Tag: ବାଲୁଗାଁ

ବାଲୁଗାଁ: ବାଲୁଗାଁ ମହାବିଦ୍ୟାଳୟର ଜାତୀୟ ସେବା ଯୋଜନା ଓ ଯୁବ ରେଡ଼କ୍ରସ ପକ୍ଷରୁ ମିଳିତ ଭାବେ ଅନ୍ତର୍ଜାତୀୟ ମହିଳା ଦିବସ ଅନୁଷ୍ଠିତ ହୋଇଯାଇଛି। ଅଧ୍ୟକ୍ଷ ଡକ୍ଟର ଲକ୍ଷ୍ମୀଧର ସୁବୁଦ୍ଧିଙ୍କ ସଭାପତିତ୍ୱରେ ଅନୁଷ୍ଠିତ ଉକ୍ତ କାର୍ଯ୍ୟକ୍ରମରେ ପ୍ରଥମେ ଛାତ୍ରୀ ପ୍ରଜ୍ଞାସ୍ମିତା ସାହୁ ଏକ ମାତୃବନ୍ଦନା ଗାନ କରିବା ସହ ମହିଳା ଦିବସର ପ୍ରାସଙ୍ଗିକତା ଉପସ୍ଥାପନା କରିଥିଲେ।

ଏହାପରେ ବରିଷ୍ଠ ଅଧ୍ୟାପିକା ଡକ୍ଟର ମୋନାଲିସା ମାନସିଂ ମହିଳାମାନଙ୍କ ମର୍ଯ୍ୟାଦା ସମ୍ପର୍କରେ ପୁରୁଷମାନଙ୍କର ଦୃଷ୍ଟିକୋଣ ପରିବର୍ତ୍ତନ ହେବା ସମ୍ପର୍କରେ ଆଲୋକପାତ କରିଥିଲେ। ଜାତୀୟ ସେବା ଯୋଜନାର କାର୍ଯ୍ୟକ୍ରମ ଅଧିକାରୀ ଅଧ୍ୟାପିକା ରୀନା ରାଉତ ସମ୍ପ୍ରତି ବୌଦ୍ଧିକ ଓ ସାଂସ୍କୃତିକ କ୍ଷେତ୍ରରେ ମହିଳାମାନଙ୍କର ଆଧିପତ୍ୟ ବିଷୟରେ ସୂଚନା ଦେଇଥିଲେ।

ରେଡ଼କ୍ରସ ଅଧିକାରୀ ଅଧ୍ୟାପିକା ମନସ୍ବିନୀ ପଟ୍ଟନାୟକ ପୁରୁଷ ପ୍ରଧାନ ସମାଜରେ ଦେଖାଯାଉଥିବା ନାରୀବାଦର ସ୍ୱର ସହିତ “ଯେଉଁଠି ନାରୀ ସେଇଠି ପ୍ରଗତି”ସମ୍ପର୍କରେ ନିଜର ଶାଣିତ ସ୍ୱର ଉପସ୍ଥାପନ କରିଥିଲେ। ଯୁକ୍ତ ଦୁଇ ଅଧ୍ୟକ୍ଷ ସୁବାସ ଚନ୍ଦ୍ର ଶ୍ରୀଚନ୍ଦନ ସମଗ୍ର ବିଶ୍ୱରେ ମହିଳା ମାନଙ୍କର ସାମାଜିକ ଓ ରାଜନୈତିକ ସ୍ଥିତି ସମ୍ପର୍କରେ ବକ୍ତବ୍ୟ ପ୍ରଦାନ କରିଥିଲେ। ଅଧ୍ୟକ୍ଷ ନିଜର ସଭାପତୀୟ ଅଭିଭାଷଣରେ ନାରୀମାନଙ୍କ ସମ୍ପର୍କରେ ଥିବା ନକରାତ୍ମକ ଚିନ୍ତାଧାରାକୁ ପରିହାର କରି ସେମାନଙ୍କ ପ୍ରତି ସମ୍ବେଦନଶୀଳତା ପ୍ରକାଶ କଲେ ସମାଜର ଯଥାର୍ଥ ବିକାଶ ହୋଇପାରିବ ବୋଲି କହିଥିଲେ।

ଅଧ୍ୟାପକ ମୃଡ଼ାଣି ଶଙ୍କର ପ୍ରସାଦ ମିଶ୍ର, ପତିତପାବନ ପଣ୍ଡା, ବନ୍ଦନା ଦାସ, କୀର୍ତ୍ତିମୟୀ ବାରିକ ବିଶ୍ୱ ମହିଳା ଦିବସର ବାର୍ତ୍ତା ବିଶ୍ଳେଷଣ କରିଥିଲେ। ଅଧ୍ୟାପକ ଡକ୍ଟର କୈଳାସ ଚନ୍ଦ୍ର ମହାରଣା କାର୍ଯ୍ୟକ୍ରମ ସଂଯୋଜନା କରିଥିଲେ।

ଏହି ଅବସରରେ ମହିଳା ଦିବସ ଉପଲକ୍ଷେ ସଭାରେ ଏକ କେକ୍ କଟାଯାଇ ସମସ୍ତଙ୍କୁ ପରିବେଷଣ କରାଯାଇଥିଲା। ଧନ୍ୟବାଦ ଅର୍ପଣ କରିଥିଲେ ଅଧ୍ୟାପିକା ସ୍ୱାତୀ ସ୍ଵାଗତିକା ସାହୁ।

ବାଲୁଗାଁ: ଆଗକୁ ଆସୁଛି ଦୋଳ ପର୍ବ।ଗାଁ ଗଣ୍ଡାରେ ଯାନିଯାତ୍ରା। ବାଲୁଗାଁ,ବାଣପୁର ତଥା ଆଖପାଖ ଅଞ୍ଚଳରେ ଚଳଚଞ୍ଚଳ ହୋଇଉଠିଛି ବ୍ୟବସାୟିକ ପ୍ରତିଷ୍ଠାନ। ଏହି ପରିପ୍ରେକ୍ଷୀରେ ବ୍ୟବସାୟିକ ଦୃଷ୍ଟି କୋଣରୁ ତଥା ସୁଲଭ ମୂଲ୍ୟରେ ପୋଷାକପତ୍ର,ଷ୍ଟେସନାରୀ ସାମଗ୍ରୀ ଠାରୁ ଆରମ୍ଭ କରି ଘରକରଣା ସାମଗ୍ରୀ ଉପଲବ୍ଧ ରହିଥିବା ମେଗା ସପିଙ୍ଗ ବଜାର ବାଲୁଗାଁ ହନୁମାନ ପରିବା ମାର୍କେଟ ଠାରେ ଉଦଘାଟିତ ହୋଇଯାଇଛି। ଏହି ମେଗା ସପିଙ୍ଗ ବଜାରକୁ ଏନଏସି ଅଧ୍ୟକ୍ଷା ସୁକାନ୍ତି ପାଇକରାୟ ଉଦଘାଟନ କରିଥିଲେ।

ଉକ୍ତ କାର୍ଯ୍ୟକ୍ରମରେ ସମସ୍ତ କାଉନସିଲର, ଜୟହିନ୍ଦ ଫାଉଣ୍ଡେସନ ସମ୍ପାଦକ ସେକ କୌଶର, ଆଇନଜୀବୀ ବିରଞ୍ଚି ନାୟକ, ଆଇନଜୀବୀ ସନ୍ଦୀପ କୁମାର ମହାପାତ୍ର, ପତ୍ରକାର ମିର ମକୁଦଅଲୀ, ସୟଦ ଲିୟାକତ ଅଲୀ, ସେକ ରୋଶନ, ସପିଙ୍ଗ ବଜାର ଏମଡି ମହମଦ ସାବିର, ପରିଚାଳକ ଅଜୟ ସାମଲ ପ୍ରମୁଖ ଉପସ୍ଥିତ ଥିଲେ।

ଏହି ସପିଙ୍ଗ ବଜାର ଦୀର୍ଘ ଏକ ମାସ ଧରି ଚାଲୁ ରହିବା ସହ ଗ୍ରାହକଙ୍କ ଚାହିଦା ମୁତାବକ ସାମଗ୍ରୀ ସୁଲଭ ମୂଲ୍ୟରେ ଯୋଗାଇ ଦେବାକୁ ମେଗା ବଜାର ଏମଡି ସାବିର କହିଛନ୍ତି। ଏଥିସହିତ ଗ୍ରାହକଙ୍କୁ ଆକୃଷ୍ଟ କରିବାକୁ ଦୈନନ୍ଦିନ ମେଗା ବଜାର ପରିସରରେ ବିଭିନ୍ନ ସାଂସ୍କୃତିକ,କମେଡି କାର୍ଯ୍ୟକ୍ରମ ପରିବେଷଣ କରାଯିବା ନେଇ ପରିଚାଳକ ଶ୍ରୀ ସାମଲ କହିଛନ୍ତି।

ବାଲୁଗାଁ: ବାଲୁଗାଁ ସ୍ଥିତ ଶାଳିଆ ପ୍ରେସ କ୍ଲବ ପକ୍ଷରୁ ନୂତନ ଉପଖଣ୍ଡ ଆରକ୍ଷୀ ଅଧିକାରୀ ସଞ୍ଜୟ କୁମାର ପଟ୍ଟନାୟକଙ୍କୁ ସ୍ୱାଗତ ସମ୍ବର୍ଦ୍ଧନା ଜଣାଇବା ସହ ବାଲୁଗାଁ-ବାଣପୁର ଅଞ୍ଚଳର ବହୁବିଧ ସମସ୍ୟା ନେଇ ବିସ୍ତୃତ ଆଲୋଚନା କରିଥିଲେ। ପ୍ରକାଶ ଥାଉକି ବାଲୁଗାଁ-ବାଣପୁର ଅଞ୍ଚଳରେ ଦିନକୁଦିନ ଚୋରି, ଡକାୟତି, ରାହଜାନି, ଚୋରା ଦେଶୀମଦ କାରବାର, ଗଞ୍ଜେଇ ଚୋରା ଚାଲାଣ, ପାରିବାରିକ କଳହ ଆଦି ବହୁମାତ୍ରାରେ ବଢି ଚାଲିଛି। ଏହାର ନିରାକରଣ ନିମିତ୍ତ କଡା ପଦକ୍ଷେପ ଗ୍ରହଣ କରିବାକୁ ଏସଡିପିଓ ଶ୍ରୀ ପଟ୍ଟନାୟକଙ୍କୁ କ୍ଲବ ପକ୍ଷରୁ ଅନୁରୋଧ କରାଯାଇଥିଲା।

ଏଥିସହିତ ଜୁଆ ଆଡ୍ଡା ଉପରେ ଚଢ଼ାଉ, ଟ୍ରାଫିକ ସମସ୍ୟା ଏବଂ ପାଟ୍ରୋଲିଂକୁ କଡାକଡି କରିବାକୁ ଆଲୋଚନା କରାଯାଇଥିଲା। ପ୍ରତିଟି ସମସ୍ୟା ଉପରେ ଗୁରୁତର ସହ ତଦନ୍ତ କରି ଏହାର ସମାଧାନ ଦିଗରେ ବିହିତ ପଦକ୍ଷେପ ଗ୍ରହଣ କରିବା ନେଇ ଶ୍ରୀ ପଟ୍ଟନାୟକ ପ୍ରତିଶ୍ରୁତି ଦେଇଛନ୍ତି।

ଉକ୍ତ ଆଲୋଚନାରେ କ୍ଲବ ସଭାପତି ଅଜିତ କୁମାର ସାହୁ, ସମ୍ପାଦକ ଅରୁଣ କୁମାର ପଣ୍ଡା, ଉପ ସଭାପତି ଶିବଶକ୍ତି ସାସମଲ, କୋଷାଧ୍ୟକ୍ଷ ସୁଧୀର କୁମାର ପାତ୍ର, ଆଇନ ପରାମର୍ଶଦାତା ସିତାରାମ ଅଗ୍ରୱାଲ, ପ୍ରଦୀପ କୁମାର ସେଠୀଙ୍କ ସମେତ ସମସ୍ତ ସଦସ୍ୟ ଉପସ୍ଥିତ ଥିଲେ।

ବାଲୁଗାଁ: ଆଜି ପୂର୍ବାହ୍ନରେ ବାଲୁଗାଁ ସ୍ଥିତ ଚିଲିକାରାଣୀ ଇଂରାଜୀ ମାଧ୍ୟମିକ ବିଦ୍ୟାଳୟ ସଭାଗୃହରେ ଶିକ୍ଷକ-ଅଭିଭାବକ ବୈଠକ ଅନୁଷ୍ଠିତ ହୋଇଯାଇଛି। ବିଦ୍ୟାଳୟ ଅଧ୍ୟକ୍ଷ ନୀଳାଦ୍ରି ଭୂଷଣ ବେହେରାଙ୍କ ପୌରହିତ୍ୟରେ ଭକ୍ତ ବୈଠକ ଅନୁଷ୍ଠିତ ହୋଇଥିବାବେଳେ ସମସ୍ତ ଶିକ୍ଷକ,ଶିକ୍ଷୟିତ୍ରୀ ଓ ଅଭିଭାବକମାନେ ଉପସ୍ଥିତ ଥିଲେ। ନିକଟରେ ବିଦ୍ୟାଳୟର ୧୨୦ ଜଣ ଛାତ୍ରଛାତ୍ରୀ ସିବିଏସଇ ଦଶମ ପରୀକ୍ଷା ଦେଉଥିବା ବେଳେ ଚଳିତ ମାସ ଶେଷ ସପ୍ତାହରୁ ଏଲକେଜି ଠାରୁ ନବମ ଶ୍ରେଣୀ ପର୍ଯ୍ୟନ୍ତ ପରୀକ୍ଷା ଅନୁଷ୍ଠିତ ହେବ।

ବିଦ୍ୟାଳୟରେ ପିଲାମାନଙ୍କ ପାଠପଢା ସାଙ୍ଗକୁ ଉତ୍ତମ ଶୈକ୍ଷିକ ପରିବେଶ ଓ ବିଦ୍ୟାଳୟ ଭିଲିଭୂମି ଅଗ୍ରଗତି ନିମନ୍ତେ ଅଭିଭାବକମାନେ ମତ ରଖୁଥିଲେ। ଦୀର୍ଘ ଦିନ ଧରି ବିଦ୍ୟାଳୟ ପରିଚାଳନା କମିଟି ଏବଂ ବିଦ୍ୟାଳୟର ଶିକ୍ଷକ-ଶିକ୍ଷୟିତ୍ରୀ, କର୍ମଚାରୀଙ୍କ ମଧ୍ୟରେ ତିକ୍ତତା ଲାଗି ରହିଥ‌ିବାରୁ ବିଭିନ୍ନ ସମସ୍ୟା ଦେଇ ଗତିକରୁଥିବା ଶିକ୍ଷକ ଶିକ୍ଷୟିତ୍ରୀମାନେ କହିଥିଲେ।

ସମସ୍ୟାର ସମାଧାନ ପାଇଁ ରବିବାର ବୈଠକ ଅନୁଷ୍ଠିତ ହୋଇଥିବାବେଳେ ପରିଚାଳନା କମିଟି ସଭାପତି, ସମ୍ପାଦକଙ୍କ ସମେତ ପ୍ରାୟତଃ ସଦସ୍ୟଙ୍କ ଅନୁପ‌ସ୍ଥିତ ଯୋଗୁଁ ଅଶାନ୍ତ ବାତାବରଣ ଦେଖାଯାଇଥିଲା। ଏପରିକି ବାରମ୍ବାର ବିଦ୍ୟାଳୟରେ ବୈଠକ କରାଯାଉଥିଲେ ସୁଦ୍ଧା କମିଟି ସଭାପତି, ସମ୍ପାଦକ ଏବଂ ଏକାଧିକ କାର୍ଯ୍ୟକାରିଣୀ ସଦସ୍ୟ ଅନୁପସ୍ଥିତ ରହୁଥିବା କାରଣରୁ ନିୟମାନୁସାରେ କୌଣସି ଗୁରୁତ୍ତ୍ୱପୂର୍ଣ୍ଣ ଆଲୋଚନା ସମ୍ଭବ ହେଇପାରୁନଥିବା ଅଧ୍ୟକ୍ଷ ଶ୍ରୀ ବେହେରା କହିଛନ୍ତି। ଯାହାଫଳରେ ବିଦ୍ୟାଳୟକୁ ସମସ୍ୟା ଦୂର କରିବା ନେଇ ନୂତନ କମିଟି ଗଠନ ପାଇଁ ଅଭିଭାବକମାନେ ଦାବି କରିଥିଲେ।

ଏହି ପରିପ୍ରେକ୍ଷୀରେ ସର୍ଵସଂମତି କ୍ରମେ ପୂର୍ବରୁ ଗୃହୀତ ଥିବା ପରିଚାଳନା କମିଟିକୁ ପ୍ରତ୍ୟାହୃତ କରି ନୂତନ କମିଟି କରିବାକୁ ନିଷ୍ପତ୍ତି ନିଆଯାଇଛି।ନୂତନ କମିଟି ଗଠନ ହେବା ପର୍ଯ୍ୟନ୍ତ ଅଭିଭାବକ ଓ ଶିକ୍ଷକ,ଶିକ୍ଷୟିତ୍ରୀଙ୍କୁ ନେଇ ଏକ ୭ ଜଣିଆ ଅସ୍ଥାୟୀ କମିଟି ଗଠନ କରାଯାଇଛି। ଉକ୍ତ କମିଟିରେ ଅଜିତ କୁମାର ସାହୁ, ରାଜୀବ କୁମାର ସେନାପତି,ଶିବ ପ୍ରସାଦ, ଧୀରେନ୍ଦ୍ର କୁମାର ପ୍ରଧାନ, ବିଦ୍ୟାଧର ସାହୁ, ଚିନ୍ମୟୀ ପଟ୍ଟନାୟକ, ମଧୁବାଳା ବଳିଆରସିଂ ପ୍ରମୁଖ ମନୋନୀତ ହୋଇଥିଲେ। ବିଦ୍ୟାଳୟ ଅନ୍ତର୍ଗତ ସମସ୍ତ କାର୍ଯ୍ୟ ସୁରୁଖୁରୁରେ ପରିଚାଳନା କରିବା ନେଇ ମନୋନୀତ ସଦସ୍ୟମାନେ ମତ ପ୍ରକାଶ କରିଥିଲେ।

ସୂଚନା ଥାଉକି ଚିଲିକାରାଣୀ ଇଂରାଜୀ ମାଧ୍ୟମିକ ବିଦ୍ୟାଳୟରେ ଏଲକେଜି ଠାରୁ ଏକାଦଶ ଶ୍ରେଣୀ ପର୍ଯ୍ୟନ୍ତ ପାଠ୍ୟକ୍ରମ ଥିବାବେଳେ ୯୦୦ ରୁ ଉର୍ଦ୍ଧ୍ବ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି। ୩୫ ଜଣ ଶିକ୍ଷକ, ଶିକ୍ଷୟିତ୍ରୀ ଏବଂ ୩୦ ଜଣ ଅଣଶିକ୍ଷକ କର୍ମଚାରୀ ନିଯୁକ୍ତ ହୋଇଛନ୍ତି। ମାତ୍ର ପରିଚାଳନା କମିଟିର ମନମୁଖୀ ଶାସନ ଏବଂ ଶିକ୍ଷକ ଓ ଅଣଶିକ୍ଷକ କର୍ମଚାରୀଙ୍କ ତିକ୍ତତା ଯୋଗୁ ଛାତ୍ରଛାତ୍ରୀଙ୍କ ଶିକ୍ଷା ବ୍ୟବସ୍ଥା ବାଧାପ୍ରାପ୍ତ ହେଉଥିବାବେଳେ ଅଭିଭାବକ ମହଲରେ ଅସନ୍ତୋଷର ବାତାବରଣ ଦେଖାଦେଇଛି। ଏସମ୍ବନ୍ଧରେ କମିଟି ସଭାପତି କିରଣ ପାତ୍ର ଓ ସମ୍ପାଦକ ଅରୁଣ କୁମାର ବରାଳଙ୍କ ସହ ଯୋଗାଯୋଗ ହୋଇପାରିନାହିଁ।

ବାଲୁଗାଁ: ଆଜି ପୂର୍ବାହ୍ନରେ ବାଲୁଗାଁ ଏନଏସି କାର୍ଯ୍ୟାଳୟ ସଭାଗୃହରେ ବ୍ଲକ ସ୍ତରୀୟ ଆଇନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଚିଲିକା ଶିଶୁ ବିକାଶ ପ୍ରକଳ୍ପ ଅଧିକାରିଣୀ ଅଞ୍ଜଳି ବାଳା ମଲ୍ଲିକଙ୍କ ତତ୍ୱବାଧାନରେ ଅନୁଷ୍ଠିତ କାର୍ଯ୍ୟକ୍ରମରେ ଚିଲିକା ବ୍ଲକ ଅଧ୍ୟକ୍ଷା ଜ୍ୟୋଷ୍ଣା ବେହେରା, ଉପାଧ୍ୟକ୍ଷ ଅରୁଣ ପଟ୍ଟନାୟକ, ବାଲୁଗାଁ ଏନଏସି ଉପାଧ୍ୟକ୍ଷ ଭଗବାନ ପ୍ରଧାନ, କାର୍ଯ୍ୟନିର୍ବାହୀ ଅଧିକାରୀ ପ୍ରାଣନାଥ ସେଠ, ଖୋର୍ଦ୍ଧା ଜିଲ୍ଲା ସାମାଜିକ କଲ୍ୟାଣ ଅଧିକାରିଣୀ ସୌଦାମିନୀ ଦାସ,ଦେବକୀ ସାହୁ, ସ୍ୱାସ୍ଥ୍ୟ କର୍ମଚାରୀ, ମିଶନଶକ୍ତି ସଭାପତି ସନ୍ତୋସି ପ୍ରମୁଖ ଯୋଗ ଦେଇଥିଲେ।

ବରିଷ୍ଠ ଆଇନଜୀବୀ ଦିଲ୍ଲୀପ କୁମାର ପଟ୍ଟନାୟକ ମହିଳା ସୁରକ୍ଷା ଆଇନ ସମ୍ପର୍କରେ ଅବଗତ କରାଇଥିଲେ। ସ୍ୱାଧୀନ ଭାରତରେ ମହିଳାମାନେ ଏବେ ସୁଦ୍ଧା ନିଜକୁ ଅସୁରକ୍ଷିତ ମନେ କରୁଛନ୍ତି। ପ୍ରତି ଘରେ ଘରେ ମହିଳା ମାନେ ପ୍ରତି ମୁହୂର୍ତ୍ତରେ ନିଜ ପରିବାର ହେଉ ଅବା ବାହ୍ୟ ପରିବେଶରେ ନିର୍ଯ୍ୟାତନାର ଶିକାର ହେଉଛନ୍ତି।

ପ୍ରତିଟି କ୍ଷେତ୍ରରେ ମହିଳାମାନେ ନିଜକୁ ଅବହେଳିତ ନଭାବି ନିଜ ସୁରକ୍ଷା ତଥା ନାର୍ଯ୍ୟ ଦାବି ପାଇଁ ଆଇନର ସହାୟତା ନେଇପାରିବେ ବୋଲି ବ୍ଲକ ଅଧ୍ୟକ୍ଷା ଶ୍ରୀମତୀ ବେହେରା କହିଥିଲେ। ମହିଳାଙ୍କୁ ସଂମାନ ଓ ସୁରକ୍ଷା ଦେବା ଆମ ସମସ୍ତଙ୍କର ପ୍ରାଥମିକତା।କନ୍ୟା ଭ୍ରୁଣ ହତ୍ୟାକୁ ବିରୋଧ, ସତୀଦାହ ପ୍ରଥା ବନ୍ଦ କରିବା, ସ୍ୱାମୀ ସ୍ତ୍ରୀ ମଧ୍ୟରେ ବିଛେଦ ହେଲେ ସ୍ତ୍ରୀକୁ ନାର୍ଯ୍ୟ ନ୍ୟାୟ ପ୍ରଦାନ ଦିଗରେ ମଞ୍ଚସିନ ଅତିଥିମାନେ ମତ ପ୍ରକାଶ କରିଥିଲେ।

ଉକ୍ତ କାର୍ଯ୍ୟକ୍ରମରେ ଅଙ୍ଗନବାଡ଼ି କର୍ମୀ, ଆଶା କର୍ମୀ, ସ୍ୱୟଂ ସହାୟକ ଗୋଷ୍ଠୀ ମହିଳା, ସିଆରପି, ଏମବିକେ, କଲେଜ ଛାତ୍ରୀଙ୍କ ସମେତ ଶତାଧିକ ମହିଳା ଉପସ୍ଥିତ ଥିଲେ।

ବାଲୁଗାଁ: ବାଲୁଗାଁ ମହାବିଦ୍ୟାଳୟର ଇଂରାଜୀ ଭାଷା ସାହିତ୍ୟ ସମାଜ ପକ୍ଷରୁ “ସାହିତ୍ୟ ଓ ଜୀବନ” ଶୀର୍ଷକ ଏକ କର୍ମଶାଳା ଅନୁଷ୍ଠିତ ହେବା ସହ ବାର୍ଷିକ ପୁରସ୍କାର ବିତରଣ ଉତ୍ସବ ମହାବିଦ୍ୟାଳୟର ଅଧ୍ୟକ୍ଷ ଡକ୍ଟର ଲଷ୍ମୀଧର ସୁବୁଦ୍ଧିଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମର ଆବାହିକା ତଥା ଇଂରାଜୀ ବିଭାଗ ମୁଖ୍ୟ ଅଧ୍ୟାପିକା ଡକ୍ଟର ମୋନାଲିସା ମାନସିଂହ ଅତିଥିମାନଙ୍କର ପରିଚୟ ପ୍ରଦାନ କରିଥିଲେ।

ଉକ୍ତ ଉତ୍ସବରେ ନିମନ୍ତ୍ରିତ ଅତିଥି ମାନଙ୍କୁ ସମ୍ବର୍ଦ୍ଧିତ କରିବା ପରେ ଅଧ୍ୟକ୍ଷ ଡକ୍ଟର ଲକ୍ଷ୍ମୀଧର ସୁବୁଦ୍ଧି ସ୍ୱାଗତ ଭାଷଣ ପ୍ରଦାନ କରିଥିଲେ। ଉତ୍ସବର ମୁଖ୍ୟ ଅତିଥି ତଥା ମହାବିଦ୍ୟାଳୟର ପ୍ରାକ୍ତନ ଅଧ୍ୟକ୍ଷ ଡକ୍ଟର କଳ୍ପନା ଦାଶ ଓ ମୁଖ୍ୟ ବକ୍ତା ତଥା ପ୍ରାକ୍ତନ ଇଂରାଜୀ ବିଭାଗ ମୁଖ୍ୟ ଡକ୍ଟର ଜୟନ୍ତୀ ଯୋଗଦେଇ ସାହିତ୍ୟ ଓ ସର୍ଜନଶୀଳତା ସହିତ ଦୈନନ୍ଦିନ ଜୀବନର ସମ୍ପର୍କ ପ୍ରସଙ୍ଗରେ ଆଲୋଚନା କରି ଶିକ୍ଷାର୍ଥୀମାନଙ୍କୁ ଅନୁପ୍ରାଣିତ କରିଥିଲେ। ଯୁକ୍ତ ଦୁଇ ଅଧ୍ୟକ୍ଷ ସୁବାଷ ଚନ୍ଦ୍ର ଶ୍ରୀଚନ୍ଦନ ମଧ୍ୟ ସାମ୍ପ୍ରତିକ ସମୟରେ ଇଂରାଜୀ ଭାଷା ସାହିତ୍ୟର ଗୁରୁତ୍ୱ ଓ ନିଯୁକ୍ତି ପ୍ରୟୋଜନୀୟତା ବିଷୟରେ ବକ୍ତବ୍ୟ ପ୍ରଦାନ କରିଥିଲେ। ଅଧ୍ୟାପକ ଡକ୍ଟର କୈଳାସ ଚନ୍ଦ୍ର ମହାରଣା କାର୍ଯ୍ୟକ୍ରମ ସଂଯୋଜନା କରିବା ସହ ସାହିତ୍ୟ, ସର୍ଜନଶୀଳତା ଓ ଦୃଷ୍ଟି ସମ୍ପ୍ରସାରଣର ବିଭିନ୍ନ ଦିଗ ଦିଗନ୍ତ ଉପରେ ବକ୍ତବ୍ୟ ଉପସ୍ଥାପନ କରିଥିଲେ।

ଏହି ଅବସରରେ ଛାତ୍ର ଛାତ୍ରୀ ମାନଙ୍କ ମଧ୍ୟରେ ଅନୁଷ୍ଠିତ ହୋଇଥିବା ଇଂରାଜୀ କଥନ, ଶ୍ରବଣ, ପଠନ ଲିଖନ ଦକ୍ଷତା ପ୍ରତିଯୋଗିତାରେ କୃତିତ୍ୱ ଅର୍ଜନ କରିଥିବା ଛାତ୍ର ଛାତ୍ରୀମାନଙ୍କୁ ଅତିଥିମାନେ ପୁରସ୍କୃତ କରିଥିଲେ। ଧନ୍ୟବାଦ ଅର୍ପଣ କରିଥିଲେ ଅଧ୍ୟାପକ ପତିତପାବନ ପଣ୍ଡା।

ବାଲୁଗାଁ: ଖୋର୍ଦ୍ଧା ଜିଲ୍ଲା ବାଲୁଗାଁ ନିକଟସ୍ଥ ପାରୀକଂସାରୀ ଗ୍ରାମରେ ପ୍ରଭୁ ତ୍ରିନାଥ ଦେବଙ୍କ ବାର୍ଷିକ ଉତ୍ସବ ଅନୁଷ୍ଠିତ ହେବାକୁ ଯାଉଛି। ଆସନ୍ତାକାଲି ତଥା ଫେବୃୟାରୀ ୧୦ ତାରିଖରେ ଉକ୍ତ ଗ୍ରାମରେ ପ୍ରଭୁ ତ୍ରିନାଥ ଦେବଙ୍କ ବାର୍ଷିକ ଉତ୍ସବ ଅନୁଷ୍ଠିତ ହେବ। ବାର୍ଷିକ ଉତ୍ସବ ଉପଲକ୍ଷେ ପ୍ରଭୁ ତ୍ରିନାଥ ଦେବଙ୍କ ମନ୍ଦିର ପ୍ରାଙ୍ଗଣରେ ଯଜ୍ଞ ଅନୁଷ୍ଠିତ ହେବ।

ସୋଲରୀ ପାହାଡ଼ ପାଦ ଦେଶରେ ଅବସ୍ଥିତ ଛୋଟିଆ ଗ୍ରାମ ପାରୀକଂସାରୀରେ ପ୍ରତି ବର୍ଷ ଭଳି ଚଳିତ ବର୍ଷ ମଧ୍ୟ ମହାଧୂମଧାମରେ ଉକ୍ତ ଉତ୍ସବ ପାଳନ କରାଯାଉଛି।

ଏହି ପରିପ୍ରେକ୍ଷୀରେ ନାଟ୍ୟକାର ଓ ନିର୍ଦ୍ଧେଶକ ଉପେନ୍ଦ୍ର କୁମାର ପରିଡାଙ୍କ ବଳିଷ୍ଠ କଳା କୌଶଳରେ ମଞ୍ଚସ୍ଥ ହେବାକୁ ଯାଉଥିବା ଅଶ୍ରୁସଜ୍ଜଳିତ ପାରିବାରିକ ନାଟକ “ଲୁଚି ଲୁଚି ବସି କିଏ କାନ୍ଦୁଛି” ପରିବେଷଣ ହେବ। ବାର୍ଷିକ ଉତ୍ସବରେ ଯୋଗ ଦେଇ ପ୍ରଭୁ ତ୍ରିନାଥ ଦେବଙ୍କ ଆଶୀର୍ବାଦ ଲାଭ କରିବା ସହ ସାମାଜିକ ନାଟକକୁ ଉପଭୋଗ କରିବା ପାଇଁ ଗ୍ରାମବାସୀ ନିବେଦନ କରିଛନ୍ତି।

ବାଲୁଗାଁ: ବାଲୁଗାଁ ସ୍ଥିତ ଶାଳିଆ ପ୍ରେସ କ୍ଲବରେ ୭୬ ତମ ସାଧାରଣତନ୍ତ୍ର ଦିବସ ପାଳିତ ହୋଇଯାଇଛି। କ୍ଲବ ସଭାପତି ଅଜିତ କୁମାର ସାହୁ ପତାକା ଉତ୍ତୋଳନ କରିଥିବା ବେଳେ ସମସ୍ତ ସଦସ୍ୟଙ୍କ ଗହଣରେ ଜାତୀୟ ସଙ୍ଗୀତ ଗାନ କରାଯାଇଥିଲା। ଭାରତ ମାତାକୀ ଜୟ ଏବଂ ମହାପୁରୁଷ ମାନଙ୍କ ଜୟ ଗାନ ଧ୍ୱନୀରେ ପ୍ରକମ୍ପିତ ହୋଇଥିଲା କ୍ଲବ ପରିସର।

ଏହି ଅବସରରେ ସଭାପତି ଶ୍ରୀ ସାହୁଙ୍କ ନେତୃତ୍ୱରେ ଶାଳିଆ ପ୍ରେସ କ୍ଲବ କୋର କମିଟି ସଦସ୍ୟମାନଙ୍କୁ ନେଇ ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା। ସଂଘକୁ ସୁଦୃଢ କରିବା, ଚଳିତ ବର୍ଷ ବିଭିନ୍ନ ଜନହିତକର କାର୍ଯ୍ୟକୁ ଗୁରୁତ୍ୱ, ନିରପେକ୍ଷ ଖବର ପ୍ରସାରଣ ଉପରେ ଗୁରୁତ୍ୱ ଏବଂ ସଂଘୀୟ ମନୋବଳକୁ ଆଗେଇ ନେବାପାଇଁ ଆଲୋଚନା କରାଯାଇଥିଲା।

ଉକ୍ତ ବୈଠକରେ ସଂଘର ନୂତନ ପରାମର୍ଶଦାତା ଭାବେ ସଞ୍ଜୀବ ସେନାପତି ଓ ତ୍ରିଲୋଚନ ସାହୁ, ଆଇନ ପରାମର୍ଶଦାତା ଭାବେ ସିତାରାମ ଅଗ୍ରୱାଲ ଓ ପ୍ରଦୀପ କୁମାର ସେଠୀ, ଉପସଭାପତି ଭାବେ ଶିବଶକ୍ତି ଶାସମଲ, ସମ୍ପାଦକ ଭାବେ ଅରୁଣ କୁମାର ପଣ୍ଡା, ସହ ସମ୍ପାଦକ ଭାବେ ମନୋରଞ୍ଜନ ବେହେରାଙ୍କୁ ମନୋନୀତ କରାଯାଇଥିଲା।

ସଂଘ ପକ୍ଷରୁ ସମସ୍ତ ନୂତନ କାର୍ଯ୍ୟକର୍ତ୍ତାଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ କରାଯାଇଥିଲା।କୋଷାଧ୍ୟକ୍ଷ ସୁଧୀର କୁମାର ପାତ୍ର ଧନ୍ୟବାଦ ଅର୍ପଣ କରିଥିଲେ।

ବାଲୁଗାଁ: ଆଜି ଅପରାହ୍ନରେ ୫ନଂ ଜାତୀୟ ରାଜପଥ ଚିଲିକା ବ୍ଲକ ଅଠରବାଟିଆ ପଞ୍ଚାୟତ ଅନ୍ତର୍ଗତ ଇଂଜନପୁର ଛକ ନିକଟରେ ଦୁଇଟି ବାଇକ ମୁହାଁମୁହିଁ ଧକ୍କା ଫଳରେ ଦୁଇ ଜଣ ଗୁରୁତର ହୋଇଛନ୍ତି। ସୂଚନା ମୁତାବକ ଗଞ୍ଜାମ ଜିଲ୍ଲା ରମ୍ଭା ଥାନା ଅନ୍ତର୍ଗତ ମିନିଛିନିପାଟଣା ଗ୍ରାମର ଅର୍ଜୁନ ବେହେରା (୩୮) ବ୍ୟବସାୟ ନିମନ୍ତେ ନିଜ ବାଇକ ଯୋଗେ ବାଲୁଗାଁ ମାଛ ଗୋଦାମକୁ ମାଛ କିଣିବାକୁ ଆସୁଥିବା ବେଳେ ଇଂଜନପୁର ଛକ ନିକଟରେ ଖଲ୍ଲିକୋଟ ଥାନା ଅନ୍ତର୍ଗତ ଲଙ୍ଗଳେଶ୍ୱର ବାକୁଟଗାଁର ପଙ୍କଜ ସାହୁ (୨୮) ବାଲୁଗାଁରୁ ବାଇକ ଯୋଗେ ନିଜ ଗ୍ରାମକୁ ଫେରୁଥିବା ବେଳେ ମୁହାଁମୁହିଁ ଧକ୍କା ହୋଇଥିଲା। ଫଳରେ ଦୁଇ ବାଇକ ଆରୋହିଙ୍କ ପ୍ରଚୁର ରକ୍ତସ୍ରାବ ହୋଇଥିବା ବେଳେ ଅଚେତ ଅବସ୍ଥାରେ ପଡିରହିଥିଲେ।

ଖବର ପାଇ ଦୁର୍ଘଟଣା ସ୍ଥଳରେ ବାଲୁଗାଁ ପୋଲିସ ପହଞ୍ଚି ଆହତ ଦ୍ୱୟଙ୍କୁ ଉଦ୍ଧାର କରି ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ମାତ୍ର ଉଭୟଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ବ୍ରହ୍ମପୁର ଏମକେସିଜି ଡାକ୍ତରଖାନାକୁ ପଠାଇ ଦିଆଯାଇଛି। ଘଟଣା ସ୍ଥଳରୁ ପୋଲିସ ଦୁର୍ଘଟଣା ଗ୍ରସ୍ତ ଦୁଇଟି ବାଇକ ଜବତ କରିବାସହ ତଦନ୍ତ ଜାରି ରଖିଛି।

ବାଣପୁର: ଖୋର୍ଦ୍ଧା ଜିଲ୍ଲା ଅବକାରୀ ଅଧିକ୍ଷକ ସୁମତି ତ୍ରିପାଠୀଙ୍କ ନିର୍ଦ୍ଦେଶ କ୍ରମେ ଟାଙ୍ଗୀ ରେଞ୍ଜ ଅବକାରୀ ନିରୀକ୍ଷକ ରାଧାକାନ୍ତ ଭୋଇଙ୍କ ତତ୍ୱାବଧାନରେ ବାଲୁଗାଁ ଅବକାରୀ ଅଧିକାରୀ ସୁଜିତ କୁମାର ମୁଦୁଲି ପାଟ୍ରୋଲିଂ କରୁଥିବା ବେଳେ ବାଣପୁର ଥାନା ଅନ୍ତର୍ଗତ ଅନ୍ତରକିଆରୀ ନିକଟରେ ଏକ ମୋଟର ସାଇକେଲ (ଗାଡି ନଂ ଓଡି ୦୨ ବିଜି ୬୩୧୦) ଦ୍ରୁତ ଗତିରେ ଯାଉଥିବା ଦେଖି ତାର ପିଛା କରିଥିଲେ। ନିକଟରେ ଥିବା ମେଘାମ୍ବରି ମନ୍ଦିର ଠାରେ ଅଟକାଇ ଥିବାବେଳେ ଗାଡି ପଛରେ ଏକ ବସ୍ତା ବନ୍ଧାଯାଇଥିବା ଦେଖି ତଲାସୀ ନେବାରୁ ସେଥିରୁ ୫୦୦ ପ୍ୟାକେଟ ମହୁଲି (୨୫୦ ଲିଟର) ମହୁଲି ସମେତ ମୋଟର ସାଇକେଲ ଜବତ କରାଯାଇଛି।

ଅଭିଯୁକ୍ତ ଜଣକ ବାଣପୁର ଥାନା ଅନ୍ତର୍ଗତ ବଡ଼ସିରେଇପୁର ଗ୍ରାମର ସୁରେନ୍ଦ୍ର ଦାସଙ୍କ ପୁଅ ଭଗବାନ ଦାସ।ଅଭିଯୁକ୍ତଙ୍କ ବିରୁଦ୍ଧରେ ମାମଲା ରୁଜୁ କରାଯାଇ କୋର୍ଟଚାଲାଣ କରାଯାଇଥିବା ବାଲୁଗାଁ ଅବକାରୀ ଅଧିକାରୀ ଶ୍ରୀ ମୁଦୁଲି କହିଛନ୍ତି। ଉକ୍ତ ଚଢ଼ାଉରେ ଏଏସଆଇ ସଞ୍ଜୟ କୁମାର ସୁବୁଦ୍ଧି,କନେଷ୍ଟବଳ ତୁଷାରକାନ୍ତ ଚମ୍ପତି,ଆଶିଷ ପ୍ରଧାନ, ଚିନ୍ମୟୀ ଦାସ, କାଳୁ ପ୍ରଧାନ ପ୍ରମୁଖ ଉପସ୍ଥିତ ଥିଲେ।

ବାଲୁଗାଁ: ବାଲୁଗାଁ ଉଚ୍ଚ ମାଧ୍ୟମିକ ବିଦ୍ୟାଳୟ ଆନୁକୂଲ୍ୟରେ “ବୀର୍ ବାଲ୍ ଦିବସ ଉତ୍ସବ” ପାଳିତ ହୋଇଯାଇଛି। ଭାରତ ସରକାରଙ୍କ ନିର୍ଦ୍ଦେଶକ୍ରମେ ତଥା ରାଜ୍ୟ ସରକାରଙ୍କ ଓସେପା ଦ୍ୱାରା ତ୍ୱରାନ୍ୱିତ ନିର୍ଦ୍ଦେଶନାମା ଅନୁସାରେ ଏକ ସପ୍ତାହ ବ୍ୟାପୀ ଛାତ୍ରଛାତ୍ରୀଙ୍କ ମଧ୍ୟରେ ବିଭିନ୍ନ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଶିଖ୍ ସମ୍ପ୍ରଦାୟର ଦଶମ ଧର୍ମଗୁରୁ ଗୋବିନ୍ଦ ସିଂଙ୍କ ଦୁଇ କନିଷ୍ଠ ପୁତ୍ରଙ୍କ ଦେଶ ମାତୃକା ପାଇଁ ଯେଉଁ ତ୍ୟାଗପୂର୍ଣ୍ଣ ଆତ୍ମ ବଳିଦାନ ତାହାର ସ୍ମୃତି ସ୍ୱରୂପ ୨୬ ଡିସେମ୍ବରକୁ ରାଷ୍ଟ୍ରୀୟ ବୀର୍ ବାଲ୍ ଦିବସ ଭାବରେ ଦେଶ ବ୍ୟାପୀ ପାଳନ ହେଉଛି।

ଆମ ମହାବିଦ୍ୟାଳୟ ପ୍ରଜ୍ଞା ଭବନରେ ମହାବିଦ୍ୟାଳୟ ଅଧ୍ୟକ୍ଷ ଡ଼. ଲକ୍ଷ୍ମୀଧର ସୁବୁଦ୍ଧିଙ୍କ ସଭାପତିତ୍ବରେ ଉକ୍ତ ଉତ୍ସବ ଅନୁଷ୍ଠିତ ହୋଇଥିଲା। ସମ୍ମାନିତ ଅତିଥି ଭାବରେ ଯୁକ୍ତଦୁଇ ଅଧ୍ୟକ୍ଷ ଅଧ୍ୟାପକ ସୁବାସ ଚନ୍ଦ୍ର ଶ୍ରୀଚନ୍ଦନ, ଡ଼. କୈଳାସ ଚନ୍ଦ୍ର ମହାରଣା, ଡ଼. ମୋନାଲିସା ମାନସିଂହ, ଅଧ୍ୟାପକ ପ୍ରବୀଣ କୁମାର ଜେନା ଯୋଗଦେଇ ଦିବସ ସମ୍ପର୍କରେ ବକ୍ତବ୍ୟ ପ୍ରଦାନ କରିଥିଲେ। ଶେଷରେ କୃତୀ ପ୍ରତିଯୋଗୀମାନଙ୍କୁ ପ୍ରମାଣ ପତ୍ର ଓ ବିଜୟ ସ୍ମାରକ ଦ୍ୱାରା ସମ୍ବର୍ଦ୍ଧିତ କରାଯାଇଥିଲା।

ଉକ୍ତ କାର୍ଯ୍ୟକ୍ରମର ସଂଯୋଜକ ଅଧ୍ୟାପକ ଡ଼. ପୂର୍ଣ୍ଣଚନ୍ଦ୍ର ସାମନ୍ତରାୟ ମଞ୍ଚ ସଂଯୋଜନା କରିଥିବା ବେଳେ ଅଧ୍ୟାପିକା ସୁନିତା ନନ୍ଦ, ଅଧ୍ୟାପିକା କୀର୍ତ୍ତିମୟୀ ବାରିକ, ଅଧ୍ୟାପକ ବିମଳ କୁମାର ପଣ୍ଡା, ଅଧ୍ୟାପକ ମନୋଜ କୁମାର ନାୟକ, ଡେମୋନଷ୍ଟେଟର ବିଶ୍ଵଜିତ ଦାସ ପ୍ରମୁଖ ସହଯୋଗ କରିଥିଲେ।