ସୀତାରାମ ଅଗ୍ରୱାଲ
ବାଲୁଗାଁ: ବାଲୁଗାଁ ଥାନା ଅନ୍ତର୍ଗତ ବଡ଼କୁଳ ପଞ୍ଚାୟତ ରାଉତରାପଲ୍ଲୀ ଗ୍ରାମରେ ମଙ୍ଗଳବାର ଅପରାହ୍ନରେ ଏକ ଅଭାବନୀୟ ଘଟଣା ଘଟିଯାଇଛି।
ପ୍ରାପ୍ତ ସୂଚନା ମୁତାବକ ଖୋର୍ଦ୍ଧା, ଗଞ୍ଜାମ, ପୁରୀ, ବାଲେଶ୍ୱର ସମେତ ଭୁବନେଶ୍ୱରରୁ ମାତ୍ରାଧିକ ମହିଳା ରାଉତରାପଲ୍ଲୀ ଗ୍ରାମରେ ତୁମୁୂଳକାଣ୍ଡ ଘଟାଇଛନ୍ତି। ଅଭିଯୋଗକ୍ରମେ ରାଉତରାପଲ୍ଲୀ ଗ୍ରାମର ଜନୈକ ମହିଳା ଦୀର୍ଘଦିନ ଧରି ବିବାହିତ ପୁରୁଷମାନଙ୍କୁ ମୋହରା କରି ଅନୈତିକ କାର୍ଯ୍ୟ କରିବା ସହ ବିବାହ ବନ୍ଧନରେ ବାନ୍ଧିହୋଇ ଟଙ୍କା ପଇସା ଲୁଟୁଥିଲା। କିଛି ସମୟର ଦେଖା ସାକ୍ଷାତ ହେଉ ଅଥବା ମୋବାଇଲ ବାର୍ତ୍ତାଳାପରେ ପୁରୁଷମାନଙ୍କୁ ଆକୃଷ୍ଟ କରି ଅନୈତିକ ସମ୍ପର୍କ ରଖିବା ସହ ଗୋପନରେ ଭିଡ଼ିଓ ରେକଡିଂ, ଅଶ୍ଲିଳ ଫଟୋ ଉଠାଇ ବ୍ଲାକ୍ମେଲିଂ କରି ବିବାହର ନାଟକ କରି ଟଙ୍କାପଇସା ଲୁଟୁଥିଲା।
ଯାହାଫଳରେ ବିବାହିତ ମହିଳାମାନେ ନିଜର ବୈବାହିକ ସମ୍ପର୍କ ହରାଇବା ସହ ଅଦ୍ୟାବଧି ଛାଡ଼ପତ୍ର ମାମଲା ମଧ୍ୟ ଲାଗି ରହିଛି। ଏ ସଂକ୍ରାନ୍ତରେ ମହିଳାମାନେ ନିଜ ନିଜ ଅଞ୍ଚଳରେ ପୋଲିସ୍ କେଶ୍ ରୁଜୁ କରିଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଦୀର୍ଘଦିନ ହେବ ଅନୈତିକ କାର୍ଯ୍ୟରେ ଲିପ୍ତଥିବା ଜନୈକ ମହିଳା ଅନେକ ପୁରୁଷଙ୍କ ସହ ସମ୍ପର୍କ ରଖି ଅନେକ ପରିବାର ଉଜାଡୁଥିବା ଯୋଗୁଁ କୌଣସି ସୂତ୍ରରୁ ନିଜର ସ୍ୱାମୀଙ୍କୁ ହରାଇଥିବା ମହିଳାମାନେ ମଙ୍ଗଳବାର ପୂର୍ବାହ୍ନରେ ନାଭାଲ୍ ଫାଣ୍ଡିରେ ପହଁଚି ଫାଣ୍ଡି ଅଧିକାରୀଙ୍କୁ ଅବଗତ କରାଇଥିଲେ। ପରବର୍ତ୍ତୀ ସମୟରେ ସମସ୍ତ ମହିଳା ଏକତ୍ରିତ ହୋଇ ରାଉତରାପଲ୍ଲୀ ଗ୍ରାମର ଜନୈକ ମହିଳାଙ୍କ ଘରକୁ ଯାଇଥିଲେ। ମାତ୍ର କିଛି ଦୂରରୁ ଏମାନଙ୍କୁ ଦେଖି ଜନୈକ ମହିଳାଙ୍କ ଘରୁ କିଛି ଯୁବକ ଏବଂ ଯୁବତୀ ଚମ୍ପଟ ମାରିଥିଲେ। ଏପରି ଦୃଶ୍ୟ ଦେଖି ମହିଳାମାନେ ଉତ୍ତେଜିତ ହେବା ସହ ଭଙ୍ଗାରୁଜା କରିଥିଲେ।
ଅପରପକ୍ଷରେ ଜନୈକ ମହିଳାଙ୍କ ବାପା ଏହି ମହିଳାମାନଙ୍କୁ ପଥରରେ ଆକ୍ରମଣ କରିଥିବାର ଅଭିଯୋଗ ହୋଇଛି। ଯାହାଫଳରେ ଜଣେ ମହିଳାଙ୍କ ମୁଣ୍ଡ ଫାଟିଯାଇଛି। ଖବର ପାଇ ନାଭାଲ ଫାଣ୍ଡି ଅଧିକାରୀ ଗୋବିନ୍ଦ ଗୌଡ଼ା, ବାଲୁଗାଁ ଥାନା ଅଧିକାରୀ ରମାକାନ୍ତ ମାହାଲିକଙ୍କ ସମେତ ୫ଜଣ ପୋଲିସ କର୍ମଚାରୀ ଘଟଣା ସ୍ଥଳରେ ପହଁଚି ଉତ୍ତ୍ୟକ୍ତ ମହିଳାମାନଙ୍କୁ ବୁଝାସୁଝା କରିବା ପରେ ସମ୍ପୃକ୍ତ ମହିଳାମାନେ ନାଭାଲ ଫାଣ୍ଡିର ଏକଲିଖିତ ଅଭିଯୋଗ କରିଛନ୍ତି। ମହିଳାମାନଙ୍କ ଅଭିଯୋଗକୁ ଆଧାରକରି ବାଲୁଗାଁ ପୋଲିସ ୬୩/୨୧ ରେ ଏକ ମାମଲା ରୁଜୁକରିବା ସହ ଜଣଙ୍କୁ ଗିରଫ କରିଛି।
ପୂର୍ବରୁ ଏହାକୁ ନେଇ ଗ୍ରାମର କିଛି ଯୁବକ ଏକାଧିକବାର ବିରୋଧ କରିଥିଲେ ମଧ୍ୟ ତାଙ୍କ ନାମରେ ମିଥ୍ୟା ମାମଲା ଦେବାକୁ ସମ୍ପୃକ୍ତ ପରିବାର ପକ୍ଷରୁ ଧମକ ଦେଉଥିବାର ଅଭିଯୋଗ ହେଉଛି।
