ସମୀକ୍ଷା ବ୍ୟୁରୋ
ଆଉ କିଛି ଘଣ୍ଟା ପରେ ବିଦାୟ ନେବ ୨୦୧୯। ଏହି ବର୍ଷ ଅନେକ ଘଟଣା ଦେଶରେ ଚହଳ ପକାଇଥିଲା । ରାଜନୀତିଠାରୁ ଆରମ୍ଭ କରି ଉନ୍ନାଓ ଓ ପ୍ରିୟଙ୍କା ରେଡ୍ଡି ଗଣଦୁଷ୍କର୍ମ, ଏନକାଉଣ୍ଟର ଓ ଅଭିନନ୍ଦନ ବର୍ଦ୍ଧମାନଙ୍କ ସାହସ ପରି ଘଟଣା ବେଶ୍ ଚର୍ଚ୍ଚାରେ ରହିଥିଲା। ସେହିପରି କୋର୍ଟଙ୍କର ମଧ୍ୟ କିଛି ଐତିହାସିକ ରାୟ ବର୍ଷ ସାରା ଦେଶର ମାହୋଲ୍କୁ ଚଳଚଞ୍ଚଳ କରି ରଖିଥିଲା । ୨୦୨୦କୁ ସ୍ବାଗତ କରିବା ପୂର୍ବରୁ ଆସନ୍ତୁ ନଜର ପକାଇବା ଚଳିତ ବର୍ଷର କିଛି ପ୍ରମୁଖ ଘଟଣାବଳୀ ଉପରେ….
ଫୁଲଓ୍ବାମା ଆକ୍ରମଣ
ବର୍ଷର ଦ୍ବିତୀୟ ମାସ ଅର୍ଥାତ୍ ଫେବୃଆରୀ ମାସରେ ହୋଇଥିଲା ଫୁଲ୍ଓ୍ବାମା ଆକ୍ରମଣ। ଫେବ୍ରୁଆରି ୧୪ ରେ ପ୍ରାୟ ଦିନ ୩ ଟା ୧୫ ମିନିଟ ରେ ଜମ୍ମୁ କାଶ୍ମୀର ହାଇୱେ ସି ଆର ପି ଏଫ ଯବାନ ମାନଙ୍କୁ ନେଇ ଯାଉଥିବା ଏକ ଗାଡି ଉପରକୁ ଜୈଶ- ଏ ମହମ୍ମଦ ସମର୍ଥିତ ଆତଙ୍କବାଦୀ ସଂସ୍ଥାର ଆତଙ୍କବାଦୀ ମାନେ ଆକ୍ରମଣ କରିଥିଲେ । ଏଥିରେ ପ୍ରାୟ ୪୦ ଜଣ ଯବାନ ସହିଦ ହୋଇଥିଲେ ।
ବାଲାକୋଟ୍ ଏୟାରଷ୍ଟ୍ରାଇକ୍
ଫୁଲଓ୍ବାମା ଆକ୍ରମଣ ପରେ ଏହାକୁ ନେଇ ସାରା ଭାରତରେ ପ୍ରତିଶୋଧର ନିଆଁ ଜଳୁଥିଲା। ପାକିସ୍ତାନ କୁ ପାନେ ଦେବାର ଲକ୍ଷ୍ୟ ଫୁଲଓ୍ବାମା ଘଟଣାର ୧୨ ଦିନ ପରେ ଫେବୃଆରି ୨୬ ରେ ପାକିସ୍ତାନ ର ବାଲାକୋଟ ରେ ଥିବା ଆତଙ୍କବାଦୀ ଶିବିର ଉପରେ ଭାରତୀୟ ବାୟୁସେନା ଦ୍ଵାରା ଅତର୍କିତ ଆକ୍ରମଣ କରାଯାଇଥିଲା । ଏଥିରେ ଅନେକ ଆତଙ୍କବାଦୀ ମୃତାହତ ହୋଇଥିଲେ। ଏହାର ଗୋଟିଏ ଦିନ ପରେ ଅର୍ଥାତ ଫେବୃଆରି ୨୭ ରେ ପାକିସ୍ତାନ ଭାରତୀୟ ବାୟୁସୀମା କୁ ପ୍ରବେଶ କରିବାକୁ ଚେଷ୍ଟା କରିଥିଲା । ଏହି ଉଦ୍ୟମ କୁ ୱିଙ୍ଗ କମାଣ୍ଡର ଅଭିନନ୍ଦନ ବର୍ଦ୍ଧମାନ ପାକିସ୍ତାନ ର ଏକ ଫାଇଟର ଜେଟ ଏଫ ୧୬ କୁ ଗୁଳିମାରୀ ଖସାଇ ଦେବା ସହ ପିଛା କରି ପାକିସ୍ତାନ ମଧ୍ୟରେ ଖସି ପଡିଥିଲେ । ପରେ ମୋଦୀଙ୍କ କୂଟନୀତି ଆଗରେ ପାକିସ୍ତାନ ରେ ଥିବା ଇମରାନ ସରକାର ହାର ମାନି ଥିଲା ଏବଂ ଅଭିନନ୍ଦନଙ୍କୁ ସସମ୍ମାନେ ଫେରାଇ ଦେଇଥିଲା ।
ସିବିଆଇ କଳି
୨୦୧୮ ମସିହା ଅକ୍ଟୋବର ରୁ ଦୁଇ ସିବିଆଇ ମୁଖ୍ୟ ଙ୍କ ମଧ୍ୟରେ ବଦଳିକୁ ନେଇ ସିବିଆଇ ମଧ୍ୟରେ ଗଣ୍ଡୋଗୋଳର ସୂତ୍ରପାତ ହୋଇଥିଲା । ସିବିଆଇର ମୁଖ୍ୟ ଓ ଉପମୁଖ୍ୟଙ୍କ ମଧ୍ୟରେ ଚାଲିଥିବା ସିବିଆଇ ବନାମ ସିବିଆଇ ଲଢ଼େଇ ପରେ ସରକାର ସିବିଆଇ ମୁଖ୍ୟ ଆଲୋକ ବର୍ମା ଓ ଉପମୁଖ୍ୟ ରାକେଶ ଆସ୍ଥାନାଙ୍କୁ ରାତି ଅଧିଆ ଅନିର୍ଦ୍ଦିଷ୍ଟ କାଳ ପାଇଁ ଛୁଟିରେ ଯିବାକୁ ସରକାର ନିର୍ଦ୍ଦେଶ ଦେବା ସହ ଯୁଗ୍ମ ନିର୍ଦ୍ଦେଶକ ଥିବା ଏମ୍ ନାଗେଶ୍ୱର ରାଓଙ୍କୁ ସିବିଆଇର ଅନ୍ତରୀଣ ମୁଖ୍ୟ ଭାବେ ଅବସ୍ଥାପିତ କରାଇଥିଲେ । ପରେ ସିବିଆଇ ମୁଖ୍ୟଙ୍କ ଆଲୋକ ବର୍ମା ତାଙ୍କ କାର୍ଯ୍ୟ କାଳ ସରିଯାଇଥିବା ଦର୍ଶାଇ ସେ ଇସ୍ତଫା ଦେଇଥିଲେ । ତେବେ ପରବର୍ତ୍ତୀ ସିବିଆଇ ନିର୍ଦ୍ଦେଶକ ଭାବେ ଋଷି କୁମାର ଶୁକ୍ଲାଙ୍କୁ ଦାୟିତ୍ବ ପ୍ରଦାନ କରାଯାଇଛି ।
ମୋଦୀଙ୍କ ପ୍ରଧାନମନ୍ତ୍ରୀ ଭାବେ ଦ୍ଵିତୀୟ ପାଳି
ମୋଦୀଙ୍କ ନେତୃତ୍ଵରେ ୨୦୧୪ ରେ ପ୍ରଥମେ ବିଜେପି ଅନ୍ୟ ସହଯୋଗୀ ଦଳଙ୍କ ସହାୟତାରେ କ୍ଷମତାକୁ ଆସିଥିଲା । ତେବେ ଚଳିତଥର ରେକର୍ଡ ସଂଖ୍ୟକ ଆସନ ଅଧିକାର କରି ବିଜେପି ପୁନର୍ବାର କ୍ଷମତାକୁ ଆସିଥିଲା । ଚଳିତ ଲୋକସଭା ନିର୍ବାଚନରେ ବିଜେପି ଏକାକୀ 303 ଆସନ ଅକ୍ତିଆର କରି ଇତିହାସ ରଚିଥିଲା । ତେବେ ବିଜେପି ଲୋକସଭା ନିର୍ବାଚନରେ ବହୁ ବରିଷ୍ଠଙ୍କ ଟିକେଟ କାଟିଥିଲା । ଏମାନଙ୍କ ମଧ୍ୟରେ ରହିଥିଲେ ଲାଲକୃଷ୍ଣ ଆଡଭାନୀ, ସୁମିତ୍ରା ମହାଜନ, ମୁରଲୀମନୋହର ଯୋଶୀଙ୍କ ପରି ବହୁ ତୁଙ୍ଗ ବିଜେପି ନେତୃବୃନ୍ଦ । ସେହିପରି ଚଳିତଥର ବିଜେପିର ସଭାପତି ଥିବା ଅମିତ୍ ଶାହା ନିର୍ବାଚନ ମଇଦାନକୁ ଓହ୍ଲାଇ ବାଜିମାତ୍ କରି ଗୃହମନ୍ତ୍ରୀ ହୋଇଛନ୍ତି ।
କଂଗ୍ରେସର ଅଧ୍ୟକ୍ଷ ପଦରୁ ରାହୁଲ୍ଙ୍କ ଇସ୍ତଫା
ଚଳିତ ଲୋକସଭାରେ କଂଗ୍ରେସର ବିଫଳତା ପଦରେ ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ ରାହୁଲ୍ ଗାନ୍ଧି । ଦଳର ପରାଜୟକୁ ନେଇ ସେ ଏପରି ନିଷ୍ପତ୍ତି ନେଇଥିଲେ। ଏବେ କଂଗ୍ରେସ ଦଳର ଅନ୍ତରୀଣ ଅଧ୍ୟକ୍ଷା ଭାବେ ସୋନିଆ ଗାନ୍ଧି ଦାୟିତ୍ବ ସମ୍ଭାଳୁଛନ୍ତି। ସେହିପରି ଚଳିତ ବର୍ଷ ପ୍ରତ୍ୟକ୍ଷ ରାଜନୀତିକୁ ଓହ୍ଲାଇ କଂଗ୍ରେସର ମହାସଚିବ ପଦରେ ଅଭିଷିକ୍ତ ହୋଇଛନ୍ତି ।
ତ୍ରିପଲ୍ ତଲାକ୍ ବିଲ୍କୁ ମିଳିଲା ମଞ୍ଜୁରୀ
ମୋଦି ସରକାରଙ୍କ ଦ୍ବିତୀୟ କାର୍ଯ୍ୟକାଳରେ ତ୍ରିପଲ୍ ତଲାକ୍ ବିଲ୍କୁ ମିଳିଲା ମଞ୍ଜୁରୀ । ଏହି ବିଲ୍ ଆଇନରେ ପରିଣତ ହେଲା । ଏହି ଆଇନ୍ ଅନୁସାରେ ଇନ୍ଷ୍ଟାଣ୍ଟ ଟ୍ରିପଲ ତଲାକ ଏକ ଦଣ୍ଡନୀୟ ଅପରାଧ । ଯେଉଁଥିରେ ପୋଲିସ ଅଭିଯୁକ୍ତକୁ ବିନା ୱାରେଣ୍ଟରେ ଗିରଫ କରି ପାରିବ । ଏ କ୍ଷେତ୍ରରେ ଅଭିଯୁକ୍ତ ତିନି ବର୍ଷ ଯାଏ ଜେଲ ଦଣ୍ଡ ସହ ଫାଇନ ଦେବାକୁ ପଡିବ । ଟ୍ରିପଲ ତଲାକର ପୀଡ଼ିତା ମହିଳା କିମ୍ବା ତାଙ୍କ ରକ୍ତ ସମ୍ପର୍କୀୟ ଅଭିଯୋଗ ଆଣିଲେ ହିଁ ଏହା ଦଣ୍ଡନୀୟ ଶ୍ରେଣୀରେ ଆସିବ ।
ଅଯୋଧ୍ୟା ବିବାଦର ସମାଧାନ
ପ୍ରାୟ ୪୦୦ ବର୍ଷ ଧରି ଅଯୋଧ୍ୟା କୁ ନେଇ ହିନ୍ଦୁ ମୁସଲିମ୍ ମଧ୍ୟରେ ଲାଗି ରହିଥିବା ବହୁ ଚର୍ଚ୍ଚିତ ଜମି ବିବାଦର ଯବନିକା ପଡିଥିଲା। ସେତେବେଳର ମୁଖ୍ୟ ବିଚାରପତି ରଞ୍ଜନ ଗୋଗୋଇ ଙ୍କ ଅଧ୍ୟକ୍ଷତା ରେ ଏକ ପାଞ୍ଚ ଜଣିଆ ଖଣ୍ଡପୀଠ ଏହି ମାମଲା ର ନିୟମିତ ଶୁଣାଣି କରିଥିଲେ । ଉଭୟ ପକ୍ଷର ଦଲିଲ ଶୁଣିବା ପରେ ପ୍ରତ୍ନତତ୍ଵ ବିଭାଗର ପ୍ରମାଣ କୁ ଆଧାର କରି ଧାରା ୧୪୨ କୁ ବିନିଯୋଗ କରି ସମୁଦାୟ ୨.୭୭ ଏକର ଜାଗା କୁ ହିନ୍ଦୁ ପକ୍ଷକୁ ଦେବାକୁ ନିର୍ଦ୍ଦେଶ ଦେଇଥିଲେ ଏବଂ ଅଯୋଧ୍ୟା ଭିତରେ ୫ ଏକର ଜାଗା ମୁସଲିମ୍ ପକ୍ଷ କୁ ଦେବା କୁ ନିର୍ଦ୍ଦେଶ ଦେବା ସହ ସମସ୍ତ ପକ୍ଷ କୁ ନେଇ ଏକ କମିଟି ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି । ଏହି ବିବାଦର ଦୀର୍ଘ ସମୟ ଧରି ଶୁଣାଣି ହେବା ସହ ଏକ ରେକର୍ଡ ସୃଷ୍ଟି କରିଥିଲା ।
ସାବରିମାଳା ବିବାଦ
ସବାରିମାଳା ମନ୍ଦିର ରେ ବହୁ ବର୍ଷ ଧରି ୧୦ ବର୍ଷ ରୁ ୫୦ ବର୍ଷ ବୟସ୍କ ମହିଳାଙ୍କର ପ୍ରବେଶ ନିଷେଧ ରହିଥିଲା। ଏହି ମାମଲା ର ଶୁଣାଣି ଏକ ପାଞ୍ଚ ଜଣିଆ ଖଣ୍ଡପୀଠ କରିଥିଲେ । ଏଥିରେ ୩ : ୨ ଭିତ୍ତି ରେ ବିଚାର ହୋଇଥିଲା । ଏଥିରେ ମହିଳାଙ୍କ ପ୍ରବେଶ କୁ ନେଇ ଥିବା ନିଷେଧଜ୍ଞା କୁ କୋର୍ଟ ଉଠାଇ ଦେଇଥିଲେ । ଏହା ପରେ କେରଲ ରେ ସର୍ବ ବୃହତ ମାନବ ଶ୍ରୁଙ୍ଖଳ କରା ଯାଇ ସପକ୍ଷ ବାଦି ଏବଂ ବିପକ୍ଷବାଦୀଙ୍କ ମଧ୍ୟରେ ଟଣା ଓଟରା ଲାଗି ରହିଥିଲା । ଏହି ରାୟ ବିରୋଧ ରେ ଏକ ରିଭିଉ ପିଟିସନ ଦାୟର ହୋଇଥିଲା । ଏହି ପିଟିସନ ସେତେବେଳ ର ମୁଖ୍ୟ ନ୍ୟାୟାଧୀଶ ରଞ୍ଜନ ଗୋଗୋଇ ଙ୍କ ଅଧ୍ୟକ୍ଷତା ରେ ଶୁଣାଣି ହୋଇଥିଲା । ଏହି ମାମଲା ର ଜଟିଳତା କୁ ଲକ୍ଷ କରି ବିଚାରପତି ଉକ୍ତ ମାମଲା କୁ ଏକ ସାତ ଜଣିଆ ଖଣ୍ଡପୀଠ ରେ ଶୁଣାଣି କରିବାକୁ ସୁପାରିଶ କରିଛନ୍ତି ।
ଆତଙ୍କ ନିରୋଧୀ ବିଲ୍ ସଂଶୋଧନ
ଚଳିତ ବର୍ଷ ଆତଙ୍କବାଦ ନିରୋଧୀ ବିଲ୍ ସଂଶୋଧନ ମଧ୍ୟ ପାସ୍ ହୋଇଛି । ଏହି ବିଲ୍ରେ ଆତଙ୍କବାଦୀର ସଂଜ୍ଞାକୁ ଆହୁରି ବ୍ୟାପକ କରାଯାଇଛି । ସଂସ୍ଥା ସହ ଲିଙ୍କ୍ ନଥିଲେ ବି ବ୍ୟକ୍ତିଙ୍କୁ ଆତଙ୍କବାଦୀ ଆଖ୍ୟା ଦିଆଯାଇପାରିବ।
ଅନୁଚ୍ଛେଦ ୩୭୦ ର ପ୍ରତ୍ୟାହାର
କେନ୍ଦ୍ର ସରକାର ଚଳିତ ବର୍ଷ ଐତିହାସିକ ନିଷ୍ପତ୍ତି ମଧ୍ୟରେ ରହିଥିଲା ଧାରା ୩୭୦ର ଉଚ୍ଛେଦ । ଅଗଷ୍ଟ 5 ତାରିଖରେ ଧାରା ୩୭୦ ଏବଂ ୩୫(ଏ) ଉଚ୍ଛେଦ କରିଥିଲେ । ଏହା ପରେ ଜମ୍ମୁ କାଶ୍ମୀର ସ୍ବତନ୍ତ୍ର୍ୟ ରାଜ୍ୟ ରୂପେ ନୁହେଁ ବରଂ ଦୁଇ କେନ୍ଦ୍ରଶାସିତ ଅଞ୍ଚଳ ଭାବେ ମାନ୍ୟତା ପାଇଛି । ଗୃହମନ୍ତ୍ରୀ ଅମିତ ଶାହ ଙ୍କ ଅଧ୍ୟକ୍ଷତା ରେ ଅଗଷ୍ଟ ୫ ୨୦୧୯ ରେ ସଂସଦ ର ଉଭୟ ସଦନ ରେ ବିଲ ପାରିତ ହୋଇ ଜାମୁ ଏବଂ କାଶ୍ମୀ କୁ ପୃଥକ ପୃଥକ କେନ୍ଦ୍ର ଶାସିତ ଅଞ୍ଚଳ ର ମାନ୍ୟତା ଦିଆଯିବା ସହ ସ୍ବତନ୍ତ୍ର ରାଜ୍ୟର ମାନ୍ୟତାକୁ ପ୍ରତ୍ୟାହାର କରି ଦିଆଗଲା । ଏହା ଯୋଗୁଁ ଭାରତ ମାନଚିତ୍ରରେ ପରିବର୍ତ୍ତନ ହେଲା ।
ଉନ୍ନାଓ ମାମଲା
ଏହି ମାମଲା ସାରା ଭାରତରେ ଚହଳ ପକାଇଥିଲା । ଜଣେ ବିଜେପି ବିଧାୟକ ଙ୍କ ସହ ଜଣେ ନାବାଳିକା ର ସମ୍ପର୍କ ରୁ ଆରମ୍ଭ ହୁଏ ଏହି ଘଟଣା । ପରେ ୪ ଜୁନ ୨୦୧୭ ରେ ଉକ୍ତ ନାବାଳିକା ସହ ଦୁଷ୍କର୍ମ ହୁଏ । ଉତ୍ତରପ୍ରଦେଶର ବହୁଚର୍ଚ୍ଚିତ ଉନ୍ନାଓ ପୀଡ଼ିତାଙ୍କୁ ଦୀର୍ଘ ଦୁଇ ବର୍ଷ ପରେ ନ୍ୟାୟ ମିଳିଲା। ଉତ୍ତରପ୍ରଦେଶର ବହୁଚର୍ଚ୍ଚିତ ଉନ୍ନାଓ ନାବାଳିକାଙ୍କୁ ଅପହରଣ ଓ ଦୁଷ୍କର୍ମ ମାମଲାରେ ବହିଷ୍କୃତ ବିଜେପି ବିଧାୟକ କୁଲଦୀପ ସିଂହ ସେଙ୍ଗରଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଛି । ଦିଲ୍ଲୀର ତିସହଜାରୀ କୋର୍ଟ ଆଜି ଏହି ମାମଲାର ଦଣ୍ଡଶୁଣାଣି କରି ଦୋଷୀସାବ୍ୟସ୍ତ ସେଙ୍ଗାରଙ୍କୁ ଆଜୀବନ ଜେଲ୍ ସହ ୨୫ ଲକ୍ଷ ଟଙ୍କାର ଜରିମାନା କରିଛନ୍ତି । ଗତ ଡିସେମ୍ବର ୧୬ ତାରିଖରେ ଆଇପିସିର ଧାରା ୩୭୬ ଏବଂ ପୋକ୍ସୋ ଆଇନର ଧାରା ୫ ଏବଂ ୬ ଅଧୀନରେ କୋର୍ଟ ସେଙ୍ଗରଙ୍କୁ ଦୋଷୀସାବ୍ୟସ୍ତ କରିଥିଲେ ।
ହାଇଦ୍ରାବାଦ ପଶୁ ଡାକ୍ତରାଣୀ ହତ୍ୟା ମାମଲା
ନଭେମ୍ବର ୨୮ ରେ ଘଟିଥିବା ଏହି ଘଟଣାଟିକୁ ନେଇ ସାରା ଦେଶରେ ପ୍ରତିବାଦର ସ୍ଵର ଉଠିଥିଲା ଏବଂ ନାରୀ ସୁରକ୍ଷା ପ୍ରତି ସରକାରଙ୍କୁ ସାଧାରଣ ଲୋକଙ୍କ ଅଙ୍ଗୁଳି ଉଠିଥିଲା। ଏହି ଘଟଣା ଘଟିବାର ଦୁଇ ଦିନ ମଧ୍ୟରେ ପୋଲିସ ଉକ୍ତ ବର୍ବୋରୋଚିତ କାଣ୍ଡ ରେ ସମ୍ପୃକ୍ତ ଥିବା ଚାରି ଅଭିଯୁକ୍ତଙ୍କୁ ଗିରଫ କରିଥିଲା । ପୋଲିସ ହେପାଜତ ରେ ଥାଇ ଉକ୍ତ ଅଭିଯୁକ୍ତ ମାନଙ୍କୁ ସେମାନେ ଘଟଣା ଘଟାଇଥିବା ଜାଗାକୁ ସେମାନଙ୍କୁ ନିଆ ଯାଉଥିବା ବେଳେ ପୋଲିସ ସହ ଧସ୍ତାଧସ୍ତି ହେବାରୁ ଘଟଣା ସ୍ଥଳରେ ସମ୍ପ୍ୟକ୍ତ ଚାରି ଅଭିଯୁକ୍ତଙ୍କୁ ପୋଲିସ ଏନକାଉଣ୍ଟର କରିଥିଲା। ଏହାକୁ ନେଇ ସାରା ଦେଶରେ ମିଶ୍ରିତ ପ୍ରତିକ୍ରିୟା ଦେଖିବାକୁ ମିଳିଥିଲା। ଉକ୍ତ ଗୁଳିକାଣ୍ଡରେ ସମ୍ପୃକ୍ତ ପୋଲିସ ଅଧିକୃଙ୍କ ଉପରେ ଏକ ମାମଲା ଦାୟର ହେବା ସହ ଏକ ଏସଆଇଟି ଗଠନ ହୋଇଛି ।
ମୋଟର ଯାନ ସଂଶୋଧନ ଆଇନ
ଚଳିତ ବର୍ଷ କେନ୍ଦ୍ର ସରକାର ମୋଟର ଯାନ ଆଇନକୁ ବେଶ୍ କଡାକଡି କରିଛନ୍ତି । ନୂତନ ସଂଶୋଧିତ ମୋଟର ଯାନ ଆଇନରେ ଜରିମାନା ଅର୍ଥକୁ ଅହେତୁକ ବୃଦ୍ଧି କରାଯାଇଛି । ଏହି ନିୟମରେ ନାବାଳକ ଗାଡି ଚାଳନା ପାଇଁ ଅଭିଭାବକଙ୍କୁ ଦଣ୍ଡ ଦେବାର ପ୍ରାବଧାନ ରହିଛି । ସେହିପରି ମଦ ପିଇ ଗାଡିଚାଳନା, ସ୍ପିଡ୍ ଲିମିଟ୍, ଲାଇସେନ୍ସ ଆଦି କ୍ଷେତ୍ରରେ ମଧ୍ୟ ଜରିମାନା ଅର୍ଥକୁ ବୃଦ୍ଧି କରାଯାଇଛି ।
ଦୀର୍ଘ ବର୍ଷର ମିତ୍ରତାରେ ସୃଷ୍ଟି ହେଲା ଫାଟ
ଚଳିତ ବର୍ଷ ବିଜେପି – ଶିବସେନା ମଧ୍ୟରେ ଫାଟ ସୃଷ୍ଟି ହୋଇଛି । ଦୁହେଁ 25 ବର୍ଷର ସମ୍ପର୍କକୁ ଭାଙ୍ଗିଛନ୍ତି । ମହାରାଷ୍ଟ୍ରରେ ବିଜେପି-ଶିବସେନା ମିଳିତ ଭାବରେ ନିର୍ବାଚନ ଲଢି ମଧ୍ୟ ଦୁହେଁ ମେଣ୍ଟ ସରକାର ଗଢିବାରେ ଅସମର୍ଥ ହୋଇଥିଲେ । ଆସନ ବୁଝାମଣାକୁ ନେଇ ଦୁହିଁଙ୍କ ମେଣ୍ଟ ଭାଙ୍ଗିଯାଇଥିଲା । ପ୍ରଥମଥର ପାଇଁ ମହାରାଷ୍ଟ୍ରରେ ଶିବସେନା କଂଗ୍ରସ ଓ ଏନ୍ସିପି ସହ ମିଶି ସରକାର ଗଠନ କଲା । ସେହିପରି ପ୍ରଥମ ଥର ପାଇଁ ଚଳିତ ବର୍ଷ ପ୍ରତ୍ୟକ୍ଷ ରାଜନୀତିରେ ଠାକ୍ରେ ପରିବାର ଅଂଶଗ୍ରହଣ କରି ବାଜିମାତ୍ କରିଛନ୍ତି । ଉଦ୍ଧବ ଠାକ୍ରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହୋଇଥିବାବେଳେ ତାଙ୍କ ପୁତ୍ର ଆଦିତ୍ୟ ଠାକ୍ରେ ବର୍ଲି ଆସନରୁ ପ୍ରଥମର ଥର ପାଇଁ ନିର୍ବାଚନ ଲଢି ବିଜୟୀ ହୋଇ ଏବେ କ୍ୟାବିନେଟ୍ ମନ୍ତ୍ରୀ ରହିଛନ୍ତି ।
ସିଏଏଓ ଏନ୍ଆରସିକୁ ନେଇ ବିବାଦ
ଦ୍ବିତୀୟ ପାଳି ସରକାରରେ ମୋଦି ସରକାର ସିଏଏ ଓ ଏନ୍ଆରସି ଆଣିଛନ୍ତି । ନାଗରିକତ୍ବ ବିଲ୍ରେ କିଛି ପରିବର୍ତ୍ତନ ଆଣିଛନ୍ତି । ଏହାକୁ ନେଇ ବିରୋଧୀଙ୍କ ସମେତ ସାଧାରଣ ଜନତା ବିରୋଧ ପ୍ରଦର୍ଶନ କରୁଛନ୍ତି । ଏହି ବିରୋଧ ମଧ୍ୟରେ ଏହା ରାଷ୍ଟ୍ରପତିଙ୍କ ଅନୁମୋଦନ ଲାଭ କରି ସରିଛି । କିନ୍ତୁ ଏହି ଆଇନ କୁ ରାଜ୍ୟ ମାନେ ଲାଗୁ କରିବାକୁ ନେଇ ଟାଳଟୁଳ ନୀତି ଅବଲମ୍ବନ କରୁଛନ୍ତି । ଏହାର ପରିଣତି କଣ ହେବ ଭବିଷ୍ୟତ କହିବ ।
କାରଗିଲ୍ ହିରୋର ବିଦାୟ
୧୯୯୯ ମସିହା କାରଗିଲ ଯୁଦ୍ଧରେ ପ୍ରମୁଖ ଭୂମିକା ଗ୍ରହଣ କରିଥିଲା ଭାରତୀୟ ବାୟୁସେନାର ଲଢ଼ୁଆ ବିମାନ ଏୟାରକ୍ରାଫ୍ଟ ମିଗ୍-୨୭। ଏହି ଲଢ଼ୁଆ ବିମାନ ‘ବାହାଦୂର’ ରାଜସ୍ଥାନ ଯୋଧପୁରରେ ଅନ୍ତିମ ଥର ପାଇଁ ଉଡ଼ାଣ ଭରି ଅବସର ଗ୍ରହଣ କରିଛି। ୧୯୮୫ ମସିହାରେ ଏହି ବିମାନ ଭାରତୀୟ ବାୟୁସେନାରେ ସାମିଲ୍ ହୋଇଥିଲା।
ଚଳିତ ବର୍ଷ ଚର୍ଚ୍ଚିତ ଘଟଣା ମଧ୍ୟରେ ରହିଛି ଭାରତୀୟ ବଂଶୋଦ୍ଭବ ଅଭିଜିତ୍ ଚାଟ୍ଟାର୍ଜୀଙ୍କୁ ଅର୍ଥନୀତିରେ ନୋବେଲ୍ ପୁରସ୍କାର ପ୍ରାପ୍ତ ତଥା ନୋବେଲ୍ ଆଓ୍ବାର୍ଡ ପ୍ରାପ୍ତ ଅବସରରେ ଭାରତୀୟ ପରିଧାନ ସ୍ବରୂପ ଧୋତି ଓ କୁର୍ତ୍ତାରେ ଏହି ସମ୍ମାନ ଗ୍ରହଣ କରି ଭାରତୀୟ ସଂସ୍କୃତିର ପରିଚୟ ଦେଇ ଚର୍ଚ୍ଚାରେ ରହିଛନ୍ତି। ସେହିପରି ଚଳିତ ଥର ଚର୍ଚ୍ଚାରେ ରହିଥିଲା ପିଆଜ। ପିଆଜ ଦର ଭାରତରେ ପ୍ରଥମ ଥର ପାଇଁ 150 ଟଙ୍କା ପ୍ରତି କିଲୋରେ ବିକ୍ରି ହୋଇ ରେକର୍ଡ ସୃଷ୍ଟି କରିଛି । ଏପର୍ଯ୍ୟନ୍ତ ମଧ୍ୟ ସରକାର ପିଆଜ ଦର ଉପରେ ନିୟନ୍ତ୍ରଣ ଆଣି ପାରିନାହାନ୍ତି।
ଘଟଣାବହୁଳ ବର୍ଷ ଭାବରେ 2019 ଆମଠୁ ବିଦାୟ ନେଉଛି। ନୂତନ ବର୍ଷକୁ ସ୍ବାଗତ ପାଇଁ ଚାରିଆଡେ ଚାଲିଛି ଉତ୍ସବର ମାହୋଲ୍ । ବର୍ଷର ଅନ୍ତିମ କ୍ଷଣରେ ଆମେ ଏତିକି ଆଶା କରିବା ଯେ, ଆଗାମୀ ବର୍ଷ ଭାରତ ବର୍ଷ ପାଇଁ ଶାନ୍ତିର ବର୍ଷ ହେଉ। ଅର୍ଥନୀତି କ୍ଷେତ୍ରରେ ଭାରତର ସ୍ଥିତି ସୁଦୃଢ ରହୁ । ସର୍ବୋପରି ଭାରତ ନିଜର ଅଖଣ୍ଡତା ଓ ଐକତା ଉପରେ ତିଷ୍ଠି ରହୁ ।