ଭୁବନେଶ୍ବର: ବିଜେପି ସଭାପତି ମନମୋହନ ସାମଲଙ୍କ ନୂଆ ଟିମରେ ନୂଆ ନୂଆ କଥା ଦେଖିବାକୁ ମିଳିଛି। ଏହି ଟିମରେ ବରିଷ୍ଠ ନେତାମାନଙ୍କୁ ବାଦ ଦିଆଯାଇଥିବା ବେଳେ କେତେକ ଯୁବ ନେତାଙ୍କୁ ସାମିଲ କରାଯାଇଛି। ଏହି ତାଲିକାରେ ଧର୍ମେନ୍ଦ୍ର ପ୍ରଧାନଙ୍କ ଗୋଷ୍ଠୀକୁ ପ୍ରାଧାନ୍ୟ ଦିଆଯାଇଥିବା ବେଳେ ଅପରାଜିତା ଗୋଷ୍ଠୀଙ୍କୁ ମଧ୍ୟ ଅବହେଳା କରାଯାଇ ନାହିଁ। ଏକ ମିଳାମିଶା ତାଲିକା ପ୍ରକାଶ କରାଯାଇଛି।
ହେଲେ ଏହି ତାଲିକାରେ ସବୁଠାରୁ ଆଶ୍ଚର୍ଯ୍ୟ ଜନକ କଥା ହେଲା, ଯିଏ କେବେ କୌଣସି ରାଜନୈତିକ ଦଳରେ ସାମିଲ ନ ଥିଲେ ତାଙ୍କୁ ବିଜେପି ଡାକିଆଣି ଉପସଭାପତି କରିଛି। ସେ କେବେ ବିଜେପିର କାର୍ଯ୍ୟକ୍ରମରେ ଭାଗ ନେଇ ନାହାଁନ୍ତି କି ଦଳରେ ସାମିଲ ମଧ୍ୟ ହୋଇ ନାହାଁନ୍ତି। ହେଲେ ଆକସ୍ମିକ ଭାବେ ତାଙ୍କୁ ସିଧା ଦଳର ଉପସଭାପତି କରାଯାଇଛି। ଯାହାକୁ ନେଇ କେବଳ ବିଜେପି ନେତାଙ୍କ ମଧ୍ୟରେ ନୁହେଁ ପୁରା ଓଡିଶା ରାଜନୀତିରେ ଚର୍ଚ୍ଚା ଚାଲିଛି। ସେ ହେଲେ କଟକର ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ର।
ଅବଶ୍ୟ ଡାକ୍ତର ମହାପାତ୍ର ରୋଗୀ ସେବା କରିବାରେ ବେଶ ପରିଚିତ ଏବଂ ପ୍ରତିଷ୍ଠିତ ବ୍ୟକ୍ତି ଭାବେ ଜଣାଶୁଣା। ଜଣେ ମହିଳା ଓ ଶିଶୁ ବିଶେଷଜ୍ଞ ଡାକ୍ତର ଭାବେ ତାଙ୍କର ବେଶ ଖ୍ୟାତି ରହିଛି। ସେତିକି ନୁହେଁ ସେ ଜଣେ ଭଲ ମଣିଷ ଭାବରେ ମଧ୍ୟ ପରିଚିତ। ସେଥିପାଇଁ ରାଜ୍ୟ ସରକାର ତାଙ୍କୁ ଏସସିବି ମେଡିକାଲ କଲେଜର ଉପଦେଷ୍ଠା ଭାବେ ନିଯୁକ୍ତି ଦେଇଛନ୍ତି। ହେଲେ ସେ କେବେ କୌଣସି ରାଜନୈତିକ ମଞ୍ଚରେ ନିଜର ପାଦ ରଖି ନାହାଁନ୍ତି।
ତେବେ ଏ ନେଇ ଖୋଦ ଡାକ୍ତର ମହାପାତ୍ର ମଧ୍ୟ ଆଶ୍ଚର୍ଯ୍ୟ। ଏହା ତାଙ୍କ ପାଇଁ ଏକ ଅକସ୍ମିକ ଘଟଣା ବୋଲି ସେ କହିଛନ୍ତି। ଏହି ତାଲିକା ପ୍ରକାଶ ପରେ ସେ କହିଛନ୍ତି ଯେ, ମୋର ସଭାପତି ମନମୋହନବାବୁଙ୍କ ସହିତ ଭଲ ସଂପର୍କ ରହିଛି। ଏପରିକି ଜେ ପି ନଡ୍ଡାଙ୍କ ସହିତ ମଧ୍ୟ ସଂପର୍କ ରହିଛି। ହେଲେ ମୋତେ ଦଳରେ ସାମିଲ କଥା ଜଣା ନ ଥିଲା। ତାଲିକା ପ୍ରକାଶ ପରେ ସେ ଜାଣିଲେ ଯେ, ତାଙ୍କୁ ଦଳର ଉପସଭାପତି କରାଯାଇଛି।
ତେବେ ପୂର୍ଣ୍ଣଚନ୍ଦ୍ର କହିଛନ୍ତି ଯେ, ସେ କେବେ ରାଜନୀତିର ନ ଥିଲେ କି କୌଣସି ଦଳରେ ନ ଥିଲେ। ଗତଥର ତାଙ୍କୁ ଏକ ଦଳ ତରଫରୁ ଟିକେଟ ଯଚା ଯାଇଥିଲା, ହେଲେ ସେ ଏହାକୁ ପ୍ରତ୍ୟାଖାନ କରିଥିଲେ। ଏବେ ମଧ୍ୟ କୌଣସି ଦଳରେ ସାମିଲ ହେବାର ଆଗ୍ରହ ନ ଥିଲା। ତେବେ ବିଜେପି ମୋତେ ଉପସଭାପତି କରିଥିବାର ତାଲିକା ପ୍ରକାଶ ପରେ ଜାଣିଲି। ତେବେ ଏହାପରେ ଦଳ କଣ କରୁଛି, କି ପ୍ରକାରର ନିର୍ଦ୍ଦେଶ ଦେଉଛି ତାହାକୁ ଅପେକ୍ଷା କରିଛି ବୋଲି କହିଛନ୍ତି ଡାକ୍ତର ମହାପାତ୍ର।
ବିଜେପି ହେଉଛି ଏକ କ୍ୟାଡର ଭିତ୍ତିକ ଦଳ। ଏହି ଦଳର କାର୍ଯ୍ୟକର୍ତ୍ତାଙ୍କୁ ଯେତେବେଳେ ନିଯୁକ୍ତି ଦିଆଯାଏ ତା ପୂର୍ବରୁ ତାଙ୍କର ଇତିହାସ ପରଖା ଯାଏ। ସେ ଦଳରେ କେବେଠାରୁ ଅଛନ୍ତି, କିପରି କାମ କରୁଛନ୍ତି, ସଂଘ ସହିତ ଅଛନ୍ତି କି ନାହିଁ ଇତ୍ୟାଦି। ହେଲେ ସେ ସବୁ ନୀତି ନିୟମ ଡାକ୍ତର ମହାପାତ୍ରଙ୍କ କ୍ଷେତ୍ରରେ ଲାଗୁ କରାଯାଇ ନାହିଁ। ତାଙ୍କୁ ଦଳରେ ନ ମିଶାଇ ସିଧା ଉପସଭାପତି କରାଇବା ଓଡିଶା ରାଜନୀତିରେ ବେଶ ଚର୍ଚ୍ଚାର ବିଷୟ ପାଲଟିଛି।
ତେବେ ବିଜେପିର କେତେକ ନେତାଙ୍କ ଅନୁସାରେ ଡାକ୍ତର ମହାପାତ୍ରଙ୍କୁ କୁଆଡେ କଟକରୁ ଲୋକସଭା ପ୍ରାର୍ଥୀ କରିବା ପାଇଁ ଦଳ ନିଷ୍ପତି କରିଛି। ସେଥିପାଇଁ ଦଳର ଏକ ଗୁରୁତ୍ବପୂର୍ଣ୍ଣ ପଦବୀ ଦିଆଯାଇଛି। ପୂର୍ବରୁ ଆଇପିଏସ ପ୍ରକାଶ ମହାପାତ୍ର ଏହି ଆସନରୁ ଲଢେଇ କରିଥିଲେ। ହେଲେ ସେ ନିର୍ବାଚନ ପରେ ଆଉ ଲୋକ ସଂପର୍କରେ କିମ୍ବା ଦଳ ସଂପର୍କରେ ରହିଲେ ନାହିଁ। ଫଳରେ ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ରଙ୍କୁ ଦଳ ଆଗକୁ ଆଣିଛି।