ସୀତାରାମ ଅଗ୍ରୱାଲ
ବାଲୁଗାଁ: ହୋମିଓ ପ୍ୟାଥିକ ଚିକିତ୍ସା ଲୋକଙ୍କ ମଧ୍ୟରେ ପୁଣିଥରେ ଅସ୍ଥାଭାଜନ ହେଉଛି। ବିଶେଷକରି ଗ୍ରାମାଞ୍ଚଳ ଲୋକଙ୍କ ଅପେକ୍ଷା ସହରାଞ୍ଚଳର ଲୋକେ ଏହି ଚିକିତ୍ସାକୁ ଏବେ ବେଶୀ ପ୍ରାଧାନ୍ୟ ଦେଉଛନ୍ତି। ଏହି ଚିକିତ୍ସା ମାଧ୍ୟମରେ ବହୁ ସାଂଘାତିକ ରୋଗ ମଧ୍ୟ ଦୂର ହେଉଥିବାର ଦେଖିବାକୁ ମିଳୁଛି। ତେଣୁ ଜନସାଧାରଣମାନେ ବର୍ତ୍ତମାନ ଏହି ଚିକିତ୍ସା ବ୍ୟବସ୍ଥା ଉପରେ ପୁଣିଥରେ ଆଗ୍ରହ ପ୍ରକାଶ କରୁଥିବା ଦେଖାଯାଉଛି।
ତେବେ ଆଜି ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଲୁଗାଁ ଗାନ୍ଧୀ ଛକ ନିକଟରେ ଏକ ହୋମିଓ କ୍ଲିନିକର ଶୁଭ ଉଦଘାଟନ ହୋଇଯାଇଛି। ଡାକ୍ତର ପ୍ରେମଲତା ଦେବୀ ତଥା ବାଣପୁର ବ୍ଲକର ପୂର୍ବତନ ଅଧ୍ୟକ୍ଷା ଏହି କ୍ଲିନିକକୁ ଉଦଘାଟନ କରିଛନ୍ତି। ଏହି କ୍ଲିନିକର ନାମ ସ୍ଵର୍ଣ୍ଣ ହୋମିଓ ହଲ୍ ରଖାଯାଇଥିବା ବେଳେ ଦୁଇଜଣ ପ୍ରତିଷ୍ଠିତ ଡାକ୍ତର ଲୋକଙ୍କୁ ଚିକିତ୍ସା ସେବା ଯୋଗାଇଦେବେ।
ଉଲ୍ଲେଖ ଯୋଗ୍ୟ ଯେ, ପଦ୍ମାବତୀ ଶତୃଶଲ୍ୟ ଟ୍ରଷ୍ଟର ଆର୍ଥିକ ସହାୟତାରେ ଭିନ୍ନକ୍ଷମ ଏବଂ ୭୫ ବର୍ଷରୁ ଉର୍ଦ୍ଧ୍ଵ ବୟସ୍କ ରୋଗୀମାନଙ୍କୁ ଏଠାରେ ନିଶୁଳ୍କ ଚିକିତ୍ସା ଉପଲବ୍ଧ କରାଯିବ। ଶ୍ରୀମତୀ ଶତୃଶଲ୍ୟ ହେଉଛନ୍ତି ରାଜ୍ୟପାଳ ପୁରସ୍କାରପ୍ରାପ୍ତ ଅବସରପ୍ରାପ୍ତ ଶିକ୍ଷକ ବାଙ୍କନିଧି ଶତ୍ରୁଶଲ୍ୟଙ୍କ ପତ୍ନୀ। ସେ ବାଣପୁର ବ୍ଲକ ଅନ୍ତର୍ଗତ ବେତୁଲି ଗ୍ରାମର ବାସିନ୍ଦା। କିନ୍ତୁ ସମ୍ବଲପୁରରେ ସ୍ଵାମୀ ବାଙ୍କନିଧି ଶିକ୍ଷକତା କରୁଥିବାରୁ ସେମାନେ ବହୁ ବର୍ଷ ଧରି ସେଠାରେ ରହି ଆସୁଥିଲେ। ପଦ୍ମାବତୀ ଜଣେ ପରୋପକାରୀ, ଦୟାଳୁ ମହିଳା ଥିଲେ। ତାଙ୍କର ବିୟୋଗ ପରେ ‘ପଦ୍ମାବତୀ ଶତୃଶଲ୍ୟ ଟ୍ରଷ୍ଟ’ ନାମରେ ଏହାକୁ ପ୍ରତିଷ୍ଠା କରାଯାଇଥିଲା। ଏହି ଟ୍ରଷ୍ଟ ମାଧ୍ୟମରେ ବହୁ ଜନମଙ୍ଗଳକାରୀ କାର୍ଯ୍ୟ କରୁଥିବାର ଦେଖିବାକୁ ମିଳୁଛି।
