Tag: ବାଲୁଗାଁ

ସୀତାରାମ ଅଗ୍ରୱାଲ

ବାଲୁଗାଁ: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ଶ୍ରୀ ଶ୍ରୀ ଊମାମହେଶ୍ଵର ବଣିକ ସଂଘ, ବାଲୁଗାଁର ସୁବର୍ଣ୍ଣ ଜୟନ୍ତୀ ଉତ୍ସବ ପାଳିତ ହୋଇଯାଇଅଛି। ଏହି ଅବସରରେ ଆଜି ସନ୍ଧ୍ୟାରେ ସଂଘ ସଭ୍ୟମାନଙ୍କ ଉପସ୍ଥିତିରେ କୁପନର ଉଠାଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଅଛି।

ଏହି କାର୍ଯ୍ୟକ୍ରମରେ ପ୍ରିୟ ଗ୍ରାହକମାନଙ୍କୁ ଆକର୍ଷଣୀୟ ପୁରଷ୍କାର ପ୍ରଦାନ କରାଯାଇଛି।  ପ୍ରଥମ ଭାଗ୍ୟଶାଳୀ ବିଜେତା ଭାବେ ସାମନ୍ତରାପୁରର ନିହାର ରଂଜନ ସାମନ୍ତରାୟଙ୍କୁ ବଜାଜ ପ୍ଳାଟିନା ମୋଟର ସାଇକେଲ ପୁରସ୍କାର ପ୍ରଦାନ କରାଯାଇଥିବା ବେଳ ଦ୍ବିତୀୟ ବିଜେତା ଭାବେ ବେଲପଡାର କାର୍ତ୍ତିକ ମହାରଣାଙ୍କୁ ୪୩ ଇଞ୍ଚ ସାମସଙ୍ଗ ଏଲ.ଇ.ଡି ଟିଭି ପୁରସ୍କାର ପ୍ରଦାନ କରାଯାଇଥିଲା ଏବଂ ତୃତୀୟ ବିଜେତା ଭାବେ ଘୁମୁସରପଦରର ମଂଜୁଲତା ରାଉତଙ୍କୁ ଭୋଲଟାସ ଡବଲଡୋର ୧୬୫ ଲିଟର ଫ୍ରିଜ ପାଇବାର ସୌଭାଗ୍ୟ ଅର୍ଜନ କରିଛନ୍ତି। ଏତଦବ୍ୟତୀତ ୧୯୧ ଟି ସାନ୍ତ୍ଵନାମୂଳକ ପୁରସ୍କାର ମିଲଟନ ହଟକେସର ଉଠାଣ ହୋଇଯାଇଅଛି।

ଉକ୍ତ କାର୍ଯ୍ୟକ୍ରମରେ ସ୍ଥାନୀୟ ଏସଡିପିଓ ମାନସ ରଞ୍ଜନ ବାରିକ ମୁଖ୍ୟ ଅତିଥି ଭାବରେ ଯୋଗ ଦେଇ ସମସ୍ତଙ୍କୁ ଉତ୍ସାହିତ କରିଥିଲେ। ସଙ୍ଘର ସଭାପତି ରବିନାରାୟଣ ନାୟକ, ଉପସଭାପତି ସେଖ ଗନିଫ୍, ସୁବର୍ଣ୍ଣ ଜୟନ୍ତୀ ପାଳନ ଉତ୍ସବର ଅଧ୍ୟକ୍ଷ ଧୀରେନ୍ଦ୍ରନାଥ ପାତ୍ର, ସଂପାଦକ ସରୋଜ କୁମାର ପାତ୍ର, ସହସଂପାଦକ ପ୍ରଦୀପ କୁମାର ସ୍ବାଇଁ ଓ ମନୋଜ କୁମାର ପାତ୍ର ପ୍ରଭୃତି କର୍ମକର୍ତ୍ତାଙ୍କ ସହିତ ସଂଘର ସମସ୍ତ ସଦସ୍ୟ ଉପସ୍ଥିତ ଥିଲେ।

ହିମାଂଶୁ କୁମାର ପାତ୍ର, ନୃସିଂହ ପ୍ରସାଦ ସେନାପତି, ସନ୍ଦୀପ କୁମାର ପାତ୍ର, ସୁନୀଲ କୁମାର ପାତ୍ର, ସୂର୍ଯ୍ୟନାରାୟଣ ସେନାପତି, ସରୋଜ କୁମାର ଦାସ ପ୍ରମୂଖ କାର୍ଯ୍ୟକ୍ରମ ପରିଚାଳନା କରିଥିଲେ।

ସୀତାରାମ ଅଗ୍ରୱାଲ

ବାଲୁଗାଁ: ଖୋର୍ଦ୍ଧା ଜିଲ୍ଲା ବାଲୁଗାଁର ନୂତନ ଏସ.ଡି.ପି.ଓ ଭାବେ ଯୋଗଦେଇଛନ୍ତି ଯୁବ ଓପିଏସ ଅଧିକାରୀ ମାନସ ରଞ୍ଜନ ବାରିକ। ନିକଟରେ ବାଲୁଗାଁ ଏସ.ଡି.ପି.ଓ ସୁରେଶ କୁମାର ଦାସଙ୍କ କେଉଁଝର ଜିଲ୍ଲା ଆନନ୍ଦପୁର ବଦଳି ହୋଇଥିବାବେଳେ ତାଙ୍କ ସ୍ଥାନରେ ଜାନୁଆରୀ ୧ ରେ ଦାଇତ୍ୱ ଗ୍ରହଣ କରିଛନ୍ତି ଶ୍ରୀ ବାରିକ। ବାଣପୁର, ବାଲୁଗାଁ, ନିରାକାରପୁର ଏବଂ ଟାଙ୍ଗୀ ପରି ଚାରି ଗୋଟି ଗୁରୁତ୍ୱପୂର୍ଣ ଥାନା ଶ୍ରୀ ବାରିକଙ୍କ  ପ୍ରତ୍ୟେକ୍ଷ ତତ୍ୱାବଧାନରେ ରହିବ।

ଜଣେ ଯୁବ କର୍ତ୍ତବ୍ୟନିଷ୍ଠ ଏବଂ ପରୋପକାରୀ  ପୋଲିସ ଅଧିକାରୀ ଭାବେ ବେଶ ଜଣାଶୁଣା ଶ୍ରୀ ବାରିକ। ଓଡିଶା ଲୋକସେବା ଆୟୋଗ ପରୀକ୍ଷାରେ ଉତ୍ତୀର୍ଣ୍ଣ ହୋଇ ୨୦୧୬ ରେ ଓଡ଼ିଶା ପୋଲିସ ସେବା(ଓ.ପି.ଏସ)ରେ ଯୋଗଦେଇ ଦୁଇ ବର୍ଷ ଟ୍ରେନିଂ ପରେ ୨୦୧୮ ରେ  ପ୍ରଥମେ ମାଲକାନଗିରି ଜିଲ୍ଲାର  ଚିତ୍ରକୋଣ୍ଡା ଏସ.ଡି.ପି.ଓ ରୂପେ ପୋଷ୍ଟିଙ୍ଗ ପାଇଥିଲେ ଶ୍ରୀ ବାରିକ ଏବଂ ଏହାପରେ ସେ କନ୍ଧମାଳ ଜିଲ୍ଲାର ବାଲିଗୁଡା ଏସ.ଡି.ପି.ଓ ଭାବେ କାର୍ଯ୍ୟରତ ଥିଲେ।

ଲକ ଡ଼ାଉନ ସମୟରେ ବାଲିଗୁଡା ଉପଖଣ୍ଡ ଅଞ୍ଚଳରେ  କୋଭିଡ ଆଇନ ଅମାନିଆଙ୍କୁ ଅଭିନଵ ତରିକାରେ ଦଣ୍ଡ ଦେବା ହେଉ କିମ୍ବା କାନ୍ଧିବନ୍ଧ ଅଞ୍ଚଳରେ ଦୁର୍ଘଟଣାଗ୍ରସ୍ତ ଟ୍ରକ ଡ୍ରାଇଭରର ଜୀବନ ବଞ୍ଚାଇବା ପରି ବହୁ ଘଟଣା ଲାଗି ସେ ଅନେକ ଥର ଗଣମାଧ୍ୟମରେ ଚର୍ଚ୍ଚାକୁ ଆସିଛନ୍ତି।

ଚିଲିକା ନିର୍ବାଚନମଣ୍ଡଳୀର ସମସ୍ତ ଜନସାଧାରଣଙ୍କୁ ସମୀକ୍ଷା ମାଧ୍ୟମରେ ନବ ବର୍ଷର ଶୁଭେଚ୍ଛା ଜଣାଇବା ସହ ଆଗାମୀ ଦିନରେ ବାଣପୁର ଏବଂ ବାଲୁଗାଁ ଅଞ୍ଚଳରେ କିପରି ଆଇନ ଶୃଙ୍ଖଳା ବ୍ୟବସ୍ଥାକୁ ସୁଦୃଢ  କରାଯିବ, ବିଶେଷ କରି ଉଭୟ ସହରରେ ବଢୁଥିବା ଟ୍ରାଫିକ ସମସ୍ୟା, ଜାତୀୟ ରାଜପଥ ଡକାୟତି, ଚୋରି ଏବଂ ସାଇବର କ୍ରାଇମ ପରି ଅପରାଧର ମୁଳୋତ୍ପାଟନ ଉପରେ ଗୁରୁତ୍ଵ ଦେବେ ବୋଲି ଆମ ପ୍ରତିନିଧିଙ୍କୁ ଏସ.ଡି.ପି.ଓ ଶ୍ରୀ ବାରିକ ସୂଚନା ଦେଇଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଆଜି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ବାଣପୁର-ବାଲୁଗାଁ ନଗର ଶାଖା ତରଫରୁ ବାଣପୁର ସ୍ଥିତ ସରସ୍ବତୀ ଶିଶୁ ବିଦ୍ୟା ମନ୍ଦିର ଠାରେ ନଗର ସମ୍ମିଳନୀ ଅନୁଷ୍ଠିତ ହୋଇଯାଇଛି।

ଏହି ଅବସରରେ ୨୦୨୦-୨୧ ଶିକ୍ଷା ବର୍ଷ ପାଇଁ ନୂତନ ନଗର କାର୍ଯ୍ୟକାରିଣୀ ଘୋଷଣା କରାଯାଇଅଛି। ଉକ୍ତ ସମ୍ମିଳନୀରେ ମୁଖ୍ୟ ଅତିଥି ରୂପେ ଏବିଭିପି ଓଡିଶା ରାଜ୍ୟ ସମ୍ପାଦକ  ଶଶିକାନ୍ତ ମିଶ୍ର ଯୋଗ ଦେଇଥିଲେ। ମୁଖ୍ୟ ଅତିଥିଙ୍କ ଉପସ୍ଥିତିରେ ପୁରୁଣା ନଗର ସମିତି ଭଙ୍ଗା ଯାଇ ନୂତନ ସମିତି ଘୋଷଣା କରାଯାଇଥିଲା। ଏହି ସମ୍ମିଳନୀରେ ନୂତନ ଭାବରେ ଅଧ୍ୟାପକ ଲକ୍ଷ୍ମୀପ୍ରସାଦ ମିଶ୍ରଙ୍କୁ ନଗର ସଭାପତି ଏବଂ ବିବେକାନନ୍ଦ ଗଡ଼ନାୟକଙ୍କୁ ନଗର ସମ୍ପାଦକ ଭାବେ ଦାଇତ୍ୱ ପ୍ରଦାନ କରାଯାଇଅଛି।

ନଗର ସହ ସମ୍ପାଦକ ରୂପେ ପ୍ରିୟାଂଶୁ ପ୍ରଧାନ, ସୌମ୍ୟ ରଂଜନ ସାହୁ, ପୃଥ୍ୱୀରାଜ ଛୋଟରାୟ, ଶୁଭମ ତ୍ରିପାଠୀ ଓ ପ୍ରଦୀପ କୁମାର ସ୍ୱାଇଁ ନିର୍ବାଚିତ ହୋଇଥିବାସ୍ଥଳେ ନଗରର ଅନ୍ୟ ଗୁରୁତ୍ୱପୂର୍ଣ ଦାଇତ୍ୱଗୁଡିକୁ ମଧ୍ୟ ଘୋଷଣା କରାଯାଇଅଛି। ବାଣପୁର-ବାଲୁଗାଁ ନଗର ଅଧୀନରେ ଥିବା ସମସ୍ତ ସାତ ଗୋଟି କ୍ୟାମ୍ପସରେ ଏବିଭିପି କିପରି ଆହୁରି ସୁଦୃଢ ହେବ ସେ ବିଷୟରେ ସମ୍ମିଳନୀରେ ବିସ୍ତୃତ ଭାବେ ଚର୍ଚ୍ଚା କରାଯାଇଥିଲା

ଛାତ୍ର ଛାତ୍ରୀ ମାନେ ସମ୍ପ୍ରତି ସମୟରେ ପାଠ ପଢିବା ସହ ନିଜକୁ ରାଷ୍ଟ୍ରହିତ କାର୍ଯ୍ୟରେ ନିୟୋଜିତ କରିବା ଉଚିତ ବୋଲି ନବ ନିର୍ବାଚିତ ନଗର ସଭାପତି ଅଧ୍ୟାପକ ଲକ୍ଷ୍ମୀ ପ୍ରସାଦ ମିଶ୍ର ମନ୍ତବ୍ୟ ରଖିଥିଲେ। ନଗର ଛାତ୍ରୀ ପ୍ରମୁଖ ବର୍ଷାରାଣୀ ପ୍ରଧାନ ମଞ୍ଚ ପରିଚାଳନା କରିଥିବାବେଳେ ଜିଲ୍ଲା ଛାତ୍ରୀ ପ୍ରମୁଖ ସଂଗୀତା ସ୍ୱାଇଁ ପରିଷଦ ଗୀତ ଗାନ କରିଥିଲେ। ଉକ୍ତ କାର୍ଯ୍ୟକ୍ରମକୁ ବିକାଶ ସେଠି ପରିଚାଳନା କରିଥିବାବେଳେ ପ୍ରିୟାଂଶୁ, ରାଜେଶ, ସୁଜିତ, ସୌମ୍ୟ, ଆଶାତୀତ, ହିମାଂଶୁ, ବିପ୍ଳବ ଆଦି ସହଯୋଗ କରିଥିଲେ।

ସୀତାରାମ ଅଗ୍ରୱାଲ

ବାଲୁଗାଁ: ଆଜି ସନ୍ଧ୍ୟାରେ ଶୋକାକୁଳ ପରିବେଶ ମଧ୍ୟରେ ଦିବଂଗତ ଯୁବ ସଂଗଠକ ଯଥା ଅସୀମିତ ପ୍ରତିଭାର ଅଧିକାରୀ ସ୍ବର୍ଗତ ସତ୍ୟ ନାରାୟଣ ସେନାପତିଙ୍କ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଯାଇଅଛି। ଦ୍ଵାଦଶହ ଦିବସ ଅବସରରେ ବାଲୁଗାଁ ସ୍ଥିତ କଳିଙ୍ଗ ଯୁବକ ସଙ୍ଘ ପରିସରରେ ଉକ୍ତ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହେବାସହ ଏକ ସ୍ମରଣିକା ଉନ୍ମୋଚନ ହୋଇଯାଇଅଛି।

ଅନୁଷ୍ଠିତ ସଭାରେ ମୁଖ୍ୟ ଅତିଥି ଚିଲିକା ବିଧାୟକ ପ୍ରଶାନ୍ତ କୁମାର ଜଗଦ୍ଦେବ, ସମ୍ମାନିତ ଅତିଥି ପୂର୍ବତନ ବିଧାୟକ ଚିଲିକା ଡ଼ା ବିଭୁତି ଭୂଷଣ ହରିଚନ୍ଦନ, ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ବିଶ୍ୱରଂଜନ ବଡ଼ଜେନା, ବିଜେପି ଜିଲ୍ଲା ସାଧାରଣ ସମ୍ପାଦକ ଦୁଷ୍ମନ୍ତ ହରିଚନ୍ଦନ, କଳିଙ୍ଗ ଯୁବକ ସଙ୍ଘର ସଭାପତି ରବି ନାରାୟଣ ନାୟକ ପ୍ରମୁଖ ଉପସ୍ଥିତ ରହି ଦିବଂଗତ ଆତ୍ମାର ସଦଗତି ନିମନ୍ତେ ସ୍ବର୍ଗତ ସେନାପତିଙ୍କ ତୈଳ ଚିତ୍ର ସମ୍ମୁଖରେ ଦୀପ ପ୍ରଜ୍ବଳନ କରି ପୁଷ୍ପମାଲ୍ୟ ଅର୍ପଣ କରିବା ସହ ଦୁଇ ମିନିଟ ନିରବ ପ୍ରାର୍ଥନା କରିଥିଲେ।

ପ୍ରାପ୍ତ ସୂଚନା ମୁତାବକ ଚଳିତ ମାସ ୧୫ ତାରିଖରେ ସ୍ବର୍ଗତ ସତ୍ୟନାରାୟଣ ସେନାପତି ୪୧ ବର୍ଷ ବୟସରେ କରୋନାରେ ଆକ୍ରାନ୍ତ ହୋଇ ଭୁବନେଶ୍ୱର ଏମସ ହସ୍ପିଟାଲରେ ଚିକିତ୍ସିତ ଅବସ୍ଥାରେ ମୃତ୍ୟୁବରଣ କରିଥିଲେ। ସ୍ବର୍ଗତ ସେନାପତିଙ୍କ ବିୟୋଗରେ ଘର ପରିଜନଙ୍କ ମନୋବଳ ଭାଙ୍ଗିଯିବା ସହ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଥିଲା। ବହୁତ କମ ବୟସରେ ରାଜନୀତିରେ ପାଦ ଥାପି ଜିଲ୍ଲା ବିଜେପି ଯୁବମୋର୍ଚ୍ଚାର ସଭାପତି ଭାବେ ନିଜର ଦକ୍ଷତା ବଳରେ ଦଳକୁ ମଜଭୁତ କରୁଆସୁଥିବା ଏହି ନେତାଙ୍କ ବିୟୋଗରେ ସମ୍ପୃକ୍ତ ଅଂଚଳରୁ ବିଜେପିର ଅଗ୍ରଗତିରେ ବ୍ରେକ ଲାଗିଥିବା ଅନୁମାନ କରାଯାଉଛି। ଯାହାକି ଏହି କିମ୍ବଦନ୍ତୀ ପୁରୁଷଙ୍କ ସ୍ଥାନ ପୂରଣ କରିବା ଅସମ୍ଭବ ବୋଲି ପୂର୍ବତନ ବିଧାୟକ ଡ଼ା ହରିଚନ୍ଦନ ମତବ୍ୟକ୍ତ କରିଥିଲେ।

ସମଗ୍ର ଅଞ୍ଚଳର ସାଙ୍ଗଠନିକ ସୁଦୃଢତାକୁ ସମ୍ମାନ ଜଣାଇ ସ୍ବର୍ଗତ ଶ୍ରୀ ସେନାପତି ନିଜକୁ ସ୍ଥାନୀୟ ଅଞ୍ଚଳର ଜଣେ ପ୍ରତିଷ୍ଠିତ ତଥା ପ୍ରଖର ରାଜନୈତିକ ବ୍ୟକ୍ତିତ୍ୱ ଭାବେ ଉପସ୍ଥାପନ କରିବା ସହ ସମାଜସେବୀ ଭାବେ ଜନ ସମାଜରେ ନିଜକୁ ଖୁବ କମଦିନ ମଧ୍ୟରେ ପ୍ରତିଷ୍ଠିତ କରିପାରିଥିଲେ ବୋଲି ଚିଲିକା ବିଧାୟକ ଶ୍ରୀ ଜଗଦ୍ଦେବ ବକ୍ତବ୍ୟ ରଖିଥିଲେ।

ନିଜର ଜ୍ଞାନ କୌଶଳ ତଥା ଯୁବସମାଜ ଭିତରେ ସ୍ଥାନୀୟ ଅଞ୍ଚଳରେ ନାନାଦି ଉନ୍ନତିମୂଳକ କାର୍ଯ୍ୟ କରିବା ସହ ସୁଖ ଦୁଃଖର ସାଥି ହୋଇ ସମଗ୍ର ଅଞ୍ଚଳକୁ ନିଜର ପ୍ରିୟଭାଜନ କରିପାରିଥିଲେ ଏହି ଦିବଂଗତ ନେତା ବୋଲି ଶ୍ରୀ ବଡ଼ଜେନା ଅତି କୋହଭରା କଣ୍ଠରେ ପ୍ରତିପାଦନ କରିଥିଲେ।

ଜଣେ କାର୍ଯ୍ୟଦକ୍ଷ, ମିଷ୍ଟଭାଷୀ, ମେଳାପୀ ସମାଜସେବୀଙ୍କ ବିୟୋଗରେ ସମଗ୍ର ଅଞ୍ଚଳ ଭାଙ୍ଗିପଡିଥିବା ବେଳେ ସେହି ଆତ୍ମାର ସଦଗତି ତଥା ପ୍ରିୟଭାଜନଙ୍କୁ ମହାପ୍ରଭୁ ଶ୍ରୀ ଜଗନ୍ନାଥ ସହାୟ ହୁଅନ୍ତୁ ବୋଲି ଶ୍ରୀ ଦୁଷ୍ମନ୍ତ ହରିଚନ୍ଦନ ପ୍ରକାଶ କରିଥିଲେ।

ସ୍ବର୍ଗତ ସେନାପତିଙ୍କ ଅନ୍ତିମ ଶ୍ରଦ୍ଧାଞ୍ଜଳି ସଭାରେ ବିଜେପି ଖୋର୍ଦ୍ଧା ଜିଲ୍ଲା ସଭାପତି ରଶ୍ମୀରଞ୍ଜନ ମହାପାତ୍ରଙ୍କ ସମେତ ବହୁ ପ୍ରତିଷ୍ଠିତ ତଥା ମାନ୍ୟଗଣ୍ୟ ବ୍ୟକ୍ତି ଏବଂ ଯୁବ ବିଜେପି ସଂଗଠନର ସମସ୍ତ କାର୍ଯ୍ୟକର୍ତ୍ତା ଉପସ୍ଥିତ ରହି କୋଭିଡ ନିୟମ ପାଳନ କରି ଆନ୍ତରିକ ଶ୍ରଦ୍ଧା ଜ୍ଞାପନ କରିଥିଲେ। ଏହି ଅବସରରେ ଦିବଂଗତ ଶ୍ରୀ ସେନାପତିଙ୍କ ସ୍ମୃତିକୁ ବଜାୟ ରଖିବା ପାଇଁ ନିଜର ଜୀବନଶୈଳୀ ଉପରେ ଆଧାରିତ ‘ଲୁହ’ ପତ୍ରିକା ଉନ୍ମୋଚନ କରାଯାଇଥିଲା।

ସୀତାରାମ ଅଗ୍ରୱାଲ 

ଚିଲିକା: ଆଜି ଖୋର୍ଦ୍ଧା ଜିଲ୍ଲା ଚିଲିକା ନିର୍ବାଚନମଣ୍ଡଳୀ ଅନ୍ତର୍ଗତ ବାଣପୁର ଏବଂ ବାଲୁଗାଁ ଏନ.ଏ.ସି ଅଞ୍ଚଳରେ ନିଖିଳ ଭାରତ ସ୍ୱାୟତ୍ତ ଶାସନ ପ୍ରତିଷ୍ଠା ଦିବସ ପାଳନ ହୋଇଯାଇଅଛି। ଉକ୍ତ ଦୁଇଟି ସହରର କାର୍ଯ୍ୟକ୍ରମ ରେ ମୁଖ୍ୟ ଅତିଥି ଭାବେ ଚିଲିକା ବିଧାୟକ ପ୍ରଶାନ୍ତ କୁମାର ଜଗଦ୍ଦେବ ଯୋଗଦେଇଥିଲେ। ବିଧାୟକ ସର୍ବପ୍ରଥମେ ବାଲୁଗାଁ ଏନ.ଏ.ସି କାର୍ଯ୍ୟାଳୟରେ ପହଁଚି କାର୍ଯ୍ୟାଳୟ ପରିସରରେ ଜାତୀୟ ପତାକା ଉତ୍ତୋଳନ କରିଥିଲେ ଏବଂ ଏହାପରେ ଗାନ୍ଧୀଛକ ସ୍ଥିତ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ।

ନିଜର ଅଭିଭାଷଣରେ ବିଧାୟକ ଆଗାମୀ ଦିନରେ ବାଲୁଗାଁ ସହରର ସର୍ବାଙ୍ଗୀନ ଉନ୍ନତି ସହ ସହରର ଡ୍ରେନେଜ ଏବଂ ଆଲୋକୀକରଣ ବ୍ୟବସ୍ଥାକୁ ଆହୁରି ସୁଦୃଢ କରିବା ଦିଗରେ ଗୁରୁତ୍ୱାରୋପ କରିଥିଲେ। ଉକ୍ତ କାର୍ଯ୍ୟକ୍ରମ ରେ ବାଲୁଗାଁ ବିଜ୍ଞାପିତ ଅଞ୍ଚଳ ପରିଷଦ ର କାର୍ଯ୍ୟନିର୍ବାହୀ ଅଧିକାରୀ ଆକୃତି ଗୋଏଙ୍କାଙ୍କ ସମେତ କାର୍ଯ୍ୟାଳୟର ସମସ୍ତ କର୍ମଚାରୀ ଏବଂ ସ୍ଵେଚ୍ଛାସାଥି ମାନେ ଉପସ୍ଥିତ ଥିଲେ।

ବାଲୁଗାଁ ଗସ୍ତ ପରେ ବିଧାୟକ ବାଣପୁର ଏନ.ଏ.ସି କାର୍ଯ୍ୟାଳୟରେ ପହଁଚି ଜାତୀୟ ପତାକା ଉତ୍ତୋଳନ କରିଥିଲେ ଏବଂ ଏହାପରେ ସହିଦ କୃତିବାସ ପାଟଶାଣୀ, ପ୍ରବାଦ ପୁରୁଷ ବିଜୁ ପଟ୍ଟନାୟକ ଏବଂ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ରେ ପୁଷ୍ପମାଲ୍ୟ ଅର୍ପଣ କରିଥିଲେ। ବାଣପୁର ଏନ.ଏ.ସି କାର୍ଯ୍ୟାଳୟ ପରିସରରେ ବିଧାୟକ ନିଜର ଅଭିଭାଷଣରେ ଆଗାମୀ ଦିନରେ ବାଣପୁର ସହରରେ କେତେ ଗୋଟି ଉନ୍ନୟନ ଯୋଜନା ମାନ ନିଶ୍ଚିତ ରୂପେ କାର୍ଯ୍ୟକ୍ଷମ ହେବ ବୋଲି ପ୍ରତିଶୃତି ଦେଇଥିଲେ। ସେଗୁଡିକ ହେଲା ଏନ.ଏ.ସି ରେ ଜଳ ନିଷ୍କାସନ ପାଇଁ ଡ୍ରେନେଜ ନିର୍ମାଣ, ସ୍ମାର୍ଟ ସ୍ମଶାନ ନିର୍ମାଣ, ସ୍ମାର୍ଟ ପାର୍କ ନିର୍ମାଣ ଏବଂ ଅଲଗା ଅଲଗା ଭେଣ୍ଡିଙ୍ଗ ଜୋନ ପ୍ରତିଷ୍ଠା(ଉଭୟ ପରିବା ଏବଂ ମାଛ, ମାଂସ ବିକ୍ରେତାଙ୍କ)। ଉକ୍ତ କାର୍ଯ୍ୟକ୍ରମରେ ବାଣପୁର ବିଜ୍ଞାପିତ ଅଞ୍ଚଳ ପରିଷଦର କାର୍ଯ୍ୟନିର୍ବାହୀ ଅଧିକାରୀ ସନ୍ତୋଷ ନିଆଲଙ୍କ ସମେତ କାର୍ଯ୍ୟାଳୟର ସମସ୍ତ କର୍ମଚାରୀମାନେ ଉପସ୍ଥିତ ଥିଲେ।

ସୀତାରାମ ଅଗ୍ରୱାଲ

ବାଲୁଗାଁ: କରୋନା ଭୂତାଣୁ ସଂକ୍ରମଣ ସାରା ରାଜ୍ୟରେ ବଢିବାରେ ଲାଗିଛି। ସେଥିପାଇଁ ରାଜ୍ୟ ସରକାରଙ୍କ ପକ୍ଷରୁ କୋଭିଡ଼ ଗାଇଡ଼ଲାଇନକୁ ପାଳନ କରୁନଥିବା ଅମାନିଆଙ୍କ ଉପରେ କଡା ପଦକ୍ଷେପ ନେବାପାଇଁ ନିର୍ଦ୍ଦେଶ ଦେଉଛନ୍ତି। ରାଜ୍ୟସରକାରଙ୍କ ଏପରି ନିର୍ଦ୍ଦେଶକୁ କଡାକଡି କରିବାପାଇଁ ବାଲୁଗାଁ ଏନ୍‌.ଏ.ସି କାର୍ଯ୍ୟନିର୍ବାହୀ ଅଧିକାରୀ ଆଗେଇ ଆସିଛନ୍ତି। ଅଞ୍ଚଳବାସୀଙ୍କୁ ପ୍ରଶାସନ ପକ୍ଷରୁ ବାରମ୍ବାର ସତର୍କ କରାଇବା ସତ୍ତ୍ୱେ କେତେ ଜଣ ଅମାନିଆ ପ୍ରଶାସନକୁ ଭ୍ରୁକ୍ଷେପ କରୁନାହାନ୍ତି।

ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଲୁଗାଁ ଏନ.ଏ.ସି ରେ ସରକାରଙ୍କ କୋଭିଡ଼ ଗାଇଡ଼ଲାଇନକୁ କଡ଼ାକଡ଼ି ରୂପେ ପାଳନ କରି ଏହାର ସଫଳ ରୁପୟାନ କରୁଛନ୍ତି ବାଲୁଗାଁ ବିଜ୍ଞାପିତ ଅଞ୍ଚଳ ପରିଷଦରେ ନୂତନ ଭାବେ ଯୋଗଦେଇଥିବା କାର୍ଯ୍ୟନିର୍ବାହୀ ଅଧିକାରୀ ଆକୃତି ଗୋଏଙ୍କା।

ଗତକାଲି ପୂର୍ବାହ୍ନ ସାଢେ ୧୧ଟାରେ ବାଲୁଗାଁ ସହରର ବିଭିନ୍ନ ବଜାର ଯଥା ଚିଲିକା ରୋଡ, ମାଛ ମାର୍କେଟ, ଗାନ୍ଧୀ ଛକ, ଆଇ.ବି ରୋଡ଼ ଆଦି ସ୍ଥାନାମାନଙ୍କରେ କାର୍ଯ୍ୟନିର୍ବାହୀ ଅଧିକାରୀ  ହଠାତ୍‌ ପହଞ୍ଚି ଚେକିଂ କରିଥିଲେ। ତାଙ୍କ ସାଙ୍ଗରେ ଏନ.ଏ.ସି ଟିମ ନେଇ ସବୁ ଦୋକାନ ବଜାର, ଛକ ଆଦିରେ କରିଥିଲେ କଡ଼ାକଡ଼ି ଚେକିଂ। ବାରମ୍ବାର ଅନୁରୋଧ କରିବା ସତ୍ତ୍ୱେ ବି ଜନସାଧାରଣ ମାନେ ମାସ୍କ ପିନ୍ଧୁନାହାନ୍ତି ଏବଂ ସାମାଜିକ ଦୂରତ୍ୱ ରକ୍ଷା କରୁନାହାନ୍ତି। ଏହି ପରିପ୍ରେକ୍ଷୀରେ କାର୍ଯ୍ୟନିର୍ବାହୀ ଅଧିକାରୀ ପାଖାପାଖି ଦେଢ଼ ଘଣ୍ଟା ଚେକିଂ ରେ ୨୫ ଜଣଙ୍କଠୁ ୧୨୫୦୦ ଟଙ୍କା ଜରିମାନା ଆଦାୟ କରିଥିଲେ।

ବିଗତ କିଛି ଦିନ ହେବ ପ୍ରତ୍ୟେକ ଦିନ କାର୍ଯ୍ୟନିର୍ବାହୀ ଅଧିକାରୀ ଏହି ପରି ଚେକିଂ ଜାରି ରଖିଛନ୍ତି ଏବଂ ମାସ୍କ ପିନ୍ଧନ୍ତୁ, ସାମାଜିକ ଦୂରତ୍ୱ ରକ୍ଷା କରନ୍ତୁ କହି ଜନସାଧାରଣଙ୍କୁ ବାରମ୍ବାର ନିବେଦନ କରୁଛନ୍ତି। ଅଧିକାଂଶ ଲୋକ ନିୟମ ମାନୁଥିବାବେଳେ କିଛି ଅମାନିଆ ଆଇନ ଉଲଙ୍ଘନ କରି ତଣ୍ଡ ଗଣୁଛନ୍ତି। ଏଥିସହ ବାଲୁଗାଁ ସହରର ପ୍ରମୁଖ ସମସ୍ୟା ଗୁଡିକୁ ଯଥାଶୀଘ୍ର ସୁଧାରିବା ପାଇଁ କାର୍ଯ୍ୟନିର୍ବାହୀ ଅଧିକାରୀ ବଦ୍ଧପରିକର ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି ଏବଂ ଏଥିରେ ଗଣମାଧ୍ୟମ ଓ ଜନସାଧାରଣଙ୍କ ସହଯୋଗ ଲୋଡିଛନ୍ତି।

କାର୍ଯ୍ୟନିର୍ବାହୀ ଅଧିକାରୀ ଆକୃତି ଗୋଏଙ୍କାଙ୍କ ସହ ଉକ୍ତ ଚେକିଂ ର ବାଲୁଗାଁ ଏନ.ଏ.ସି ଟାକ୍ସ କଲେକ୍ଟର ଅନନ୍ତ ପଟ୍ଟନାୟକ, ସ୍ଵଚ୍ଛସାଥି ସୁପରଭାଇଜର ଉଷାରାଣୀ ମିଶ୍ର ଏବଂ ସମସ୍ତ ଏନ.ଏ. ସି ଷ୍ଟାଫ ଏବଂ ସ୍ଵଚ୍ଛସାଥିମାନେ ଉପସ୍ଥିତ ଥିଲେ।