ସୀତାରାମ ଅଗ୍ରୱାଲ
ଚିଲିକା: ସମ୍ପ୍ରତି ଦେଶରେ ଚାଲିଛି ଆଇପିଏଲ କ୍ରେଜ। ଯୁବକଙ୍କୁ ଠୁ ନେଇ ବୃଦ୍ଧ ପର୍ଯ୍ୟନ୍ତ ସମସ୍ତେ ଆଇପିଏଲ ଦେଖିବା ପାଇଁ ମତୁଆଲା। ତେବେ କ୍ରୀଡା ପ୍ରେମୀଙ୍କ ମନକୁ ପ୍ରଫୁଲ୍ଲିତ କରିବା ଉଦ୍ଦେଶ୍ୟରେ ହୋଇଥିବା ବେଳେ ଖୋର୍ଦ୍ଧା ଜିଲ୍ଲା ବାଣପୁର ଓ ବାଲୁଗାଁ ଥାନା ଅଞ୍ଚଳରେ ଏହାର ଦୁରୁପଯୋଗ ଦେଖିବାକୁ ମିଳିଛି। ବର୍ତ୍ତମାନ ଆଇପିଏଲ ସଟ୍ଟା କବଜାରେ ହଜାର ହଜାର ଯୁବପିଢ଼ି। ଅଘୋଷିତ ଗ୍ରୁପ ଗଠନ କରି ଜୁଆରେ ଲଗାଉଛନ୍ତି ଲକ୍ଷ ଲକ୍ଷ ଟଙ୍କା।
ବାଣପୁର ବାଲୁଗାଁ ସହରାଞ୍ଚଳ ଏବଂ ଗ୍ରାମାଞ୍ଚଳରେ ଏହି ଜୁଆ କ୍ରେଜ ଜୋର ଧରିଛି। ସମସ୍ତେ ଜଣେ ଜଣେ ବୁକି ସାଜୁଛନ୍ତି। ଆଇପିଏଲ ପାଇଁ ୧୦୦ ଟଙ୍କା ଆରମ୍ଭ ହୋଇ ୧୦ ହଜାର ଟଙ୍କା ପର୍ଯ୍ୟନ୍ତ ସଟ୍ଟା ଲାଗେ। ତେବେ ଏହା ଦ୍ୱାରା ଯୁବପିଢ଼ି ବିପଥଗାମୀ ହେବା ସହ ଜୁଆ ନିଶାରେ ନିଜର ସର୍ବସ୍ବ ହରାଇ ବସୁଛନ୍ତି। କାହା ପାଇଁ ପୁଷମାସ ତ କାହାପାଇଁ ସର୍ବନାଶ ସାଜିଛି ଏହି ଆଇପିଏଲ ସଟ୍ଟା।
ମୋବାଇଲ କଲ ମାଧ୍ୟ୍ୟମରେ ଏମାନଙ୍କ କାରବାର ଚାଲେ। କୌଣସି ଏକ ଦଳର ଜିତିବା ଏବଂ ହାରିବା ଉପରେ ଏମାନେ ଲଗାଇଥାନ୍ତି ବାଜି। ଉକ୍ତ ଜୁଆର ବଶବର୍ତ୍ତୀ ହୋଇ ବହୁ ଯୁବକ ଦେବାଳିଆ ହୋଇ ପରିଶେଷରେ ଭିଟାମାଟି ଛାଡ଼ନ୍ତି ଏବଂ ଆଉ କେତେ ଆତ୍ମହତ୍ୟା କରନ୍ତି।
ତେବେ ବାଣପୁର ଓ ବାଲୁଗାଁ ପରି ଶିକ୍ଷିତ ସହରାଞ୍ଚଳରେ ଏପରି ଦୃଶ୍ୟ ବୁଦ୍ଧିଜୀବୀ ମାନଙ୍କୁ ବ୍ୟଥିତ କରୁଛି। ପୋଲିସ ତୁରନ୍ତ ଏହା ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରି ଏହାର ଚେରକୁ ମୁଳୋତ୍ପାଟନ କରୁ ବୋଲି ସାଧାରଣରେ ଦୃଢ଼ ଦାବି ହେଉଛି।
