍ଟ ମାରିବା ସହ ଜୋର ଜବରଦସ୍ତ କରିବାକୁ ବି ସେମାନେ ପଛାଉନାହାନ୍ତି।

ତେବେ ଏହା ସେମାନଙ୍କ ନିତିଦିନିଆ କାର୍ଯ୍ୟରେ ପରିଣତ ହୋଇଥିବା ବେଳେ ଏମାନଙ୍କୁ ସାବାଡ଼ କରିବା ପାଇଁ ପୋଲିସ ପ୍ରଶାସନର ଶୁଭଦୃଷ୍ଟି ଏଯାବତ ପଡୁନି। ପରିସ୍ଥିତି ଏପରି ହେଲାଣି ଯେ, ବର୍ତ୍ତମାନ ସ୍ପଷ୍ଟ ଦିବାଲୋକରେ ଛାତ୍ରୀମାନଙ୍କୁ ଅସଦାଚରଣ କରିବାକୁ ଉକ୍ତ ଯୁବକମାନେ ପଛାଉନାହାନ୍ତି। ତେବେ ପ୍ରତିଦିନ ଏପରି ଘଟଣା ବାଣପୁରରେ ଘଟୁଥିବା ବେଳେ କେତେକ ଲୋକଲୋଚନକୁ ଆସିବା ଭୟରେ ଦବି ଯାଉଥିବା ବେଳେ ଆଉ କେତେକ ସାହସ କରି ପୋଲିସକୁ ଅଭିଯୋଗ କରୁଛନ୍ତି।

ଏପରି ଏକ ଲଜ୍ୟାଜନକ ଘଟଣା ଗତକାଲି ବାଣପୁର ଗୋଦାବରୀଶ ଉଚ୍ଚ ବିଦ୍ୟାଳୟରେ ନିକଟରେ ଘଟିଯାଇଛି। ଜଣେ ଛାତ୍ରୀଙ୍କୁ ଦୁଇ ଜଣ ଯୁବକ କମେଣ୍ଟ ମାରି ନିର୍ଧୁମ ଛେଚା ଖାଇଛନ୍ତି ଏବଂ ପରବର୍ତ୍ତୀ ସମୟରେ ଉଭୟଙ୍କୁ ଗ୍ରାମବାସି ପୋଲିସ ଜିମା ଦେଇଛନ୍ତି।

ଅଭିଯୋଗ ମୁତାବକ ବାଣପୁର ଏନଏସି ଅଞ୍ଚଳର ଦୁଇ ଜଣ ଯୁବକ ଗତକାଲି ମଧ୍ୟାହ୍ନରେ ଗୋଦାବରୀଶ ଉଚ୍ଚ ବିଦ୍ୟାଳୟ ନିକଟରେ ନିତି ଦିନ ପରି ଛାତ୍ରୀଙ୍କୁ ହଇରାଣ ନିମନ୍ତେ ଯାଇଥିଲେ। ଉକ୍ତ ସମୟରେ ଜନୈକ ଛାତ୍ରୀଙ୍କୁ କମେଣ୍ଟ ମରିବା ସହ ଅସଦାଚରଣ କରିଥିଲେ। ଏହା ଜାଣି ସ୍ଥାନୀୟ ଅଞ୍ଚଳବାସି ଉଭୟଙ୍କୁ ନିର୍ଧୁମ ଛେଚି ବାଣପୁର ପୋଲିସ ଜିମା ଦେଇଥିଲେ।

ପୋଲିସ ଉଭୟଙ୍କ ବିରୋଧରେ କେଶ ନମ୍ବର ୧୪୯/୨୨ ରେ ମାମଲା ରୁଜୁ କରି ତଦନ୍ତ ଜାରି ରଖିଛି। ତେବେ ବାଣପୁର ବଜାରରେ ପ୍ରତିଦିନ ଏପରି କାଣ୍ଡ ଘଟୁଥିବା ବେଳେ ପୋଲିସ ପକ୍ଷରୁ ଉକ୍ତ ସମସ୍ୟାକୁ ଗୁରୁତର ସହ ନେଇ ଏହାର ପ୍ରତିକାର ଦିଗରେ ଆଣ୍ଟି ରୋମିଓ ସ୍କ୍ୱାର୍ଡ ଗଠନ କରି ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।

ସୀତାରାମ ଅଗ୍ରୱାଲ

ବାଣପୁର: ଆଜି ବାଲୁଗାଁ ଅବକାରୀ ବିଭାଗ ବାଣପୁର ଥାନା ଅଧିନସ୍ଥ ମହତପଲା ଏବଂ ଜଗନ୍ନାଥପୁର ଗ୍ରାମରେ ଚଢ଼ାଉ କରି ଦୁଇ ଜଣ ମହିଳା ସମେତ ତିନି ଜଣ ଦେଶୀ ମଦ ବେପାରୀକୁ ଗିରଫ କରିଛି। ମହତପଲା ଗ୍ରାମରୁ ଦୁଇ ଜଣ ମହିଳା ମଦ ବେପାରି ଗିରଫ ହୋଇଛନ୍ତି। ସେମାନଙ୍କ ନିକଟରୁ ୬୨ ଲିଟର ଦେଶୀ ମଦ ଜବତ କରିଛି ଅବକାରୀ ବିଭାଗ।

ଅନୁରୂପ ଭାବେ ଜଗନ୍ନାଥପୁର ଗ୍ରାମରୁ ଗଙ୍ଗାଧର ଦଣ୍ଡସେଣଙ୍କୁ ଗିରଫ କରିବା ସହ ତାଙ୍କ ନିକଟରୁ ୩୦ ଲିଟର ଦେଶୀମଦ ଜବତ କରିଛି ଅବକାରୀ ବିଭାଗ। ସମସ୍ତ ଗିରଫ ଅଭିଯୁକ୍ତଙ୍କ ବିରୋଧରେ ତିନି ଗୋଟି ମାମଲା ରୁଜୁ କରାଯାଇ କୋର୍ଟଚାଲାଣ କରାଯାଇଥିବାର ବାଲୁଗାଁ ଅବକାରୀ ଅଧିକାରୀ ରଞ୍ଜନ ଦାସ ସୂଚନା ଦେଇଛନ୍ତି।

ସୀତାରାମ ଅଗ୍ରୱାଲ

ଚିଲିକା: ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବ ସଦାବେଳେ କିଛି ନା କିଛି କାରଣ ପାଇଁ ଚର୍ଚ୍ଚାରେ ରହିଆସିଛନ୍ତି। ବାଲୁଗାଁ ବିଜେପି ନଗର ମଣ୍ଡଳ ସଭାପତିଙ୍କୁ ଆକ୍ରମଣ ହେଉ ଅବା ଦଳୀୟ ସଭାରେ ମହିଳା କର୍ମୀଙ୍କୁ ଦୁର୍ବ୍ୟବହାର ହେଉ। ଏଭଳି ଅନେକ ଘଟଣାରେ ବିଧାୟକ ପ୍ରଶାନ୍ତ ଜଗଦ୍ଦେବ ଚର୍ଚ୍ଚାକୁ ଆସୁଛନ୍ତି। ତେବେ ନିଜର ଚିରାଚରିତ ପ୍ରକୃତି ଲାଗି ବିଜେଡିରୁ ନିଲମ୍ବିତ ହୋଇଥିଲେ ମଧ୍ୟ ବିଧାୟକ ନିଜକୁ କାବୁ ରଖିପାରୁନାହାନ୍ତି।

ଗତକାଲି ରାତିରେ ପୁଣି ବିଧାୟକ ଜଗଦ୍ଦେବ ବାଣପୁର ବ୍ଲକ ତୁମୁରାପୁଟ ପଞ୍ଚାୟତର ଆଶାୟୀ ସରପଞ୍ଚ ପ୍ରାର୍ଥୀନୀ ମିନା ବେହେରାଙ୍କ ସ୍ୱାମୀ ବାବୁଲା ବେହେରାଙ୍କୁ ପ୍ରାର୍ଥୀପତ୍ର ଦାଖଲ ନକରିବା ପାଇଁ ଧମକାଉଥିବାର ଏକ ଅଡ଼ିଓ ଭାଇରଲ ହେବାରେ ଲାଗିଛି। ତେବେ ଉକ୍ତ ଘଟଣା ବର୍ତ୍ତମାନ ଆହୁରି ଭୟଙ୍କର ମୋଡ଼ ନେବାରେ ଲାଗିଛି।

ଆଜି ସଂନ୍ଧ୍ୟାରେ ବାଣପୁର ଥାନାରେ ହାଜର ହୋଇ ତାଙ୍କର ଏବଂ ତାଙ୍କ ପରିବାର ସଦସ୍ୟ ମାନଙ୍କ ଜୀବନର ସୁରକ୍ଷା ପ୍ରଦାନ ପାଇଁ ଆଇଆଇସିଙ୍କୁ ମିନା ବେହେରା ଏକ ଲିଖିତ ନିବେଦନ କରିଛନ୍ତି। ଉକ୍ତ ଅନୁରୋଧ ପତ୍ରରେ ମିନା ଲେଖିଛନ୍ତି କି ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବ ଗତକାଲି ସଂନ୍ଧ୍ୟାରେ ତାଙ୍କ ସ୍ୱାମୀଙ୍କୁ ଫୋନ ମାଧ୍ୟମରେ ଧମକାଇଥିଲେ। ଯଦି ମିନା ପ୍ରାର୍ଥୀପତ୍ର ଦାଖଲ କରନ୍ତି ତେବେ ସୁବିଧା ଦେଖିକି ତାଙ୍କ ବ୍ୟବସ୍ଥା କରିବେ ବୋଲି ବିଧାୟକ ଧମକାଇଥିଲେ।

ଏହାପରେ ମିନା ଏବଂ ତାଙ୍କ ପରିବାରବର୍ଗ ଭୟଭୀତ ଅବସ୍ଥାରେ ଥିବା ବେଳେ ଗତକାଲି ରାତି ଦୁଇ ଟା ରେ କେତେଜଣ ବିଜେଡି ନେତା ମାନେ ପୁନଶ୍ଚ ମିନାଙ୍କୁ ଧମକାଇଥିବା ଉଲ୍ଲେଖ କରିଛନ୍ତି। ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ମିନା ସରପଞ୍ଚ ଆଶାୟୀ ପ୍ରାଥୀ ଥିବା ବେଳେ ତାଙ୍କୁ ସୁରକ୍ଷା ଦେବା ପୋଲିସର ନୈତିକ ଦାଇତ୍ୱ ବୋଲି ମିନା କହିଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ନୀଳାଦ୍ରିପ୍ରସାଦ ପଞ୍ଚାୟତରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ନୀଳାଦ୍ରିପ୍ରସାଦ ଜଙ୍ଗଲରେ ଗୁଳିମାଡ଼ ହୋଇଥିବା ଖବର ହସ୍ତଗତ ହୋଇଛି। ଏହି ଘଟଣାରେ ଜଣେ ବିଜେଡ଼ି ନେତା ଅଳ୍ପକେ ବର୍ତ୍ତି ଯାଇଛନ୍ତି। ତେବେ ଏ ନେଇ ବାଣପୁର ଥାନାରେ ଏକ ଲିଖିତ ଅଭିଯୋଗ ହୋଇଛି। ଅଭିଯୋଗ କରିଛନ୍ତି ରିଗିଡିସିମା ଗ୍ରାମର ନକୁଳ ଶବରଙ୍କ ପୁତ୍ର ଲୋକନାଥ ଶବର(୪୭)।

ଅଭିଯୋଗ ମୁତାବକ ସୋମବାର ରାତି ପାଖାପାଖି ୮ ଘଟିକା ସମୟରେ ଲୋକନାଥ ନୀଳାଦ୍ରିପ୍ରସାଦ ଉପସ୍ୱାସ୍ଥ୍ୟ କେନ୍ଦ୍ର ନିକଟସ୍ଥ ଏକ ଜଳଖିଆ ଦୋକାନରୁ କାମ ସାରି ସ୍କୁଟି ଯୋଗେ ନିଜ ଗ୍ରାମ ରିଗିଡିସିମାକୁ ଫେରୁଥିବାବେଳେ ବଙ୍କାଡ଼ଗଡ଼ ଜଙ୍ଗଲ ରାସ୍ତାରେ ହଠାତ ତାଙ୍କ ଉପରକୁ ଏକ ରାଉଣ୍ଡ ଗୁଳି ଚାଳନା ହୋଇଥିଲା। ସୌଭାଗ୍ୟବଶତଃ ଲୋକନାଥ ଗୁଳିମାଡ଼ରୁ ବର୍ତ୍ତିଯାଇଥିଲେ। ଲୋକନାଥ ଏଥିରେ ଭୟଭୀତ ହୋଇ କ୍ଷିପ୍ର ଗତିରେ ଗାଡ଼ିଚଳାଇ କିଛି ବାଟ ଅତିକ୍ରମ କଲା ପରେ ନିଜ ସମ୍ପର୍କୀୟଙ୍କୁ ଏ ବିଷୟରେ ଅବଗତ କରାଇଥିଲେ। ଏହାପରେ ଉକ୍ତ ଖବର ବିଜୁଳି ବେଗରେ ସମଗ୍ର ଅଞ୍ଚଳରେ ଖେଳିଯାଇଥିଲା। ଘଟଣାସ୍ଥଳରେ ଶହ ଶହ ଜନସାଧାରଣ ରୁଣ୍ଡହେଲା ପରେ ପୋଲିସକୁ ସୂଚନା ଦେଇଥିଲେ ଲୋକନାଥ। ସଙ୍ଗେ ସଙ୍ଗେ ବାଣପୁର ଆଇଆଇସି ରଶ୍ମିରଞ୍ଜନ ସାହୁ ନିଜ ଟିମ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଦେଇଥିଲେ।

ଅନୁରୂପ ଭାବେ ମଙ୍ଗଳବାର ମଧ୍ୟ ଦିନତମାମ ପୋଲିସ ତଦନ୍ତ ଜାରି ରଖିଥିବା ବେଳେ ପୋଲିସ ହାତରେ କୌଣସି ସୁରାକ ଲାଗିପାରିନାହିଁ। ତେବେ ଏହା ପୂର୍ବଶତ୍ରୁତାରୁ ହୋଇଥାଇପାରେ ବୋଲି ଲୋକନାଥ ସନ୍ଦେହ କରି ଏତଲାରେ କିଛି ବ୍ୟକ୍ତିବିଶେଷଙ୍କ ନାମ ଉଲ୍ଲେଖ କରିଥିବାର ଜଣାପଡିଛି। ଅପରପକ୍ଷେ ଲୋକନାଥ ମଧ୍ୟ ନୀଳାଦ୍ରିପ୍ରସାଦ ପଞ୍ଚାୟତର ଜଣେ ପୁରୁଖା ବିଜେଡି ନେତା ଭାବେ ପରିଚିତ। ତେଣୁ ଆଗକୁ ପଞ୍ଚାୟତ ନିର୍ବାଚନ ଆସିବାକୁ ଥିବାବେଳେ ଗୁଳିକାଣ୍ଡର ଏହା ମଧ୍ୟ ଏକ ପ୍ରମୁଖ କାରଣ ହୋଇଥାଇପାରେ ବୋଲି ଅନୁମାନ କରାଯାଉଛି।

ତେବେ ଏହି ପରିପ୍ରେକ୍ଷୀରେ ବାଣପୁର ପୋଲିସ କେସ ନମ୍ବର ୩୮୦/୨୧, ଦଫା ୩୦୭, ୨୫ ଓ ୨୭ ଆରମ୍ସ ଆକ୍ଟ ରେ ଏକ ମାମଲା ରୁଜୁକରି ତଦନ୍ତ ଜାରିରଖିଛି। ଉକ୍ତ କେସର ତଦନ୍ତକାରି ଅଧିକାରୀ ହେଉଛନ୍ତି ଏସଆଇ ରାଜକିଶୋର ବେହେରା।

ସୀତାରାମ ଅଗ୍ରୱାଲ

ଚିଲିକା: କୌଣସି କଥାକୁ ନେଇ ବଚସା ହେବାରୁ ଜଳଖିଆ ଦୋକାନରେ ଗ୍ରାହକଙ୍କୁ ଛୁରାମାଡ ହୋଇଥିବା ଅଭିଯୋଗ ହୋଇଛି। ଛୁରାମାଡରେ ଗ୍ରାହକଜଣଙ୍କୁ ମେଡିକାଲରେ ଭର୍ତ୍ତି କରାଯାଇଛି। ଖୋର୍ଦ୍ଧା ଜିଲ୍ଲା ନାଚୁଣୀ ଫାଣ୍ଡି ଅନ୍ତର୍ଗତ ବଉଳାବନ୍ଧ ଗ୍ରାମରେ ଏଭଳି ଏକ ଅଭାବନୀୟ ଘଟଣା ଘାଟିଯାଇଛି।

ଅଭିଯୋଗ ମୁତାବକ ଖୋର୍ଦ୍ଧା ଜିଲ୍ଲା ବଉଳାବନ୍ଧ ଗ୍ରାମ ଛକରେ ଦେବେନ୍ଦ୍ର ସାହୁଙ୍କ ଜଳଖିଆ ଦୋକାନ ରହିଛି। ଗତକାଲି ରାତିରେ ଦେବେନ୍ଦ୍ର ସାହୁଙ୍କ ଜଳଖିଆ ଦୋକାନକୁ ଉକ୍ତ ଗ୍ରାମର ମୁନା ବେହେରା ଜଳଖିଆ ଖାଇବା ନିମନ୍ତେ ଯାଇଥିଲେ। ତେବେ କୌଣସି କଥାକୁ ନେଇ ଦୋକାନୀ ଦେବେନ୍ଦ୍ର ଓ ଗ୍ରାହକ ମୁନାଙ୍କ ମଧ୍ୟରେ ବଚସା ସୃଷ୍ଟି ହୋଇଥିଲା। ଦେଖୁ ଦେଖୁ ବଚସା ଝଗଡା ରୁପନେଲା। ମୁନାକୁ ଦେବେନ୍ଦ୍ର ଜାତିଆଣ ଆକ୍ଷେପ କରିବା ସହ ତାଙ୍କର ଦୁଇ ସହଯୋଗୀ ବିଭୁତି ସାହୁ ଏବଂ ଧର୍ମେନ୍ଦ୍ର ସାହୁଙ୍କ ସହ ମିସି ମୁନାଙ୍କୁ ମରଣାନ୍ତକ ଆକ୍ରମଣ କରିଥିଲେ। ଏପରିକି ଛୁରାରେ ଆକ୍ରମଣ କରୁଥିବାବେଳେ ଛୁରାଟି ମୁନାଙ୍କ ପେଟରେ ବାଜିଥିଲା ଏବଂ ମୁନାଙ୍କୁ ଗୁରୁତର ଅବସ୍ଥାରେ ଗ୍ରାମବାସୀ ବାଣପୁର ମେଡିକାଲରେ ଭର୍ତ୍ତି କରିଥିଲେ।

ତେବେ ଏ ସଂକ୍ରାନ୍ତରେ ବାଣପୁର ଥାନାରେ କେସ ନମ୍ବର ୩୨୫/୨୧ ରେ ଏକ ମାମଲା ରୁଜୁ କରାଯାଇଛି। ଏବଂ ସମସ୍ତ ତିନି ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିବା ନାଚୁଣୀ ଫାଣ୍ଡି ଅଧିକାରୀ ମୁକେଶ ବେହେରା ସୂଚନା ଦେଇଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଗତକାଲି ରାତ୍ରିରେ ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ସାନସିରେଇପୁର ଗ୍ରାମର ଜଣେ ଯୁବକ ବିଷ ପିଇ ଆତ୍ମହତ୍ୟା କରିଥିବାର ଅଭିଯୋଗ ହୋଇଛି। ଅଭିଯୋଗ ମୁତାବକ ସାନସିରେଇପୁର ଗ୍ରାମର ସୁଶାନ୍ତ ବେହେରା (୨୦) କୌଣସି କାରଣ ବଶତଃ ଗତକାଲି ରାତିରେ ବିଷ ପିଇଦେଇଥିଲେ। ପରିବାର ଲୋକ ସଙ୍ଗେସଙ୍ଗେ ରାତି ପ୍ରାୟ ୧୦.୩୦ ଘଟିକା ସମୟରେ ସୁଶାନ୍ତଙ୍କୁ ବାଣପୁର ମେଡିକାଲରେ ଭର୍ତ୍ତି କରିଥିଲେ।

ତେବେ ସୁଶାନ୍ତ ବିଷ ପିଇବାସହ ପ୍ରଚୁର ମଦ ମଧ୍ୟ ପିଇଥିଲେ। ଫଳରେ ଡାକ୍ତର ତାଙ୍କ ପେଟ ସଫା କରି ଗୁରୁତର ଅବସ୍ଥାରେ ତାଙ୍କୁ ଭୁବନେଶ୍ୱର କ୍ୟାପିଟାଲ ହସ୍ପିଟାଲ ସ୍ଥାନାନ୍ତରିତ କରିଦେଇଥିଲେ। ବାଟରେ ଗଲା ବେଳକୁ ଟାଙ୍ଗୀ ନିକଟରେ ଅବସ୍ଥା ଅଣାୟତ୍ତ ହେବାରୁ ସୁଶାନ୍ତଙ୍କୁ ପରିବାର ଲୋକେ ଟାଙ୍ଗୀ ମେଡିକାଲରେ ଭର୍ତ୍ତି କରିଥିଲେ। ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରି ଟାଙ୍ଗୀ ପୋଲିସକୁ ସୂଚନା ଦେଇଥିଲେ।

ଟାଙ୍ଗୀ ପୋଲିସ ଡାକ୍ତରଖାନାରେ ପହଞ୍ଚି ଶବ ଜବତ କରିବାସହ ବାଣପୁର ପୋଲିସକୁ ଖବର ଦେଇଥିବାର ଟାଙ୍ଗୀ ଆଇଆଇସି ବିଜୟ କୁମାର ମଲ୍ଲିକ ସୂଚନା ଦେଇଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଆଜି ଅବକାରୀ ବିଭାଗ ବାଣପୁର ଥାନା ଅନ୍ତର୍ଗତ ଦାଶରଥୀପୁର ଅଞ୍ଚଳରେ ଚଢ଼ାଉ କରି ବିପୁଳ ପରିମାଣର ଦେଶୀ ମଦ ଜବତ କରିଛି। ସୂଚନା ମୁତାବକ ଅନେକ ସମୟରେ  କୋଷରଡ଼ା ଅଞ୍ଚଳରୁ ଦେଶୀ ମଦ ଆଣି ବେପାରୀମାନେ ବାଣପୁରରେ ବିକ୍ରି କରୁଥିବା ଅଭିଯୋଗ ହେଉଥିଲା। ତେଣୁ

ଆଜି ସକାଳେ ଟାଙ୍ଗୀ ଅବକାରୀ ଇନ୍ସପେକ୍ଟର ଆଲୋକ ପ୍ରଧାନ ଏବଂ ବାଲୁଗାଁ ଅବକାରୀ ଏସଆଇ ମନୋଜ କୁମାର ବାରିକ ବାଣପୁର ସବ ଜେଲ ନିକଟରେ ବେପାରୀମାନଙ୍କୁ ଧରିବା ପାଇଁ ଛପି ରହିଥିଲେ। ସେହି ସମୟରେ କୋଷରଡ଼ା ଅଞ୍ଚଳରୁ ଦେଶୀ ମଦ ଧରି ଦୁଇ ବେପାରୀ ଦାଶରଥିପୁର ଅଞ୍ଚଳକୁ ଯାଉଥିଲେ। କିନ୍ତୁ ଦୂରରୁ ଅବକାରୀ ଅଧିକାରୀଙ୍କୁ ଦେଖି ବେପାରୀମାନେ ଗାଡ଼ି ଛାଡି ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏ ବାବଦରେ ଅବକାରୀ ବିଭାଗ ଗାଡ଼ି ଦୁଇଟି ଜବତ କରିବା ସହ ୩୦୦ ଲିଟର ଦେଶୀ ମଦ ଘଟଣାସ୍ଥଳରୁ ଜବତ କରିଥିଲା।

ତେବେ ଏହି ପରିପ୍ରେକ୍ଷୀରେ ପିଆର ନମ୍ବର ୩୯ ଏବଂ ୪୦ ରେ ଦୁଇ ଗୋଟି ଫେରାର ମାମଲା ଅବକାରୀ ବିଭାଗ ରୁଜୁ କରି ତଦନ୍ତ ଜାରି ରଖିଥିବାର ସୂଚନା ମିଳିଛି।

ସୀତାରାମ ଅଗ୍ରୱାଲ

ବାଣପୁର: ଆଜି ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ଥାନା ଅଞ୍ଚଳରୁ ଦୁଇ ଜଣ ଚୋରା ଦେଶୀ ମଦ ବେପାରୀଙ୍କୁ ଗିରଫ କରିଛି ବାଣପୁର ପୋଲିସ। ସୂଚନା ମୁତାବକ ବାଣପୁର ଥାନା ଅଧିନସ୍ଥ କୁରୁଞ୍ଜିପୁର ଗ୍ରାମରେ ଦେଶୀ ଚୋରା ମଦ କାରବାର ଚାଲିଥିବାର ଖବର ପୋଲିସ ପାଇଥିଲା। ଖବର ପାଇବା ପରେ ବାଣପୁର ଥାନା ଏସଆଇ ରାଜକିଶୋର ବେହେରା ଏବଂ ପ୍ରସନ୍ନ କୁମାର ଜେନା ନିଜ ଟିମ ସହ ସାଦା ପୋଷାକରେ ଉକ୍ତ ଗ୍ରାମରେ ଚଢ଼ାଉ କରି ଦୁଇ ଅଭିଯୁକ୍ତଙ୍କୁ ଗିରଫ କରିଥିଲେ।

ଅଭିଯୁକ୍ତ ଦ୍ବୟ ହେଲେ ରତିକାନ୍ତ ପଲେଇ ଏବଂ ମୋଚିରାମ ମୁଦୁଲି। ପୋଲିସ ସେମାନଙ୍କ ନିକଟରୁ ୪୯.୫ ଲିଟର ଦେଶୀ ମଦ ଜବତ କରିବା ସହ ଉଭୟଙ୍କ ବିରୋଧରେ ବାଣପୁର ଥାନାରେ କେସ ନମ୍ବର ୨୭୨ ଏବଂ ୨୭୩ ରେ ଦୁଇ ଗୋଟି ମାମଲା ରୁଜୁ କରି କୋର୍ଟଚାଲାଣ କରିଥିବାର ଆଇଆଇସି ରଶ୍ମିରଂଜନ ସାହୁ ସୂଚନା ଦେଇଛନ୍ତି।