ସୁବାଷ କୁମାର ତାରଣିଆଁ
ଭୁବନେଶ୍ବର: କ୍ରମାଗତ ଭାବେ ୨୩ ବର୍ଷ ଧରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ଓଡ଼ିଶାରେ ବିଜୁ ଜନତା ଦଳ ଶାସନ କ୍ଷମତାରେ ରହିଆସିଛି। ଏହି ୨୩ ବର୍ଷ ମଧ୍ୟରୁ ପଞ୍ଚମ ପାଳିର ପ୍ରଥମ ଦୁଇବର୍ଷ ବିଭିନ୍ନ କାରଣରୁ ସରକାରଙ୍କ ପାଇଁ ଅତ୍ୟନ୍ତ ଚ୍ୟାଲେଞ୍ଜପୂର୍ଣ୍ଣ ଥିଲା। ପଞ୍ଚମ ପାଳିର ସରକାର ଦାୟିତ୍ୱ ଗ୍ରହଣ କରିବାର ଅବ୍ୟବହିତ ପୂର୍ବରୁ ବାତ୍ୟା ‘ଫନି’ ରାଜ୍ୟର ଉପକୂଳବର୍ତ୍ତୀ ଜିଲ୍ଲା ଗୁଡ଼ିକରେ ଧ୍ୱଂସର ତାଣ୍ଡବଲୀଳା ରଚିଥିଲା ଯାହାକି ନବୀନ ପଟ୍ଟନାୟକ ଫନିର ମୁକାବିଲା ଓ ଥଇଥାନ କରିବାରେ ଏକ ଚ୍ୟାଲେଞ୍ଜ ଥିଲା। ଏହାପରେ ୨୦୨୦ ବର୍ଷର ପ୍ରାରମ୍ଭରେ ମହାମାରୀ କରୋନା ଭୂତାଣୁର ପ୍ରଥମ ଲହର ସହିତ ଆଉ ଗୋଟିଏ ବାତ୍ୟା ‘ଅମ୍ଫନ’ର ତାଣ୍ଡବ ସର୍ବୋପରି ପଞ୍ଚମ ପାଳିର ଦ୍ୱିତୀୟ ବର୍ଷର ପୂର୍ତ୍ତିର ଠିକ୍ ପୂର୍ବରୁ ମହାମାରୀ କରୋନାର ଦ୍ୱିତୀୟ ଲହର ସାଙ୍ଗକୁ ବାତ୍ୟା ‘ୟାସ’ର ତାଣ୍ଡବ ବିଜୁ ଜନତା ଦଳ ସରକାର ପ୍ରତି ଏକ ଆହ୍ୱାନ ସୃଷ୍ଟି କରିଥିଲା।
ଓଡ଼ିଶା ରାଜନୀତି କ୍ଷେତ୍ରରେ ନବୀନ ପଟ୍ଟନାୟକ ଏକ ସଫଳ ବ୍ୟକ୍ତିତ୍ୱର ଅଧିକାରୀ ଓ ଉଜ୍ଜ୍ୱଳ ତାରକା। ପ୍ରବାଦ ପୁରୁଷ ବିଜୁ ପଟ୍ଟନାକଙ୍କ ସୁପୁତ୍ର ଭାବେ ସେ ଓଡ଼ିଶାରେ ବେଶ ପରିଚିତ। ବିଜୁବାବୁଙ୍କ ମୃତ୍ୟୁପରେ ପରେ ଯେତେବେଳେ ଜନତା ଦଳରେ ସଙ୍କଟ ଦେଖା ଦେଲା, ସେହି ସମୟରେ ଦଳର ବରିଷ୍ଠ ନେତାମାନେ ବିଜୁବାବୁଙ୍କ ବିକଳ୍ପ ଭାବେ ତାଙ୍କର ସୁପୁତ୍ର ନବୀନ ପଟ୍ଟନାୟକଙ୍କୁ ନିର୍ବାଚନ ମୈଦାନକୁ ଆଣିବାକୁ ପ୍ରୟାସ କରିଥିଲେ। ଏମାନଙ୍କ ଦୃଢ ବିଶ୍ୱାସ ଥିଲା ଯେ, ବିଜୁବାବୁଙ୍କ ଅନ୍ତେ ତାଙ୍କ ସୁପୁତ୍ର ନବୀନ ବାବୁ ଦଳରେ ଯୋଗଦାନ କଲେ ଦଳ ଅଧିକ ସୁଦୃଢ ଓ ଶକ୍ତିଶାଳୀ ହୋଇପାରିବ। ଦଳର ବରିଷ୍ଠ ନେତାମାନେ ବହୁ ଉଦ୍ୟମ କରି ଦୀର୍ଘ ସମୟର ବିଚାର ବିମର୍ଷ ପରେ ନବୀନ ପଟ୍ଟନାୟକ ଓଡ଼ିଶା ଆସି ରାଜନୀତିରେ ଯୋଗଦେବାକୁ ରାଜି ହୋଇଥିଲେ।
ତେବେ ବିଜୁବାବୁଙ୍କ ପରି ନବୀନ ବାବୁ ରାଜନୀତି କ୍ଷେତ୍ରରେ ସଫଳ ହେବେ କି ନାହିଁ, ଜାଣିବାକୁ ଦଳର କିଛି ବରିଷ୍ଠ ନେତା ଦିଲ୍ଲୀର ଜଣେ ପ୍ରସିଦ୍ଧ ଜ୍ୟୋତିଷଙ୍କ ପାଖକୁ ନବୀନ ବାବୁଙ୍କ ହସ୍ତରେଖା ଦେଖାଇବାକୁ ଯାଇଥିଲେ। ଯେତେବେଳେ ସେହି ଜ୍ୟୋତିଷ ଜଣକ ନବୀନ ବାବୁଙ୍କ ହସ୍ତରେଖା ଦେଖିଲେ, ସେତେବେଳେ ସେ ଆଶ୍ଚର୍ଯ୍ୟ ହୋଇ ଯାଇଥିଲେ। ଜ୍ୟୋତିଷ ଜଣକ ନବୀନ ବାବୁଙ୍କ ହସ୍ତରେଖା ଦେଖି କହିଥିଲେ, ୧୦କୋଟି ଲୋକଙ୍କ ଭିତରେ ଏପରି ଜଣେ ଭାଗ୍ୟବାନ ବ୍ୟକ୍ତି ଥାଆନ୍ତି। ନବୀନ ବାବୁ ରାଜନୀତିରେ ଆଶାତୀତ ସଫଳତା ହାସଲ କରିବେ। ସେ ଯେତେଦିନ ପର୍ଯ୍ୟନ୍ତ ଚାହିଁବେ, ସେତେଦିନ ପର୍ଯ୍ୟନ୍ତ କ୍ଷମତାରେ ରହିପାରିବେ। ନବୀନ ବାବୁ ବାପାଙ୍କ ଠାରୁ ଅଧିକ ସଫଳତା ଓ ଲୋକପ୍ରିୟ ହାସଲ କରିପାରିବେ। ତାଙ୍କର ଦୃଢ ନିଷ୍ପତ୍ତି ରହିବ ଓ ନିଜର ଲକ୍ଷ୍ୟପଥରୁ କେବେ ବିଚ୍ୟୁତ ହେବେନାହିଁ, ଯାହା ବାସ୍ତବରେ ପରିଣତ ହୋଇଛି।
ବିଜୁ ବାବୁଙ୍କ ମୃତ୍ୟୁ ପରେ ଯେତେବେଳେ ନବୀନ ପଟ୍ଟନାୟକ ରାଜନୀତିରେ ପାଦ ରଖିଥିଲେ, ଠିକ୍ ଏହାର ଦୁଇବର୍ଷ ପରେ ୧୯୯୯ ମସହାରେ ଓଡ଼ିଶାରେ ଦେଖା ଦେଇଥିଲା ପ୍ରଳୟଙ୍କାରୀ ମହାବାତ୍ୟା। ଧ୍ୱସ୍ତବିଧ୍ୱସ୍ତ ହୋଇଯାଇଥିଲା ସାରା ଓଡ଼ିଶା। ବାସହୀନ ହୋଇଥିଲେ ଲକ୍ଷ ଲକ୍ଷ ଲୋକ। ବିପର୍ଯ୍ୟସ୍ତ ଅର୍ଥନୀତି, ଅନାହାର, ଅନଟନ ଓ ଅପପୁଷ୍ଟିର ଭୟ ରାଜ୍ୟ ରାଜନୀତିକୁ ଦୋହଲାଇ ଦେଇଥିଲା। ଏହି ଘଡ଼ିସନ୍ଧି ମୁହୂର୍ତ୍ତରେ ୨୦୦୦ ମସିହା ମାର୍ଚ୍ଚ ୫ ତାରିଖରେ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ ନବୀନ ପଟ୍ଟନାୟକ। ସେହି ସମୟରେ କିଛି ଲୋକ ନବୀନ ପଟ୍ଟନାୟକଙ୍କୁ କୁତ୍ସାରଟନା ମଧ୍ୟ କରିଥିଲେ। ପ୍ରତିକୂଳ ପରିସ୍ଥିତି, କ୍ଷମତା ଦଖଲର ଷଡ଼ଯନ୍ତ୍ର, ରାଜନୈତିକ ପଶାପାଲିର ଛକାପଞ୍ଝା ସତ୍ତ୍ୱେ ଏକ ଅପରାଜେୟ ମୁଖ୍ୟମନ୍ତ୍ରୀ ଭାବେ ୨୪ ବର୍ଷ ପୂରଣ କରିସାରିଲେଣି। ନବୀନ ପଟ୍ଟନାୟକ ୨୦୦୦, ୨୦୦୪, ୨୦୦୯, ୨୦୧୪ ଓ ୨୦୧୯ କ୍ରମାଗତ ଭାବେ ମୁଖ୍ୟମନ୍ତ୍ରୀ ଭାବେ କ୍ଷମତାରେ ରହିଆସିଛନ୍ତି।
ବିଜୁବାବୁଙ୍କ ମୃତ୍ୟୁର ଦୁଇମାସ ମଧ୍ୟରେ ନବୀନ ପଟ୍ଟନାୟକ ଆସ୍କା ଉପନିର୍ବାଚନରେ ବିଜୟୀ ହୋଇ କେନ୍ଦ୍ରରେ କ୍ୟାବିନେଟ ପାହ୍ୟା ମନ୍ତ୍ରୀ ହୋଇଥିଲେ। ଏହା ପରେ ୨୬ ଡ଼ିସେମ୍ବର ୧୯୯୭ ମସିହାରେ ବିଜୁ ଜନତା ଦଳ ଜନ୍ମ ନେଇଥିଲା। ଏହି ଆଞ୍ଚଳିକ ଦଳ ଜନ୍ମ ନେବା ପରଠାରୁ କେବେବି ପରାଜୟର ସମ୍ମୁଖୀନ ହୋଇନାହିଁ। ଇତି ମଧ୍ୟରେ ନବୀନ ବାବୁ କ୍ରମାଗତ ଭାବେ ଚାରିଥର ମୁଖ୍ୟମନ୍ତ୍ରୀ ହୋଇସାରିଲେଣି। ୨୬, ଡ଼ିସେମ୍ବର ୧୯୯୭ରେ ପ୍ରତିଷ୍ଠିତ ଏହି ଦଳ, ୧୯୯୮ ଓ ୧୯୯୯ ଲୋକସଭା ଆସନରେ ବିଜେପି ସହ ମେଣ୍ଟ କରି ୯ଟି ଓ ୧୦ଟି ଲୋକସଭା ଆସନରେ ବିଜୟୀ ହୋଇ, କେନ୍ଦ୍ର ମନ୍ତ୍ରୀମଣ୍ଡଳରେ ସାମିଲ୍ ହୋଇଥିଲା।
ଏହାପରେ ୨୦୦୯ ମସିହାରୁ ବିଜୁ ଜନତା ଦଳ ଓଡ଼ିଶା ଶାସନରେ ଏକାକୀ କ୍ଷମତାରେ ରହିଆସିଛି ଏବଂ ଦଳର ସଭାପତି, ନବୀନ ବାବୁଙ୍କୁ ଓଡ଼ିଶାବାସୀ ଲଗାତର ମୁଖ୍ୟମନ୍ତ୍ରୀ ଭାବେ ମତସାବ୍ୟସ୍ତ କରିଆସୁଛନ୍ତି। ବିଜେଡ଼ି-ବିଜେପି ମଧ୍ୟରେ ରହିଥିବା ମେଣ୍ଟ ଭାଙ୍ଗିଗଲା ପରେ ଓଡ଼ିଶାରେ ଯେଉଁ ପରିବର୍ତ୍ତନର ଝଡ଼ ବହିଥିଲା ତାହାକୁ ଭୁଲ୍ ପ୍ରମାଣିତ କରି ନବୀନ ପଟ୍ଟନାୟକଙ୍କ ବିଜୁ ଜନତା ଦଳ ବିଧାନସଭା ଓ ଲୋକସଭା ନିର୍ବାଚନରେ ସର୍ବଶ୍ରେଷ୍ଠ ପ୍ରଦର୍ଶନ କରିଆସୁଛି।
ନବୀନ ପଟ୍ଟନାୟକ କେବଳ ଓଡ଼ିଶାର ମୁଖ୍ୟମନ୍ତ୍ରୀ ନୁହଁନ୍ତି, ବରଂ ଜାତୀୟ ରାଜନୈତିକ ଦୃଶ୍ୟପଟ୍ଟରେ ସବୁଠାରୁ ବ୍ୟସ୍ତବହୁଳ ଆଉ ଚର୍ଚ୍ଚିତ ବ୍ୟକ୍ତିତ୍ୱର ଅଧିକାରୀ। ନିଜର ସ୍ୱଚ୍ଛ ଓ ନିର୍ମଳ ଭାବମୂର୍ତ୍ତି, ସରଳତା, ସଚ୍ଚୋଟତା, ସୁଶାସନ ବିଶେଷକରି ଦୁର୍ନୀତି ବିରୋଧୀ କଡ଼ା ଆଭିମୁଖ୍ୟ ଓ କାର୍ଯ୍ୟାନୁଷ୍ଠାନ ପାଇଁ ସେ ସାରା ଭାରତର ସର୍ବାଧିକ ଲୋକପ୍ରିୟ ମୁଖ୍ୟମନ୍ତ୍ରୀ ଭାବେ ମାନ୍ୟତା ପାଇଚାଲିଛନ୍ତି। ପ୍ରାକୃତିକ ବିପର୍ଯ୍ୟୟ ରାଜ୍ୟ ଭାବେ ପରିଚିତ ଥିବା ଓଡ଼ିଶାରେ ନବୀନଙ୍କ ୨୩ ବର୍ଷ ଶାସନକାଳ ମଧ୍ୟରେ ଯେତେ ଥର ବନ୍ୟା, ବାତ୍ୟା, ମରୁଡ଼ି ଘଟିଛି ତାହାକୁ ଯଥାର୍ଥ ଭାବେ ମୁକାବିଲା କରିଛନ୍ତି ନବୀନ ବାବୁ। ବିଶେଷକରି ୨୦୧୯ ମେ ୩ ତାରିଖରେ ଘଟିଥିବା ପ୍ରଳୟଙ୍କାରୀ ‘ଫନି’ ମହାବାତ୍ୟାର ସଫଳ ମୁକାବିଲା କରି ନବୀନ ସରକାର ବିଭିନ୍ନ ମହଲରୁ ପ୍ରଶଂସିତ ହୋଇଥିଲେ। ଏପରିକି ‘ଜାତିସଂଘ’ ମଧ୍ୟ ନବୀନଙ୍କ ପଦକ୍ଷେପକୁ ପ୍ରଶଂସା କରିଥିଲେ।
୨୦୨୦ ମସିହାରେ ସାରା ରାଜ୍ୟରେ ଯେତେବେଳେ ମହାମାରୀ କରୋନା ତାର କାୟବିସ୍ତାର କରିଚାଲିଥିଲା ନବୀନ ପଟ୍ଟନାୟକ ଠିକ୍ ସେହି ସମୟରେ ସଫଳତାର ସହ ମୁକାବିଲା କରିବା ପାଇଁ ଆଗୁଆ ପଦକ୍ଷେପ ନେଇ ସାରା ଦେଶରେ ମଡ଼େଲ ରାଜ୍ୟ ଭାବେ ରାଜନୈତିକସ୍ତରରେ ନବୀନଙ୍କ ପତିଆରା ବଢିଛି। ହେଲେ ବିରୋଧୀ ଦଳର ନେତାମାନେ ଏହାକୁ ସହଜରେ ଗ୍ରହଣ କରିପାରି ନାହାଁନ୍ତି। ଆରମ୍ଭରୁ ବିରୋଧୀମାନେ ନବୀନ ସରକାରରେ ଅନେକ ସମୟରେ ଅସ୍ଥିରତା ସୃଷ୍ଟି ପାଇଁ ଉଦ୍ୟମ କରି ବିଫଳ ହୋଇଛନ୍ତି। ଓଡ଼ିଶାର ରାଜନୈତିକ ପାଣିପାଗକୁ ଲକ୍ଷ୍ୟ ରଖି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଗକୁ ଆହୁରି କଠୋର ହେବେ ଏବଂ କଡ଼ା ଆଭିମୁଖ୍ୟ ଗ୍ରହଣ କରିବେ ବୋଲି ଚର୍ଚ୍ଚା ହେଉଛି। ତେବେ ୨୩ ବର୍ଷର ଶାସନ କାଳରେ ଓଡ଼ିଶାବାସୀଙ୍କ ସମସ୍ୟାର ସମାଧାନ ପାଇଁ ଗୋଟିଏ ପରେ ଗୋଟିଏ ଯୋଜନା ହାତକୁ ନେଇ ସଫଳତା ସାଉଁଟି ଚାଲିଛନ୍ତି।
ବିଶେଷକରି ନାରୀ ସଶକ୍ତିକରଣ ଉପରେ ଗୁରୁତ୍ୱ ଦେଉଥିବା ନବୀନ ବାବୁ, ସ୍ୱୟଂ ସହାୟିକା ଗୋଷ୍ଠୀ ମାଧ୍ୟମରେ ମହିଳାମାନଙ୍କୁ ଆତ୍ମନିର୍ଭରଶୀଳ କରି ସେମାନଙ୍କ ଆର୍ଥିକସ୍ଥିତିକୁ ସୁଦୃଢ କରିବା, ମିଶନ ଶକ୍ତି ନାମରେ ମହିଳା ସଶକ୍ତିକରଣ ଯୋଜନା ସହିତ ଓଡ଼ିଶାବାସୀଙ୍କ ପାଇଁ ମୋ କୁଡ଼ିଆ ଯୋଜନା, ଇନ୍ଦିରା ଆବାସ ଯୋଜନା, ମହାତ୍ମା ଗାନ୍ଧୀ ଜାତୀୟ ନିଶ୍ଚିତ କର୍ମନିଯୁକ୍ତି ଯୋଜନା, ଶିକ୍ଷକମାନଙ୍କୁ ନିଯୁକ୍ତି, ଖବର କାଗଜ ହକରମାନଙ୍କୁ କରୋନା ବିପର୍ଯ୍ୟସ୍ତ ସହାୟତ ଏବଂ ଉଠାଦୋକାନୀମାନଙ୍କୁ କୋଭିଡ଼ ସହାୟତା ପ୍ରଦାନ କରିବା ଦ୍ୱାରା, ମହାମାରୀ କରୋନା ସମୟରେ ଦୁର୍ବଳ ହୋଇପଡ଼ିଥିବା ଆର୍ଥିକସ୍ଥିତିକୁ ସୁଦୃଢ କରିବାରେ ସହାୟକ ହୋଇପାରିଛି।
୫-ଟି ଆଉ ମୋ ସରକାର ଭଳି ଅନେକ ଲୋକାଭିମୁଖୀ କାର୍ଯ୍ୟକ୍ରମକୁ ନିଷ୍ଠାର ସହ କାର୍ଯ୍ୟକାରୀ କରିବା ଏବଂ ରାଜ୍ୟର ସ୍ୱାର୍ଥକୁ ପ୍ରାଥମିକତା ଦେଇ ସାଧାରଣ ଜନତାଙ୍କ ଆସ୍ଥା ଓ ବିଶ୍ୱାସଭାଜନ ହେବାରେ ତାଙ୍କର ବିଶେଷ ଭୂମିକା ରହିଛି। ଲଗାତର ଭାବେ ୫ଥର ମୁଖ୍ୟମନ୍ତ୍ରୀ ହୋଇ ଦୀର୍ଘ ୨୩ ବର୍ଷରୁ ଉର୍ଦ୍ଧ୍ୱ କାଳ କ୍ଷମତାରେ ରହିବା ପରେ ନବୀନଙ୍କ ମୁଖ୍ୟମନ୍ତ୍ରୀତ୍ୱ ସମୟରେ ଏକ ରୋମାଞ୍ଚକର ଘଟଣା ଦେଖିବାକୁ ମିିଳିଥିଲା। ଷୋଡ଼ଶ ଓଡ଼ିଶା ବିଧାନସଭାର ବଜେଟ ଅଧିବେଶନ ଚାଲିଥିବା ବେଳେ ଧାନକିଣା ତାତିକୁ ନେଇ କ୍ରମାଗତ ଭାବେ ବିଧାନସଭା ଅଚଳ ହୋଇପଡ଼ିଥିଲା। ଏହାକୁ ନେଇ ଉଭୟ ଶାସକ ଓ ବିରୋଧୀ ମୁହାଁମୁହିଁ ହୋଇ ରାସ୍ତାକୁ ଓହ୍ଲାଇଥିଲେ। ଗୃହରେ ନବୀନଙ୍କ ଅନୁପସ୍ଥିତିକୁ ନେଇ ବିରୋଧୀ ଦଳର ବିଧାୟକମାନେ ବିଧାନସଭାରୁ ସିଧା ନବୀନ ନିବାସ ଯାତ୍ରା କରିଥିଲେ ଯାହା ଅତୀତରେ କେବେ ଘଟିନଥିଲା।
ବିରୋଧୀ ଦଳଙ୍କ ପଛେ ପଛେ ଶାସକ ବିଜେଡ଼ି ବିଧାୟକମାନେ ବି ଗଲେ। କିନ୍ତୁ ନବୀନ ନିବାସରେ ପହଞ୍ôଚବା ପରେ ବିରୋଧୀଙ୍କ ସବୁ ଅଙ୍କ ଭୁଲ୍ରେ ପ୍ରମାଣିତ ହୋଇଥିଲା। ବିରୋଧୀ ବିଧାୟକମାନେ ଯେଉଁ ମନୋଭାବ ନେଇ ନବୀନ ନିବାସ ଯାତ୍ରା କରିଥିଲେ, ସେଠାରେ ପହଞ୍ôଚବା ପରେ ପାଗ ପରିବର୍ତ୍ତନ ହୋଇଯାଇଥିଲା। ହଠାତ ବଦଳିଯାଇଥିଲେ ବିରୋଧୀ ବିଧାୟକମାନେ। ଚନ୍ଦନ ଟୋପା ଓ ପୁଷ୍ପଗଚ୍ଛ ଦେଇ ତାଙ୍କୁ ସ୍ୱାଗତ କରାଯାଇଥିଲା ଓ ପରେ ଘୋଳଦହି ପିଆଇ ଅତିଥି ଦେବୋ ଭବରେ ଆପ୍ୟାୟିତ କରଗଲା ପରେ ଏହି ଘଟଣାର ଯବନିକା ପଡ଼ିଥିଲା। ନବୀନ ପଟ୍ଟନାୟକ ସେଠାରେ ବିରୋଧୀ ବିଧାୟକଙ୍କ ସହ ଦୀର୍ଘ ସମୟ ଆଲୋଚନା କରି ବିରୋଧୀଙ୍କ ଦାବୀକୁ ଗ୍ରହଣ କରିଥିଲେ।
ଏହି ଘଟଣାରେ ନବୀନଙ୍କୁ ପ୍ରଶଂସା ପରେ ପ୍ରଶଂସା ମିଳିଥିଲା। ଖାଲି ସେତିକି ନୁହେଁ ଯଦି କୌଣସି କର୍ମୀ, ନେତା ବା ସାଧାରଣ ଜନତା ନବୀନଙ୍କୁ ସମାଲୋଚନା କରନ୍ତି, ତେବେ ସେ କେବେ ବି କିଛି ପ୍ରତିକ୍ରିୟା ପ୍ରକାଶ କରନ୍ତିନାହିଁ। ସ୍ୱଚ୍ଛ, ସରଳ, ନିର୍ମଳ ଭାବମୂର୍ତ୍ତି ନୀତିକୁ ଆପଣାଇ ନବୀନ ଓଡ଼ିଶା ମାଟିରେ ନିଜକୁ ନାୟକରୁ ମହାନାୟକ ବନାଇ ସାରିଛନ୍ତି। ନବୀନଙ୍କୁ ଦୀର୍ଘ ୨୩ ବର୍ଷ ମଧ୍ୟରେ ପ୍ରତିହତ ବା ମୁକାବିଲା କରିବା ପାଇଁ ଓଡ଼ିଶାରେ କୌଣସି ଜାତୀୟ ବା ଅଞ୍ଚଳିକ ରାଜନୈତିକ ଦଳ ସକ୍ଷମ ହୋଇପାରି ନାହାଁନ୍ତି।
ଏହି ବିଜ୍ଞପ୍ତିରେ କୁହାଯାଇଛି ଯେ ପୂର୍ବରୁ ଯେଉଁ ବିଜ୍ଞପ୍ତି ପ୍ରକାଶ କରାଯାଇଥିଲା ତାହାକୁ ରଦ୍ଦ କରାଯାଇ ଏହି ନୂଆ ତାଲିକା ଲାଗୁ କରାଗଲା।
