The Samikhsya Odia
ଭୁବନେଶ୍ବର : ଭୁବନେଶ୍ବର ସ୍ଥିତ ମାର୍କେଟ୍ ବିଲ୍ଡିଂକୁ ସିଲ୍ କରି ଦିଆଯାଇଛି । ପ୍ରବଳ ଭିଡ କାରଣରୁ ବିଏମ୍ସି ଜୋନାଲ୍ କମିଶନର ମାର୍କେଟ ବିଲ୍ଡିଂକୁ ସିଲ୍ କରିଛନ୍ତି । ରଜ ସପିଂ ପାଇଁ ଅସମ୍ଭବ ଭିଡ ତଥା ସାମାଜିକ ଦୂରତ୍ବ ନିୟମର ଉଲ୍ଲଂଘନ କାରଣରୁ ବିଏମ୍ସି ପକ୍ଷରୁ ଏହି ନିଷ୍ପତ୍ତି ନିଆଯାଇଛି । ଗତକାଲି ମଧ୍ୟ ସମାନ କାରଣରୁ ଏକାଧିକ ଦୋକାନକୁ ସିଲ୍ କରାଯାଇଛି । ଉଲ୍ଲେଖଯୋଗ୍ୟ ଯେ, ରଜ କାରଣରୁ ସରକାରଙ୍କ ପକ୍ଷରୁ ରାତ୍ରିକାଳୀନ କର୍ଫ୍ୟୁକୁ ରାତ୍ର 10 ଟା ପର୍ଯ୍ୟନ୍ତ କୋହଳ କରାଯାଇଛି ।
ଭୁବନେଶ୍ବର : ଭୁବନେଶ୍ବରରୁ ଆଉ 5 ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ନେଇ ବିଏମ୍ସି ପକ୍ଷରୁ ଟ୍ବିଟ୍ କରାଯାଇଛି । ଆଜି ସକାଳୁ 173 ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ତନ୍ମଧ୍ୟରେ ଖୋର୍ଦ୍ଧାରୁ 9 ଜଣ ରହିଥିଲେ । ଏହି 9 ଜଣ ଆକ୍ରାନ୍ତଙ୍କ ମଧ୍ୟରୁ 5 ଜଣ ଭୁବନେଶ୍ବରର ବୋଲି ବିଏମ୍ସି ଟ୍ବିଟ୍ କରି ସୂଚନା ଦେଇଛି । 5 ଜଣ ଆକ୍ରାନ୍ତଙ୍କ ମଧ୍ୟରୁ 4 ଜଣ ହୋମ୍ କ୍ବାରେଣ୍ଟିନ୍ରେ ରହିଥିବା ବେଳେ ଜଣେ ସ୍ଥାନୀୟ ଆକ୍ରାନ୍ତ ବୋଲି ଜଣାପଡିଛି । ସ୍ଥାନୀୟ ଆକ୍ରାନ୍ତ ଜଣକ ଗଜପତି ନଗରର ବୋଲି ବିଏମ୍ସି ସୂଚନା ଦେଇଛି । ଏହାକୁ ମିଶାଇ ରାଜଧାନୀରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା 86ରେ ପହଞ୍ଚିଥିବା ବେଳେ ତନ୍ମଧ୍ୟରୁ 51 ଜଣ ସୁସ୍ଥ ହୋଇଛନ୍ତି । 3 ଜଣଙ୍କର ପ୍ରାଣହାନି ଘଟିଥିବା ବେଳେ ସକ୍ରିୟ ଆକ୍ରାନ୍ତଙ୍କ ସଂଖ୍ୟା 32 ରହିଛି ।
ଭୁବନେଶ୍ବର : ଆସନ୍ତା କାଲିଠାରୁ ରାଜ୍ୟରେ ଅନ୍ଲାଇନ୍ରେ ମିଳିବ ମଦ । 24 ତାରିଖରୁ ଏହି ନିୟମ କାର୍ଯ୍ୟକାରୀ ହେବ । କିନ୍ତୁ କଣ୍ଟେନମେଣ୍ଟ ଜୋନରେ ଏହି ନିୟମ ଲାଗୁ ହେବ ନାହିଁ । ତେବେ କୌଣସି କାଉଣ୍ଟରରେ ମଦ ବିକ୍ରି କରିବାକୁ ସରକାର ଅନୁମତି ଦେଇନାହାନ୍ତି । ସ୍ପେଶାଲ କୋଭିଡ଼ ଫି ଲଗାଇ ମଦର ଦର ବଢ଼ାଇଛନ୍ତି ସରକାର । ସମସ୍ତ ପ୍ରକାର ମଦର ଦର 50 ପ୍ରତିଶତ ବୃଦ୍ଧି କରାଯାଇଛି । ଏହାସହ ରିଟେଲର ଚାହିଁଲେ ମଦ ନିଜେ ହୋମ ଡ଼େଲିକରି କରିପାରିବେ ନଚେତ ଫୁଡ଼ ଡ଼େଲିଭରି ସଂସ୍ଥାର ମଧ୍ୟ ସେମାନେ ସହଯୋଗ ନେଇପାରିବେ । ମଦ ବିକ୍ରିରୁ ମିଳିବାକୁ ଥିବା ଅତିରିକ୍ତ ରାଜସ୍ବ କୋଭିଡ୍ ମୁକାବିଲାରେ ଖର୍ଚ୍ଚ କରାଯିବ ବୋଲି ଜଣାପଡିଛି ।
ମୁମ୍ବାଇ : ଭାରତରେ କରୋନା କାୟା ବିସ୍ତାର କରି ଚାଲିଥିବାବେଳେ ମହାରାଷ୍ଟ୍ରରେ ଏହା ଅଧିକ କ୍ଷତିଗ୍ରସ୍ତ ହୋଇଛି । ମହାରାଷ୍ଟ୍ର ରାଜଧାନୀ ମୁମ୍ବାଇରେ 25 ହଜାରରୁ ଅଧିକ ଲୋକେ କରୋନାରେ ଆକ୍ରାନ୍ତ ହୋଇଛନ୍ତି । ତେବେ ଲକ୍ ଡାଉନ୍ 4.0ରେ କଟକଣା କୋହଳ ହେବା ସହିତ ଅତ୍ୟାବଶ୍ୟକ ସାମଗ୍ରୀ ସହିତ ଅନ୍ୟାନ୍ୟ ଦୋକାନକୁ ଖୋଲିବାକୁ ଅନୁମତି ମିଳିଛି । ସେହିପରି ଅନ୍ଲାଇନ୍ ଖାଦ୍ୟ ମଗାଇ ଯାଉଥିବାବେଳେ ଏବେ ମଦର ହୋମ୍ ଡେଲିଭରୀ କରିବାକୁ ନି୍ଷ୍ପତ୍ତି ନେଇଛି ବିଏମ୍ସି। ମୁମ୍ବାଇ ସହରରେ ମଦର ହୋମ ଡେଲିଭରୀ କରିବାକୁ ବମ୍ବେ ମ୍ୟୁନିସିପାଲ କର୍ପୋରେସନ୍ ଏପରି ନିଷ୍ପତ୍ତି ନେଇଛି । ବିଏମ୍ସିର ନିଷ୍ପତ୍ତି ଅନୁଯାୟୀ ଆଜିଠାରୁ ମୁମ୍ବାଇରେ ମଦର ହୋମ୍ ଡେଲିଭରୀ ଆରମ୍ଭ ହେବ । ଲୋକମାନେ ଘରେ ବସି ମଦର ଅର୍ଡର ଦେଇପାରିବେ। କିନ୍ତୁ କଣ୍ଟେନମେଣ୍ଟ ଜୋନ୍ରେ କୌଣସି ପ୍ରକାରର ସେବା ମିଳିପାରିବ ନାହିଁ । ଯେଉଁ ଦୋକାନୀମାନେ ଅନୁମତି ପାଇଛନ୍ତି, ସେମାନେ ହିଁ ଏହାର ହୋମ୍ ଡେଲିଭରୀ କରିବେ। ଏହି ଦୋକାନଗୁଡିକ କାଉଣ୍ଟରରେ କୌଣସି ପ୍ରକାରର ମଦ ବିକ୍ରି ହୋଇପାରିବ ନାହିଁ। ଦୋକାନୀମାନେ ଇ-କମର୍ସ ପ୍ଲାଟଫର୍ମ ଦ୍ବାରା ମଦର ହୋମ୍ ଡେଲିଭରୀ କରିପାରିବେ ବୋଲି ସୂଚନା ରହିଛି।
ସୂଚନାଯୋଗ୍ୟ, ମହାରାଷ୍ଟ୍ରରେ ସର୍ବାଧିକ ରୋଗୀ ଚିହ୍ନଟ ହୋଇଛନ୍ତି । ଏଠାରେ ଗତ 24 ଘଣ୍ଟାରେ 2940ଟି ନୂତନ ମାମଲା ଆସିଛି । ସେହିପରି 63 ଜଣଙ୍କର ମୃତ୍ୟୁ ହୋଇଛି । ରାଜ୍ୟରେ 44582ଜଣ ଆକ୍ରାନ୍ତ ଥିବାବେଳେ ମୋଟ୍ 1,517ଜଣଙ୍କର ମୃତ୍ୟୁ ହୋଇଛି । (ଏଜେନ୍ସି)
ଭୁବନେଶ୍ବର : ସିଲ୍ ହୋଇଥିବା ବାପୁଜୀ ନଗର ପୁଣି ଥରେ ଖୋଲିଛି । ତେବେ ସମ୍ପୂର୍ଣ୍ଣ ଭାବରେ ନୁହେଁ । ମାତ୍ର 50ଟି ଦୋକାନ ଖୋଲିବାକୁ ବିଏମ୍ସି ପକ୍ଷରୁ ଅନୁମତି ପ୍ରଦାନ କରାଯାଇଛି । 50 ଟି ଦୋକାନକୁ ଅନୁମତି ଦିଆଯିବା ସହିତ ବଜାର ଭିତରକୁ କେହି ଗାଡି ନେଇ ଯାଇପାରିବେ ନାହିଁ ବୋଲି ବିଏମ୍ସି ପକ୍ଷରୁ କୁହାଯାଇଛି । ଉଲ୍ଲେଖଯୋଗ୍ୟ ଯେ, ସାମାଜିକ ଦୂରତ୍ବର ଉଲ୍ଲଂଘନ କାରଣରୁ ବାପୁଜୀ ନଗରକୁ ସିଲ୍ କରିଥିଲା ବିଏମ୍ସି ।
ଭୁବନେଶ୍ବର : ଭୁବନେଶ୍ବର ଅନ୍ତର୍ଗତ ବାପୁଜୀ ନଗର ମାର୍କେଟ୍କୁ ସିଲ୍ କରି ଦିଆଯାଇଛି । ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବିଏମ୍ସି ପକ୍ଷରୁ ଏହି ମାର୍କଟ୍କୁ ସିଲ୍ କରିଦିଆଯାଇଛି । ଜରୁରୀ ସାମଗ୍ରୀ ଦୋକାନ ବ୍ୟତିତ ଅନ୍ୟ ସମସ୍ତ ଦୋକାନ ବନ୍ଦ ରଖିବା ପାଇଁ ନିର୍ଦ୍ଦେଶ ଦିଆଯାଇଛି । । ବିଏମ୍ସି ଡେପୁଟୀ ଜେନେରାଲ ଅଂଶୁମାନ ରଥ ଏହି ସୂଚନା ଦେଇଛନ୍ତି । ବାପୁଜୀ ନଗର ମାର୍କେଟ୍ରେ ସାମାଜିକ ଦୂରତ୍ବର ଉଲ୍ଲଂଘନ କରାଯାଉଥିବା ଅଭିଯୋଗର ବିଏମ୍ସି ପକ୍ଷରୁ ଏହାକୁ ସିଲ୍ କରି ଦିଆଯାଇଛି ।
ଭୁବନେଶ୍ବର : ରାଜଧାନୀ ଭୁବନେଶ୍ବରରେ ଦୋକାନ ବଜାର ଖୋଲିବା ପାଇଁ ନୂତନ ଗଇଡ୍ଲାଇନ୍ ଜାରି କରିଛି କମିଶନରେଟ ପୋଲିସ୍ । ମେ 1 ଠାରୁ ଏହି ନୂତନ ଗାଇଡ୍ ଲାଇନ୍ କାର୍ଯ୍ୟକାରୀ ହେବା ସହିତ 60 ଦିନ ପର୍ଯ୍ୟନ୍ତ ଏହା ବଳବତ୍ତର ରହିବ । ନୂତନ ଗାଇଡ୍ ଲାଇନ୍ ଅନୁଯାୟୀ କେବଳ ସ୍ବୀକୃତୀପ୍ରାପ୍ତ ଦୋକାନ ଖୋଲାଯାଇପାରିବ ମାତ୍ର ଦୋକାନ ଗୁଡିକରେ ସୋସିଆଲ୍ ଡିଷ୍ଟାନ୍ସିଂକୁ କଡାକଡି ଭାବରେ ପାଳନ କରାଯିବ । ଜରୁରୀକାଳୀନ ସାମଗ୍ରୀ ଦୋକାନ ସହିତ ମାର୍କେଟ୍ କମ୍ପ୍ଲେକ୍ସରେ ରହିଥିବା ଦୋକାନକୁ ଖୋଲାଯାଇପାରିବ ବୋଲି ଜଣାପଡିଛି । ତେବେ 5ରୁ ଅଧିକ ଦୋକାନ ରହିଥିବା ମାର୍କେଟ୍ କମ୍ପ୍ଲେକ୍ସକୁ ଖୋଲାଯାଇପାରିବ ନାହିଁ । ଏହା ସହିତ ଦୋକାନୀ ପାନ କିମ୍ବା ଗୁଟ୍ଖା ଖାଇ ଦୋକାନକୁ ଯାଇ ପାରିବେ ନାହିଁ ଏବଂ ବାହାରେ ଛେପ ନପକାଇବା ପାଇଁ ଗାଇଡ୍ ଲାଇନ୍ରେ ଉଲ୍ଲେଖ କରାଯାଇଛି । ଗ୍ରାହକ ସାମାଜିକ ଦୂରତ୍ବ ନରଖିଲେ ଦଣ୍ଡିତ ହେବେ ଏନେଇ ଦୋକାନୀଙ୍କୁ 100ରେ ଫୋନ୍ କରିବାକୁ ପଡିବ । ସମସ୍ତ ମଲ୍, ଜିମ୍, ଫାଷ୍ଟଫୁଡ୍, ସେଲୁନ୍, ପାନ, ବ୍ୟୁଟି ପାର୍ଲରକୁ ବନ୍ଦ ରଖାଯିବ ବୋଲି ବିଏମ୍ସି ପକ୍ଷରୁ କୁହାଯାଇଛି । (ଏଜେନ୍ସି)
ଭୁବନେଶ୍ବର: ରାଜ୍ୟ ସରକାର ଅଭାବି ଏବଂ ଗରିବ ଶ୍ରେଣୀର ଲୋକଙ୍କୁ ରନ୍ଧାଖାଦ୍ୟ ଯୋଗାଇ ଦେଇ ଆସୁଛନ୍ତି। ଠିକ୍ ସେହିପରି ଏହି ଲକଡାଉନ ସମୟରେ ବୁଲା ପଶୁମାନଙ୍କୁ ମଧ୍ୟ ରନ୍ଧାଖାଦ୍ୟ ଯୋଗାଇ ଦେବାର ବ୍ୟବସ୍ଥା କରାଯାଇଛି। ଏଥିପାଇଁ ମୁଖ୍ୟମନ୍ତ୍ରୀ ପଶୁମାନଙ୍କୁ ଖାଦ୍ୟ ଯୋଗାଇ ଦେବାକୁ ୫୪ ଲକ୍ଷ ଟଙ୍କା ଅନୁଦାନ ପ୍ରଦାନ କରିଛନ୍ତି। ସେହି ଅନୁସାରେ ରାଜ୍ୟର ପ୍ରତି ବିଜ୍ଞାପିତ ଅଞ୍ଚଳ, ସହରାଞ୍ଚଳ ଏବଂ ମହାନଗର ଅଞ୍ଚଳରେ ଏହା ଲାଗୁ କରାଯାଇଛି।
ଭୁବନେଶ୍ବର ମହାନଗର ବା ବିଏମସିରେ ମଧ୍ୟ ବୁଲାପଶୁମାନଙ୍କୁ ଦୈନିକ ରନ୍ଧା ଖାଦ୍ୟ ଯୋଗାଇ ଦିଆଯାଉଛି। ସେଥିପାଇଁ ବିଏମସି ତରଫରୁ ଏକ ସ୍ବତନ୍ତ୍ର ଟିମ କରାଯାଇ ସହରର ବିଭିନ୍ନ ସ୍ଥାନରେ ବୁଲିବୁଲି ଏହି ବୁଲା ପଶୁଙ୍କୁ ଖାଦ୍ୟ ପ୍ରଦାନ କରୁଛନ୍ତି। ବିଏମସ ତରଫରୁ ପ୍ରତ୍ୟେକ ଦିନ ସକାଳେ ୫ କ୍ବିଣ୍ଟାଲ ଏବଂ ସଂଧ୍ୟାରେ ୩ କ୍ଵିଣ୍ଟାଲ ରନ୍ଧା ଖାଦ୍ୟ କେବଳ କୁକୁରମାନଙ୍କୁ ଦିଆ ଯାଉଛି। ସେହିପରି ପ୍ରତ୍ୟେକ ଦିନ ୪ କ୍ଵିଣ୍ଟାଲ ଖାଦ୍ୟ ଗାଈଗୋରଙ୍କୁ ପ୍ରଦାନ କରାଯାଉଛି। ଏହି ଲକ ଡାଉନ ସମୟରେ ଦୈନିକ ସକାଳେ ଏବଂ ସଂଧ୍ୟାରେ ଏହି ବୁଲାପଶୁଙ୍କୁ ଦୁଇଥର ଖାଇବାକୁ ଦିଆଯାଉଛି।
ସମୀକ୍ଷା ବ୍ୟୁରୋ
ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା 42ରେ ପହଞ୍ଚିଥିବାବେଳେ ଜଣକଙ୍କର ମୃତ୍ୟୁ ହୋଇଯାଇଛି। ଭୁବନେଶ୍ବରକୁ କରୋନା ହଟସ୍ପଟ୍ ବୋଲି ଚିହ୍ନଟ କରାଯାଇଛି ସର୍ବାଧିକ କରୋନା ରୋଗୀ ଭୁବନେଶ୍ବରରୁ ହିଁ ଚିହ୍ନଟ ହୋଇଛନ୍ତି। ଆଜି ସକାଳୁ ଭୁବନେଶ୍ବରର କେନ୍ଦ୍ରରେ ଥିବା ସତ୍ୟନଗର ଅଞ୍ଚଳକୁ ବିଏମସି ତରଫରୁ କଣ୍ଟେନମେଣ୍ଟ ଜୋନ୍ ଘୋଷଣା କରାଯାଇ ବ୍ୟାପକ ପଦକ୍ଷେପ ନିଆଯାଉଥିବାବେଳେ ଏହି ଅଞ୍ଚଳରୁ କେହି ଆକ୍ରାନ୍ତ ଅଛନ୍ତି ବୋଲି ରାଜ୍ୟ ସ୍ୱାସ୍ଥ୍ୟ ବିଭାଗ କହି ନାହିଁ। ଓଡ଼ିଶା ରାଜ୍ୟ ସ୍ବାସ୍ଥ୍ୟ ବିଭାଗର ଚୁପ୍ ରହିଥିବା ବେଳେ ମହାନଗର ନିଗମର ପଦକ୍ଷେପକୁ ନେଇ ଅନେକ ଦ୍ଵନ୍ଦ୍ଵ ଉପୁଜିଛି।
ଭୁବନେଶ୍ବରର ଝାରପଡା, ବମିଖାଲ, ସୂର୍ଯ୍ୟନଗର, କପିଳପ୍ରସାଦ ପରି ଅଞ୍ଚଳରୁ କରୋନା ଆକ୍ରାନ୍ତ ଚିହ୍ନଟ ହେବା ପରେ ସମ୍ପୃକ୍ତ ଅଞ୍ଚଳକୁ ସଂକ୍ରମିତ ଅଞ୍ଚଳ ରୂପେ ଘୋଷଣା କରାଯାଇ ସେହି ସବୁ ଅଞ୍ଚଳକୁ ସିଲ୍ କରାଯାଇଥିଲା। କିନ୍ତୁ ମିଳିଥିବା କରୋନା ଆକ୍ରାନ୍ତଙ୍କ ତଥ୍ୟ ହିସାବରେ ସତ୍ୟନଗରରୁ କେହି ଆକ୍ରାନ୍ତ ରହିଥିବାର ସୂଚନା ନାହିଁ। ସତ୍ୟନଗରରୁ କେହି କରୋନା ଆକ୍ରାନ୍ତ ଥିବାକୁ ନେଇ ସ୍ବାସ୍ଥ୍ୟ ବିଭାଗ ଚୁପ୍ ରହିଥିବାବେଳେ ବିଏମ୍ସି ଏହି ଅଞ୍ଚଳକୁ କଣ୍ଟେନମେଣ୍ଟ ଜୋନ୍ ରୂପେ ଘୋଷଣା କରିବା ଏକ ବଡ଼ ପ୍ରଶ୍ନ ହୋଇ ଠିଆ ହୋଇଛି। ରାଜ୍ୟ ସରକାର କରୋନା ଆକ୍ରାନ୍ତଙ୍କୁ ନେଇ ବେଶ୍ ସମ୍ବେଦନଶୀଳ ରହିଛନ୍ତି। କରୋନା ସହ ଲଢେଇ ପାଇଁ ରାଜ୍ୟ ସରକାର ଯଥାସମ୍ଭବ ସବୁପ୍ରକାର ଚେଷ୍ଟା ଜାରି ରଖିଛନ୍ତି। ରାଜ୍ୟରେ 7ଟି କୋଭିଡ ହସ୍ପିଟାଲ କାର୍ୟକ୍ଷମ ହୋଇସାରିଛି ଓ ଏନେଇ ରାଜ୍ୟସ୍ବାସ୍ଥ୍ୟ ବିଭାଗ ବେଶ୍ ସଜାଗ ରହିଛି।
ବିଏମସି ସତ୍ୟ ନଗରରୁ କରୋନା ଆକ୍ରାନ୍ତ ମିଳିଥିବା ନେଇ କହିଥିବାବେଳେ ସମ୍ପୃକ୍ତ ବ୍ୟକ୍ତିଙ୍କର କୌଣସି ଟ୍ରାଭେଲ୍ ହିଷ୍ଟ୍ରି ନଥିବା ମଧ୍ୟ କହିଛି। ଆକ୍ରାନ୍ତଙ୍କ କୌଣସି ଯାତ୍ରା ବିବରଣୀ ନଥିବାରୁ ଏହି ଅଞ୍ଚଳକୁ ସଂକ୍ରମିତ ଅଞ୍ଚଳ ଭାବେ ବିବେଚନା କରାଯାଉଛି ବୋଲି ବିଏମ୍ସି କହିଛି। ତେବେ ସତ୍ୟନଗରର କରୋନା ପଜିଟିଭି ସମ୍ପର୍କରେ କାହାକୁ କିଛି ସୂଚନା ମିଳିନଥିବା ହେତୁ ବିଏମସିର ଏପରି ପଦକ୍ଷେପ ସମସ୍ତଙ୍କୁ ଦ୍ବନ୍ଦ୍ବରେ ପକାଇ ଦେଉଛି। ତେବେ ସତ୍ୟନଗରର ଦ୍ବନ୍ଦ୍ବକୁ ଏବେ ରାଜ୍ୟ ସରକାର ଓ ବିଏମ୍ସି ମଧ୍ୟରେ ତାଳମେଳ ନାହିଁ ବୋଲି ଅନୁମାନ କରାଯାଉଛି। ତେବେ ସେ ଯାହାବି ହେଉ ଏହାକୁ ନେଇ ରାଜ୍ୟ ସ୍ବାସ୍ଥ୍ୟ ବିଭାଗ ସ୍ପଷ୍ଟ ସୂଚନା ଦେବା ଅତ୍ୟନ୍ତ ଆବଶ୍ୟକ ହୋଇପଡିଛି।
ସୂଚନାଯୋଗ୍ୟ, ରାଜ୍ୟରେ ସର୍ବମୋଟ 42 ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ଭୁବନେଶ୍ବରରୁ ସର୍ବାଧିକ 34 ଜଣ ଚିହ୍ନଟ ହୋଇଥିବାବେଳେ ଭୁବନେଶ୍ବରର ଝାରପଡାର 72 ବର୍ଷୀୟ ବ୍ୟକ୍ତି କରୋନା ଯୋଗୁଁ ପ୍ରାଣ ହାରିଛନ୍ତି। ଭୁବନେଶ୍ବରର ବମିଖାଲ ଅଞ୍ଚଳରେ ସର୍ବାଧିକ 19ଜଣ ଚିହ୍ନଟ ହୋଇଥିବାବେଳେ ସୂର୍ଯ୍ୟନଗର ଅଞ୍ଚଳରେ 7 ଜଣ ଚିହ୍ନଟ ହୋଇଛନ୍ତି। ସେହିପରି କଟକ, ପୁରୀ, କେନ୍ଦ୍ରାପଡ଼ା, କଳାହାଣ୍ଡି, ଭଦ୍ରକ, ଯାଜପୁର ଆଦି ଅଞ୍ଚଳରୁ କରୋନା ସଂକ୍ରମିତ ଚିହ୍ନଟ ହୋଇଛନ୍ତି।
ସମୀକ୍ଷା ବ୍ୟୁରୋ
ଭୁବନେଶ୍ବର: ଘରେ ଅତ୍ୟାବଶ୍ୟକ ସାମଗ୍ରୀ ପହଞ୍ଚାଇବା ବିଏମସି। ବିଭିନ୍ନ ସଂସ୍ଥା ଦ୍ବାରା ମୋବାଇଲ୍ ଭ୍ୟାନ୍ ଓ ହୋମ୍ ଡେଲିଭରି ସୁବିଧା କରାଯାଇଛି। ଡେଲି ମାର୍କେଟ୍ ପାଇଁ 67ଟି ଓ୍ବାର୍ଡରେ 68ଟି ନୂଆ ସ୍ଥାନଚିହ୍ନଟ କରାଯାଇଛି। ଚିହ୍ନଟ ସ୍ଥାନ ବ୍ୟତୀତ ଅନ୍ୟ କୌଣସି ସ୍ଥାନରେ ବ୍ୟବସାୟୀ ବସିପାରିବେ ନାହିଁ। ଏସବୁ ସ୍ଥାନରେ ସାମାଜିକ ଦୂରତ୍ବ ବଜାୟ ରଖିବାକୁ ଅପିଲ୍ କରାଯାଇଛି। ଯଥା ସମ୍ଭବ ଘରୁ ନ ବାହାରିବା ପାଇଁ ବିଏମ୍ସିର ଅପିଲ୍ କରିଛି।
ସୂଚନାଯୋଗ୍ୟ, ଭୁବନେଶ୍ବରରୁ 32ଟି ଆକ୍ରାନ୍ତ ଚିହ୍ନଟ ହୋଇଛନ୍ତି। ଏଥିପାଇଁ ବିଏମସି ତରଫରୁ ବେଶ୍ କଡ ପଦକ୍ଷେପ ନିଆଯାଉଛି। ଓଡ଼ିଶାର ସର୍ବମୋଟ ଆକ୍ରାନ୍ତଙ୍କ ସଂଖ୍ୟା 39ରେ ପହଞ୍ଚିଛି।
ଭୁବନେଶ୍ବର, ଯାହାକୁ ନେଇ ସରକାର ଚିନ୍ତାରେ ଥିଲେ ତାହା ବର୍ତ୍ତମାନ ଦୂର ହୋଇଛି। ରାଜ୍ୟରେ ବର୍ତ୍ତମାନ ପର୍ଯ୍ୟନ୍ତ ଗୋଷ୍ଠୀ ସଂକ୍ରାମଣ ହୋଇ ନାହିଁ ବୋଲି ଜଣାପଡିଛି। ଆଜି ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀଙ୍କ ସାମ୍ବାଦିକ ସମ୍ମିଳନୀରୁ ଏହା ସ୍ପଷ୍ଟ ହୋଇଛି। ସେ କହିଛନ୍ତି ଯେ, ସୂର୍ଯ୍ୟନଗରର ଆକ୍ରାନ୍ତ କୋଲକାତାରେ ତାଙ୍କର ଜଣେ ସଂପର୍କୀୟଙ୍କ ସଂପର୍କରେ ଆସିଥିଲେ। ସେ ବର୍ତ୍ତମାନ କୋଲକାତାରେ କୋଭିଡ19 ପଜେଟିଭ ବୋଲି ଜଣାପଡିଛି। ତେଣୁ ସେ ତାଙ୍କ ଦ୍ବାରା ସଂକ୍ରମିତ ହୋଇଥିବାର ପ୍ରମାଣିତ ହୋଇଛି। ତେଣୁ ସେ ଗୋଷ୍ଠୀ ସଂକ୍ରାମଣର ଆକ୍ରାନ୍ତ ନୁହଁନ୍ତି ବୋଲି ସ୍ପଷ୍ଟ ହୋଇଛି।
ସେହିପରି ବମିଖାଲର ଯେଉଁ ତିନିଭାଇ କୋଭିଡ19 ଆକ୍ରାନ୍ତ ହୋଇଛନ୍ତି ସେମାନେ ମଧ୍ୟ ଭୋପାଳରୁ ଏହି ସଂକ୍ରାମଣର ଶିକାର ହୋଇଛନ୍ତି ବୋଲି ଜଣାପଡିଛି। ଭୋପାଳରେ ରହୁଥିବା ତାଙ୍କ ବାପାଙ୍କୁ ଏହି ଭାଇଙ୍କ ମଧ୍ୟରୁ ଜଣେ ଦେଖା କରିବାକୁ ଯାଇଥିଲେ। ପରବର୍ତ୍ତି ସମୟରେ ତାଙ୍କ ବାପାଙ୍କୁ କୋଭିଡ19 ଆକ୍ରାନ୍ତ ହୋଇଥିବାର ବୋଲି ଜଣାପଡିଲା। ସେହିଠାରୁ ବମିଖାଲର ତିନି ଭାଇ ସଂକ୍ରାମିତ ହୋଇଛନ୍ତି ବୋଲି ବର୍ତ୍ତମାନ ସ୍ପଷ୍ଟ ହୋଇଛି। ଫଳରେ ଏହି ଘଟଣାଟି ମଧ୍ୟ ଗୋଷ୍ଠୀ ସଂକ୍ରାମଣ ନୁହଁ ବୋଲି ପ୍ରମାଣିତ।
ପୁରୀ ଆକ୍ରାନ୍ତ ଭୁବନେଶ୍ବରର ବିଜେବି ନଗର ପୋଷ୍ଟମ୍ୟାନ
ସେହିପରି ପୁରୀ ଆକ୍ରାନ୍ତ ମଧ୍ୟ ଦିଲ୍ଲୀ ଭ୍ରମଣରେ ଯାଇଥିଲେ। ସେଠାରୁ ସେ ଆକ୍ରାନ୍ତ ହୋଇଥିବାର ଜଣାପଡିଛି। ସେ ବର୍ତ୍ତମାନ ଭୁବନେଶ୍ବରର ବିଜେବି ନଗରର ପୋଷ୍ଟ ଅଫିସରେ ପୋଷ୍ଟମ୍ୟାନ ଭାବେ କାମ କରୁଛନ୍ତି। ସେ ଆକ୍ରାନ୍ତ ହୋଇ ଭୁବନେଶ୍ବରର ଗୌତମ ନଗରରେ ଚିଠି ବାଣ୍ଟିଥିବାର ଜଣାପଡିଛି। ସେଥିପାଇଁ ଏହି ପୋଷ୍ଟମ୍ୟାନ ଯେଉଁମାନଙ୍କ ଘରକୁ ଯାଇ ଚିଠି ବାଣ୍ଟିଛନ୍ତି ସେମାନେ 104 ନମ୍ବରକୁ ଫୋନ କରିନ୍ତୁ ବୋଲି କମିଶନର ଅନୁରୋଧ କରିଛନ୍ତି।
ରାଜ୍ୟ ସରକାରଙ୍କୁ ସୂର୍ଯ୍ୟନଗର ଓ ବମିଖାଲ ଆକ୍ରାନ୍ତଙ୍କୁ ନେଇ ନିଦ ହଜିଯାଇଥିଲା। କାରଣ ସେମାନେ ବାହାରକୁ କେବେ ଯାଇ ନ ଥିବାର ପ୍ରାଥମିକ ତଦନ୍ତରୁ ଜଣାପଡିବା ପରେ ଏହା ଗୋଷ୍ଠୀ ସଂକ୍ରାମଣ ହୋଇଥାଇପାରେ ବୋଲି ସନ୍ଦେହ ପ୍ରକାଶ ପାଇଥିଲା। ମୁଖ୍ୟତଃ ସୂର୍ଯ୍ୟନଗର ଘଟଣା ସବୁଠାରୁ ଗୁରୁତ୍ବ ଥିଲା। ସେହି ବ୍ୟକ୍ତି ବାହାରକୁ କୁଆଡେ ଯାଇ ନ ଥିବାରୁ ତାଙ୍କୁ କିପରି ହେଲା ସେ ନେଇ ରାଜ୍ୟ ସରକାରଙ୍କ ଟିମ ଦିନରାତି କାମ କରୁଥିଲେ। ଶେଷରେ କୋଲକାତାର ସଂପର୍କୀୟଙ୍କ ଦ୍ବାରା ଏହା ସଂକ୍ରାମଣ ହୋଇଥିବାର ଜଣାପଡିବା ପରେ ଏବେ ଅସ୍ବସ୍ଥୀ ମିଳିଛି।
ସମୀକ୍ଷା ବ୍ୟୁରୋ
ଭୁବନେଶ୍ୱର : ରାଜ୍ୟରେ ଗତକାଲି ପଞ୍ଚମ କରୋନା ଆକ୍ରାନ୍ତ ଚିହ୍ନଟ କରାଯାଇଥିବା ବେଳେ ଆଜି ବିଏମ୍ସି ପକ୍ଷରୁ ଉକ୍ତ ବ୍ୟକ୍ତିଙ୍କର ପରିଚୟ ପ୍ରଦାନ କରାଯାଇଛି । ବିଏମସି କମିଶନର ପ୍ରେମ୍ଚାନ୍ଦ ଚୌଧୁରୀ ଏକ ପ୍ରେସ୍ମିଟ୍ କରି ଏହି ସୂଚନା ଦେଇଛନ୍ତି । ଆକ୍ରାନ୍ତ ବ୍ୟକ୍ତିଙ୍କ ନାମ ପ୍ରଦୀପ ଦଳବେହେରା ଏବଂ ସେ ସୂର୍ଯ୍ୟନଗରର ପ୍ଲଟ୍ ନଂ ୩୭, ୟୁନିଟ-7 ଏବଂ ୱାର୍ଡ ନମ୍ବର 46ରରେ ବସବାସ କରନ୍ତି। ବିଏମସିର ସ୍ବତନ୍ତ୍ର କ୍ଷମତା ବଳରେ ଏହି ଆକ୍ରାନ୍ତଙ୍କ ପରିଚୟ ପ୍ରଦାନ କରାଯାଇଛି। ଏଥିରେ କୁହାଯାଇଛି ଏହି ବ୍ୟକ୍ତିଙ୍କ ସଂସ୍ପର୍ଶରେ ଯେଉଁମାନେ ଆସିଛନ୍ତି ସେମାନେ ତୁରନ୍ତ 14 ଦିନ ପାଇଁ ଘରେ ସଙ୍ଗରୋଧରେ ରହନ୍ତୁ ।
ଏହି ଘଟଣା ପରେ ବିଏମ୍ସି ଉକ୍ତ ଅଞ୍ଚଳକୁ ସିଲ୍ କରିବାର ନିଷ୍ପତ୍ତି ନେଇଛି । ସମ୍ପୃକ୍ତ ବ୍ୟକ୍ତିଙ୍କର ବିଦେଶ ଗସ୍ତ କିମ୍ବା ରାଜ୍ୟ ବାହାରକୁ ଗସ୍ତର କୌଣସି ପ୍ରମାଣ ନଥିବାରୁ ବିଏମ୍ସ କର୍ତ୍ତୃପକ୍ଷ ଏହି ନିଷ୍ପତ୍ତି ନେଇଛନ୍ତି । ଗଙ୍ଗନଗର ଛକରୁ ଏଲ୍ଆଇସି ଛକ ଗୋପବନ୍ଧୁ ଛକରୁ ଏଲ୍ଆଇସି ଛକ ରାସ୍ତାକୁ ସିଲ୍ କରି ଦିଆଯାଇଛି । ଏହିତ ଅଞ୍ଚଳରେ ପ୍ରବେଶ ଉପରେ ମଧ୍ୟ କଟକଣା ଜାରି କରାଯାଇଛି । ସେହିପରି ଉକ୍ତ ବ୍ୟକ୍ତିଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତି ନିଜକୁ ୧୦୪ ନମ୍ବରରେ ପଞ୍ଜୀକରଣ କରି ହୋମ୍ କ୍ୱାରାଣ୍ଟିନ୍ରେ ରହିବା ପାଇଁ ପରମର୍ଶ ଦିଆଯାଇଛି ।
ସମୀକ୍ଷା ବ୍ୟୁରୋ
ଭୁବନେଶ୍ବର : କୋରୋନା ଭାଇରସ୍ର ବର୍ଦ୍ଧିତ ପ୍ରଭାବକୁ ହ୍ରାସ କରିବା ପାଇଁ ଭୁବନେଶ୍ବର ମହାନଗର ନିଗମ (ବିଏମ୍ସି) ପକ୍ଷରୁ ନୂତନ ଘୋଷଣା କରାଯାଇଛି । କୋଭିଡ୍-19 ଅଧିନିୟମ 2020ର ଧାରା 3 ଏବଂ 11 ଅନୁଯାୟୀ ଏହି କଟକଣା ଜାରି କରାଯାଇଛି । କୋଭିଡ୍-19 କାରଣରୁ ସମସ୍ତ ବାର୍, ରେଷ୍ଟୁରାଣ୍ଟ, କଫିସପ୍, କ୍ୟାଣ୍ଟିନ୍ ପରି ସ୍ଥାନକୁ ବନ୍ଦ ରଖିବା ପାଇଁ ଘୋଷଣା କରାଯାଇଛି । ପୂର୍ବରୁ 7 ଜଣ ଲୋକ ଏକତ୍ର ଛିଡାହେବା ଉପରେ କଟକଣା ଜାରି କରାଯାଇଛି । ବଜାର ଘାଟ, ସପିଂ କମ୍ପ୍ଲେକ୍ସ, ଗାଁ ହାଟ ପ୍ରଭୃତିକୁ ମଧ୍ୟ ବନ୍ଦ ରଖିବା ପାଇଁ ନିର୍ଦ୍ଦେଶନାମା ଜାରି କରାଯାଇଛି । ବନ୍ଦ ରଖିବା ପାଇଁ ନିର୍ଦ୍ଦେଶନାମା ଜାରି କରାଯାଇଥିଲେ ମଧ୍ୟ ଲୋକଙ୍କ ନିତ୍ୟବ୍ୟବହାର୍ଯ୍ୟ ସାମଗ୍ରୀ ମିଳୁଥିବା ଦୋକାନ ଗୁଡିକ କାର୍ଯ୍ୟକରିବ ବୋଲି ଜଣାପଡିଛି ।
ବନ୍ଦ ହେବାକୁ ଥିବା ଦୋକାନର ତାଲିକା :
1. ଅଳଙ୍କାର ସୋରୁମ୍ ଏବଂ ଦୋକାନ
2. ବୈଦ୍ୟୁତିକ ସାମଗ୍ରୀ ଦୋକାନ
3. ଚାରି ଚକିଆ ଯାନ ଏବଂ ସାଇକେଲ୍ ସୋରୁମ୍
4. କ୍ରୀଡା ଉପକରଣ ସୋରୁମ୍
5. ଫର୍ଣ୍ଣିଚର୍ ସୋରୁମ୍ ଏବଂ ଗୋଦାମ
6. ଜୋତା ଏବଂ ବ୍ୟାଗ୍ ସୋରୁମ୍
7. ମାର୍ବଲ୍/ଟାଇ ଗୋଦାମ
8. ଘଣ୍ଟା ସୋରୁମ୍ ଏବଂ ଦୋକାନ
9. ହୋମ୍ ପେଣ୍ଟସ୍ ଦୋକାନ
10.ବହି ଏବଂ ମାଗାଜିନ୍ ଷ୍ଟୋର୍
11. ଗିଫ୍ଟ ଦୋକାନ ଏବଂ ଶିଶୁ କେୟାର ଉତ୍ପାଦ
ସମୀକ୍ଷା ବ୍ୟୁରୋ
ଭୁବନେଶ୍ବର : ଆଜିଠୁ ଭୁବନେଶ୍ୱରରେ ସିଲ ହେବ ବେଆଇନ କଲ୍ୟାଣ ମଣ୍ଡପ । ଏହି କ୍ରମରେ ଆଜି ପ୍ରଥମ ଦିନରେ ୫ଟି କଲ୍ୟାଣ ମଣ୍ଡପ ସିଲ କରାଯିବ । ରାଜଧାନୀ ଭୁବନେଶ୍ୱରରେ ଥିବା କିଛି କଲ୍ୟାଣ ମଣ୍ଡପ ହୋଲ୍ଡିଂ ଟିକସ୍ ଦେଉନଥିବା, ବିଲ୍ଡିଂ ପ୍ଲାନିଂ ଅନୁମୋଦନ ହୋଇନଥିବା ଓ ମଣ୍ଡପରେ ପାର୍କିଂ ସୁବିଧା ନଥିବା ଜଣାପଡ଼ିଛି। ତେବେ ଏହି କାରଣରୁ ଭୁବନେଶ୍ୱରରେ ୩ଟି ଜୋନରେ ଥିବା ୮୦ଟି କଲ୍ୟାଣ ମଣ୍ଡପ ସିଲ୍ କରିବାକୁ ଚିହ୍ନଟ କରାଯାଇଛି । ଗତ ଜାନୁଆରୀ ୩୧ ଯାଏଁ ଡେଡ଼ଲାଇନ ଥିଲା । ଡେଡଲାଇନ ସରିଥିବାରୁ ଆଜିଠାରୁ ପର୍ଯ୍ୟାୟ କ୍ରମେ ଏହି ସବୁ ମଣ୍ଡପ ସିଲ୍ କରାଯିବା ପାଇଁ ନିଷ୍ପତ୍ତି ହୋଇଥିବା ଜଣାପଡିଛି । ବିଡ଼ିଏ ଓ ବିଏମସିର ମିଳିତ ସ୍କ୍ୱାର୍ଡ ଏହି କାର୍ଯ୍ୟ କରିବେ । ପ୍ରାପ୍ତ ସୂଚନା ଅନୁସାରେ ଶହୀଦ୍ ନଗରଠାରେ ଥିବା ବେଆଇନ କଲ୍ୟାଣ ମଣ୍ଡପକୁ ସିଲ୍ କରିବା ଲାଗି ସ୍କ୍ବାର୍ଡ ପହଞ୍ଚିଥିବାର ଜଣାପଡିଛି ।
ସମୀକ୍ଷା ବ୍ୟୁରୋ
ଭୁବନେଶ୍ବର : ଫନି ଝଡବାତ୍ୟାକୁ 6 ମାସରୁ ଅଧିକ ସମୟ ବିତି ଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ମିଳିନାହିଁ ସହାୟତା ରାଶି । ରାଜଧାନୀରେ ରହିଥିବା ବିଭିନ୍ନ ଦୋକାନୀଙ୍କୁ ଫନି ସହାୟତା ମିଳିନଥିବା ନେଇ ଉଠାଦୋକାନୀଙ୍କ ପକ୍ଷରୁ ବିଏମ୍ସି ଘେରାଉ କରାଯାଇଛି । ରାଜଧାନୀରେ ସର୍ବେକ୍ଷଣ କରାଯାଇଥିବା ସମୁଦାୟ 21,883ଦୋକାନୀଙ୍କୁ 10 ହଜାର ଟଙ୍କାର ଫନି ସହାୟତା ସହିତ ଅଶୋକନଗରରେ ପ୍ରସ୍ତାବିତ ଶିଶୁ ଉଦ୍ୟାନ ସ୍ଥାନରେ ଡମ୍ପିଂୟାର୍ଡ ଯୋଜନା ବନ୍ଦ କରିବା ଦାବିରେ କାର୍ଯ୍ୟାଳୟ ଘେରାଉ ସହିତ କମିଶନରଙ୍କୁ ସ୍ମାରକପତ୍ର ପ୍ରଦାନ କରାଯାଇଛି ।
ଆଜି ପୂର୍ବାହ୍ନରେ ଶହ ଶହ ଉଠା ଦୋକାନୀ ଓ ଅଶୋକ ନଗର ବାସିନ୍ଦା ଉଠାଦୋକାନୀ ବ୍ୟବସାୟୀ ସଂଘର ସଭାପତି ସୁର ଜେନାଙ୍କ ନେତୃତ୍ୱରେ ସିପିଆଇର ରାଜ୍ୟ ଦପ୍ତର ଭଗବତୀ ଭବନଠାରୁ ଏକ ଶୋଭାଯାତ୍ରାରେ ବାହାରି ରାଜମହଲ ଓ କଳ୍ପନା ଛକ ଅତିକ୍ରମ ପୂର୍ବକ ବିଏମ୍ସି କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲେ । ସିପିଆଇ ରାଜ୍ୟ ସମ୍ପାଦକ ଆଶିଷ କାନୁନ୍ଗୋ ଓ ସୁର ଜେନା ଉଦ୍ବୋଧନ ଦେଇ ବିଏମ୍ସିର ବାଛ ବିଚାର କରି ଫନି ସହାୟତା ଦେବାକୁ ନିନ୍ଦା କରି ସମସ୍ତଙ୍କୁ ସହାୟତା ଦାବି କରିଥିଲେ । 5ଜଣିଆ ପ୍ରତିନିଧିମଣ୍ଡଳୀ ବିଏମ୍ସି କମିଶନରଙ୍କୁ ସାକ୍ଷାତ କରି ସ୍ମାରକପତ୍ର ପ୍ରଦାନ କରିଥିଲେ । ଏହି ଶୋଭାଯାତ୍ରାରେ କୈଳାସ ପୁହାଣ, ରୀତା ସେଠୀ, ବୁଲୁ ସାହୁ, କୁନା ପାଣିଗ୍ରାହୀ, ପବିତ୍ର ସ୍ୱାଇଁ, ବଟକୃଷ୍ଣ ସାହୁ, ସନ୍ତୋଷ ନାୟକ, ବିକ୍ରମ ସ୍ୱାଇଁ, ଭରତ ସାହୁ ଓ ପୂଜା ମିଶ୍ର ପ୍ରମୁଖ ଉଠାଦୋକାନୀ ସାମିଲ ହୋଇଥିଲେ ।
ସମୀକ୍ଷା ବ୍ୟୁରୋ
ଭୁବନେଶ୍ବର,04/01: ଆସନ୍ତା 6ରୁ8 ମାସ ମଧ୍ୟରେ ରାଜଧାନୀର ବିଭିନ୍ନ ସ୍ଥାନରେ 43ଟି ମାଇକ୍ରୋ କମ୍ପୋଷ୍ଟିଂ ସେଣ୍ଟର ସ୍ଥାପନ କରାଯିବ ବୋଲି ବିଏମ୍ସି କମିଶନର ପ୍ରେମଚନ୍ଦ ଚୌଧୁରୀ ପ୍ରକାଶ କରିଛନ୍ତି । ଏହି କମ୍ପୋଷ୍ଟିଂ ସେଣ୍ଟର ସ୍ଥାପନ କରାଯିବା ପରେ ଦାରୁଠେଙ୍ଗରେ ରହିଥିବା ଡମ୍ପିଂ ୟାର୍ଡ ହଟାଯିବ । ଦାରୁଠେଙ୍ଗ ସହିତ ସୈନିକ ସ୍କୁଲରେ ଥିବା ଡମ୍ପିଂ ୟାର୍ଡରେ ଥିବା ଅଳିଆକୁ ବାୟୋମାଇନିଂ କରାଯାଇ ରିସାଇକ୍ଲିଂ କରାଯିବ । ଡମ୍ପିଂୟାର୍ଡକୁ ନେଇ ବିବାଦ ଲାଗି ରହିଥିବା ବେଳେ ବିଏମ୍ସିର ଏହି ନିଷ୍ପତ୍ତି ସମସ୍ୟାର ସମାଧାନ କରିବା ନେଇ ଆଶା କରାଯାଉଛି ।